E Manatu Mai le Atua—Le Auala Tatou te Iloa Ai

O SE fesili ua leva ae e tāua tele, ua taumānatu i ai tagata mo le faitau afe o tausaga: Pe afai e alofa le Atua iā i tatou, ae aiseā la ua tele ai mafatiaga? Atonu e te ioe mai pe afai e te alofa i se tasi, e te lē manaʻo e mafatia lenā tagata, ma pe afai e feagai o ia ma faafitauli, e te taumafai e fesoasoani iā te ia. Ona o lea, ua manatu ai le toʻatele e faapea, ona o le tele o mafatiaga i le lalolagi, e lē o manatu mai la le Atua iā i tatou. O lea la, e tāua tele ona tatou iloiloina muamua, faamaoniga e iloa ai le alofa moni o le Atua iā i tatou, ma lona manatu mamafa mai.

E Faamaonia i le Foafoaga le Alofa o le Atua

O Ieova le Atua “na . . . faia le lagi ma le lalolagi, le sami ma mea uma o iai.” (Galuega 4:24) A o manatunatu i mea na faia e Ieova, e tatau ona tatou iloa ai, e manatu mai o ia iā i tatou. O se faataʻitaʻiga, seʻi manatu i mea ia e tatou te maua ai le fiafia. Pe e te fiafia i meataumafa lelei? Sa ono mafai ona saunia e Ieova na o se ituaiga meaʻai se tasi ina ia tausia ai lo tatou ola. Nai lo lea, ua ia saunia le tele o meaʻai eseese ina ia faafiafia ai i tatou i lo latou  tofo. Ua faamatagofie foʻi e Ieova le lalolagi i le tele o laau matagofie, fugālaau, ma laufanua ina ia tatou olioli ma fiafia ai i le olaga.

Seʻi manatu foʻi i le auala ua faia ai i tatou. O o tatou uiga mālie, le mafai ona tatou olioli i musika, ma le mafai ona tatou fiafia i mea matagofie, o ia mea e lē manaʻomia ina ia faatumau ai le ola—o meaalofa uma na mai i le Atua ina ia faafiafia ai o tatou olaga. Ma seʻi manatu i lau faiā ma isi. O ai sē e lē olioli i le aufaatasiga māfana ma uō lelei, po o le opo mai a se tasi e tatou te alolofa tele i ai? Ioe, o le alofa, o se meaalofa mai i le Atua alofa! Talu ai na tuuina e le Atua i le tagata le uiga o le alofa, e tatau la ona avea lenā uiga o se tasi o uiga o le Atua.

Ua Taʻua i le Tusi Paia le Alofa o le Atua

Ua taʻu mai e le Tusi Paia iā i tatou, o le Atua o le alofa lava ia. (1 Ioane 4:8) E lē gata e faaalia lona alofa e ala i le foafoaga, ae ua faamaonia foʻi i lana Afioga, le Tusi Paia. O se faataʻitaʻiga, ua aumaia e le Tusi Paia iā i tatou taʻiala e fesoasoani i le mauaina o le soifua mālōlōina, o loo faalaeiau mai ia pulea i mea uma, ma lapataʻi mai e faatatau i le onā ma le ʻaitele.—1 Korinito 6:9, 10.

Ua aumaia foʻi e le Tusi Paia fautuaga atamai e faatatau i faiā a tagata, ua uunaʻia i tatou ia alofa le tasi i le isi, ma feutagaʻi ma isi i le faaaloalo, āva, ma le agalelei. (Mataio 7:12) O loo taʻusalaina ai faiga ma uiga e faapogaia ai mafatiaga—le matapeʻapeʻa, faitatala, matauʻa, mulilua, ma le fasioti tagata. Pe afai e taumafai tagata uma e ola e tusa ai ma fautuaga lelei o loo i le Tusi Paia, e mautinoa o le a faaitiitia mafatiaga i le lalolagi atoa.

Ae peitaʻi, o le faailoaga sili o le alofa o le Atua, o le auina mai lea o lona Alo, o Iesu, e togiolaina tagata. Ua taʻua i le Ioane 3:16: “O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.” Ua uma la ona faatulaga e Ieova o le a faaiʻuina e faavavau le oti ma mafatiaga uma.—1 Ioane 3:8.

E manino mai, e anoanoaʻi faamaoniga e iloa ai le alofa o Ieova iā i tatou. E talafeagai la ona manatu e faapea, e lē finagalo le Atua ia tatou mafatia. O le a ia gaoioi e faamuta mafatiaga. E lē manaʻomia ona tatou taumatemate i lenei mataupu—ua taʻu mai e le Tusi Paia iā i tatou le auala tonu o le a aveesea ai e le Atua mafatiaga.

[Ata i le itulau 4]

O le alofa, o se meaalofa mai i le Atua alofa