Pe Manaʻomia Ona e Aʻoaʻoina le Gagana Eperu ma le Eleni?

O LE tele o vaega o le Tusi Paia sa muaʻi tusia i gagana e lua, le gagana Eperu ma le Eleni. * Na faia faapea e tusitala na faaaogāina na gagana, e ala i le taʻitaʻiga a le agaga paia o le Atua. (2 Samuelu 23:2) O lea la, o le feʻau na latou tusiaina e mafai ona faamatalaina “e mai le agaga o le Atua.”—2 Timoteo 3:16, 17.

Ae peitaʻi, o le toʻatele lava o tagata o loo faitauina le Tusi Paia i aso nei, e lē malamalama i le gagana Eperu ma le Eleni. O lea, e manaʻomia ona latou faaaogā se faaliliuga o le Tusi Paia i la latou lava gagana. Atonu o le mea foʻi lenā o loo manaʻomia ona e faia. Atonu e te taumānatu, ona o nei faaliliuga e lē faagaeeina, ʻPe mafai ona ou malamalama atoatoa i le feʻau o le Tusi Paia pe a ou faaaogāina se faaliliuga, pe e ao ona ou taumafai e aʻoaʻoina le gagana Eperu ma le Eleni?’

O Vala ia Manatua

A o leʻi taliina lenā fesili, e iai ni vala e ao ona e manatua. Muamua, e lē faapea a e malamalama i le gagana Eperu po o le gagana Eleni anamua, ona faavavega ai lea ona matuā malamalama se tasi i le feʻau o le Tusi Paia. Na fetalai Iesu e faatatau i tagata e tautatala i le gagana Iutaia i ona aso, e faapea: “Ua outou saʻili i Tusitusiga Paia, auā ua outou manatu o le auala lenā tou te maua ai le ola e faavavau; ma o mea na o loo molimau iā te aʻu. A ua outou lē fia ō mai iā te aʻu ina ia outou maua ai le ola.” (Ioane 5:39, 40) O le ā lo latou faafitauli? Pe ona o le lē malamalama i le gagana Eperu? E leai, sa latou iloa lelei le gagana. Ae peitaʻi, na fetalai atili Iesu: “Ua ou iloa lelei tou te lē alolofa i le Atua.”—Ioane 5:42.

I se tulaga tutusa, na taʻu atu e le aposetolo o Paulo i Kerisiano e tautatala i le gagana Eleni, i le aai o Korinito e faapea: “Na fia vāai tagata Iutaia i ni faailoga, ae na saʻili e tagata Eleni le poto; a ua avea lo tatou talaʻia o Keriso na tutuʻi i luga o le laau, ma mea ua tautevateva ai tagata Iutaia, ae o se mea valea lea i tagata o nuu ese.” (1 Korinito 1:22, 23) E manino mai la, e lē o le tautala i le gagana Eperu po o le Eleni, o le ki lea e taliaina ai le feʻau o loo i le Afioga a le Atua.

O le vala lona lua ia manatua, e ui lava o nisi tagata i aso nei e  tautatala i le gagana Eperu po o le Eleni faaonapōnei, ae o nei gagana e matuā ese lava mai le gagana Eperu ma le Eleni lea na faaaogā e tusia ai le Tusi Paia. O le toʻatele o tagata i aso nei e tautatala i le gagana Eleni, o se luʻi le taumafai ia malamalama i le Tusi Paia i le gagana Eleni. E māfua ona ua iai upu fou ua faaopoopo i le gagana, ua suia ai faaupuga tuai, ma o le tele o upu na iai seʻia oo mai i le taimi nei e eseese o latou uiga. O se faaaʻoaʻoga, o le upu ua faaliliuina “aulelei” i le Galuega 7:20 ma le Eperu 11:23, o lona uiga i le gagana Eleni i aso nei o le “mālie.” E lē gata i lea, e tele suiga ua iai i le kalama ma le faatulagaina saʻo o upu o le gagana.

E tusa lava foʻi pe e te aʻoaʻoina le gagana Eperu po o le Eleni i aso nei, e lē uiga ai faapea o le a e matuā malamalama lelei ai i le Tusi Paia i uluaʻi gagana na tusia ai. E manaʻomia pea ona e faalagolago atu i lomifefiloi ma tusi kalama ina ia faailoa mai ai iā te oe, le auala na faaaogā ai nei gagana ina ua muaʻi tusia tusi o le Tusi Paia.

O le vala lona tolu, o le aʻoaʻoina o se gagana fou o se mea e matuā faigatā tele. E ui lava atonu i le taimi muamua e foliga mai e faigofie ona aʻoaʻo ni nai faaupuga i se isi gagana, ae e faitau tausaga o fai ni taumafaiga faifai pea a o e leʻi malamalama i ni nai eseesega o le faaleoga o upu, ma uiga o upu e iloagatā o lenā gagana. I le taimi e tasi, atonu e saʻo ai se tasi o muagagana, O le itiiti o le iloa o le mataʻutia lenā. E faapefea?

O le ā le Uiga o le Upu?

Po ua fesili atu iā te oe se tasi o loo aʻoaʻoina lau gagana, e faatatau i le uiga o se upu? Afai o lea, e te iloa e lē faigofie i taimi uma ona avatu se tali. Aiseā? Auā atonu e tele ni uiga o se upu. E te ono fesili atu i le tagata e taʻu mai se faataʻitaʻiga o le upu i se fuaiupu. A leai lenā manatu, o le a faigatā iā te oe ona iloa po o lē fea uiga o loo faatatau i ai le upu. O se faataʻitaʻiga, e te ono fesili atu po o le ā le uiga o le upu faa-Peretania “iron.” O lenei upu e eseese ona uiga i tulaga eseese. E mafai ona uiga atu i se ituaiga o uʻamea, se auli, po o se pate tā polo. I nisi tulaga, e mafai ona faasino atu i filifili e loka ai pagota, po o se mea e sui ai se meaʻai e manaʻomia i le tino. Pe a faamatalaina se gaoioiga, e ono uiga atu i le faamafolafola o lavalava i se auli. Pe a faaaogā i le faa-Peretania le faaupuga “iron out,” e matuā ese la lona uiga, e uiga atu i le foʻia o se faafitauli. O lē fea uiga e saʻo?

E ono taʻu mai e se lomifefiloi iā te oe uiga uma o se upu. O nisi lomifefiloi e lisi mai i se faasologa e tele ina faaaogā ai. Ae o le tulaga lea o loo faaaogā ai le upu, o le a fesoasoani iā te oe e iloa ai le uiga tonu o le upu. O se faataʻitaʻiga: Seʻi faapea e iai sina ou tomai faafomaʻi ma ua e manaʻo e suʻe le māfuaaga o ni āuga patino ua e aafia ai. E mafai ona e saʻili i se lomifefiloi o mea tau faafomaʻi. E ono taʻu mai iā te oe e faapea, i le 90 pasene o āuga o loo iā te oe, e tasi le mea o loo uiga atu i ai, ae i le 10 pasene ua latou faailoa mai ai se isi mea e matuā ese lava. E manaʻomia ona e malamalama atili a o e leʻi faia se faaiʻuga i le maʻi tonu o loo e maua ai. I se tulaga tutusa, o le 90 pasene o taimi e faaaogā ai se upu, e mafai ona tasi le mea e uiga atu i ai, ae e lē fesoasoani lenā iā te oe pe afai o e faitauina se mau tāua, ae o loo faaaogā ai le uiga lona lua o lenā upu. E manaʻomia ona e malamalama atili e faatatau i le siʻomaga o le mau a o e leʻi malamalama i le upu.

Pe a suʻesuʻeina le uiga o upu o loo i le Tusi Paia, e manaʻomia foʻi ona e iloa mau o loo siʻomia ai le upu o loo faaaogā. O se faataʻitaʻiga, o uluaʻi upu e masani ona faaliliuina i le “agaga,” e mafai ona eseese uiga, e fua lava i le tulaga o loo faaaogā ai na upu. O nisi taimi, e mafai ona faaliliu saʻo lava i le “matagi.” (Esoto 10:13; Ioane 3:8) I isi tulaga e faasino atu i le malosi o le ola o loo i totonu o foafoaga ola uma, o tagata atoa ma meaola.  (Kenese 7:22; Salamo 104:29; Iakopo 2:26) E faamatalaina foʻi foafoaga ola lē vaaia i le lagi, o agaga. (1 Tupu 22:21, 22; Mataio 8:16) E taʻu le malosi galue o le Atua o lona agaga paia. (Kenese 1:2; Mataio 12:28) O le upu lava foʻi lenā e faaaogā e faamatala ai le uunaʻiga lea e faapogaia ai se tagata e faaalia se uiga patino, po o faalogona, faapea ma uiga faalemafaufau e faaalia e se vaega o tagata.—Iosua 2:11; Kalatia 6:18.

E ui lava atonu e lisi mai e se lomifefiloi faa-Eperu pe faa-Eleni nei uiga eseese, ae o le siʻomaga o le mau o le a fesoasoani iā te oe e iloa ai po o lē fea uiga e talafeagai. * E moni lenei tulaga e tusa lava po o e faitauina le Tusi Paia i uluaʻi gagana na tusia ai, po o e faaaogāina foʻi se faaliliuga i lau lava gagana.

Pe e Sesē Ona Faaaogā se Faaliliuga?

O nisi ua fai ni taumafaiga malosi e aʻoaʻoina le gagana Eperu po o le Eleni o loo faaaogā i le Tusi Paia, pe aʻo uma foʻi le lua. E tusa lava foʻi pe latou te iloa le mea e gata mai ai lo latou iloa, ae e latou te fiafia ona ua mafai ona faitau le Tusi Paia i uluaʻi gagana na tusia ai, ma latou lagona e tāua taumafaiga uma. Peitaʻi, pe afai e lē o mafai ona e faia lenā tulaga, pe e tatau ona e lotovaivai ma fiu i au saʻiliʻiliga mo upu moni o le Tusi Paia? E leai! E iai nisi o māfuaaga mo lenei manatu.

Muamua, e talafeagai ona faaaogā se faaliliuga o le Tusi Paia. O le mea moni, o tusitala o Tusitusiga Kerisiano Eleni, po o le Feagaiga Fou, sa masani ona latou faaaogā se faaliliuga faa-Eleni pe a sii mai se mau mai Tusitusiga Eperu. * (Salamo 40:6; Eperu 10:5, 6) E ui lava na latou tautatala i le gagana Eperu pe sii  mai manatu mai uluaʻi Tusitusiga Eperu, ae e mautinoa sa sili atu ona faigofie iā i latou ona faaaogā se faaliliuga o na fuaiupu sa tele ina maua e tagata ia na tusi atu i ai.—Kenese 12:3; Kalatia 3:8.

Lua, e tusa lava foʻi pe malamalama se tagata i gagana na uluaʻi tusia ai le Tusi Paia, ae e faatoʻā mafai ona ia faitauina pe afai ua uma ona faaliliuina. E māfua ona na tusia e tusitala o Evagelia i le gagana Eleni, fetalaiga a Iesu na muaʻi fetalai ai i le gagana Eperu. * E so o se tasi e manatu e mafai ona faitauina upu a auauna faamaoni anamua a Ieova i a latou uluaʻi gagana, e ao ona tuuina atu i ai se ituaiga atamai faapitoa ina ia iloa ai po o le ā e faatatau i ai na upu. O le mea moni, o Ieova na faagaeeina le faasaoina o fetalaiga a lana Auauna silisili i se faaliliuga—i se gagana e malamalama uma ai le toʻatele i lenā taimi—ua faaalia ai, e lē tāua le gagana o loo tatou faitauina ai le Tusi Paia. O le itu e tāua, o lo tatou faitauina lea o le feʻau faagaeeina o le Tusi Paia i se auala e mafai ona tatou malamalama ma tali atu ai.

Tolu, o le “tala lelei” lea o loo i le Tusi Paia, e ao ona iloa e tagata lotomaulalo o “nuu uma, ma ituaiga uma, ma gagana uma, ma tagata uma.” (Faaaliga 14:6; Luka 10:21; 1 Korinito 1:27-29) I le ōgatusa ai ma lenei manaʻoga, o le toʻatele o tagata i aso nei e mafai ona aʻoaʻoina fuafuaga a le Atua, mai i se kopi o le Tusi Paia i la latou lava gagana, e aunoa ma le tau aʻoaʻoina o se isi gagana. I le tele o gagana, o loo maua ai le tele o faaliliuga eseese, ma e filifili lava le tagata faitau i le gagana e faitau ai. *

E faapefea la ona e faamautinoa o loo e malamalama i le upu moni o i le Tusi Paia? Ua iloa e Molimau a Ieova, o le faia o se suʻesuʻega faale-Tusi Paia ma le iloiloina o faamatalaga o loo siʻomia ai, o se auala tāua tele e malamalama ai i le feʻau o loo i le Afioga a le Atua. O se faataʻitaʻiga, e latou te faaaogā se mataupu patino, e pei o le “Faaipoipoga,” ma suʻe mau o loo faasino atu i lenā mataupu. O lenā auala, e latou te tuu atu ai i le isi vaega o le Tusi Paia e faamatala mai le uiga o le isi vaega o le Tusi Paia. Aiseā e lē faaaogā lelei ai le auala lea o loo ofo atu e Molimau a Ieova i tagata uma, o le faia o talanoaga faale-Tusi Paia i aiga e aunoa ma se totogi? E tusa lava po o le ā le gagana e te tautala ai, o le finagalo o le Atua “ia faaolaina ituaiga uma o tagata, ma ia oo ina iloa lelei le upu moni.”—1 Timoteo 2:4; Faaaliga 7:9.

[Faaopoopoga i lalo]

[Pusa/Ata i le itulau 22]

Le Septuagint

O tagata Iutaia e tautatala i le gagana Eleni i le taimi o Iesu ma ona aposetolo, sa tele ina latou faaaogāina le Septuagint. O le faaliliuga lenei o Tusitusiga Paia Eperu i le gagana Eleni. E mataʻina le Septuagint ona e lē gata o le uluaʻi taumafaiga lea e faaliliu le Tusi Paia i se isi gagana, ae e mataʻina foʻi ona o le telē o le galuega faaliliu na faia ai. Na amata le galuega a le ʻaufaaliliu o le Septuagint i le senituri lona tolu T.L.M., ma faamāeʻa e isi i le silia i le selau tausaga mulimuli ane ai.

Sa vave ona faaaogā lelei e uluaʻi Kerisiano le Septuagint ina ia faamaonia ai o Iesu o le Keriso, le Mesia folafolaina. O le lelei tele na iʻu ai ina manatu nisi tagata i le Septuagint o se faaliliuga a tagata “Kerisiano.” O lenā tulaga na lē toe tāua tele ai le Septuagint i tagata Iutaia, ma iʻu ai ina faia isi faaliliuga fou i le gagana Eleni. O se tasi o na faaliliuga sa faia e se tagata na liliu i le faa-Iutaia, e igoa iā Akula, i le senituri lona lua T.A. Pe a faamatala lenei faaliliuga, e faasino atu e se tasi o tagata atamai o le Tusi Paia, o se “tulaga e leʻi faatalitalia.” O loo iai le suafa o le Atua, o Ieova, i mataʻitusi faa-Eperu, i le faaliliuga atoa a Akula i le gagana Eleni.

[Ē Ana le Ata]

Israel Antiquities Authority

[Ata i le itulau 23]

O le itu tāua, o lo tatou faitauina lea o le feʻau faagaeeina o le Tusi Paia i se auala e mafai ona tatou malamalama ma tali atu ai