Xoossay Nuussi Tumuppe Qoppees—Waatidi Eriyoo?

XOOSSAY nuna siiqiyaaba gidikko, tuggay hagaadan aybissi daridee? yaagiya oyshaa shaˈan qoodettiya layttau asay oychidaba gidikkonne, ha wodiyankka oychana koshshiya oysha. Neeni issi ura siiqiyaaba gidikko, he uri tuggatanaadan koyennaagee qoncce; he uri metootiyaaba gidikko, neeni a maaddanau baaxetana. Daro asay hegaadan qoppiyoogaappe denddidaagan, alamiyan daro tuggay deˈiyo gishshau, Xoossay nuussi qoppennabadan etau siyettees. Yaatiyo gishshau, Xoossay nuna tumuppe siiqiyoogaanne nuussi qoppiyoogaa bessiya naqaashaa koyro akeekiyoogee koshshiyaaba.

Meretay Xoossaa Siiquwaa Qonccissees

Xoossaa Yihooway “saluwaa, sa7aa, abbaanne eta giddon de7iya ubbabaa” medhidaagaa. (Oosuwaa 4:24) Yihooway medhidobaa wotti dentti qoppiyo wode, i nuussi qoppees giidi kuuyana bessiyoogee qoncce. Leemisuwau, nena ufayssiyaabata qoppa. Malˈˈo qumaa miyoogan ufayttikkii? Nuuni deˈon deˈanaadan Yihooway issi qommo quma xallaa immana danddayees. SHin, nuuni miyo wode ufayttanaadan zawi baynna qommo qumay deˈanaadan oottiis. Hegaadankka, nuuni deˈuwan ufayttanaadan Yihooway maalaalissiya dumma dumma qommo mittay, ciishshay, qassi deree dembbay deˈiyoosa oottidi saˈaa medhiis.

Nuuni merettido ogiyaakka qoppa. Nuuni naaciyoogee, muuziqan ufayttiyoogeenne xeellanau loˈˈiyaabaa nashshiyoogee deˈuwan deˈanau koshshiyaaba gidenna; ha ubbabay nuuni deˈuwan ufayttanaadan Xoossay immidoba. Qassi haratuura deˈiya dabbotaa qoppa. Loˈˈo laggetuura issippe siiquwan wodiyaa aattiyo wode woykko keehippe siiqiyo uri qoommiyo wode ufayttennay oonee? Siiqana danddayiyoogee ba huuphe siiqiya Xoossaa imota! Asay siiqanaadan oottidi Xoossay medhido gishshau, he eeshshay Xoossaa eeshsha gidana bessees.

 Geeshsha Maxaafay Xoossay Nuna Siiqiyoogaa Qonccissees

Geeshsha Maxaafay Xoossay siiqo gidiyoogaa yootees. (1 Yohaannisa 4:8) A siiqoy meretaa xallan gidennan, a Qaalan, Geeshsha Maxaafaanikka qoncciis. Leemisuwau, Geeshsha Maxaafay nu payyatettau goˈˈiya kaaletuwaa immees; ubbaban kiphatancha gidanaadan minttettees; qassi ushshanchanne yorancha gidennaadan yootees.—1 Qoronttoosa 6:9, 10.

Geeshsha Maxaafay issoy issuwaara siiqettanaadan, qassi harata bonchuwaaninne kehatettan oyqqanaadan minttettiyoogan, haratuura waanidi siga deˈanaakko loˈˈo zoriyaa immees. (Maatiyoosa 7:12) Geeshsha Maxaafay metuwau gaaso gidiya meezetanne koshshata, giishin yaaretiyoogaa, zigiriyoogaa, qanaatiyoogaa, wodiraa laammiyoogaanne woriyoogaa malabata diggees. Asay ubbay Geeshsha Maxaafay yootiyo loˈˈo zoriyaadan deˈanau baaxetiyaakko, alamiyan hagaa keena metoy deˈana danddayenna.

SHin Xoossay ba siiquwaa qonccissido oge ubbaappe aadhiyaagee asaa naata wozanau ba Naˈaa Yesuusa immidoogaa. Yohaannisa 3:16y: “Xoossaa Na7aa ammaniya ubbai merinaa de7uwaa ekkanaappe attin, xayenna mala, Xoossai ha sa7aa keehi siiqido gishshau, ba mexi issi Na7aa immiis” yaagees. Yaatiyo gishshau, Yihooway hayquwaanne meto ubbaa muleera xayssanau giigissuwaa oottiis.—1 Yohaannisa 3:8.

Yihooway nuna siiqiyoogau keehi daro naqaashay deˈiyoogee qoncce. Hegaa gishshau, nuuni waayettiyoogaa i beˈanau koyenna giidi qoppiyoogee bessiyaaba. I tuggaa xayssana. Nuuni hegee waani polettaneeshsha giidi qoppana koshshenna; Xoossay tuggaa waatidi xayssanaakko Geeshsha Maxaafay geeshshidi yootees.

[Sinttaa 4n deʼiya misiliyaa]

Siiqana danddayiyoogee siiqiya Xoossaa imota