Nzapa abi bê ti lo biani na e: E hinga ni tongana nyen?

ASARA angu saki mingi awe si azo ayeke hunda tere ti ala na kota tënë so: Tongana Nzapa andoye e, ngbanga ti nyen pasi ayeke mingi tongaso? Peut-être mo yeke yeda so tongana mo ndoye mbeni zo, mo ye si zo ni abâ pasi pëpe, na tongana lo yeke na yâ ti kpale, mo yeke tara ti mû maboko na lo. Tâ tënë, azo mingi abâ so teti so pasi ayeke mingi na yâ ti dunia, Nzapa alingbi pëpe ti sara mbeni ye ndali ti e. Tongaso, a yeke kota ye ti tene e bâ kozoni kue aye so afa biani so Nzapa andoye e nga lo bi bê ti lo na e.

Aye so Nzapa asara afa ndoye ti lo

Jéhovah Nzapa ayeke “Lo so asara yayu na sese na ngu-ingo nga na aye kue so ayeke na yâ ni”. (Kusala 4:24). Tongana e bâ aye so Jéhovah asara, kite ayeke pëpe so e lingbi ti tene so lo bi bê ti lo na e. Na tapande, gbu li ti mo na ndo ti aye so asara si fini anzere na mo. Mo ye nzoni kobe? Jéhovah alingbi fade gi ti mû na e mara ti kobe oko ti bata na fini ti e, me lo sara tongaso pëpe. Lo sara mara ti akobe nde nde ti tene anzere na yanga ti e. Legeoko nga, Jéhovah asara sese na apendere keke nde nde, akongo, na apendere ndo so asara si gigi anzere na amû ngia na e.

Bâ nga lege so Nzapa asara e na ni. Ngangu so e yeke na ni ti sara atënë ti ngia, ti mä nzerengo ti mozoko, nga ti gonda pendere ti aye ayeke aye so e yeke pëpe gi na bezoin ni si e ngbâ na fini: aye so kue Nzapa amû na e ti tene fini ti e asi singo na anzoni ye. Na ndo ni, gbu li ti mo na ndo ti songo ti mo na amba ti mo. Zo wa la aye ti duti na tere ti anzoni kamarade pëpe? Wala zo wa la aye ti gbu mbeni zo so lo ye lo mingi na kate ti lo pëpe? Biani, ngangu so zo ayeke na ni ti ndoye mba ti lo alondo na Nzapa ti ndoye! Teti so Nzapa asara zo na ngangu ti ndoye mba ti lo, a fa biani so ndoye ayeke mbeni mbage ti sarango ye ti Nzapa.

 Bible adë bê ti e na ndo ti ndoye ti Nzapa

Bible atene na e so Nzapa ayeke ndoye (1 Jean 4:8). A bâ gi ndoye ti Nzapa na yâ ti aye so lo sara pëpe, me a bâ nga ni polele na yâ ti Mbeti ti lo so ayeke Bible. Na tapande, afango ye ti Bible amû maboko na e ti duti na nzoni seni, awa e ti sara ye ahon ndo ni pëpe, na agboto mê ti e na ndo ti nyongo sämba na tengo kobe ahon ndo ni.​—1 aCorinthien 6:9, 10.

Bible amû nga awango ti ndara na ndo ti dutingo ti zo na amba ti lo, na tenengo so a lingbi e ndoye amba ti e, e kpe ala, e ne ala na e sara nzoni bê na ala (Matthieu 7:12). A ke asarango ye na abibe so asara si zo abâ pasi na pekoni: bê ti ye, kpere-kpere, kota bê, gingo koli wala wali nde, na fango zo. Tongana fade zo oko oko asara ngangu ti sara ye alingbi na anzoni wango so ayeke na yâ ti Mbeti ti Nzapa, ka pasi ayeke duti mingi pëpe na yâ ti dunia.

Kota fango ndoye ti Jéhovah na gigi ayeke na mungo Molenge ti lo, Jésus, tongana ngere so a futa ti zi azo. Jean 3:16 atene: “Nzapa andoye tâ azo ti dunia so mingi si lo mû gi oko Molenge ti lo ndali ti ala, si zo kue so amä na bê na lo, a lingbi ti futi lo pëpe, me lo wara fini ti lakue lakue.” Tongaso, Jéhovah aleke ti zi biani biani kui na apasi nde nde kue.​—1 Jean 3:8.

A yeke polele so aye mingi afa so Jéhovah andoye e. Ni la, a yeke na lege ni ti tene Nzapa aye pëpe ti bâ e na yâ ti pasi. Fade lo yeke hunzi apasi kue. A lingbi e gi bê ti e pëpe na ndo ti tënë ni: Bible afa na e tâ tongana nyen Nzapa ayeke zi apasi kue.

[Foto na lembeti 4]

Ngangu so zo ayeke na ni ti ndoye mba ti lo alondo na Nzapa ti ndoye