Te tâuˈa maira iho â te Atua—eaha te haapapuraa?

UA FERURI te taata e tausani matahiti i te maoro i teie uiraa faufaa: Mai te peu e te here ra te Atua ia tatou, no te aha te mauiui i rahi ai? Ia here oe i te hoê taata, eita iho â ïa oe e hinaaro ia mauiui oia, e ia fifi oia, e tamata iho â ïa oe i te tauturu ia ˈna. No te uˈana o te mauiui i te ao nei e manaˈo ai e rave rahi e aita te Atua e tâuˈa maira. Mea faufaa ïa ia hiˈopoa tatou i te haapapuraa e te here ra iho â te Atua ia tatou, e te tâuˈa maira oia.

Te haapapu ra te poieteraa i te here o te Atua

O Iehova “te Atua i hamani i te raˈi, e te fenua, e te tai, e te mau mea atoa i roto ia ratou.” (Ohipa 4:24) A feruriruri ai tatou i ta Iehova i poiete, e faaoti iho â ïa tatou e te tâuˈa maira oia. A hiˈo na i te mau mea ta ˈna i horoa mai e o te faaoaoa ia tatou. Mea au anei na oe te maa maitatai? E nehenehe ta Iehova e horoa mai i te hoê noa huru maa no te ora. Aita râ, ua poiete oia e rave rau maa au rahi. Ua faanehenehe atoa oia i te fenua i te unauna rau o te tumu raau e te tiare ia oaoa e ia anaanatae tatou i te oraraa.

A hiˈo atoa na i to tatou hamaniraa. Aita e titauhia ra no te ora ia au tatou e ataata, i te upaupa  e te nehenehe. E ô râ no ǒ mai i te Atua o te haamaitai i to tatou oraraa. A manaˈo atoa i to oe taairaa e vetahi ê. O vai te ore e au i te auhoaraa mahanahana aore ra te tauahi a te hoê taata mea here roa na tatou? E ô hoi te here no ǒ mai i te hoê Atua aroha! E tuhaa te here o te huru o te Atua, e ua poiete oia i te taata ma taua huru ra.

Te haapapu maira te Bibilia i te here o te Atua

Te parau ra te Bibilia e e aroha te Atua. (Ioane 1, 4:8) Te itehia ra to ˈna here i roto i ta ˈna poieteraa e i roto atoa i ta ˈna Parau, te Bibilia. Ei hiˈoraa, te horoa ra te Bibilia i te mau aratairaa no te ea maitai, te faaitoito ra i te haerea au noa i roto i te mau mea atoa, e te faaara maira no nia i te taero ava e te amu-hua-raa i te maa.—Korinetia 1, 6:9, 10.

Te horoa atoa ra te Bibilia i te mau aˈoraa paari no nia i te mau taairaa i rotopu i te taata, ia here e ia faatura tatou te tahi i te tahi ma te hamani maitai. (Mataio 7:12) Te faahapa ra te Parau a te Atua i te mau peu e haerea o te haamauiui, mai te nounou, te parau faaino, te feii, te faaturi, e te taparahi taata. Ia tutava te taata atoa i te ora ia au i teie mau aˈoraa maitatai o te mau Papai, e iti mai ïa te mauiui i te ao nei.

Te faaiteraa rahi roa ˈˈe râ o te aroha o te Atua, o ta ˈna ïa Tamaiti o Iesu tei horoa ia ˈna ei hoo no te huitaata. Te na ô ra te Ioane 3:16: “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.” Ua faanaho ê na ïa Iehova i te faaore roa i te pohe e te mauiui atoa.—Ioane 1, 3:8.

Mea rahi mau â te haapapuraa e te here ra Iehova ia tatou. Eita ïa oia e au ia hiˈo ia tatou ia mauiui e e faaore iho â oia i te reira. Te faaite maira te Bibilia e nafea te Atua e na reira ˈi, aita ïa e faufaa ia manaˈonaˈo.

[Hohoˈa i te api 4]

E ô te here no ǒ mai i te hoê Atua aroha