Ou letid Labib pou ed ou amelyor ou lapriyer
Ou letid Labib pou ed ou amelyor ou lapriyer
“O Zeova, silvouple, les ou zorey port latansyon avek lapriyer ou serviter.”—NEE. 1:11.
1, 2. Akoz i pou anmenn byenfe si ou egzamin serten lapriyer ki’n ganny rikorde dan Labib?
LAPRIYER ek letid Labib i de laspe enportan an rapor avek vre ladorasyon. (1 Tesa. 5:17; 2 Tim. 3:16, 17) Byensir, Labib pa en liv lapriyer. Me, dan Labib i annan plizyer lapriyer e bokou parmi i dan liv Psonm.
2 Anmezir ou lir e etidye Labib, i tre probab ou pou vwar bann lapriyer ki adapte avek bann sityasyon ki ou rankontre. Anfet, ler ou servi sa bann panse ki dan sa bann lapriyer ki’n ganny rikorde dan Lekritir, sa i kapab amelyor kalite ou lapriyer. Ki ou kapab aprann avek bann dimoun ki zot demann pour led ti ganny reponn ek sa ki i ti annan dan zot lapriyer?
Rode e swiv gidans Bondye
3, 4. Ki misyon serviter Abraam ti gannyen e ki nou kapab aprann avek lafason ki Zeova ti reponn son lapriyer?
3 Atraver letid Labib ou kapab aprann ki ou devret touzour priye pour ganny gidans Bondye. Egzamin sa ki ti arive kan patrias Abraam ti anvoy son pli vye serviter, ki tre probab ti Eliezer, Mezopotami, pour rod en madanm ki annan lakrent pour Bondye pour Izaak. O firamezir ki bann madanm ti tir delo dan en serten pwi, sa serviter ti priye: “Zeova . . . , la sa ki devret arive: sa zenn madanm avek ki mon pou dir: ‘Met ou potao ater silvouple pour ki mon kapab bwar’ e ki pou dir: ‘Bwar e mon pou osi donn delo ou bann samo,’ sanmenm sa enn ki ou devret donn mon serviter Izaak; e atraver sa, fer mwan konnen ki ou’n demontre lanmour fidel anver mon met.”—Zen. 24:12-14.
4 Lapriyer serviter Abraam ti ganny reponn kan Rebeka ti donn delo son bann samo. Pli tar Rebeka ti al avek li Kanaan e vin madanm Izaak, ki i ti kontan en kantite. Byensir, ou pa kapab ekspekte ki Bondye pou fer en serten siny spesyal pour ou. Par kont, si ou priye e determinen pour les son lespri gid ou, i pou donn ou son gidans dan ou lavi.—Gal. 5:18.
Lapriyer i ede redwir lenkyetid
5, 6. Kwa ki enportan pour note dan lapriyer Zakob kan i ti pros pour zwenn Ezai?
5 Lapriyer i kapab redwir lenkyetid. Akoz lafreyer ki i ti annan pour son frer zimo Ezai, Zakob ti priye: “Ar, Zeova . . . mon pa merite ganny tou sa labonte leker ek fidelite ki ou’n demontre anver ou serviter . . . Mon priy ou, delivre mwan dan lanmen mon frer Ezai akoz mon per li, ki i kapab vini e sirman atak mwan, manman ansanm avek zanfan. E ou ou’n dir: ‘Mon pou vreman azir an byen avek ou e mon pou fer ou desandans vin parey gren disab dan lanmer ki pa kapab ganny konte akoz pou annan bokou zot.’”—Zen. 32:9-12.
6 Menm si Zakob ti pran bann mezir prekosyon, son lapriyer ti ganny reponn kan zot ti rekonsilye zot de Ezai. (Zen. 33:1-4) Lir sa demann atantivman e ou pou vwar ki Zakob pa ti zis sipliye pour ganny led. I ti demontre lafwa dan sa Desandans ki ti’n ganny promet e osi lapresyasyon pour labonte leker Bondye. Eski ou annan serten ‘lafreyer dan ou leker’? (2 Kor. 7:5) Si wi, siplikasyon Zakob i kapab fer ou rapel ki lapriyer i kapab redwir lenkyetid. Par kont, nou lapriyer pa devret enkli zis bann demann, me i bezwen osi demontre lafwa.
Priye pour ganny lasazes
7. Akoz Moiz ti priye pour ganny konnesans lo semen Zeova?
7 Sa dezir pour fer plezir Zeova i devret motiv ou pour priye pour ganny lasazes. Moiz ti priye pour ganny konnesans lo semen Bondye. I ti sipliye: “Gete, [Zeova] ou pe dir mwan: ‘Fer monte sa pep [sorti Lezip]’ . . . Aprezan, silvouple, si mon’n trouv faver devan ou lizye, fer mwan konn ou bann semen silvouple, . . . afen ki mon kapab trouv faver dan ou lizye.” (Egz. 33:12, 13) Pour reponn li, Bondye ti donn Moiz en pli gran konnesans lo Son semen, sa ti neseser si i ti pou diriz pep Zeova.
8. Ki byenfe ou kapab gannyen si ou medit lo 1 Lerwa 3:7-14?
8 David osi ti priye: “Fer mwan konn ou bann semen, O Zeova.” (Ps. 25:4) Salomon, garson David ti priy Bondye pour ganny lasazes ki ti neseser pour li desarz son responsabilite konman lerwa Izrael. Lapriyer Salomon ti fer plezir Zeova e apard sa ki i ti’n demande, Zeova ti donn li larises ek laglwar osi. (Lir 1 Lerwa 3:7-14.) Si ou ganny serten privilez dan servis ki kapab paret tro bokou pour ou, priye pour ganny lasazes e demontre limilite. Apre sa, Bondye pou ed ou ganny sa konnesans e ed ou demontre sa lasazes ki neseser pour desarz ou bann responsabilite dan en bon fason e avek lanmour.
Lapriyer ki sorti dan leker
9, 10. Ki ou vwar enteresan dan lafason ki Salomon ti refer avek leker dan son lapriyer pour inogirasyon tanp?
9 Lapriyer i devret sorti dan leker pour li ganny ekoute. Dan 1 Lerwa sapit 8 nou vwar lapriyer senser ki Salomon ti fer devan en gran lafoul ki ti’n rasanble pour inogirasyon tanp Zeova Zerizalenm lannen 1026 A.N.L. Apre ki lars lalyans ti ganny mete dan Tre Sen e nyaz Zeova ti ranpli tanp, Salomon ti loue Bondye.
10 Etidye lapriyer Salomon e remarke konman i ti refer avek leker. Salomon ti rekonnet ki zis Zeova tousel ki konn leker en dimoun. (1 Rwa. 8:38, 39) Sa menm lapriyer i montre ki i annan lespwar pour en peser ki ‘retourn kot Bondye avek tou son leker.’ Si en lennmi ti tyonbo pep Bondye, zot siplikasyon ti pou ganny tande si zot leker ti konplet anver Zeova. (1 Rwa. 8:48, 58, 61) I kler alor ki ou lapriyer i devret sorti dan ou leker.
Bann Psonm i kapab amelyor ou lapriyer
11, 12. Ki ou’n aprann atraver lapriyer en Levit ki pa ti kapab al kot sanktyer Bondye pour en serten letan?
11 Si ou etidye bann Psonm, sa i kapab ed ou amelyor ou lapriyer e ed ou espere pour Bondye reponn zot. Egzamin pasyans ki en Levit an egzil ti annan. Menm si i pa ti kapab al kot sanktyer Zeova pour en serten letan, i ti sante: “Akoz ou dan dezespwar, O mon leker. Akoz ou azite dan mwan? Esper Bondye akoz mon pou loue li ankor konman mon sover ek Bondye.”—Ps. 42:5, 11; 43:5.
12 Ki ou kapab aprann avek sa Levit? Si i arive ki ou ganny anprizonnen pour ladrwatir e sa i anpes ou zwenn ansanm avek lezot krwayan dan landrwa ladorasyon pour en serten letan, avek pasyans esper Bondye pour azir. (Ps. 37:5) Medit lo lazwa ki ou’n eksperyanse dan lepase e priye pour annan landirans anmezir ou “esper Bondye” ziska ki i ava posib pour ou asosye ankor avek son pep.
Priy avek lafwa
13. An armoni avek Zak 1:5-8, akoz ou devret priy avek lafwa?
13 Nenport ki sityasyon ou ladan, touzour priy avek lafwa. Si ou lentegrite pe ganny teste, swiv konsey disip Zak. Apros Zeova dan lapriyer san annan okenn dout ki i pou donn ou sa lasazes ki ou bezwen pour andir ou leprev. (Lir Zak 1:5-8.) Bondye i konn tou bann panse ki fatig ou e i kapab gid e rekonfort ou atraver son lespri sen. Avek lafwa, devid ou leker avek li “san doute” e aksepte gidans ki son lespri sen i donnen ek konsey sorti dan son Parol.
14, 15. Akoz i kapab ganny dir ki Ana ti priye e azir avek lafwa?
14 Ana, enn parmi sa de madanm en Levit ki ti apel Elkana, ti priye e azir avek lafwa. Ana ki ti napa zanfan ti ganny sikannen avek Penina, sa lot madanm Elkana, ki ti annan plizyer zanfan. Ana ti fer en ve kot tabernak. I ti dir ki si i ganny en zanfan, i pou donn Zeova sa zanfan. Lefet ki son lalev ti pe tranble anmezir i ti priye, Gran Pret Eli ti krwar i ti sou. Apre ki i ti aprann ki sa pa ti leka, Eli ti dir: “Ki Bondye Izrael i fer sa ki ou’n demann li.” Menm si Ana pa ti konnen ki ti pou arive egzakteman, i ti annan lafwa ki son lapriyer ti pou ganny reponn. Alor “i ti nepli enkyet.” I ti nepli sagren ouswa deprimen.—1 Sam. 1:9-18.
15 Apre ki Samyel ti’n ne e ganny sevre, Ana ti prezant li avek Zeova pour servis sakre dan tabernak. (1 Sam. 1:19-28) Si ou pran letan pour medit lo lapriyer ki Ana ti fer sa zour, sa i kapab ed ou pour amelyor ou lapriyer e ed ou pour vwar ki menm si ou dan sagren akoz en problenm, ou pou kapab sirmont li, si ou priy avek lafwa ki Zeova pou reponn ou.—1 Sam. 2:1-10.
16, 17. Ki ti arive lefet ki Neemya ti priye e azir avek lafwa?
16 Neemya sa zonm drwat dan senkyenm syek A.N.L. ti priye e azir avek lafwa. I ti sipliye: “O Zeova, silvouple, les ou zorey port latansyon avek lapriyer ou serviter ki pran plezir pour annan lakrent pour ou non; e silvouple permet ou serviter reisi ozordi e fer sa zonm pran pitye pour li.” Lekel “sa zonm”? I ti lerwa Pers, Artakzerses, ki Neemya ti servi li diven.—Nee. 1:11.
17 Pour plizyer zour Neemya ti priy avek lafwa apre ki i ti’n aprann ki bann Zwif ki ti’n ganny large par bann Babilonnyen ki avan sa ti’n kaptir zot, ti “dan difikilte ek repros; e miray Zerizalenm [ti’n] kase.” (Nee. 1:3, 4) Lapriyer Neemya ti ganny reponn plis ki sa ki i ti pe ekspekte, kan Lerwa Artakzerses ti les li al Zerizalenm pour rebatir miray. (Nee. 2:1-8) Pa bokou letan apre miray ti ganny repare. Lapriyer Neemya ti ganny reponn akoz vre ladorasyon ti pli enportan pour li e sa lapriyer ti ganny fer avek lafwa. Eski ou lapriyer osi i koumsa?
Pa bliye pour loue e remersye Bondye
18, 19. Akoz en serviter Zeova i devret loue e remersye li?
18 Pa bliye pour loue e remersye Zeova dan lapriyer. I annan en kantite rezon pour fer li! Par egzanp, David ti vreman anvi loue lafason ki Bondye i dirize. (Lir Psonm 145:10-13.) Eski ou lapriyer i montre ki ou apresye privilez ki ou annan pour anons Rwayonm Zeova? Parol bann psalmis i osi kapab ed ou pour remersye Bondye e demontre lapresyasyon senser pour bann renyon ek lasanble, atraver lapriyer ki sorti dan leker.—Ps. 27:4; 122:1.
19 Lapresyasyon pour sa relasyon presye ki ou annan avek Bondye i kapab motiv ou pour priy avek tou ou leker avek bann panse koumsa: “Mon pou loue ou parmi lepep, O Zeova, mon pou sant pour ou parmi bann kominote nasyonal. Akoz ou labonte leker i gran ziska lesyel e laverite ziska kot nyaz. O Bondye, ganny met pli o parlao lesyel; les ou laglwar vin parlao later.” (Ps. 57:9-11) Pa sa i bann santiman rekonfortan! Pa ou pou dakor ki bann parol tousan koumsa sorti dan bann Psonm i kapab annan lefe e ed ou amelyor ou lapriyer?
Sipliy Bondye avek respe
20. Ki mannyer Mari ti demontre son devosyon pour Bondye?
20 Respe pour Bondye i devret evidan dan ou lapriyer. Parol ranpli avek respe ki Mari ti dir en pti pe letan apre ki i ti konnen i pou vin manman Mesi i parey avek pour Ana kan i ti prezant Samyel pour servis kot tabernak. Respe ki Mari ti annan pour Bondye ti evidan dan sa ki i ti dir: “Mon glorifye Senyer avek tou mon leker, Mon lespri i dan lazwa akoz Bondye, mon Sover.” (Lik 1:46, 47) Eski ou kapab amelyor ou lapriyer par eksprim bann santiman parey? I pa drol alor ki Mari ki ti annan lakrent pour Bondye ti ganny swazir pour vin manman Zezi, sa Mesi!
21. Ki mannyer lapriyer Zezi i donn levidans respe ek lafwa?
21 Avek respe Zezi ti priye avek lafwa total. Par egzanp, avan resisit Lazar, “Zezi ti get anler e dir, ‘Papa, mersi ki ou’n ekout mwan. Mon konnen ki ou touzour ekout mwan.’” (Zan 11:41, 42) Eski ou lapriyer i demontre ki ou annan en tel respe ek lafwa? Si ou etidye byen model lapriyer ki Zezi ti fer avek respe, ou pou vwar ki sa ki ti enportan ladan i sanktifikasyon non Zeova, ki son Rwayonm i vini e lakonplisman son lavolonte. (Mat. 6:9, 10) Reflesir lo ou lapriyer. Eski zot demontre lentere senser ki ou annan pour Rwayonm Zeova, lakonplisman son lavolonte ek sanktifikasyon son non sen? Zot devret.
22. Akoz ou kapab asire ki Zeova pou donn ou kouraz pour anons sa bon nouvel?
22 Akoz persekisyon ek leprev, souvan nou sipliye pour ganny led pour nou kapab servi Zeova avek kouraz. Avek kouraz, Pyer ek Zan ti refize obeir kan Sannedren ti donn zot lord pour aret ‘ansenny o non Zezi.’ (Akt 4:18-20) Apre ki zot ti ganny large, zot ti rakont sa ki ti’n pase avek lezot krwayan. Apre sa, tou bann ki ti la ti sipliy Bondye pour ed zot kapab koz avek lardyes. Sirman i ti en moman eksitan kan sa lapriyer ti ganny reponn e zot ti “ranpli avek Sent-Espri e zot ti konmans anons mesaz Bondye san okenn lafreyer.” (Lir Akt 4:24-31.) Konman rezilta, bokou dimoun ti vin bann adorater Zeova. Lapriyer i osi kapab motiv ou pour anons sa bon nouvel avek lardyes.
Kontinyen amelyor ou lapriyer
23, 24. (a) Nonm lezot legzanp pour montre ki mannyer letid Labib i kapab ed ou amelyor ou lapriyer. (b) Ki ou pou fer pour amelyor ou lapriyer?
23 I annan bokou legzanp ankor ki kapab ganny site pour montre ki lir e etidye Labib i kapab ed ou pour amelyor ou lapriyer. Parey Yona, ou kapab rekonnet ki “delivrans i pour Zeova.” (Yona 2:1-10) Si ou enkyet akoz en pese grav e ou’n rod led avek bann ansyen, bann santiman dan lapriyer David i kapab ed ou dan ou lapriyer personnel pour montre ki ou’n repantir senserman. (Ps. 51:1-12) Dan serten lapriyer ou kapab loue Zeova parey Zeremi ti fer. (Zer. 32:16-19) Si ou pe rod en konzwen pour marye, etidye sa lapriyer ki dan Ezra sapit 9, sipliy Bondye osi akoz sa i kapab ranforsi ou determinasyon pour obeir Bondye e ‘marye selon senyer.’—1 Kor. 7:39; Ezra 9:6, 10-15.
24 Kontinyen lir, etidye e fouy dan Labib. Rod bann pwen ou kapab servi dan ou lapriyer. Ou kapab servi sa bann pwen sorti dan Labib dan ou prop siplikasyon, lapriyer remersiman ek louanz. Sirman ou pou vin pli pros avek Zeova o firamezir ki ou amelyor ou lapriyer atraver letid Labib.
Ki ou pou reponn?
• Akoz nou devret rode e swiv gidans Bondye?
• Kwa ki devret motiv nou pour priye pour ganny lasazes?
• Ki mannyer liv Psonm i kapab ed nou pour amelyor nou lapriyer?
• Akoz nou devret priy avek lafwa ek respe?
[Kestyon]
[Portre lo paz 15]
Serviter Abraam ti priye pour ganny gidans Bondye. Me ou?
[Portre lo paz 17]
Ador Bondye an fanmir i kapab ed ou amelyor ou lapriyer