Dirava ese Ita Ia Laloa Edena Bamona Unai Ita Diba?

TAUNIMANIMA ese lagani momo lalonai idia laloa bada henanadai badana ta be inai: Bema Dirava be ita ia lalokau henia, dahaka dainai hisihisi be momo? Bema oi be ta oi lalokau henia, oi ura lasi ia hisihisi, eiava bema metau ia davaria, reana oi durua toho. Unai dainai, momo be tanobada ai hisihisi idia itaia neganai, idia laloa Dirava ese ita ia laloa lasi. To, gau haida ese idia hamomokania Dirava ese ita ia lalokau henia bona laloa bada, unai gaudia mani ita herevalaia guna.

Havaraia Gaudia ese Idia Hamomokania Dirava be Lalokau

Iehova Dirava be “guba bona tanobada bona davara bona idia lalonai noho gaudia ibounai ia karaia.” (Kara 4:24) Iehova ese ia havaraia gaudia ita lalohadailaia neganai, ita diba Iehova ese ita ia laloa. Oi idia hamoalea gaudia mani oi laloa. Aniani namona oi ura, ani? Iehova be aniani tamona ia karaia, eda mauri ia durua totona, a? Lasi, Iehova be aniani idauidau ia karaia, unai amo edia mamina idauidau ita moalelaia. Unai hegeregerena, Iehova ese au, flaoa bona ororo mai hairaidia idauidau ia karaia, unai amo iseda mauri ita moalelaia diba.

Dirava ese ita ia karaia dalana mani oi laloa danu. Ita kiri, miusiki ita moalelaia, bona gau idauidau edia hairai ita moalelaia diba​—ena be unai gaudia be ita idia durua lasi ita mauri noho totona, to idia be Dirava ena harihari gaudia bona ita idia durua eda mauri ita moalelaia totona. Danu, tau ta tura henia karana mani oi laloa. Ita lalokau henia turana namona ta ida ita herevahereva bona rosia neganai ita moale, ani? Momokani, ma ta ita lalokau henia karana be taunimanima ia lalokau henia Diravana ena harihari gauna! Dirava ese lalokau be taunimanima edia lalona dekenai ia atoa dainai, ita diba lalokau be Dirava ena kara ta.

Baibel Ia Gwau Dirava be Lalokau

Baibel ia gwau Dirava be lalokau. (1 Ioane 4:8) Havaraia gaudia sibona lasi, to danu, Baibel ese ia hahedinaraia Dirava be lalokau. Hegeregere: Baibel ena hakaua herevadia be ita idia durua ita gorere lasi, ita ia hagoadaia iseda  goada hegeregerena gaukara ta ita karaia, bona ita ia hadibaia kekero bona mataganigani karadia be taravatu.​—1 Korinto 6:9, 10.

Danu, Baibel ena sisiba namona be ita ia durua ma haida ita tura henia, lalokau henia bona matauraia totona. (Mataio 7:12) Baibel be hisihisi idia havaraia karadia​—mataganigani, maumau, mama, heudahanai bona ala-ala​—ia taravatua. Bema taunimanima ibounai be Baibel ena sisiba namodia idia badinaia, tanobada ibounai dekenai hisihisi be lasi.

To Dirava ena lalokau ia hahedinaraia dalana badana be inai: Ena Natuna Iesu ia siaia ena mauri davalaia boubouna do ia henia taunimanima totona. Ioane 3:16 ia gwau: “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” Unai dainai, Iesu amo Iehova be mase bona hisihisi idauidau do ia haorea.​—1 Ioane 3:8.

Momokani, gau momo ese idia hahedinaraia goevagoeva, Iehova be ita ia lalokau henia. Unai dainai, eda hisihisi ia itaia neganai ia moale lasi. Ia ese kara ta do ia karaia, hisihisi ia haorea totona. Unai ita lalohadailaia be anina lasi​—Dirava ese hisihisi do ia kokia dalana be Baibel ese ita dekenai ia gwauraia hedinarai.

[Foto rau 4 ai]

Ma ta ita lalokau henia karana be lalokau Diravana ena harihari gauna