Dios Ta Realmente Interesá den Nos—Kon Nos Por Sa Esei?

SI DIOS ta stima nos, dikon tin asina tantu sufrimentu? Esei ta un pregunta importante ku hende tin míles di aña ta hasi nan mes. Probablemente bo ta di akuerdo ku si bo ta stima un persona, bo no ke p’e sufri, i si e ta den problema, lo bo trata di yud’é. P’esei, siendo ku tin asina tantu sufrimentu riba tera awe, hopi hende ta pensa ku ta imposibel ku Dios por ta interesá den nos. Pues, laga nos konsiderá promé e pruebanan ku ta mustra ku Dios realmente ta stima nos, esta, ku e ta interesá den nos.

Kreashon Ta Prueba di Dios Su Amor

Yehova Dios ta Esun ku “a traha shelu i tera i laman i tur loke tin den nan.” (Echonan 4:24) Si nos reflekshoná riba Yehova su kreashon, nos mester yega na e konklushon ku e ta interesá den nos. Por ehèmpel, pensa riba e kosnan ku bo tin plaser den dje i ku ta un delisia pa bo. Bo ta gusta un bon kuminda? Yehova por a perkurá solamente ún tipo di kuminda pa tene nos na bida. Pero en bes di esei, el a krea un gran variedat di kuminda ku ta un delisia pa nos paladar. Di mes manera, Yehova a hasi e tera bunita ku un abundansia di palu, flor i paisahe maravioso pa hasi bida dushi i interesante pa nos.

Pensa tambe riba e manera ku el a krea nos. Nos sentido di humor, nos kapasidat di disfrutá di músika i di apresiá kosnan bunita no ta nesesario pa nos biba. Mas bien, nan ta regalonan ku Dios a duna nos pa hasi bida mas dushi. I konsiderá nos relashon ku otro hende. Ken no ta gusta e dushi kompania di bon amigunan òf di haña un brasa serka un persona ku e ta stima mashá? Sí, e kapasidat di stima riba su mes ta un regalo di un Dios ku ta stima! Siendo ku Dios a krea hende ku e kapasidat di stima, e kualidat akí mester ta parti di Dios su personalidat.

Beibel Ta Sigurá Nos di Dios Su Amor

Beibel ta bisa nos ku Dios ta amor. (1 Juan 4:8) Su amor ta bisto no solamente  den su kreashon sino tambe den su Palabra, esta, Beibel. Por ehèmpel, Beibel ta duna nos guia ku ta kontribuí na un bon salú, e ta animá nos pa ta moderá den tur kos i ta spièrta nos kontra buracheria i golosidat.​—1 Korintionan 6:​9, 10.

Ademas, Beibel ta duna konseho sabí enkuanto kon pa trata otro hende; e ta urgi nos pa stima otro i trata otro ku rèspèt, dignidat i bondat. (Mateo 7:12) E ta kondená práktika i aktitut ku ta kousa sufrimentu. Algun ehèmpel di esakinan ta golosidat, hasimentu di redu, envidia, adulterio i asesinato. Si tur hende tabata hasi esfuerso pa sigui e ekselente konsehonan di Beibel, sin ningun duda lo tabatin ménos sufrimentu riba mundu.

Sinembargo, e prueba di mas grandi di Dios su amor ta e echo ku el a duna su Yu, Hesus, pa reskatá humanidat. Juan 3:16 ta bisa: “Dios a stima mundu asina tantu, ku el a duna su Yu unigénito, pa ken ku kere den dje no bai pèrdí, ma tin bida eterno.” Pues, Yehova a hasi loke ta nesesario kaba pa pone un fin pa semper na morto i tur sufrimentu.​—1 Juan 3:8.

Ta klaru anto ku nos tin un abundansia di prueba ku ta mustra ku Yehova ta stima nos. P’esei, ta lógiko pa nos konkluí ku Dios no ta gusta mira nos sufri. Lo e aktua pa kaba ku sufrimentu. Nos no tin ku spekulá riba e asuntu akí, pasobra Beibel ta bisa nos presis kon Dios lo kaba ku sufrimentu.

[Plachi na página 4]

E kapasidat di stima ta un regalo di un Dios ku ta stima