Ri Ma Lemnagdad Got Rogon ni Kad Nanged

BAARAY reb e deer nrib ga’ fan ni kari kakrom ni ma lemnag e girdi’: Faanra gad ba t’uf rok Got, ma mang fan ni kaygi yoor e gafgow? Dabisiy ni faanra ba t’uf be’ rom ma dabum ni ngam guy ni be gafgow, ma faanra ke magawon ma ga ra gay rogon ni ngam ayuweg. Ere ku arrogon ni boor e girdi’ ni ma lemnag nder lemnagdad Got ni bochan e kaygi gel e gafgow u fayleng. Ere ba ga’ fan ni ngad guyed e mich riy nriyul’ ni gad ba t’uf rok Got ma ma lemnagdad.

Tin Ke Sunmiy Got e Be Micheg e T’ufeg Rok

Jehovah e ir e en ni ke “sunumiy e tharmiy, nge but’, nge day, nge urngin ban’en ni bay u fithik’ e pi n’ey.” (Acts 4:24) Gad ra fal’eg i yaliy e pi n’en ni ke sunmiy Jehovah, ma rayog ni nga dogned nriyul’ ni ma lemnagdad. Am lemnag e pi n’en ni ga ma felfelan’ ngay. Ga baadag e ggan nib fel’ lamen? Rayog ni nge sunmiy Jehovah taab mit e ggan ni ngad ked ya nge dab da m’ad. Machane ke ngongliy ni boor mit ni bochan e ngad ked nib fel’ lamen ma gad felfelan’ ngay. Maku arrogon ni ki ngongliy e fayleng ni bay e gek’iy nge floras nge yungi n’en nib fel’ yaan riy ni fan e ngad felfelan’gad ngay.

Kum lemnag rogon ni kan sunmiydad. Kan sunmiydad ni gad ba felfelan’, maku gad ma felfelan’ ko musik nib fel’ nge boch ban’en nib fel’ yaan. Pi n’ey e rayog ni ngad pared ndariy, machane ke pi’ Got ngodad nib tow’ath ni bochan e ngad felfelan’gad ngay. Kum lemnag rogon e tha’ u thilmed boch e girdi’. Mini’ e dabun ni ngar felfelan’gad e pi tafager rok u taabang ara ngar gamuchmuchgow be’ nib t’uf rok? Gad ma t’ufeg e girdi’ ni bochan e aram reb e tow’ath ni yib rok fare Got ni ma t’ufegey! Ere faanra bay e re fel’ngin nem rodad, ma dabisiy ni aram bang i rarogon Got.

 Be Micheg e Bible ni Gad Ba T’uf Rok Got

Be yog e Bible ni Got e t’ufeg. (1 John 4:16) Gathi kemus ni ke m’ug e re t’ufeg ney  ko tin ke sunmiy Got, ya ku be m’ug ko  Thin rok ni bay u Bible. Bod ni bay boch ban’en u Bible ni faan yira fol riy ma yira par nib fel’ fithik’ i dowey, maku be pi’ e  Bible e athamgil nga lanin’uy u boch ban’en ndab un rin’ nge pag rogon, maku be  ginangey u murung’agen e chingaw nge  abich ni ke pag rogon.​—1 Korinth 6:9, 10.

Ku be fonownagdad e Bible u rogon ni nga i par nib fel’ e tha’ u thildad boch e girdi’, ma be pi’ e athamgil nga lanin’dad ni ngaud t’ufeged gadad, ma ud ted fan e girdi’, ma ud golgad ngorad. (Matthew 7:12) Ku ma yog boch ban’en nib kireb ni ma k’aring e gafgow ko girdi’ ni aram e chogow, nge gun’gun’ nge awan’, nge ngam pirew be’ ni gathi mabgol rom nge mathang fan. Faanra i fol gubin e girdi’ ko fonow u Bible ma ra lich e gafgow u fayleng.

Machane, bin th’abi fel’ e kanawo’ ni ke dag Got gelngin ni gad ba t’uf rok riy e aram e ke pi’ Jesus ni Fak ni nge biyuliy e girdi’. Be gaar e John 3:16: “Yi Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.” Ere ke dugliy Jehovah ni nge chuweg e yam’ nge gubin mit e gafgow.​—1 John 3:8.

Ba tamilang ni boor e mich riy ni gad ba t’uf rok Jehovah. Ere dabun ni be guydad ni gad be gafgow ma ra chuwegdad u fithik’ e gafgow. Dabi maruwaran’dad riy ya be yog e Bible rogon nra rin’ Got e re n’ey.

[Picture on page 4]

Ba t’uf e girdi’ rodad ni bochan e aram reb e tow’ath ni ke pi’ ba Got ni ma t’ufegey ngodad