Lee-naʼin nia pergunta

Testemuña ba Jeová mak relijiaun Protestante ka lae?

Testemuña ba Jeová la hanoin sira-nia an nuʼudar relijiaun Protestante. Tanbasá?

Relijiaun Protestante mosu besik tinan atus lima liubá iha Europa tanba ema hakarak halo reforma, ka mudansa iha Igreja Katólika Romana. Liafuan “Protestante” uza ba dala primeiru iha tinan 1529 atu hanaran ba ema neʼebé tuir Martin Luther kuandu sira halo enkontru boot ida iha sidade Speyer, iha rai-Alemaña. Husi tempu neʼebá, liafuan neʼe hanaran ba ema neʼebé kaer metin ba doutrina “Reforma Protestante” nian. Livru ida naran Merriam-Websterʼs Collegiate Dictionary, edisaun 11, hatete katak ema Protestante mak “ema ida husi relijiaun neʼebé lakohi simu Papa nia ukun, no neʼebé simu doutrina Reforma Protestante nian neʼebé dehan katak atu Maromak simu ema, sira presiza iha fiar deʼit, no katak fiar-naʼin hotu mak amlulik, no katak Bíblia deʼit mak hun ba lia-loos.”

Maski Testemuña ba Jeová mós la simu papa nia ukun no simu Bíblia ho laran tomak, maibé sira la hanesan ho relijiaun Protestante iha dalan barak. Tuir loloos, livru The Encyclopedia of Religion hatete katak Testemuña ba Jeová “la hanesan” ho relijiaun sira seluk. Haree toʼok dalan tolu neʼebé sira la hanesan.

Primeiru, maski relijiaun Protestante la simu buat balu husi adorasaun Katólika, ulun-naʼin husi Reforma Protestante simu nafatin doutrina balu seluk husi relijiaun Katólika, hanesan Trindade, infernu, no katak ema iha klamar neʼebé la mate. Maibé, Testemuña ba Jeová fiar katak doutrina sira-neʼe kontra buat neʼebé Bíblia hanorin no halo ema iha hanoin neʼebé laloos kona-ba Maromak.

Segundu, relijiaun Testemuña ba Jeová la halo protestu hasoru relijiaun seluk, maibé sira-nia hakarak mak atu hanorin buat diʼak husi Bíblia. Sira tuir konsellu iha Bíblia neʼebé hatete: “Naʼi nia atan la istori malu, maibé nia laran-kmaus ba ema hotu-hotu, mestre diʼak ida, ho pasiénsia barak. Nia sei laran-kmaus wainhira nia korrije ema neʼebé la fiar buat neʼebé nia hateten.” (2 Timoteo 2:24, 25) Maski Testemuña ba Jeová hatudu sai relijiaun seluk nia hanorin neʼebé la hanesan ho buat neʼebé Bíblia hanorin, maibé sira-nia hakarak laʼós atu halo reforma, ka mudansa ruma iha relijiaun seluk. Tuir loloos, sira-nia hakarak mak atu ajuda ema hatene loloos kona-ba Maromak no ninia Liafuan, Bíblia. (Koloso 1:9, 10) Kuandu ema husi relijiaun seluk la hanoin hanesan ho Testemuña ba Jeová, sira hadook an husi haksesuk malu.—2 Timoteo 2:23.

Terseiru, maski relijiaun Protestante haketak an atu harii relijiaun foun atus ba atus, maibé Testemuña ba Jeová la hanesan neʼe, sira nafatin iha unidade iha mundu tomak. Testemuña ba Jeová iha nasaun 230 liu halo tuir apóstolu Paulo nia konsellu atu koʼalia ho “neon ida deʼit” kona-ba doutrina husi Bíblia. Sira la haketak malu, maibé sira iha unidade loloos “ho hanoin ida deʼit no laran ida deʼit”. (1 Korinto 1:10) Testemuña ba Jeová hakaʼas an hamutuk atu halo tuir konsellu husi Bíblia neʼebé hatete: “Halo buat hotu-hotu atu imi bele sai laran ida deʼit iha espíritu, husi dame neʼebé halibur imi hamutuk.”—Efeso 4:3.