Diosta allin mañakuq kanapaqqa Bibliatam estudiana
Diosta allin mañakuq kanapaqqa Bibliatam estudiana
‘Ruegakuykim Señorlláy, chaylla kay sirvientekipa mañakuyniyta [. . .] uyariykunaykipaq.’ (NEH. 1:11.)
1, 2. ¿Imanasqataq allinninchikpaq kanman Bibliapi tarikuq mañakuykunamanta yachayqa?
BIBLIATA estudiaywan orakuyqa ancha allinmi Diosta yupaychanapaq (1 Tes. 5:17; 2 Tim. 3:16, 17). Bibliaqa manam mañakunapaq librochu, ichaqa orakuymantam achka ejemplokuna kachkan, wakintam Salmos libropi tarinchik.
2 Estudiaspanchikqa yaqapaschá sasachakuyninchikkunawan tupaq mañakuykunata tarisunchik. Leesqanchikman hina mañakuptinchikqa orakusqanchikmi aswan allin kanqa. ¿Imatam yachachwan Diosta ñawpaq tiempopi serviqkunapa mañakusqankumanta?
Diospa yanapakuyninta maskasun hinaspa kasukusun
3, 4. ¿Imata rurananpaqmi serviqninta Abraham kamachirqa? ¿Imatam yachanchik Jehová Dios yanapasqanmanta?
3 Biblia estudiasqanchikmi yanapawanchik Diospa yanapakuyninta haykapipas maskanapaq. Yuyarisun Abrahampa mayor kaq sirvientenmanta, payqa Eliezerchusmi karqa. Abraham kamachiptinmi payqa Mesopotamia lawman rirqa huk sipasta akllamuq, chaynapi Isaacpa señoran kananpaq, sipasqa Diosta serviqmi kanan karqa. Sipaskuna pozomanta yakuta horqochkaptinkum kaynata mañakurqa: “Ñoqam nisaq huk kaqnin sipasta: ‘Ama hina kaspaykiyá puyñuykita uraykachispa yakuykita tomaykachiway’ nispa, hinaptinyá payñataq niwachun: ‘Tomaykuyá, tomaykachisaqtaqyá camelloykikunamanpas’ nispa. Chaynata contestawaqniy sipasyá kachun serviqniki Isaacpaq akllasqayki warmiqa. Chaynapim yachasaq patronniyman prometisqayki cumplisqaykita” (Gen. 24:12-14).
4 Mañakusqanmi uyarisqa karqa, Rebecam camellonkunaman yakuta tomaykachirqa. Chaymantam Rebecaqa paywan Canaanman rirqa Isaacpa kuyasqan señoran kananpaq. Kunanqa manam suyachwanchu Jehová Dios ima señaltapas qowananchiktaqa. Ichaqa, yanapawasunmi mañakuptinchik hinaspa espiritunwan yanapachikuptinchikqa (Gal. 5:18).
Diosta mañakuyqa hawkayachiwanchikmi
5, 6. ¿Imatam yachachiwanchik Esauwan manaraq tupachkaspan Jacobpa mañakusqan?
5 Preocupasqa kaptinchikmi orakuyqa hawkayachiwanchik. Esauta manchakuspanmi Diosta Jacob mañakurqa: “Cheqap kuyapayakuynikitaqa manam chaskinaypaq hinachu kani [. . .]. Wawqey Esaumantayá libraykullaway Taytáy, paytaqa manchakunim. Hamuspachá wañurachinqa warmiykunata wawantinta. Qamtaqmi niwarqanki Taytáy: ‘Ñoqam yanapasqayki allin kanaykipaq chaynataq lamar qochapi aqo hinaña mana yupay atina castayoq kanaykipaq’”, nispa (Gen. 32:9-12).
6 Jacobqa Esauwan tupananpaq yachaywan ruraspanpas, paywanqa allinyanakurqam mañakusqanta Dios uyarisqanrayku (Gen. 33:1-4). Cuidadowan leespaqa kaykunamantam yachasun: Jacobqa manam Diospa yanapakuyllantachu mañakurqa. Qawachirqam prometesqa Miraypi iñisqanta, agradecekurqataq paywan Dios sumaq sonqo kasqanmantapas. ¿Imawanpas hukmanyasqachu kachkanki? (2 Cor. 7:5.) Chayna tarikuptikiqa Jacobpa mañakusqanmi kallpanchasunki, mañakuyqa preocupasqa kaqtam hawkayachin. Yachachiwanchiktaqmi imamanta mañakuspapas, iñisqanchikta qawachinapaq.
Yachayniyoq kanapaq mañakusun
7. ¿Imanasqataq Moisesqa Diosta mañakurqa munasqanta yachaykachinanpaq?
7 Yachayta mañakunapaqmi Diosta agraday munasqanchik kallpanchawananchik. Moisesmi Diosta mañakurqa munayninta yachaykachinanpaq. Nirqam: “Qanmi niwarqanki: ‘Pusay [Egiptomanta] kay runakunata’ nispa [. . .]. Favorniki ñoqawan kaptinqa ruegakuykim qampa munasqaykita yachachiwanaykipaq chaynapi [. . .] favorniki tarinaypaq”, nispa (Exo. 33:12, 13). Israelitakunata pusananpaqmi Moisesqa yachanan karqa Diospa munasqanta, Diosqa uyarirqam mañakusqanta.
8. ¿Imaynatam yanapawanchik 1 Reyes 3:7-14 nisqanpi yuyaymanayqa?
8 Davidpas kaynatam mañakurqa: “Reqsiykachillawayá munasqallaykiman hina kawsakuytapas”, nispa (Sal. 25:4). Churin Salomonpas, allinta kamachinanpaq yachayta Dios qonanpaqmi mañakurqa. Salomonpa mañakusqanqa Diospa agradonpaqmi karqa, chaymi mañakusqanta qospanpas tukuy imatawan allin reqsisqa kaytapas qorqa (leey 1 Reyes 3:7-14). Congregacionpi rurayninchikkunamanta preocupasqa kaspaqa yachayta qowananchikpaq mañakusun hinaspa humilde kasun. Paymi yachayta qowasun ima rurananchiktapas allinta ruranapaq.
Sonqomanta mañakusun
9, 10. ¿Imakunatam runapa sonqonmanta willawanchik templo rurayta tukuruspa Salomonpa mañakusqan?
9 Dios uyariwananchikpaqqa sonqomantam mañakuna. 1 Reyes libropa 8 capitulopim leenchik, templo rurayta tukuruspa Salomonpa tukuy sonqonmanta mañakusqanta, chayqa karqa cristianokunapa tiemponmanta 1026 wata puntataraqmi. Diospa contrato baulnin Chuyay-chuyay sitioman churasqa kaptin hinaspa temploman Diospa puyun huntaykuptinmi, Salomonqa achka runapa qayllanpi Diosta hatuncharqa.
10 Mañakusqanmanta leespam tarinchik runapa sonqonmanta achka kutita rimasqanta. Nirqam runakunapa sonqonta Jehová Dioslla reqsisqanta (1 Rey. 8:38, 39). Nirqataqmi “tukuy sonqonkuwan” huchankumanta wanakuqkunapaq suyakuy kasqanmanta. Mayqan enemigonpas israelitakunapi munaychakuptinqa, Diosta ‘tukuy sonqonkuwan’ servispankuqa segurom kanmanku karqa mañakusqanku uyarinanmanta (1 Rey. 8:48, 58, 61). Arí, mañakusqanchikqa sonqomantam kanan.
Salmos librom yanapawanchik aswan allin mañakuq kanapaq
11, 12. ¿Imatam yachanchik Diosta yupaychananpaq temploman riyta mana atispan Leviy castayoq runapa rurasqanmanta?
11 Salmos librota estudiayqa yanapawasunmi aswan allin mañakuq kananpaq hinaspa Dios contestawananchikta pacienciawan suyanapaqpas. Llaqtanmanta karupi tarikuq Leviy castayoq runapi piensasun. Payqa temploman riytam munarqa, ichaqa huk tiempom mana atirqachu. Chaymi kaynata takirqa: “¿Imamantamá hukmanyaruyman? ¿Imamantamá preocupakuyman? Diosnillaypim suyasaq ñoqallayqa. Paytaqa alabasaqraqmi ñoqallayqa. Paymi yanapaykuwan ñoqallaytaqa. Payllataqmi ñoqallaypa Diosnillayqa”, nispa (Sal. 42:5, 11; 43:5).
12 ¿Imatam paymanta yachachwan? Diosta servisqanchikmanta presochasqa kaspanchik iñiqmasinchikwan mana huñunakuspaqa, pacienciakuspam Diospa rurananta suyananchik (Sal. 37:5). Chaynataq kaqllamanta huñunakunapaq suyaspapas, yuyaymanana servispanchik kusisqa kasqanchikpi hinaspa aguantanapaq kallpata mañakuna.
Iñiywan mañakusun
13. ¿Imanasqam iñiywan mañakunanchik Santiago 1:5-8 nisqanman hina?
13 Ima sasachakuypiña kaspaykipas iñiywan mañakuy. Diosta kasukuyniki pruebasqa kaptinqa, Santiagopa nisqanman hina mana iskayrayaspa orakuy, yachaytaqa qosunkim pruebakunata aguantanaykipaq (leey Santiago 1:5-8). Diosqa yachanmi ima sasachawasqanchikta, chaymi espiritunwan yanapawasun hinaspa consuelawasun. ‘Ama iskayrayaspayá mañakuy’ hinaspa kasukuy espiritunwan hinaspa Bibliawan yanapasusqaykita.
14, 15. ¿Anapa imayna kasqanmi qawachin iñiywan mañakusqanmanta hinaspa rurasqanmantapas?
14 Leviy ayllumanta Elcanapa Ana sutiyoq huknin warminmi iñiywan mañakurqa. Anaqa mana wachakuqmi karqa, chaymi Elcanapa huknin warmin Penina sapa kuti burlakuq, payqa achka wawayoqmi karqa. Huk kutipim Anaqa Diospa yachanan karpapi Jehová Diosman prometekurqa qari wawata qoykuptin paypaq sapaqchananpaq. Sonqollanpi mañakuptinmi simillan kuyurqa, chaymi sacerdote Eliyqa piensarqa sinka kasqanta. Mana sinka kasqanmanta cuentata qokuspanmi nirqa: “Israelpa Diosninyá imam mañakusqaykita qosunki”, nispa. Anaqa manam yacharqachu imaynata Dios contestanantaqa, ichaqa segurom karqa mañakusqan uyarisqa kananmantaqa, chaymi manaña llakikurqachu nitaq ‘hukmanyasqañachu karqa’ (1 Sam. 1:9-18).
15 Anaqa qari wawatam wachakurqa, Samuelwanmi suticharqa. Anukaruspanmi Diospa wasinman aparqa Payta servinanpaq (1 Sam. 1:19-28). Anapa mañakusqanpi yuyaymanaspaqa allin orakuqmi kasun. Entiendesuntaqmi confianzawan mañakuspa sasachakuypa llakichiwasqanchikta vencenamantapas (1 Sam. 2:1-10).
16, 17. ¿Imatam Nehemias chaskirqa orakusqanmanta hinaspa iñiywan rurasqanmanta?
16 Cristianokunapa tiemponmanta 500 wata ñawpaqtam, Nehemiaspas iñiywan orakurqa hinaspa rurarqa. Nirqam: ‘Ruegakuykim [. . .] kay sirvientekipa [. . .] chaynataq sutiki respetay munaq sirvientekikunapa mañakuynintapas uyariykunaykipaq. Kay sirvienteki imapas rurasqay allin lloqsinanpaqyá yanapaykuway, reywanpas favoreceykachiwayá’, nispa. ¿Pimantam rimachkarqa? Persia nacionniyoq Artajerjesmantam, paymanmi Nehemiasqa copata servirqa (Neh. 1:11).
17 Nehemiasqa achka punchawñam tukuy sonqonmanta Diosta mañakurqa, yacharurqam Babiloniamanta librasqa judiokuna ‘ñakarispanku penqaypi kasqankutawan’ Jerusalenpa ‘murallan tuñichisqa kasqanmantapas’ (Neh. 1:3, 4). Nehemiaspa mañakusqanqa uyarisqam karqa, rey Artajerjesmi saqerqa Jerusalenta hatarichimunanpaq (Neh. 2:1-8). Manam unay tiempopichu hatarichirqaku. Paypa orakusqanqa uyarisqam karqa, Jehová Diosta yupaychanapaq kaqmanta hinaspa iñiywan mañakusqanrayku. ¿Chaynachu ñoqanchikpa mañakusqanchikpas?
Amayá qonqasunchu Dios alabaytawan agradecekuytaqa
18, 19. ¿Imakunamantam cristianokunaqa Diosta alabananchik hinaspa agradecekunanchik?
18 Mañakuspaqa ama qonqasunchu Dios alabaytawan agradecekuytaqa. Chayta ruranapaqqa achka razonkunam kachkan. Ejemplopaq, Jehová Diospa tukuy atiyniyoq kasqanmanta yuyaymanasqanmi Davidta kallpancharqa alabananpaq (leey Salmo 145:10-13). ¿Orakusqanchik qawachinchu Diospa Gobiernonmanta willakuy chaninchasqanchikta? Chaynataq, Salmos libroqa yanapawanchikmi huñunakuymantawan asambleakunamanta Diosninchikta agradecekunapaqpas (Sal. 27:4; 122:1).
19 Dioswan amistad kasqanchikmanta agradecekusqanchikmi kallpanchawachwan sonqomanta mañakunapaq hinaspa salmos qellqaq hina kaynata ninapaq: “Nacionkunapim takipusqayki. Alto-alto cielokunaman haypachkaq hinam qampa kuyapayakuynikiqa. Puyukunaman haypachkaq hinam confiakunapaq kaynikiqa. Diosnilláy, cielokunapa altonkamayá hatunchasqa kay. Diosnilláy, tukuy kay pachapiyá allin reqsisqa kay” (Sal. 57:9-11). ¡Mayna allinmi nisqanqa! Salmospi qellqasqakunam, yanapawanchik orakuyninchik aswan allin kananpaq.
Ancha respetowan mañakusun
20. ¿Imaynatam Mariaqa Dios respetasqanta qawachirqa?
20 Haykapipas respetowanmi orakunanchik. Mariam Jesuspa maman kananmanta yacharuspan nirqa: “Ukuymantam Señorta alabani. Sonqoypas Salvaqniy Diosraykum anchallataña kusikuchkan”, nispa (Luc. 1:46, 47). Nisqanmi rikchakun Samuel warmachata templopi servinanpaq Ana pusaspa nisqanwan, chaymi qawachin Maria ancha respetoyoq kasqanta. ¡Chaychá Jesuspa maman kananpaq akllasqa karqa! ¿Kallpanchakuwaqchu pay hina sonqomanta orakunaykipaq?
21. ¿Imaynatam Jesusqa mañakusqanpi qawachirqa iñisqantawan respetoyoq kasqanta?
21 Jesuspas iñiywan hinaspa respetowanmi orakurqa. Lazarota manaraq kawsarichichkaspanmi “hanaq pachata qawarispan nirqa: ‘Taytáy, graciastam qoyki uyariykuwasqaykimanta. Qamqa siemprem uyariwanki’”, nispa (Juan 11:41, 42). ¿Iñiywan hinaspa respetowanchu orakunki? Imayna mañakunamanta Jesuspa nisqanmi qawachin: Diospa sutin chuyanchasqa kananpaq, Gobiernon hamunanpaqwan munaynin rurakunanpaq mañakuy aswan allin kasqanta (Mat. 6:9, 10). Piensariy imayna mañakusqayki kasqanmanta. ¿Qawachinchu Diospa Gobiernon hamunanpaq, munaynin rurasqa kananpaq hinaspa sutin chuyanchasqa kananpaq munasqaykita?
22. ¿Imanasqataq seguro kanchik Diosmanta mana manchakuspa willanapaq kallpa qowananchikmanta?
22 Cristianokunaqa qatikachasqa otaq pruebakunapi kaspankum, Diosta mañakunku kallpata qonanpaq. Punta pachak watapim, Pedrotawan Juanta autoridadkuna kamachirqaku “Jesucristopa sutinpi amaña willakunankupaq”, paykunam ichaqa mana manchakuspa hinalla willakurqaku (Hech. 4:18-20). Preso kasqankumanta lloqsispankum apostolkunaqa iñiqmasinkuman willarqaku ima pasasqanmanta. Chaymi llapallanku Diosta mañakurqaku valorta qoptin predicanankupaq. Hinaptinmi ‘chuya espiritu lliwman huntaykuptin’ ‘manaña manchakuspanku willakurqaku Diospa palabranta’. ¡Mayna kusisqachá tarikurqaku! (Leey Hechos 4:24-31.) Chaynapim achka iñikurqaku hinaspa Jesuspa qatiqninña karqaku. Ñoqanchikpas mañakuspanchikmi kallpata tarisun allin noticiamanta willakunapaq.
Sapa kutim aswan allin mañakuq kanayki
23, 24. a) ¿Ima ejemplokunam qawachin aswan allin mañakuq kanapaq Biblia leeypiwan estudiay allin kasqanmanta? b) Mañakusqayki aswan allin kananpaq, ¿imata ruranaykipaqmi tantearunki?
23 Allin orakuq kanapaqqa Bibliatam leena hinaspa estudiana, chaytam achka ejemplokuna qawachin. Jonas hinam nichwan: “Dios Taytalláy, qamllam salvanki runakunataqa”, nispa (Jon. 2:1-10). Huchallikuruspa ancianokunapa yanapayninta maskaptinchikqa, Davidpa orakusqanmi yanapawasun wanakusqanchikmanta Diosman willanapaq (Sal. 51:1-12). Wakinpiqa Jeremias hinam alabachwan (Jer. 32:16-19). Casarakunaykipaq pitapas maskaspaqa, piensay Esdras libropa 9 capitulopi tarikuq mañakuypi hinaspa Diosman willakuy imayna sientekusqaykita. Chaymi yanapasunki “Señorpi iñiqwan” casarakunaykipaq (1 Cor. 7:39; Esd. 9:6, 10-15).
24 Ama haykapipas saqeychu Biblia leeytawan estudiaytaqa. Dios yanapasunaykipaq, alabanaykipaqwan agradecekunaykipaqqa Bibliapi mañakuykunaman hina orakuy. Allin orakuq kanaykipaq kallpanchakuspaqa, Jehová Diosmanmi astawan asuykunki.
¿Imatam niwaq?
• ¿Imanasqam Diospa yanapayninta maskaspa kasukuna?
• ¿Imata munaspam yachayta qowananchikpaq Diosta mañakunanchik?
• ¿Imaynatam Salmos libro yanapawachwan aswan allin mañakuq kanapaq?
• ¿Imanasqataq iñiywan hinaspa respetowan mañakunanchik?
[Kay yachachikuypa tapukuyninkuna]
[8 kaq paginapi dibujo]
¿Abrahampa sirvienten hinachu Diospa yanapayninta mañakunki?
[10 kaq paginapi dibujo]
Familiawan Diosta yupaychaymi yanapasunki aswan allin orakuq kanaykipaq