Chlekub-o j-orasiontik li xchanel Vivliae
Chlekub-o j-orasiontik li xchanel Vivliae
«Mucʼul Dios, ta jcʼanbot vocol ti acʼo avaʼibun jcʼop ti liʼ chajcʼopanot, vuʼun li avajtunelune.» (NEH. 1:11)
1, 2. ¿Kʼu yuʼun toj lek ti jkʼelbetik skʼoplal jlomuk orasionetik ti te ta jtatik ta Vivliae?
LI ORASION xchiʼuk xchanel Vivliae jaʼ chaʼtos ti toj tsotsik skʼoplal ta sventa li melel yichʼobil ta mukʼ Diose (1 Tes. 5:17; 2 Tim. 3:16, 17). Akʼo mi maʼuk slivroal orasionetik li Vivliae, ep orasion chalbe skʼoplal, jech kʼuchaʼal te ta jtatik ta slivroal Salmoe.
2 Kʼalal ta jkʼeltik o ta jchantik li Vivliae, yikʼaluk van te ta jtabetik skʼoplal li kʼusitik la skʼanik ta orasion ti jaʼ jech yakal ta jnuptantike. Mi jaʼ jech chkaltik jutuk ta j-orasiontik li kʼusi ta jkʼeltike, mas me chlekub li j-orasiontike. ¿Kʼusi ta jchantik ta sventa ti kʼuyelan la skʼanik vokol ta orasion li yajtuneltak Dios ta skʼakʼalil Vivliae?
Jsaʼtik xchiʼuk jchʼuntik li beiltasel chakʼ Diose
3, 4. ¿Kʼusi skʼan spas li yajtunel Abrahame, xchiʼuk kʼusi ta jchantik ta sventa ti kʼuyelan takʼbat s-orasion yuʼun Jeovae?
3 Li xchanel Vivliae chakʼ kiltik ti toj tsots skʼoplal ti jkʼanbetik beiltasel li Diose. Jvules ta joltik li bankilal yajtunel Abraham ti jaʼ van li Eliezere. Li vinik taje bat ta Mesopotamia ta skoj ti albat yuʼun yajval ti akʼo bat saʼ talel jun ants ti chtun ta stojolal Jeovae, ti jaʼ sventa chnupun xchiʼuk li Isaaque. Kʼalal laj yil jun tsebal ants ti yakal tslokʼes voʼ ta posoe, la skʼopon Jeova xchiʼuk xi laj yalbee: «Me oy jun tseb jech chcalbee: “Avocoluc yaleso aqʼuib yuʼun ta jcʼan jlecʼuc avaʼal cuchʼ”, me xcute. Ti me jech chistacʼbune: “Liʼ oye, uchʼan; ta xcacʼbe yuchʼic ec li acamellotaque”, me xiyutune, jech ta jnaʼ o ti jaʼ tʼujbil avuʼun yuʼun ta xicʼ li avajtunel Isaaque. Jech ta jnaʼ o ti ta melel cʼux ta avoʼnton li cajvale» (Gén. 24:12-14).
4 La stabe stakʼobil s-orasion yajtunel Abraham kʼalal laj yakʼbe yuchʼ voʼ kameyoetik li Rebecae. Mu ta sjaliluk une la xchiʼin batel ta Canaán yajtunel Abraham li tsebe, vaʼun kʼot ta skʼanbil ajnil li Isaaque. Melel onoʼox chaʼa, li avie muʼyuk me ti oy xa kʼusi tukʼ chakʼbutik senyail li Jeovae. Akʼo mi jech, jaʼ chal bu chi jxanav batel mi ta jkʼopontik ta orasione xchiʼuk mi chkakʼ jbatik ta beiltasel li ta xchʼul espiritue (Gál. 5:18).
Li orasione tspajes vul oʼonton
5, 6. ¿Kʼusi chakʼ kiltik li orasion la spas Jacob kʼalal skʼan toʼox sta sbaik xchiʼuk Esaue?
5 Li orasione xuʼ tspajes li kʼusi ta jvul-o koʼontontike. Xi la spas orasion li Jacob ta skoj ti chiʼ mi oy kʼusi spasbat yuʼun li xchiʼil ta vachil ti Esaú sbie: «Mucʼul Dios [...] muʼyuc cʼusi la jpas ti jech oy ep slequil avoʼnton ta jtojole, ti lec cʼusi chapas ta jtojole. Cʼalal echʼ jtuchʼ li ucʼum Jordane, muʼyuc cʼusi quichʼoj; jaʼ noʼox jun jnamteʼ quichʼoj. Pero liʼ ta orae, oy xa chaʼvocʼ jvinictac. Avocoluc mu me xavacʼ ochcun ta scʼob li jbanquil Esaue. Yuʼun chixiʼ me chtal stsacun ta pleitoe, jech ta smil li antsetique xchiʼuc li ololetique. Voʼot laj avalbun ta jamal ti lec chicʼot avuʼune. Xchiʼuc laj avalbun noxtoc ti ta to xbol ep jmomnichʼnabtaque, ti jaʼ jech yepal chbatic jech chac cʼu chaʼal yiʼtic ta tiʼnab ti mu stacʼ atele» (Gén. 32:9-12).
6 Li Jacobe chaʼa pʼij onoʼox laj yakʼ sba, jaʼ yuʼun chapaj li skʼop xchiʼuk li sbankile, pe ti kʼusi mas tsots skʼoplale jaʼ ti takʼbat s-orasion yuʼun Jeovae (Gén. 33:1-4). Mi ta jkʼelbetik lek smelolal kʼalal ta jchantik ta Vivlia li kʼusi kʼot ta pasele te chkakʼtik venta ti maʼuk noʼox la skʼan koltael li Jacobe. Te chkakʼtik venta xtok ti xchʼunoj ta sventa li albil Nitilulale xchiʼuk ti laj yalbe kolaval li slekil yoʼonton Diose. ¿Mi oy kʼusi cha xiʼo li voʼote? (2 Cor. 7:5.) Mi jeche, ta me spat avoʼonton ti kʼuyelan la skʼan vokol li Jacobe, yuʼun chakʼ ta ilel ti xuʼ spajes vul oʼonton kʼalal ta jpastik orasione. Te chakʼ kiltik xtok ti maʼuk noʼox skʼan jkʼantik vokol kʼalal ta jpastik orasione, yuʼun skʼan te xkakʼ ta ilel xchʼunel koʼontontik.
Jkʼan jpʼijiltik
7. ¿Kʼu yuʼun la skʼanbe Jeova li Moisés ti akʼo xojtikinbe mas li smantaltake?
7 Ti oy ta koʼontontik ta jlekubtasbetik yoʼonton Jeovae jaʼ me tstij koʼontontik ti akʼo jkʼanbetik pʼijilale. Jech kʼuchaʼal li Moisese chaʼa la skʼanbe Jeova ti akʼo x-akʼbat yil li kʼusitik chapanbil yuʼune, jaʼ xkaltik, li smantaltake. Xi laj yalbee: «Qʼuelavil, laj avalbun ti vuʼun ta xquicʼ [lokʼel ta Egipto] li jchiʼiltaque [...]. Jaʼ yuʼun me ta melel lec chavilune, albun caʼay scotol li cʼusitic chapanbil avuʼune [...]. Jech ta jnaʼ ti lec chavilune» (Éxo. 33:12, 13). Li Moisese tskʼan chojtikinbe mas li smantaltak Jeova sventa tsbeiltas li steklumal Israele, vaʼun takʼbat yuʼun Dios li kʼusi la skʼane.
8. ¿Kʼuxi tskoltautik kʼalal ta jnopbetik lek skʼoplal li kʼusi chal ta 1 Reyes 3:7-14?
8 Jaʼ jech xi la skʼanbe Jeova ek li Davide: «Acʼbun quil li beetic avuʼune» (Sal. 25:4). Jaʼ jech li skerem ti Salomón sbie la skʼan pʼijilal ek sventa spas yuʼun li yabtel ta ajvalilale. Li orasion la spas Salomone lek tajek laj yaʼi li Jeovae, jaʼ yuʼun maʼuk noʼox laj yakʼbe spʼijil, laj yakʼbe skʼulejal xtok xchiʼuk ichʼel ta mukʼ (kʼelo 1 Reyes 3:7-14). Mi vokol chkaʼitik ta spasel li jmoton jtaojtik ta tsobobbaile, jkʼanbe jpʼijiltik li Diose xchiʼuk bikʼit xkakʼ jbatik. Jaʼ me tskoltautik ti akʼo xkojtikintik leke xchiʼuk ti akʼo jta li jpʼijiltik chtun kuʼuntik sventa jnaʼtikuk spasel li kʼusitik jbainojtike.
Ta sjunuluk koʼontontik jpastik orasion
9, 10. ¿Kʼusi alakʼik sba laj yal ta sventa oʼontonal li Salomón kʼalal la spas orasion sventa chakʼbe ta skʼob Dios li chʼulnae?
9 Mi ta jkʼantik akʼo xaʼi Jeova li j-orasiontike skʼan me ta sjunul koʼonton jpastik. Li ta kapitulo 8 ta Baʼyel yuʼun Reyese te ta jtatik jun orasion ti ta sjunul yoʼonton la spas Salomón ti jaʼ sventa tskʼupil kʼopta Jeovae, taje jaʼo la spas kʼalal laj yakʼbe ta skʼob Dios li chʼulna ta Jerusalén ta sjabilal 1026 kʼalal maʼuk toʼox jkʼakʼaliltike. Li Salomone la skʼupil kʼopta Dios ta yeloval epal krixchanoetik kʼalal laj xaʼox yichʼ akʼel ta Batsʼi Lekil Chʼul Kuarto li xkaxail smantal Diose, vaʼun li tok yuʼun Jeovae la snojes li chʼulnae.
10 Kʼalal ta jkʼelbetik skʼoplal ti kʼuyelan la spas orasion Salomone, ep te ta jtatik ti kʼuyelan chalbe skʼoplal oʼontonale. Jech kʼuchaʼal liʼe, li ajvalile laj yal ti jaʼ noʼox Jeova xojtikinbe yoʼonton krixchanoetike (1 Rey. 8:38, 39). Xchiʼuk te laj yal ti oy to spatobil yoʼonton li jpas muliletik mi ta «scotol sjol yoʼntonic» tsutes yoʼontonike. Kʼalal chchuke batel yuʼun yajkontra li j-israeletike xuʼ me spat lek yoʼontonik kʼalal tspasik orasione, yuʼun snaʼojik ti ch-aʼibat li vokol tskʼanbeik mi tukʼ «[yoʼontonik] ta stojol li Mucʼul [Diose]» (1 Rey. 8:48, 58, 61). Jamal lek xvinaj ti skʼan xlokʼ ta koʼontontik li orasion ta jpastike.
¿Kʼuxi xuʼ xlekub-o j-orasiontik li salmoetike?
11, 12. ¿Kʼusi ta jchantik ta sventa ti kʼusi la spas jun jleví vinik ti mu xuʼ yuʼun xbat yichʼ ta mukʼ Dios ta chʼulnae?
11 Mi ta jchantik li salmoetike xuʼ me xlekub ti kʼuyelan ta jpastik orasione xchiʼuk tskoltautik sventa oyuk smalael kuʼuntik li stakʼobil chakʼ Diose. Jnopbetik skʼoplal jun jleví ti ikʼbil batel ta yan lume. Oy ta yoʼonton chbat ta xchʼulna Jeova, pe oy van kʼuk sjalil ti muʼyuk xuʼ yuʼune. Jaʼ yuʼun xi kʼejine: «¿Cʼu yuʼun ti ep chcʼunib coʼntone? ¿Cʼu yuʼun ti ep chcacʼbe sloʼil conʼntone? Yuʼun jaʼ noʼox jpatoj coʼnton o ta stojol li Diose, jaʼ li Dios ti mu xlaj coʼnton ta yalbel slequilale, yuʼun jaʼ jcoltavanej cuʼun, jaʼ Dios cuʼun» (Sal. 42:5, 11; 43:5).
12 ¿Kʼusi xuʼ jchantik ta stojolal li jleví vinike? Mi oy junuk velta xi j-och ta chukel ta skoj li mantale xchiʼuk ti mu stakʼ jtsob jbatik xchiʼuk li kermanotaktike, skʼan oyuk smalael kuʼuntik li kʼusi tspas Dios ta jtojolaltike (Sal. 37:5). Kʼalal ta jmalatik sventa xuʼ jtsob jbatik yan velta yuʼun li Diose xchiʼuk li steklumale, jnoptik li muyubajel yakʼojbutik ti chi jtun ta stojolale xchiʼuk jkʼanbetik ti akʼo xakʼ kipaltik sventa xkuch batel kuʼuntike.
Oyuk xchʼunel koʼontontik kʼalal ta jpastik orasione
13. ¿Kʼu yuʼun skʼan oyuk xchʼunel koʼontontik jpastik orasion kʼuchaʼal chal Santiago 1:5-8?
13 Kʼusiuk ti avokole, oyuk xchʼunel avoʼonton kʼalal cha pas orasione. Mi yakal chichʼ akʼel ta preva li stukʼil avoʼontone, chʼuno li tojobtasel chakʼ yajtsʼaklom Cristo Santiagoe: kʼalal cha pas orasione pato lek avoʼonton ti chakʼbot apʼijil Jeova sventa stsal avuʼun li prevaetik cha nuptane (kʼelo Santiago 1:5-8). Li Diose snaʼoj li kʼusitik ta jvul-o koʼontontike, jaʼ yuʼun ta me sbeiltasutik xchiʼuk tspat koʼontontik ta xchʼul espiritu. Oyuk lek xchʼunel avoʼonton xa kʼopon, «tscʼan mu chibuc [avoʼonton]», chʼamo me li beiltasel chakʼ chʼul espiritue xchiʼuk li tojobtaseletik ta sKʼope.
14, 15. ¿Kʼuxi jnaʼojtik ti ta xchʼunel yoʼonton la spas orasion li Anae xchiʼuk ti te vinaj xchʼunel yoʼonton li ta stalelale?
14 Li jleví vinik ti Elcana sbie oy chaʼvoʼ yajnil, june jaʼ Ana ti ta xchʼunel yoʼonton la spas orasione xchiʼuk ti te vinaj xchʼunel yoʼonton li ta stalelale. Mu snaʼ x-alaj xchiʼuk chlabanat yuʼun Penina —li yan yajnil Elcanae—, ti jaʼ oy jayvoʼuk yalabe. Jun velta kʼalal jaʼo te oy ta chʼulna pasbil ta nukule, li Anae te laj yalbe ta melel Jeova ti chakʼbe li yol sventa xtun ta stojolal mi akʼbat xchiʼin junuk yole. Kʼalal yakal tspas orasione chnikʼ tajek li yanal yee; jaʼ yuʼun la snop li bankilal pale Elí ti chyakube. Kʼalal laj yakʼ venta ti muʼyuk bu chyakube, xi laj yalbee: «Li Dios yuʼun Israele acʼo yacʼbot ti cʼusi laj acʼanbee». Akʼo mi mu snaʼ kʼuxi chkʼot ta pasel taje, oy lek xchʼunel yoʼonton ti chtakʼbat kʼusi ora li s-orasione, jaʼ yuʼun «muʼyuc xa laj yat yoʼnton» (1 Sam. 1:9-18).
15 Li Anae vokʼ jun yol ti Samuel laj yakʼbe sbie. Kʼalal laj yikta xchuʼ li yole bat yakʼ ta chʼulna pasbil ta nukul sventa tspasbe yabtel Jeova (1 Sam. 1:19-28). Mi ta jnopbetik lek smelolal li orasion la spas li ants ti yichʼoj ta mukʼ Dios taje, te me chkakʼtik venta kʼuxi xuʼ xlekub batel kuʼuntik li j-orasiontike xchiʼuk te me chkaʼibetik smelolal ti stakʼ tsalel li at-oʼonton chakʼ vokolil mi ta sjunul koʼonton jchʼunojtik ti tstakʼbutik Jeova li kʼusi ta jkʼanbetike (1 Sam. 2:1-10).
16, 17. ¿Kʼusi kʼot ta pasel yuʼun Nehemías ta skoj ti ta xchʼunel yoʼonton la spas orasione xchiʼuk ti te vinaj xchʼunel yoʼonton li ta stalelale?
16 Li Nehemías ti jaʼ jun yajtunel Jeova ti kuxi ta siglo 5 kʼalal maʼuk toʼox jkʼakʼaliltike, ta xchʼunel yoʼonton la spas orasion ek xchiʼuk te vinaj xchʼunel yoʼonton li ta stalelale. Xi la skʼanbe li Jeovae: «Mucʼul Dios, ta jcʼanbot vocol ti acʼo avaʼibun jcʼop ti liʼ chajcʼopanot, vuʼun li avajtunelune, xchiʼuc acʼo avaʼibe scʼop li avajtuneltac liʼ chascʼopanicote, ti tscʼan chayichʼicot ta muqʼue. Ta jcʼanbot vocol ti lec cʼusi acʼo cʼotuc ta pasel ta jtojol, vuʼun li avajtunelune, xchiʼuc ti acʼo cʼuxucun ta yoʼnton li ajvalile». ¿Buchʼu li ajvalil laj yalbe skʼoplale? Jaʼ li ajvalil ta Persia ti Artajerjes sbie, ti jaʼ te ch-abtej ta j-akʼ yaʼyel tsʼusub li Nehemías ta pasobmantale (Neh. 1:11).
17 Oy xa ta sjayibal kʼakʼal ta sjunul yoʼonton tspas orasion li Nehemiase, yuʼun laj yaʼi ti «toj ep svocolic, toj ep qʼuexlal chaʼyic» li j-israeletik ti kolik lokʼel tal ta Babiloniae, «yuʼun li coralton yuʼun Jerusalene laj yichʼ jinesel» (Neh. 1:3, 4). Ti kʼusi albat ta sventa taje, maʼuk noʼox jech ti kʼuyelan snopoje, yuʼun albat yuʼun ajvalil Artajerjes ti xuʼ xbat ta xchaʼvaʼanbel smuroaltak li Jerusalene (Neh. 2:1-8). Jech xtok, ta ora noʼox tsuts li abtelale. Li tukʼil vinik taje laj yichʼ takʼbel li vokol la skʼane, yuʼun ta xchʼunel yoʼonton la spas orasion xchiʼuk ti jaʼ mas laj yalbe skʼoplal li yichʼel ta mukʼ Jeovae. ¿Mi jaʼ jech xuʼ xichʼ alel ta jtojolaltik ek?
Mu me jchʼay ta joltik ta skʼupil kʼoptael Dios xchiʼuk ti jtojbetik ta vokole
18, 19. ¿Kʼusi srasonal oy kuʼuntik ta skʼupil kʼoptael li Jeovae xchiʼuk ti jtojbetik ta vokole?
18 Kʼalal ta jpastik orasione skʼan me mu xchʼay xkaʼitik ta skʼupil kʼoptael li Jeovae xchiʼuk ti jtojbetik ta vokole. Toj ep srasonal oy kuʼuntik ta stojel ta vokol li yajtunelutik Diose. Jech kʼuchaʼal liʼe, kʼalal la snopbe skʼoplal David li ajvalilal yuʼun Jeovae jaʼ tijbat-o yoʼonton ta skʼupil kʼoptael (kʼelo Salmo 145:10-13). ¿Kʼusi xuʼ xkaltik li ta jtojolaltike? ¿Mi chakʼ ta ilel j-orasiontik ti ep sbalil chkiltik li jmoton jtaojtik ta yalel batel li Ajvalilal yuʼun Jeovae? Li kʼusi chal salmoetike xuʼ me jaʼ skoltautik ta stojbel tajek ta vokol Dios li tsobajeletik xchiʼuk mukʼta tsobajeletik kuʼuntike (Sal. 27:4; 122:1).
19 Li stojbel ta vokol Jeova ti toj lek xkil jbatik xchiʼuke jaʼ me tstij koʼontontik ti akʼo ta sjunuluk koʼonton jpastik orasione xchiʼuk ti akʼo jech xlokʼ ta koʼontontik kʼuchaʼal li jtsʼibajom yuʼun salmo ti xi laj yale: «Cajval, ta xcal alequilal ta stojol li yantic lumetique; ta jqʼuejinta alequilal ta stojol li yantic banamile. Yuʼun toj mucʼ li cʼuxubinel avuʼune; xʼechʼ to smucʼul jech chac cʼu chaʼal li vinajele; staoj cʼalal to vinajel li cʼusitic melel chavale. Dios cuʼun, ichʼbilucot ta mucʼ cʼalal to ta vinajel; nojuc ta alequilal sbejel li banamile» (Sal. 57:9-11). ¡Toj kʼupil xa noʼox sba li kʼusi lokʼ ta oʼontonal taje! ¿Mi mu jechuk ti xuʼ jaʼ xlekub-o j-orasiontik li kʼusitik chal Salmo ti chkʼot ta oʼontonale?
Kichʼtik ta mukʼ Dios kʼalal ta jpastik orasione
20. ¿Kʼuxi laj yakʼ ta ilel María ti yichʼoj tajek ta mukʼ Diose?
20 Skʼan onoʼox me xkichʼtik ta mukʼ Dios kʼalal ta jpastik orasione. Kʼalal mu toʼox jaluk yechʼel ti laj yaʼi María ti chkʼot ta smeʼ Mesiase, xi laj yale: «Li coʼntone chalbe ep slequilal li Diose. Toj xcuxet noʼox coʼnton ta stojol li Diose, jaʼ li Jcoltavanej cuʼune» (Luc. 1:46, 47). Li kʼusitik laj yal ti xkoʼolajtik kʼuchaʼal laj yal li Ana kʼalal ay yakʼ li neneʼ Samuel ta chʼulna pasbil ta nukule, chakʼ ta ilel ti yichʼoj ta mukʼ Dios li Mariae. ¡Jaʼ yuʼun laj yichʼ tʼujel ta smeʼ Jesús chaʼa! ¿Mi xuʼ jech xlokʼ ta avoʼonton yalel ta aorasion kʼuchaʼal laj yale?
21. ¿Kʼuxi laj yakʼ ta ilel Jesús ti ta xchʼunel yoʼonton la spas orasione xchiʼuk ti yichʼoj lek ta mukʼ Diose?
21 Jaʼ jech ta xchʼunel yoʼonton la spas orasion ek li Jesuse xchiʼuk yichʼoj lek ta mukʼ Dios. Jech kʼuchaʼal liʼe, kʼalal mu toʼox chchaʼkuxes li Lazaroe, «la stoy muyel sat ta toyol, jech laj yal: “Tati, colaval ti chavaʼibun jcʼope. Li vuʼune ta jnaʼ ti scotol cʼacʼal chavaʼibun jcʼope”» (Juan 11:41, 42). ¿Mi jaʼ jech ta xchʼunel avoʼonton cha pas orasion xchiʼuk ti chavichʼ ta mukʼ Diose? Mi cha kʼelbe lek skʼoplal li orasion ti laj yakʼ ta chanel Jesuse, te chavakʼ venta ti jaʼ mas toj tsotsik skʼoplal li xchʼultajesbel sbi Jeovae, ti chtal li Ajvalilal yuʼune xchiʼuk li skʼoteb ta pasel kʼusi tskʼan yoʼontone (Mat. 6:9, 10). Li avi une nopo li ta aorasiontake. ¿Mi chakʼ ta ilel ti solel oy tajek ta avoʼonton li Ajvalilal yuʼun Diose, li kʼusi tskʼan yoʼontone xchiʼuk li xchʼultajesbel sbie?
22. ¿Kʼu yuʼun jpatoj lek koʼontontik ti chakʼ stsatsal koʼontontik ta xcholel lekil aʼyej li Jeovae?
22 Kʼalal chilik kontrainel li yajtuneltak Diose o ti chil prevaetike ta skʼanbeik stsatsal yoʼontonik. Li ta baʼyel sigloe albatik yuʼun Sanedrín li Pedro xchiʼuk Juan «ti mu xa me xchanubtasvanic ta sventa li Jesuse», pe tsots yoʼonton laj yalik ti muʼyuk chikta sbaike (Hech. 4:18-20). Kʼalal koltaatik lokʼel li jtakboletike, bat xchapbeik yermanotakik li kʼusi la snuptanike. Vaʼun ti kʼuyepal te tsobolike la skʼanbeik vokol Dios sventa tsotsuk yoʼonton xcholik li aʼyeje. Ta anil noʼox takʼbatik, yuʼun «scotolic inoj ta yoʼntonic stsatsal ti Chʼul Espiritue. Jech jamal laj yalic batel li scʼop Diose; muʼyuc xiʼel laj yaʼyic». ¡Solel xmuyubaj van tajek laj yaʼiik! (Kʼelo Hechos 4:24-31.) Ti kʼusi kʼot ta pasel ta skoje jaʼ ti toj echʼ xa noʼox ep pasik ta jchʼunolajele. Jaʼ jech li ta jtojolaltik eke, xuʼ me xakʼ stsatsal koʼontontik li orasion ti chtun kuʼuntik ta xcholel li lekil aʼyeje.
Lekubuk batel mas avuʼun li aorasione
23, 24. 1) ¿Kʼusi yan svinajeb ti jaʼ chlekub-o mas j-orasiontik li skʼelel xchiʼuk li xchanel Vivliae? 2) ¿Kʼusi anopoj cha pas sventa cha lekubtas li aorasione?
23 Ep jech vinajem ti jaʼ chlekub-o mas j-orasiontik li skʼelel xchiʼuk li xchanel Vivliae. Jaʼ me jech jpastik kʼuchaʼal Jonase, kakʼtik venta ti jaʼ noʼox stuk xuʼ tskoltautik li Jeovae (Jon. 2:1-10). Mi oy bu jpasojtik tsatsal mulil xchiʼuk ti jkʼanojtik xa koltael ta stojolal moletike, li orasionetik spasoj Davide jaʼ me tskoltautik ta yalbel Dios ti jsutesoj xa koʼontontike (Sal. 51:1-12). Bakʼintik xtoke xuʼ van jkʼupil kʼoptatik Jeova kʼuchaʼal la spas Jeremiase (Jer. 32:16-19). Mi yakal cha saʼ buchʼu cha nupun achiʼuke, nopbo skʼoplal li orasion te ta jtatik ta kapitulo 9 ta Esdrase, vaʼun albo Dios ti kʼuyelan chavaʼi abae. Taje jaʼ me tskoltaot ti anopoj cha chʼunbe li smantal Diose xchiʼuk ti jaʼ noʼox cha nupun achiʼuk li buchʼu «xchʼunoj Cajvaltique» (1 Cor. 7:39; Esd. 9:6, 10-15).
24 Mu me xavikta skʼelel xchiʼuk xchanel li Vivliae. Saʼo ti kʼusi xuʼ xaval ta aorasione, mi jaʼo xa vokolet ta skʼanbel koltael li Diose, mi cha kʼupil kʼopta o mi cha tojbe ta vokol. Mi chavakʼ persa ta slekubtasel li aorasione, naʼo me lek ti mas nopol chavaʼi aba ta stojolal Jeova jujun kʼakʼale.
¿Kʼusi cha takʼ?
• ¿Kʼu yuʼun skʼan jsaʼtik xchiʼuk jchʼuntik li beiltasel chakʼ Diose?
• ¿Kʼusi skʼan stij koʼontontik ta skʼanbel jpʼijiltik li Diose?
• ¿Kʼuxi xuʼ xlekub-o j-orasiontik li slivroal Salmoetike?
• ¿Kʼu yuʼun skʼan ta xchʼunel koʼontontik jpastik orasion xchiʼuk ti kichʼojtikuk ta mukʼ Diose?
[Sjakʼobiltak sventa xchanobil]
[Lokʼol ta pajina 8]
Li yajtunel Abrahame la skʼanbe koltael li Diose. ¿Mi jaʼ jech cha pas ek?
[Lokʼol ta pajina 10]
Li yichʼel ta mukʼ Jeova ta kutsʼ kalaltike xuʼ me xlekub-o li j-orasiontike