Kay revista leeqkunaq tapukuynin

¿Jehová Diospa testigonkuna protestante religionchu kanku?

Jehová Diospa testigonkunaqa manan protestante religionchu kanku. Qatiqninpi yachasun chaymanta.

1517 watamantapachan Europa nacionkunapi protestante religionqa rikhurimurqan Cátolica Iglesiata correginanpaq. 1529 watapi Dieta de Espira nisqa huñunakuypin protestante nispa suticharqanku Martín Luteroq qatikuqninkunata. Chaymantapachan chay religionkunata “protestante” sutiwan reqsikun. Askha librokunapin ninku: “Chay protestante iglesiakunaqa manan Papa nisqa runata kasupunkuñachu, aswanpas Bibliaq nisqallantan kasukunku. Paykunaq nisqan hina, runaqa salvasqa kanqa iñisqanraykullas, llapa iñiqkunataqsi sacerdote kanku”, nispa.

Jehová Diospa testigonkunapas manan papa nisqa runata kamachiqninku hinatachu qhawarinku, Bibliaq nisqallantataq kasukunkupas. Ichaqa manan protestante religionkuna hinachu kanku. Diccionario de religiones y creencias nisqanman hina, Testigokunaqa “hukniraypunin” kanku protestantekunamantaqa. Hukniray kasqankumanta yachasunchis.

Protestante religionkunaqa Católica religionkuna hinan iñinku Trinidad nisqapi, infiernopi, “almaqa manan wañunchu” nisqa yachachikuypipas. Jehová Diospa testigonkunan ichaqa mana chaykunapi iñinkuchu, aswanmi ninku: “Chay yachachikuykunaqa Bibliaq contranpin kashan, mana allinpaqtaq Diostapas qhawarichin”, nispa (qhawariy kay revistapi 4 paginamanta 7 paginakama).

Hinaspapas Testigokunaqa manan religionkunaq yachachisqan contrachu sayarinku otaq protestanku, aswanpas Bibliaq yachachiyninkunatan yachachinku, chayllatan munanku. Biblian nin: “Señorpa kamachinqa manan ch’aqwaykunapichu purinan, aswanmi llapapaq munakuyniyoq kanan, yachachinanpaqpas kusan kanan, pacienciayoqtaq kananpas kutipakuqkunata llamp’u sonqowan anyananpaq”, nispa, chaytan Testigokunaqa kasukunku (2 Timoteo 2:24, 25). Chhaynaña kaqtinpas Bibliawanmi allinta rikuchinku imapichus religionkunaq pantasqanta. Chaytaqa ruwanku manan chay religionkunata cambiachinankupaqchu, aswanpas llamp’u sonqo runakuna Diosmanta Bibliamantawan yachanankuta munaspan chayta ruwanku (Colosenses 1:9, 10). Chayraykun paykunaqa mana ch’aqwaymanchu chapukunku (2 Timoteo 2:23).

Chaymantapas protestante religionkunaqa askha t’aqakunamanmi t’aqarqokunku, Testigokunan ichaqa huk familia hina 230 nacionkunapiraq huk-nisqalla kawsashanku. Chaymantapas Testigokunaqa Bibliaq nisqanman hinallan yachachinku, chhaynapitaqmi kasukunku: ‘Llapallaykichis ch’ulla yuyaylla kaychis’, nispa apóstol Pabloq nisqanta. Arí, paykunaqa ‘huk-nisqalla, huk yuyaynillayoq, huk sonqollayoqmi kawsanku’ (1 Corintios 1:10). Llapallankutaq ‘santo espirituq kallpachasqan huk sonqolla kawsanku, hukkuna hukkunawan thak-kayta maskhaspa’ (Efesios 4:3).