“Stret Taem” i Klosap Nomo
“Stret Taem” i Klosap Nomo
OLSEM profet Habakuk, ol disaepol blong Jisas tu oli wantem tumas blong luk en blong ol trabol we i stap mekem ol man oli safa. Taem oli harem ol samting we Kingdom blong God bambae i mekem blong stretem ol trabol long wol ya, oli askem long Jisas se: “Plis yu talem long mifala. ?Wetaem bambae ol samting ya oli kamtru? ?Mo wanem saen bambae i soemaot we yu yu stap [rul long Kingdom blong yu], mo we hemia lashaf blong fasin blong laef long wol ya?” (Matiu 24:3, NW) Jisas i ansa long olgeta se Jeova God nomo i save stret taem we bambae Kingdom i rul antap long olgeta samting long wol ya. (Matiu 24:36; Mak 13:32) Be Jisas wetem sam narafala profet tu, oli talemaot sam samting we bambae oli hapen long wol, mo we oli soemaot se taem ya i klosap.—Lukluk bokis long raetsaed blong pej ya.
?Olsem wanem? ?Yu yu agri se long taem blong yumi, ol samting ya oli hapen oltaem nomo? Mo tu, Jisas i talemaot wan wok blong tijim ol man we bambae i gohed long olgeta ples blong wol. Hem i talem se: “Gud nius ya blong Kingdom, bambae ol man oli talemaot long olgeta ples long wol, blong oli witnes long hem long fes blong olgeta man, nao biaen bambae en i save kam.”—Matiu 24:14, NW.
Samting ya i stap hapen stret long taem blong yumi. Ol Witnes blong Jeova oli mekem wok ya. Long samwe long 236 aelan mo kantri, bitim seven milian Witnes oli stap talemaot long ol man ol wok we bambae Kingdom blong God i mekem. Mo oli givhan long ol man ya blong oli mekem laef blong olgeta i laenap wetem ol stret rul blong God ya we i wantem finisim olgeta samting we oli mekem man i harem nogud mo safa. I gud we yu gohed blong lanem moa long saed blong Kingdom blong God, ale bambae yu save harem gud blong laef blong olwe long wan wol we i no moa gat man i safa long hem.
[Bokis blong pija long pej 8]
Ol Vas Blong Baebol We Oli Tokbaot Ol Las Dei
• Ol bigfala faet we man i neva luk bifo
• Ol bigbigfala etkwek
• Kakae i sot
• Ol strong sik
• Fasin nogud i kam bigwan
• Ol man oli no moa gat lav
• Ol man oli spolem wol
• Ol man oli wantem mane tumas
• Pikinini i no moa obei long papa mama
• Ol man oli tingbaot olgeta nomo
2 TIMOTI 3:3, NW
• Ol man oli no gat sore
• Ol man oli no wantem agri wetem narafala
• Nomata wanem kaen man, be oli no save bos long tingting blong olgeta
• Plante moa man oli no laekem ol samting we oli gud
• Oli laekem moa ol samting we oli harem gud long hem, i bitim we oli lavem God
• Plante oli talem se oli Kristin be oli gat tu fes
• Plante man oli wok olsem giaman profet
• Ol man oli mekem trabol long ol trufala Kristin
MATIU 24:39, NW
• Ol man oli no wantem lesin long ol woning blong Baebol
[Tok blong pija long pej 8]
Long olgeta ples blong wol, ol Witnes blong Jeova oli tijim ol narafala long Kingdom blong God