Huku Wasuka Umwe Tyili Nonthue Oñgeni Tuetyinoñgonoka

ELI epulo limwe ekulu, liakolela ovanthu vehole okulinga mokueenda kuomanima omanyingi-nyingi, liati: Inkha Huku una oluembia nonthue, oityi kuakalela ononkhumbi ononyingi? Tyipondola ove utavela okuti inkha uhole omunthu umwe, kuhande amone ononkhumbi. Inkha omunthu oo umona emone, ove wovola okumukuatesako. Ngotyo, ovanyingi vasoka okuti ouye weyula ononkhumbi ononyingi, mokonda Huku kasukile nonthue. Anthi, tyakolela nkhele tete tutalei etyi tyilekesa okuti tyotyili Huku una oluembia nokuasuka nonthwe.

Aviho Viaetuako Vilekesa Oluembia lua Huku

Jeova Huku Oe “watunga eulu noohi, nelunga, novipuka aviho vikahimo.” (Atos 4:24) Tyina tutala ovipuka Jeova atunga, tuimbuka okuti tyotyili oe wasuka nonthue. Nkhele soka, konthele yovipuka vikuetela ehambu. Okuti ove uhole okulia kuapepa? Jeova ankho upondola okutuavela vala okulia kwike pala okutekula omuenyo wetu. Anthi, oe wetulingila okulia kuelikalaila kuapepa nawa pala ehambu lietu. Tupu, Jeova wafiwiasa oohi nomiti vielikalaila, no nonthemo mbelikalaila, novipuka ovikuavo viehiwa okuvitala, opo tukale nomuenyo wehambu.

Tupu, tala onkhalelo tuatungwa. Onkhalelo yetu yokutala ovipuka vihambukiswa, nokutehelela oviimbo oviwa, nokutala ovipuka oviwa, kayesukisile pala okutekula omuenyo—mahi aviho ovio Huku wetuavela vio opo tukale nehambu. Pahe soka koupanga wove na vakuenyi. Olie uhehole oupanga omuwa nomapanga omawa ine okuhumbakanwa na una tuhole unene? Tutyihole, mokonda ohole otyituwa tuapewa na Huku woluembia! Mokonda Huku  watunga ovanthu nepondolo liokukala nohole, otyituwa otyo tyatuka ku Huku.

Ombimbiliya Itulekesa Nawa Oluembia lua Huku

Ombimbiliya itupopila okuti Huku oluembia. (1 João 4:8) Oluembia luae kalumonekela vala kovipuka aetako, tupu lumonekela Mondaka yae, Ombimbiliya. Nkhele tala, Ombimbiliya ituavela ehongolelo lituetela ouwa, itulonga okupola pokati kovipuka aviho, nokutulondola konthele yokunwa unene nokulia unene.—1 Coríntios 6:9, 10.

Ombimbiliya tupu ituavela onondonga onongwa konthele yoñgeni tuna okukala na vakuetu. Itutuma okukala nohole kese umwe na mukuetu, nehumbilo, nokankhenda. (Mateus 7:12) Ombimbiliya iilika ovituwa no nonkhalelo mbueta ononkhumbi—elungavi, okupopia ovityapi, nonkhi, noumbalehi, nokuipaa. Inkha ovanthu aveho vaovolele okuendela monondonga mbuvasiwa Movihonekwa, ñgeno mouye mutupu ononkhumbi ononyingi.

Anthi, Huku walekesa okuti una oluembia unene, etyi aava Omona wae Jesus, opo ayovole ovanthu. João 3:16 yati: “Huku una oluembia olunene novanthu, waava Omona wae wongunga, opo kese omunthu umukolela ahakahanyaunueko, mahi akakale nomuenyo wahapu.” Ngotyo, Jeova walinga epongiyo opo anyimeko ononkhia no nonkhumbi ambuho.—1 João 3:8.

Tyotyili, kuna ovipuka ovinyigi vilekesa okuti Jeova una oluembia nonthue. Tyayandyuluka nawa, okuti Huku kahambukwa okutala ononkhumbi mbetu. Moluotyo, Huku makamanako ononkhumbi. Onthue katusukisa okusoka unene oñgeni meketyilinga—Ombimbiliya itupopila nawa oñgeni Huku makatyimako ononkhumbi.

[Ehangununo liolutalatu pefo 4]

Epondolo liokukala nohole tuelipewa na Huku woluembia