A Dios a Mera el Omekerreu​—Kede Mekerang e Mo Medengelii Tiang

TIANG a meketeketang engdi ngkmal klou a ultutelel el ker, el mla mo betok el telael el rak el lolebedebek er ngii a rechad el kmo: A lsekum a Dios a betik a rengul er kid, e ngera uchul me ngkmal klou a ringel? Kau a ulterekokl el locha kongei el kmo sel lebetik a rengum er a chad, e ngdiak el soam el lomes er ngii el chuarm, me sel omesang el chelebangel a mondai e ngsoam el ngosuir. Sei a uchul me te betok a melatk el kmo a uchul me ngngar er ngii a betok el ringel el ngar tia el beluulechad a Dios el locha diak el lomekerreu er kid. Me ngklou a ultutelel el kot e bo domes aike el olechotel a kmo a Dios a mera el betik a rengul e omekerreu er kid.

A Blebelel a Dios a Omeketakl er a Bltikerreng er Ngii

A Jehovah el Dios a “rirellii a eanged, ma chutem, ma daob, ma ikel rokui el ngara chelsel.” (Rellir 4:​24) Me sel bo dolebedebek aike el bla lrruul a Jehovah e ngngulterekokl el kmal sebeched el mesa el kmo ngomekerreu er kid. El di ua tiang, ka bo molebedebek aike el tekoi el loldeu er a rengum. Kau ngsoam a ungil el kall? A Jehovah a mle sebechel el di meskid a chimo el bedengel a kall el dousbech el melisiich a klengar er kid. Engdi ngbai mileob a diak lemochur a ildisel el kakerous el bedengel a kall el doldeu a rengud er a ungil el telemtemul. Me ngdi osisiu, a Jehovah a dirrek el milsichii tia el chutem er a betok el ungil el kerrekar me a bung me a teletelel a beluu el rullii a klengar el mo sebeched el dmeu a rengud e semeriar er ngii.

Ka dirrek el molebedebek er a teletelel a omebeled. A blekerdeled el sebeched el melechesuar a oltobedechur el tekoi, e sebeched el oldeu a rengud el orrenges a ongngak, e melechesuar a omereng el saul el kirel a klebekelel a tekoi, a tekoi el diak dousbech el olengeseu el melisiich a klengar er kid, engdi ngii el rokui a sengk el mla er a Dios el meruul a klengar er kid el lmuut el mo ungil e klou a deurreng er ngii. Ka kuk molebedebek er a deleuill er kau me a rebebil. Ngtechang a diak el deu a rengul el lobengterir a rungil el sechelil me a lechub e domechull er a chad el sal betik a rengud er  ngii? Tia el kid a sebeched el loubltikerreng a sengk el mla er a betik a rengul el Dios el mei er kid! A uchul me a Dios a milebeterir a rechad el sebechir el loubltikerreng, e le tia el tekoi el ta er a telengtengil a blekerdelel.

A Biblia a Olterekokl a Rengud er a Bltikerreng er a Dios el Mei er Kid

A Biblia a ouchais er kid el kmo a Dios a bltikerreng. (1 Johanes 4:⁠8) Tia el bltikerreng a diak el di lemocholt el oeak a blebelel el merekong e ngdirrek el obeketakl el ngar er a chelsel a Tekingel el Biblia. El di ua tiang, a ulekerael el lebeskid a Biblia a melisiich a ungil el klisichel a bedenged, e ngosukid el mo oba tabesul el uldasu el kirel a bek el tekoi el ngar er ngii er a klengar er kid, e mengelechel el omtok a cheltelaol er a rrom me a nglemokel.​—1 Korinth 6:​9, 10.

A Biblia a dirrek el meskid a mellomes el llach el kirel a deleuill er a rechad, el melisiich er kid el mo kaubltikerreng e mo olecholt a omengull me a blekokuii el mo er a rechad. (Matteus 7:​12) E olekebai a omeruul me a lechub e nguldasu el omekdubech a ringel el ua rechorecherreng me a omelaes me a chelechei me a laokreng me a koadelchad. A lsekum a rokui el chad a melasem el kiei el oltirakl aika el ungil el llach el debetik er a Bades, e ngulterekokl el mo diak el sal klou a ringel er a beluulechad.

Engdi sel kot el olechotel a bltkil a rengul a Dios a sera lodureklii a Ngelekel el Jesus el mo olubet el kirel a klechad. A Johanes 3:16 a melekoi el kmo: “A kllungel a bltkil a rengul a Dios era belulechad a uchul me ngmilsa dital Ngelekel, me tirkel rokui loumera er ngii a diak bo lriid, e bai mo oba diak a ullebengelel klengar.” Me a Jehovah a mla kutmeklii a rolel e a kodall me a rokui el bedengel a ringel a mo mokngemed.​—1 Johanes 3:⁠8.

Ngbleketakl el ngar er ngii a betok el ungil el uchul e a Jehovah a betik a rengul er kid. Ngulterekokl el diak el soal el mesekid el mo chuarm. Ngmo ouedikel el mo merrob a rokui el ringel. Me ngdiak a belkul el dolechedech er tia el tekoi e le Biblia a bleketakl el ouchais er kid el kmo  ngmekerang a Dios a bo lecheroid a ringel.

[Siasing el ngar er a 4 el llel]

Kede oubltikerreng e le ngsengk el mla er a Dios el betik a rengul er kid