Hẹn Odẹ̀ Towe lẹ Pọnte Gbọn Biblu Pinplọn Dali
Hẹn Odẹ̀ Towe lẹ Pọnte Gbọn Biblu Pinplọn Dali
‘OKLUNỌ E, yẹn vẹ̀ we, tuntoai hlan odẹ̀ mẹmẹsi towe tọn lọ.’—NẸH. 1:11.
1, 2. Naegbọn e do yin alenu nado lẹnnupọndo odẹ̀ he yin kinkàndai to Biblu mẹ delẹ ji?
ODẸ̀ po Biblu pinplọn po yin adà tangan sinsẹ̀n-bibasi nugbo tọn. (1 Tẹs. 5:17; 2 Tim. 3:16, 17) Nugbo wẹ dọ Biblu ma yin owe odẹ̀ tọn de gba. Ṣigba e bẹ odẹ̀ susu hẹn, yèdọ kakajẹ odẹ̀ susu he tin to owe Psalm tọn mẹ lẹ ji.
2 Dile a to Biblu hia bosọ to pinplọn ẹn, e yọnbasi dọ a ni mọ odẹ̀ he sọgbe hẹ ninọmẹ he a nọ pehẹ lẹ. Na nugbo tọn, eyin a nọ yí hogbe he tin to odẹ̀ he yin kinkàndai to Owe-wiwe mẹ lẹ zan to odẹ̀ towe lẹ mẹ, enẹ sọgan hẹn odẹ̀ towe lẹ pọnte dogọ. Etẹwẹ hiẹ sọgan plọn sọn mẹhe biọ alọgọ to odẹ̀ mẹ bo mọ gblọndo na odẹ̀ yetọn lẹ si, podọ sọn nuhe odẹ̀ yetọn bẹhẹn lẹ mẹ?
Nọ Dín Anademẹ Jiwheyẹwhe Tọn Bosọ Nọ Hodo E
3, 4. Azọ́n tẹwẹ yin didena devi Ablaham tọn, podọ etẹwẹ mí sọgan plọn sọn kọdetọn lọ mẹ?
3 Eyin a nọ plọn Biblu, a na mọdọ dandannu wẹ e yin nado nọ biọ anademẹ Jiwheyẹwhe tọn whepoponu to odẹ̀ mẹ. Lẹnnupọndo nuhe jọ to whenue tọgbo Ablaham do devi mẹho pete whédo etọn tọn—vlavo Eliẹzẹli—hlan Mẹsopotamia nado yì dín asi budisi Jiwheyẹwhe tọ́ de na Isaki ji. Dile yọnnu lẹ to osin dà to dotọ̀ de kọ̀n, devi lọ hodẹ̀ dọmọ: “OKLUNỌ, . . . gbọ e ni jọ dọ, awhli he yẹn na dọhlan, dọmọ, Yẹn vẹ̀ we, zlọn tọ̀zẹ́n towe dai, na yẹn ni nù; bọ ewọ nasọ dọmọ, Nù, yẹn nasọ dà na kanklosọpoawenọ towe lẹ nù ga; ewọ lọ wẹ ni yin asi lọ he hiẹ ko de na devi towe, Isaki; gbọn ehe mẹ yẹn na yọnẹn dọ hiẹ do dagbe hia hlan klunọ ṣie.”—Gẹn. 24:12-14.
4 Jiwheyẹwhe sè odẹ̀ devi enẹ tọn to whenue Lebeka na osin kanklosọpoawenọ etọn lẹ. E ma dẹn bọ e hodo devi lọ yì Kenani bo lẹzun asi yiwanna Isaki tọn. Nugbo wẹ dọ a ma sọgan donukun dọ Jiwheyẹwhe ni na we ohia vonọtaun mọnkọtọn de. Ṣigba, e na deanana we to gbẹzan towe mẹ eyin a nọ hodẹ̀ hlan ẹn bo magbe nado jo dewe do na gbigbọ wiwe etọn ni deanana we.—Gal. 5:18.
Odẹ̀ Nọ Gọalọ Nado De Magbọjẹ Mítọn lẹ Pò
5, 6. Etẹwẹ jẹna ayidego to odẹ̀ he Jakobu hò mẹ to whenue e jlo na yì pé Esau?
5 Odẹ̀ sọgan de magbọjẹ mítọn pò. Na Jakobu to budina nọvisunnu ahoho etọn Esau wutu, e hodẹ̀ dọmọ: “OKLUNỌ, . . . yẹn ma jẹna ṣinun-ṣinun sọn dagbewanyi lẹpo mẹ, podọ sọn nugbo lẹpo tọn mẹ, he hiẹ ko yí hia hlan devi towe . . . Yẹn vẹ̀ we, whlẹn mi sọn alọ nọvisunnu ṣie tọn mẹ, sọn alọ Esau tọn mẹ: na yẹn dibuna ẹn, e nikaa wá bo gbà mi, onọ̀ po ovi lẹ po. Hiẹ dọmọ, Nugbonugbo yẹn na wà dagbe na we, yẹn nasọ basi okún towe di tọkẹ́n ohù tọn, he yè ma sọgan hia na susugege.”—Gẹn. 32:9-12.
6 Dile etlẹ yindọ Jakobu ze afọdide mẹdehihọ́ tọn delẹ, Jiwheyẹwhe sè odẹ̀ etọn na mí mọdọ ewọ po Esau po gbọwhẹ. (Gẹn. 33:1-4) Eyin a hia kandai odẹ̀ etọn tọn po sọwhiwhe po, a na mọdọ Jakobu ma biọ alọgọ poun gba. E do yise hia to Okún dopagbe lọ mẹ bosọ yọ́n pinpẹn dagbewanyi Jiwheyẹwhe tọn. Be hiẹ tindo “obu . . . to homẹ” wẹ ya? (2 Kọl. 7:5) Eyin mọ wẹ, ovẹvivẹ Jakobu tọn sọgan flin we dọ odẹ̀ sọgan de magbọjẹ towe lẹ pò. Ṣigba, odẹ̀ mítọn lẹ ma dona bẹ obiọ kẹdẹ hẹn gba, e sọ dona dohia dọ mí tindo yise.
Nọ Biọ Nuyọnẹn to Odẹ̀ Mẹ
7. Naegbọn Mose do hodẹ̀ bo biọ nuyọnẹn Jiwheyẹwhe na e nido yọ́n aliho Etọn lẹ?
7 Ojlo lọ nado hẹn homẹ Jehovah tọn hùn dona whàn we nado nọ biọ nuyọnẹn to odẹ̀ mẹ. Mose hodẹ̀ bo biọ nuyọnẹn Jiwheyẹwhe na e nido yọ́n aliho Etọn lẹ. E vẹvẹna Jehovah dọmọ: “Pọ́n, hiẹ dọhlan mi dọ, Hẹn gbẹtọ helẹ hẹji wá [sọn Egipti] . . . Enẹwutu dinvie, Yẹn vẹ̀ we, eyin yẹn ko mọ ojọmiọn to nukun towe mẹ, bo do aliho towe lẹ hia mi dinvie, . . . hlan opodo lọ dọ yẹn nido mọ ojọmiọn to nukun towe mẹ.” (Eks. 33:12, 13) Nado na gblọndo odẹ̀ Mose tọn, Jiwheyẹwhe na ẹn nuyọnẹn he sẹhundaga de na e nido yọ́n aliho etọn lẹ—yèdọ nuhe e tindo nuhudo etọn nado deanana omẹ Jehovah tọn lẹ.
8. Nawẹ ayihamẹlinlẹnpọn do 1 Ahọlu lẹ 3:7-14 ji sọgan hẹn ale wá na we gbọn?
8 Davidi lọsu hodẹ̀ dọmọ: “Hẹn mi yọ́n ali towe, OKLUNỌ E.” (Ps. 25:4) Sọlọmọni, visunnu Davidi tọn vẹ̀ Jiwheyẹwhe nado na ẹn nuyọnẹn he na gọalọna ẹn nado hẹn azọngban etọn lẹ di, taidi ahọlu Islaeli tọn. Homẹ Jehovah tọn hùn do odẹ̀ Sọlọmọni tọn go, podọ e ma yin nuhe e biọ kẹdẹ wẹ Jiwheyẹwhe na ẹn gba, ṣigba e sọ na ẹn adọkun po gigo po. (Hia 1 Ahọlu lẹ 3:7-14.) Eyin hiẹ mọ lẹblanulọkẹyi sinsẹ̀nzọn tọn lẹ yí he taidi nuhe hú agbọ́ we, biọ nuyọnẹn to odẹ̀ mẹ bo do whiwhẹ hia. Eyin a wàmọ, Jiwheyẹwhe na gọalọna we nado tindo oyọnẹn, podọ nado yinuwa po nuyọnẹn po na a nido penukundo azọngban towe lẹ go to aliho he sọgbe mẹ podọ po owanyi po.
Nọ Hodẹ̀ sọn Ahun mẹ Wá
9, 10. Etẹwẹ a mọdọ e jẹna ayidego to aliho he mẹ Sọlọmọni donù ayiha go te mẹ to odẹ̀ he e hò to klandowiwe tẹmpli lọ tọn whenu?
9 Whẹpo Jehovah nido sè odẹ̀ mẹde tọn, e dona wá sọn ahun mẹ. Sọlọmọni hodẹ̀ ahundopo tọn de, he yin kinkàndai to 1 Ahọlu lẹ weta 8 mẹ, to gbẹtọgun he pli to Jelusalẹm na klandowiwe tẹmpli Jehovah tọn lọ nukọn to 1026 J.W.M. To whenue aki alẹnu tọn yin zizedo Fiwiwe Gbaugbau lọ, bọ aslọ Jehovah tọn gọ́ tẹmpli lọ mẹ, Sọlọmọni pagigona Jiwheyẹwhe.
10 Lẹnnupọndo odẹ̀ Sọlọmọni tọn ji, bo doayi aliho he mẹ e donù ayiha go te to odẹ̀ etọn mẹ. Sọlọmọni dọ dọ Jehovah kẹdẹ wẹ nọ yọ́n nuhe tin to ahun gbẹtọ tọn mẹ. (1 Ahọ. 8:38, 39) Odẹ̀ dopolọ dohia dọ todido tin na ylandonọ he ‘yí ayiha etọn lẹpo do gọ̀ do Jiwheyẹwhe dè.’ Eyin kẹntọ de wle omẹ Jiwheyẹwhe tọn lẹ, Jehovah na sè odẹ̀ yetọn eyin yé tindo ayiha pipé. (1 Ahọ. 8:48, 58, 61) Enẹwutu, odẹ̀ towe lẹ dona nọ wá sọn ahun mẹ.
Owe Psalm Tọn Sọgan Gọalọna We Nado Hẹn Odẹ̀ Towe lẹ Pọnte
11, 12. Etẹwẹ a plọn sọn hogbe odẹ̀ Levinu he ma penugo nado tin to tẹmpli Jiwheyẹwhe tọn mẹ na ojlẹ de tọn lẹ mẹ?
11 Sọwhiwhe yíyí do lẹnnupọndo Psalm lẹ ji sọgan gọalọna we nado hẹn odẹ̀ towe lẹ pọnte podọ enẹ nasọ gọalọna we nado kúahún pọ́n Jiwheyẹwhe na gblọndo odẹ̀ towe lẹ tọn. Lẹnnupọndo homẹfa Levinu he tin to kanlinmọgbenu de tọn ji. Dile etlẹ yindọ e ma penugo nado yì tẹmpli Jehovah tọn mẹ to ojlẹ de mẹ, e jihàn dọmọ: “Etẹwutu ota towe dokọdò, hiẹ ayiha ṣie? Etẹwutu hiẹ hùnhlún to ohò ṣie mẹ? Hiẹ ni do todido to Jiwheyẹwhe mẹ: na yẹn na saa nọ pà ẹ, mẹhe yin whlẹngán nukun ṣie mẹ tọn, podọ Jiwheyẹwhe ṣie.”—Ps. 42:5, 11; 43:5.
12 Etẹwẹ a sọgan plọn sọn apajlẹ Levinu enẹ tọn mẹ? Eyin e wá jọ bọ a yin wiwle do gànpamẹ na dodowiwa wutu, bọ enẹ na zọ́n bọ a ma sọgan kọnawudopọ hẹ yisenọ hatọ lẹ na ojlẹ de to fie yé nọ basi sinsẹ̀n te, yí homẹfa do nọtepọn nuhe Jiwheyẹwhe na wà do ota towe mẹ. (Ps. 37:5) Lẹnayihamẹpọn do ayajẹ he a ko duvivi etọn wayi to sinsẹ̀nzọn Jiwheyẹwhe tọn mẹ lẹ ji, bo biọ akọndonanu to odẹ̀ mẹ dile a to “todido [dohia] to Jiwheyẹwhe mẹ” na e nido gọalọna we nado kọnawudopọ hẹ omẹ etọn lẹ whladopo dogọ.
Nọ Hodẹ̀ to Yise Mẹ
13. To kọndopọ mẹ hẹ Jakobu 1:5-8, naegbọn hiẹ dona nọ hodẹ̀ to yise mẹ?
13 Mahopọnna ninọmẹ depope he mẹ a sọgan te, nọ hodẹ̀ to yise mẹ to whepoponu. Eyin a to ninọmẹ he whlé tenọgli towe pọ́n de pehẹ, hodo ayinamẹ devi Jakobu tọn. Lẹhlan Jehovah to odẹ̀ mẹ, bo deji dọ ewọ sọgan na we nuyọnẹn he a tindo nuhudo etọn nado duto whlepọn lọ ji. (Hia Jakobu 1:5-8.) Jiwheyẹwhe yọ́n ayimajai depope he a tindo, podọ ewọ sọgan deanana we bo miọnhomẹna we gbọn gbigbọ wiwe etọn gblamẹ. Po yise dolido de po, dọ numọtolanmẹ towe lẹ tọ́n na Jiwheyẹwhe “matin ayi awe,” bo kẹalọyi anademẹ gbigbọ wiwe etọn tọn po ayinamẹ Ohó etọn tọn po.
14, 15. Naegbọn mí sọgan dọ dọ Hanna hodẹ̀ bo yinuwa po yise po?
14 Hanna he yin dopo to asi awe Ẹlkana Levinu lọ tọn lẹ mẹ, hodẹ̀ bo yinuwa po yise po. Na Hanna yin wẹnsinọ wutu, Pẹnina nọ ṣàn ẹn kò na ewọ jivi susu wutu. Hanna dopà to gòhọtúntún mẹ dọ, eyin emi ji visunnu de, emi na yí i na Jehovah. Na nùflo etọn lẹ to whinwhàn whenue e to dẹ̀ho wutu, Yẹwhenọ Daho Eli lẹndọ ahàn wẹ e nùmú. Whenue e wá mọdọ e ma yinmọ, e dọmọ: “Jiwheyẹwhe Islaeli tọn ni sọ kanbiọ towe he hiẹ biọ sọn e si na we.” Dile etlẹ yindọ Hanna ma yọ́n nuhe kọdetọn lọ na yin, e yise dọ Jiwheyẹwhe na na gblọndo odẹ̀ etọn. Enẹwutu, “nukunmẹ etọn masọ yin awublanọ ba.” E masọ nọ hanú kavi wule ba.—1 Sam. 1:9-18.
15 Whenue Hanna ji Samuẹli bo ko deanọna ẹn godo, e ze e wá gòhọtúntún mẹ na ewọ nido basi sinsẹ̀nzọn wiwe hlan Jehovah to finẹ. (1 Sam. 1:19-28) Eyin a yí sọwhiwhe do lẹnayihamẹpọn do odẹ̀ he Hanna hò to nujijọ enẹ whenu ji, enẹ sọgan hẹn odẹ̀ towe lẹ pọnte dogọ bo gọalọna we nado mọdọ hiẹ sọgan duto awubla he ayimajai depope sọgan hẹnwa ji, eyin a nọ hodẹ̀ po yise po dọ Jehovah na sè odẹ̀ towe.—1 Sam. 2:1-10.
16, 17. Etẹwẹ jọ to whenue Nẹhemia hodẹ̀ bo yinuwa po yise po?
16 Dawe dodonọ lọ Nẹhemia, he nọgbẹ̀ to owhe kanweko atọ́ntọ J.W.M. hodẹ̀ bo yinuwa po yise po. E vẹvẹ dọmọ: ‘OKLUNỌ E, yẹn vẹ̀ we, tuntoai hlan odẹ̀ mẹmẹsi towe tọn lọ, mẹhe hùnhomẹ nado dibusi oyín towe: hẹn mẹmẹsi towe duale to azán he gbè, yẹn vẹ̀ we, bo na lẹblanu hlan ẹn to nukun dawe he tọn mẹ.’ Mẹnu wẹ “dawe” ehe? Ahọlu Altakẹlikesi Pẹlsia tọn, mẹhe Nẹhemia yin kọfohẹntọ na wẹ.—Nẹh. 1:11.
17 Po yise po, Nẹhemia hodẹ̀ na azán susu whenue e sè dọ Juvi he yin tuntundote sọn kanlinmọgbenu Babilọni tọn lẹ “tin to nukunbia daho po ovlẹ po mẹ: [podọ] yè ko họ́ adó Jelusalẹm tọn liai.” (Nẹh. 1:3, 4) Nẹhemia mọ gblọndo na odẹ̀ etọn zẹ̀ nuhe e lẹn go to whenue Ahọlu Altakẹlikesi nagbè e nado yì vọ́ adó Jelusalẹm tọn lẹ dó. (Nẹh. 2:1-8) To ojlẹ kleun de godo, yé dotana adó lọ didó. Nẹhemia mọ gblọndo na odẹ̀ etọn lẹ, na e ze ayidonugo do sinsẹ̀n-bibasi nugbo ji to odẹ̀ enẹlẹ mẹ podọ yé yin hihò po yise po. Be hiẹ lọsu nọ wà nudopolọ to odẹ̀ towe lẹ mẹ ya?
A Wọn Pipà po Pẹdido po Blo
18, 19. Whẹwhinwhẹ́n tẹlẹ wutu wẹ devizọnwatọ Jehovah tọn lẹ dona nọ pà ẹ bo dopẹna ẹn?
18 A wọn nado nọ pà Jehovah bo nọ dopẹna ẹn to odẹ̀ mẹ blo. Hiẹ dona wàmọ na whẹwhinwhẹ́n susu wutu! Di apajlẹ, Davidi tindo zohunhun nado pà Jehovah na ahọlu-yinyin Etọn. (Hia Psalm 145:10-13.) Be odẹ̀ towe lẹ nọ dohia dọ a yọ́n pinpẹn lẹblanulọkẹyi he a tindo nado lá Ahọluduta Jehovah tọn ya? Hogbe psalm-kàntọ lọ tọn lẹ sọgan sọ gọalọna we nado do pinpẹn-nutọn-yinyọnẹn towe hia Jiwheyẹwhe to odẹ̀ ahundopo tọn towe lẹ mẹ na opli Klistiani tọn lẹ po plidopọ lẹ po he e hẹn yọnbasi.—Ps. 27:4; 122:1.
19 Pinpẹn-nutọn-yinyọnẹn na haṣinṣan vonọtaun towe hẹ Jiwheyẹwhe sọgan whàn we nado nọ hodẹ̀ sọn ahun mẹ wá po hogbe ehelẹ nkọ po dọmọ: “Yẹn na pà we, OKLUNỌ E, to gbẹtọ lẹ ṣẹnṣẹn: yẹn nasọ jihàn pipà lẹ hlan we to akọta lẹ ṣẹnṣẹn. Na dagbewanyi towe sù jẹ olọn lẹ dè; nugbo towe sọ jẹ aga nukunmẹ lẹ dè. Yin zizedaga, Jiwheyẹwhe E, to olọn lẹ ji aga: gigo towe to aigba lẹpo ji.” (Ps. 57:9-11) Hogbe he whànmẹ nankọ lẹ die! Be hiẹ ma kọngbedopọ dọ hogbe psalm tọn he whànmẹ enẹlẹ na gọalọna we nado hẹn odẹ̀ towe lẹ pọnte dogọ ya?
Nọ Vẹ̀ Jiwheyẹwhe po Osi Sisosiso Po
20. Nawẹ Malia do ede hia taidi budisi Jiwheyẹwhe tọ́ gbọn?
20 E dona nọ họnwun to odẹ̀ towe lẹ mẹ dọ a tindo osi sisosiso na Jiwheyẹwhe. Hogbe he Malia yizan to whenue e sè dọ emi na lẹzun onọ̀ Mẹssia tọn, jlo na taidi hogbe Hanna tọn lẹ nkọ to whenue e ze jọja Samuẹli yì gòhọtúntún mẹ nado yì sẹ̀n Jiwheyẹwhe to finẹ. Osi sisosiso he Malia tindo na Jiwheyẹwhe sọawuhia hezeheze to hogbe etọn lẹ mẹ dọmọ: “Ayiha ṣie jlayinna [Jehovah], gbigbọ ṣie sọ jaya to Jiwheyẹwhe Whlẹngántọ ṣie mẹ.” (Luku 1:46, 47) Be a sọgan hẹn odẹ̀ towe lẹ pọnte dogọ gbọn hogbe mọnkọtọn lẹ yiyizan dali ya? Abajọ Malia, yọnnu budisi Jiwheyẹwhe tọ́ enẹ do yin dide nado lẹzun onọ̀ Jesu, Mẹssia lọ tọn!
21. Nawẹ odẹ̀ Jesu tọn lẹ do osi sisosiso po yise po hia gbọn?
21 Jesu lọsu do osi sisosiso po yise dolido po hia to odẹ̀ etọn lẹ mẹ. Di apajlẹ, whẹpo e do fọ́n Lazalọsi sọnku, “Jesu . . . ze nukun etọn daga bo dọmọ, Otọ́, yẹn dopẹna we, na hiẹ nọ sè ṣie. Yẹn sọ yọnẹn dọ hiẹ nọ sè ṣie whepoponu.” (Joh. 11:41, 42) Be odẹ̀ towe lẹ nọ do osi sisosiso mọnkọtọn po yise po hia ya? Eyin a lẹnnupọndo odẹ̀ apajlẹ tọn Jesu tọn he do sisi hia lọ ji, a na mọdọ adà tangan he ji e zinnudo lẹ wẹ klandowiwe oyín Jehovah tọn, wiwá Ahọluduta etọn tọn, po ojlo etọn hinhẹndi po. (Mat. 6:9, 10) Lẹnnupọndo odẹ̀ towe titi lẹ ji. Be yé nọ dohia dọ hiẹ tindo ojlo nujọnu tọn to Ahọluduta Jehovah tọn, ojlo etọn wiwà, po klandowiwe oyín wiwe etọn tọn po mẹ ya? Mọ wẹ e dona yin.
22. Naegbọn hiẹ sọgan deji dọ Jehovah na na we adọgbigbo nado lá wẹndagbe lọ?
22 Na homẹkẹn kavi whlepọn devo lẹ wutu, odẹ̀ he mí nọ hò lẹ nọ bẹ ovẹvivẹ nado biọ alọgọ Jehovah tọn nado sẹ̀n ẹn po adọgbigbo po hẹn. Whenue Tohodọtọ Ju lẹ tọn gbẹna Pita po Johanu po nado “plọnmẹ to oyín Jesu tọn mẹ,” apọsteli enẹlẹ zindonukọn po adọgbigbo po. (Owalọ 4:18-20) To whenue yé yin tuntundote godo, yé dọ nuhe jọ na yisenọ hatọ lẹ. Enẹgodo, mẹhe tin to finẹ lẹpo biọ alọgọ Jiwheyẹwhe tọn to odẹ̀ mẹ nado dọ ohó etọn po adọgbigbo po. Yé jaya taun to whenue odẹ̀ yetọn mọ gblọndo, na yé “gọ́ na [gbigbọ wiwe], yé sọ yí tugbigbo do dọ ohó Jiwheyẹwhe tọn”! (Hia Owalọ lẹ 4:24-31.) Taidi kọdetọn de, mẹsusu lẹzun sinsẹ̀n-basitọ Jehovah tọn. Mọdopolọ, odẹ̀ sọgan hẹn we lodo nado lá wẹndagbe lọ po adọgbigbo po.
Nọ to Odẹ̀ Towe lẹ Hẹn Pọnte Dogọ
23, 24. (a) Donù apajlẹ devo lẹ go he dohia dọ Biblu pinplọn sọgan hẹn odẹ̀ towe lẹ pọnte dogọ. (b) Etẹwẹ hiẹ na wà nado hẹn odẹ̀ towe lẹ pọnte?
23 Mí sọgan donù apajlẹ susu devo lẹ go nado dohia dọ Biblu hihia po nupinplọn po sọgan hẹn odẹ̀ towe lẹ pọnte dogọ. Di apajlẹ, hiẹ lọsu sọgan dọ to odẹ̀ towe lẹ mẹ dọ “OKLUNỌ tọn wẹ whlẹngán,” dile Jona wà do. (Jona 2:1-10) Eyin ylando sinsinyẹn de to tuklado we bọ a ko dín alọgọ mẹho agun tọn lẹ tọn, numọtolanmẹ he Davidi dohia to odẹ̀ etọn lẹ mẹ sọgan gọalọna we nado dohia to odẹ̀ mẹdetiti tọn towe lẹ mẹ dọ a ko lẹnvọjọ. (Ps. 51:1-12) To odẹ̀ delẹ mẹ, hiẹ sọgan pà Jehovah dile Jẹlemia wà do. (Jẹl. 32:16-19) Eyin a to alọwlemẹ de dín, nulinlẹnpọndo odẹ̀ he tin Ẹzla weta 9 mẹ ji, po obiọ vẹkuvẹku po, sọgan gọalọna we nado hẹn gbemima towe go nado setonuna Jiwheyẹwhe bo ‘wlealọ to OKLUNỌ mẹ kẹdẹ.’—1 Kọl. 7:39; Ẹzla 9:6, 10-15.
24 Nọ hia Biblu, nọ plọn Biblu, bo nọ basi dodinnanu do Biblu ji! Nọ dín nuagokun he a sọgan yí do odẹ̀ towe mẹ lẹ. Gbọnmọ dali, hiẹ sọgan nọ yí nuagokun enẹlẹ do ovẹvivẹ towe lẹ mẹ, gọna odẹ̀ pẹdido po pipà po tọn towe lẹ. Matin ayihaawe, eyin hiẹ nọ plọn Biblu, enẹ na hẹn odẹ̀ towe lẹ pọnte dogọ bo nasọ dọ̀n we sẹpọ Jehovah Jiwheyẹwhe hugan gbede pọ́n.
Nawẹ Hiẹ Na Na Gblọndo Gbọn?
• Naegbọn mí dona nọ dín anademẹ Jiwheyẹwhe tọn bo nọ hodo e?
• Etẹwẹ dona whàn mí nado nọ biọ nuyọnẹn to odẹ̀ mẹ?
• Nawẹ owe Psalm tọn sọgan hẹn odẹ̀ mítọn lẹ pọnte dogọ gbọn?
• Naegbọn mí dona nọ hodẹ̀ to yise mẹ po osi sisosiso po?
[Kanbiọ Oplọn tọn lẹ]
[Yẹdide to weda 8]
Devi Ablaham tọn hodẹ̀ bo biọ anademẹ Jiwheyẹwhe tọn. Be hiẹ nọ wàmọ ya?
[Yẹdide to weda 10]
Sinsẹ̀n-Bibasi whẹndo tọn sọgan hẹn odẹ̀ towe lẹ pọnte dogọ