God i Rili Kea Long Yumi—?Olsem Wanem Yumi Save?

?SIPOS God i lavem yumi, from wanem plante man oli stap safa? Hemia wan kwestin we i impoten tumas, we ol man oli stap tingting long hem blong plante taosen yia finis. Maet yu yu agri se sipos yu lavem wan man, yu no wantem se man ya i safa, mo bambae yu traem blong givhan long hem sipos hem i kasem trabol. Taswe, plante man oli ting se God i no kea long yumi, from we i gat plante trabol long wol ya we i mekem ol man oli safa. Taswe, i impoten we fastaem yumi tokbaot sam samting we oli pruvum se God i rili lavem yumi, mo se hem i kea long yumi.

Ol Samting We God i Wokem Oli Soemaot Se Hem i Gat Lav

Jeova God i “mekem skae mo graon mo solwota, mo evri samting we i stap long wol ya.” (Ol Wok 4:24) Sipos yumi tingting dip long ol samting we Jeova i wokem, bambae yumi faenemaot se hem i kea long yumi. Tingbaot ol samting we oli mekem yu yu harem gud mo glad tumas. ?Yu yu laekem ol gudfala kakae? Sipos Jeova i wantem, hem i naf blong wokem wan kaen kakae nomo we i save givhan long yumi blong stap laef. Be nogat, hem i wokem plante defdefren kaen kakae we tes blong olgeta i mekem yumi harem gud tumas. Long sem fasin, Jeova i flasem wol ya wetem plante defdefren tri, flaoa, mo ples we oli mekem se yumi glad blong stap laef, mo we oli pulum tingting blong yumi.

Mo tu, tingbaot olsem wanem God i wokem yumi. Blong stap laef, i no nid blong yumi laf long samting we i fani, harem gud long ol miusik, mo laekem ol naesfala samting, be evri samting ya oli ol presen blong God we oli mekem se yumi harem gud moa long laef blong yumi. Mo tingbaot fasin joengud blong yu wetem ol narafala. ?Hu i no glad blong joengud wetem ol gudfala fren, mo blong putum han blong hem i goraon long wan we hem i laekem tumas? !Fasin ya we yumi naf blong lavem narafala i wan presen blong God ya we i lavem ol man! God i wokem ol man long fasin we oli naf blong lavem narafala, taswe lav i mas wan fasin blong God.

Baebol i Mekem Yumi Sua Se God i Lavem Yumi

Baebol i talem se God i stamba blong lav. (1 Jon 4:8) Ol samting we hem i wokem oli soemaot lav ya, mo Baebol tu we i Tok blong hem, i soemaot samting ya. Olsem nao, Baebol i givim sam advaes we oli givhan long yumi blong gat  gudfala helt, i pulum yumi blong bos long ol fasin blong yumi, mo i givim woning long saed blong fasin blong drong mo kakae bitim mak.​—1 Korin 6:9, 10.

Mo Baebol i givim waes advaes tu long fasin blong man blong joengud wetem narafala, i pulum yumi blong lavlavem yumi, mo blong soem respek, kaen fasin mo ona long ol narafala. (Matiu 7:12) Baebol i agensem ol fasin mo tingting we oli mekem se ol man oli safa, olsem griri fasin, tokbaot man, jalus, slip wetem woman no man blong narafala, mo kilim man i ded. Sipos olgeta man evriwan oli folem ol nambawan advaes blong Baebol long laef blong olgeta, i sua se bambae i no gat plante man long wol we oli safa.

Be bigfala samting we God i mekem blong soemaot lav, hemia taem hem i givim Pikinini blong hem, Jisas, olsem wan ransom blong pemaot olgeta man. Jon 3:16 i talem se: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” Taswe Jeova i mekemrere rod finis blong tekemaot ded blong olwe wetem olgeta samting we oli stap mekem man i safa.​—1 Jon 3:8.

I klia se i gat plante samting we oli pruvum se Jeova i lavem yumi. Taswe, i stret blong talem se God i no glad blong luk we yumi stap safa. Bambae hem i tekem aksen blong finisim olgeta samting we oli stap mekem ol man oli safa. Yumi no nid blong wari long saed ya, from we Baebol i talem stret long yumi olsem wanem God bambae i mekem samting ya.

[Tok blong pija long pej 4]

Fasin ya blong lavem ol narafala i wan presen we i kam long God ya we i gat lav