Nzambi Kekudibanzaka Mpenza​—Mutindu Beto Mezaba Yo

KANA Nzambi kezolaka beto, sambu na nki bampasi kele mingi? Yai kele ngyufula mosi ya ntama yina bantu mekudiyulaka banda bamvula mingi, kansi yina kele mfunu mingi. Ziku nge kendima nde kana nge kezolaka muntu mosi, nge tazola ve nde yandi mona mpasi, mpi kana yandi kele na mpasi nge tasala yonso sambu na kusadisa yandi. Yo yina, bantu mingi keyindulaka nde sambu bampasi kele mingi na nsi-ntoto, yo fwete vanda nde Nzambi kekudibanzaka ve sambu na beto. Yo yina, yo kele mfunu nde beto tadila ntetentete banzikisa yina kemonisa nde Nzambi kezolaka beto mpenza mpi kekudibanzaka sambu na beto.

Lugangu Kemonisaka Zola ya Nzambi

Yehowa Nzambi “muntu salaka zulu, ntoto, nzadi-mungwa, ti bima yonso yina kele na yo.” (Bisalu 4:24) Ntangu beto keyindululaka bima yina Yehowa megangaka, ya kyeleka beto kendimaka mpenza nde yandi kekudibanzaka sambu na beto. Mu mbandu, yindula bima yina kepesaka nge kyese. Keti nge kezolaka madya ya ntomo? Yehowa lendaka kupesa beto kaka madya ya mutindu mosi sambu na kutanina luzingu na beto. Kansi, yandi megangaka madya mingi ya mutindu na mutindu sambu na kusepedisa ludimi na beto. Mutindu mosi, sambu na kukumisa ntoto kitoko kuluta, Yehowa kusalaka banti, bintuntu, mpi banseke ti bamfinda mingi ya kitoko sambu luzingu kuvanda mbote mpi kusepedisa beto.

Beto tadila mpi mutindu beto mesalamaka. Makuki yina beto kele na yo ya kusepela na bima, na miziki, mpi na kitoko ya bima, kele ve mfunu mingi sambu na kulanda na kuvanda na luzingu: Yonso yai kele makabu, ya ketomisaka luzingu na beto, yina mekatukaka na Nzambi. Yindula mpi bangwisana na nge ti bantu yankaka. Nani kezolaka ve kuvanda ti banduku ya zola to kuyamba muntu yina yandi kezolaka mingi? Ya kyeleka, makuki ya kuzola kele, na yo mosi mpamba, dikabu yina mekatuka na Nzambi yina kezolaka! Sambu Nzambi megangaka bantu ti makuki ya kuzola, kikalulu yai fwete vanda kitini ya kimuntu ya Nzambi.

 Biblia Kendimisaka Beto Zola ya Nzambi

Biblia kesonga beto nde Nzambi kele zola. (1 Yoane 4:8) Zola na yandi kemonanaka kaka ve na lugangu, kansi yo kemonanaka mpi na Ndinga na yandi, Biblia. Mu mbandu, Biblia kepesaka bantuma ya kesadisaka na kuvanda ti mavimpi ya mbote, kesyamisaka bukatikati na mambu yonso, mpi kepesaka lukebisu na yina metala kulauka malafu mpi kudya mbiki.​—1 Korinto 6:9, 10.

Dyaka, Biblia kepesaka bandongisila ya mayele na yina metala kuvanda na bangwisana ya mbote ti bankaka, mpi kesyamisaka beto na kuzolana, na kusadila bantu yankaka mambu ti luzitu, lukumu, mpi mawete. (Matayo 7:12) Yo kebuyisaka bikalulu mpi bankadilu yina kepesaka mpasi, disongidila bwimi, songi-songi, bilula-lula, pite, mpi kufwa bantu. Kana konso muntu kesala kikesa na kuzinga na kuwakana ti bandongisila ya mbote yina kele na Masonuku, ntembe kele ve nde bampasi tavanda mingi ve na nsi-ntoto ya mvimba.

Kansi, mutindu ya kuluta nene yina Nzambi kumonisaka zola na yandi kuvandaka mutindu yandi pesaka Mwana na yandi, Yezu, sambu na kusumba bantu. Yoane 3:16 ketuba nde: “Nzambi me lutaka kuzola bantu yonso; yo yina yandi pesaka bo mwana mosi yina kele na yandi, sambu konso muntu yina me ndima yandi na ntima na yandi, yandi kufwa ve, kansi yandi kuvanda na moyo ya mvula na mvula.” Na kusalaka mutindu yina, Yehowa mebakaka dezia ngidika ya kutula nsuka ya kimakulu na lufwa mpi na konso mpasi.​—1 Yoane 3:8.

Ntembe kele ve nde banzikisa kele mingi ya kemonisa nde Yehowa kezolaka beto. Yo yina, yo kele pwelele nde yo kepesaka yandi ve kyese ntangu yandi kemonaka nde beto kemona mpasi. Yandi tasala dyambu mosi sambu na kumanisa bampasi. Yo kele mfunu ve nde beto kudiyula bangyufula mingi-mingi sambu na dyambu yai​—Biblia kesonga beto na sikisiki yonso mutindu Nzambi tamanisa bampasi.

[Kifwanisu ya kele na lutiti 4]

Makuki ya kuzola kele dikabu yina mekatuka na Nzambi yina kezolaka