Nembala, Nkulunkulu Uyasikhatsalela—Indlela Loko Lesikwati Ngayo

NANGABE Nkulunkulu asitsandza, kungani kunekuhlupheka lokungaka? Lona ngumbuto lobaluleke kakhulu bantfu labebasolo batibuta wona tinkhulungwane teminyaka letendlulile. Nawe uyavuma kutsi nangabe utsandza umuntfu lotsite awufuni ahlupheke, futsi nakungenteka angene enkingeni, ungetama kumsita. Njengobe loko kuliciniso, bantfu labanyenti bangahle bacabange kutsi bubi lobukhungetse umhlaba wonkhe, Nkulunkulu angeke akhone kusisita kubo. Ngako-ke, kubalulekile kutsi sicale sitfole bufakazi bekutsi nembala Nkulunkulu uyasitsandza futsi uyasikhatsalela yini?

Indalo YaNkulunkulu Ifakazela Lutsandvo Lwakhe

Nkulunkulu Jehova ‘nguye uMdali welizulu, nemhlaba, nelwandle, nako konkhe lokukuwo!’ (Imisebenti 4:24) Njengobe sicabanga ngaloko Jehova lakudalile, siphetsa ngekutsi uyasikhatsalela. Nasi sibonelo: Cabanga ngetintfo letikujabulisako. Uyakutsandza yini kudla lokumnandzi? Jehova abengasinika luhlobo lunye lwekudla kuze siphile. Kodvwa esikhundleni sekwenta njalo, usentele tinhlobo letehlukene tekudla kuze tisijabulise. Ngendlela lefananako, Jehova wenta umhlaba waba muhle ngekwenta tihlahla, timbali, kanye netindzawo letinhle kute tente kuphila kujabulise futsi natsi sikujabulele.

Ase uphindze ucabange ngendlela lesidalwe ngayo. Indlela lesikhombisa ngayo buntfu, likhono letfu lekujabulela umculo, kanye nendlela lesibonisa ngayo kubonga ngebuhle lesibubonako, akusito tintfo lesitidzinga kangako kute siphile—tonkhe timane nje titipho letivela kuNkulunkulu letijabulisa kuphila kwetfu. Ase ucabange ngebuhlobo bakho nalabanye. Ngubani longakujabuleli kuba ndzawonye nebangani labakahle, nobe kwangiwa ngulotsite lasondzelene naye? Akekho, ngobe likhono lekutsandza lona ngekwalo lisipho lesivela kuNkulunkulu lositsandzako. Njengobe Nkulunkulu kunguye lowadala bantfu baba  nelikhono lekutsandza, ngako-ke, lemfanelo iyincenye yebuntfu bakhe.

LiBhayibheli Lisicinisekisa Ngelutsandvo LwaNkulunkulu

LiBhayibheli lisitjela kutsi Nkulunkulu ulutsandvo. (1 Johane 4:8) Lutsandvo lwakhe alubonakali nje kuphela kuloko lakudalile, kodvwa lubonakala naseVini lakhe, liBhayibheli. Sibonelo saloku kutsi liBhayibheli lisiniketa ticondziso letingasisita kute sibe nemphilo lencono, lisikhutsata kutsi silinganisele kuto tonkhe tintfo, liphindze lisecwayise ngekudzakwa kanye nebugovu.—1 Khorinte 6:9, 10.

LiBhayibheli liphindze lisinike teluleko letihlakaniphile letimayelana nebuhlobo betfu nalamanye. Lisikhutsata kutsi sitsandzane futsi siphatse labanye ngenhlonipho, nangemusa. (Matewu 7:12) Liyayilahla imikhuba nekutiphatsa lokubangela inhlupheko—bugovu, kuhleba, umona, kuphinga kanye nekubulala. Nangabe sonkhe singetama kuphila ngeseluleko lesitfolakala emiBhalweni, kuhlupheka lokugcwele emhlabeni wonkhe kungancipha.

Indlela lehamba embili Nkulunkulu lakhombisa ngayo lutsandvo lwakhe, kwaba ngulesikhatsi anikela ngeNdvodzana yakhe, Jesu, kutsi ibe sihlengo sebantfu bonkhe. Johane 3:16 utsi: “Nkulunkulu walitsandza live kakhulu kangangekutsi wadzimate wanikela ngeNdvodzana yakhe lekukuphela kwayo, kuze kutsi nome ngubani lokholwa ngiyo angabhubhi, kodvwa abe nekuphila lokuphakadze.” Ngako Jehova sewuvele uwentile emalungiselelo ekukucedza nya kufa nato tonkhe tinhlobo tekuhlupheka.—1 Johane 3:8.

Kuyacaca, kunebufakazi lobunyenti lobukhombisa kutsi Jehova uyasitsandza. Kuliciniso kutsi akajabuli nakasibona sihlupheka. Utawucedza kuhlupheka. Akudzingeki kutsi sicombelele ngalendzaba—liBhayibheli lisitjela ngalokucacile kutsi Nkulunkulu utawukucedza kanjani kuhlupheka.

[Sitfombe ekhasini 4]

Likhono lekutsandza lisipho lesivela kuNkulunkulu lotsandzako