Revistanchikta leeqkunam tapukunku

¿Protestante religionchu kanku Jehová Diospa testigonkuna?

Jehová Diospa testigonkunaqa manam protestante religionchu kanku. ¿Imanasqa? Qawasunchikyá.

Protestante religionqa 1500 watakunapim Europa lawpi rikurirurqa, Católico religionpa yachachisqankunapa contranpi. 1529 watapim Espira law asambleapi Martín Lutero runapa qatiqninkunata chayllaraq suticharqaku protestante nispanku. Chaymantapacham Martín Lutero runapa yachachisqanta qatikuq llapallan religionkunata chaynata suticharqaku. Achka librokunapa nisqanman hinaqa protestante religionkunaqa manam reqsikunkuchu católico papa imapipas kamachikuq kasqantaqa, aswanmi Biblialla chayna kasqanta reqsikunku. Chaymantapas, iñispalla salvacionta haypanankumanta hinaspa iñiqkuna sacerdote kanankumanta yachachisqankutapas qatikunkum.

Jehová Diospa testigonkunapas manam reqsikunkuchu católico papa imapipas kamachikuq kasqantaqa, aswanmi Bibliapa yachachisqankunata tukuy imapi kasukunku. Ichaqa protestante religionkunawanqa achka yachachikuykunapim mana tupanchu. Diccionario de religiones y creencias nisqanman hinaqa, Jehová Diospa testigonkunaqa “sapaqmi kanku”. Qawasunchik kimsa kaqkunapi mana tupasqanta.

Punta kaq: Jehová Diospa testigonkunaqa manam qatikunkuchu católico religionpa wakin yachachisqantaqa, protestante religionkunam ichaqa qatikunku. Paykunam yachachinku; alma mana wañuq kasqanta, infiernomanta hinaspa Diosqa hukllapi kimsa Dioskuna kasqantapas, Jehová Diospa testigonkunam ichaqa yachachinku chay yachachikuykunaqa Bibliapa hinaspa Diospa contranpi kasqanta (qaway kay revistapa 4-7 paginankunata).

Iskay kaq: Jehová Diospa testigonkunaqa manam religionkunapa yachachisqankumantaqa atipanakuyta munankuchu, aswanmi Bibliamanta cheqapta yachachiyta munanku. Kasukunkum Bibliapa kayna nisqanta: “Señor serviqqa manam peleollapichu purinan, aswanqa llapallanwanmi allinlla kanan, payqa kanan allin yachachikuqmi hinaspa mana sientikuqmi. Llampu sonqolla kaspanmi contranpi kaqkunatapas yachaykachinan” (2 Timoteo 2:24, 25). Arí, qawachinkumá Bibliapa yachachisqanwan religionkunapa yachachisqan mana tupasqanta, ichaqa manam religionkunata cambianankupaqchu chaytaqa ruranku. Aswanmi munanku llampu sonqoyoq runakuna Bibliamantawan Diosmanta cheqapta yachanankuta (Colosenses 1:9, 10). Chaymi runakunawanqa mana atipanakunkuchu (2 Timoteo 2:23).

Kimsa kaq: Protestante religionqa achkallaña iglesiakunamanmi rakikurun, Jehová Diospa testigonkunam ichaqa mana rakinakuspanku 230 masnin nacionkunapi kachkanku. Bibliamanta yachasqankupipas apostol Pablota kasukuspankum ‘hukllata piensanku’. Paykunapuraqa manam ‘rakinasqachu kanku’, aswanmi ‘huk sonqolla hinaspa huk piensamientoyoqlla’ kanku (1 Corintios 1:10). Llapallankum kallpanchakunku “chulla sonqolla” hinaspa ‘tukuy tiempopi hawkalla kawsanankupaq’ (Efesios 4:3).