Ang “Tinudlong Panahon” Haduol Na

SAMA ni propetang Habacuc, ang mga tinun-an ni Jesus nangandoy nga matapos na ang pag-antos. Kay ila nang nahibaloan ang pagahimoon sa Gingharian sa Diyos sa pagsulbad sa mga problema dinhi sa yuta, sila nangutana kang Jesus: “Kanus-a man mahitabo kining mga butanga, ug unsa man unya ang ilhanan sa imong presensiya [ingong Hari sa Gingharian] ug sa kataposan sa sistema sa mga butang?” (Mateo 24:3) Sa pagtubag, si Jesus miingon nga si Jehova lamang ang nahibalo sa eksaktong panahon kon kanus-a ang Gingharian bug-os nga magmando sa yuta. (Mateo 24:36; Marcos 13:32) Apan gitagna ni Jesus ug sa uban pa ang mga panghitabo nga magpaila nga haduol na ang maong panahon.—Tan-awa ang  kahon sa tuo.

Dili ba ang maong mga panghitabo komon kaayo karon? Si Jesus nagtagna usab nga adunay buluhatong pagsangyaw ug pagpanudlo nga himoon sa tibuok kalibotan. Siya miingon: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.”—Mateo 24:14.

Kana mao gayod ang nagakahitabo karon. Ang mga Saksi ni Jehova mao ang nagabuhat nianang buluhatona. Sa 236 ka kayutaan, kapin sa pito ka milyong Saksi ang nagsangyaw bahin sa pagahimoon sa Gingharian, ug sila nagtabang sa mga tawo sa pagkab-ot sa matarong nga mga sukdanan sa Diyos, kansang kabubut-on mao ang pagtapos sa pag-antos ug kasakit. Padayon sa pagtuon bahin sa Gingharian sa Diyos, ug ikaw makabatog paglaom nga mabuhi sa usa ka kalibotan nga wala nay pag-antos hangtod sa kahangtoran.

[Kahon sa panid 8]

 Mga Teksto sa Bibliya nga Naghisgot Bahin sa Kataposang mga Adlaw

MATEO 24:6, 7; PINADAYAG 6:4

• Grabeng panaggubat

MATEO 24:7; MARCOS 13:8

• Kusog nga mga linog

• Kanihit sa pagkaon

LUCAS 21:11; PINADAYAG 6:8

• Kamatay

MATEO 24:12

• Pag-uswag sa kalapasan

• Pagbugnaw sa gugma

PINADAYAG 11:18

• Pagdaot sa yuta

2 TIMOTEO 3:2

• Gugma sa salapi

• Pagkadili-masinugtanon sa ginikanan

• Sobrang paghigugma sa kaugalingon

2 TIMOTEO 3:3

• Walay kinaiyanhong pagbati

• Ang mga tawo dili-ikasabot

• Walay pagpugong-sa-kaugalingon

• Kaylap nga kawalay gugma sa pagkamaayo

2 TIMOTEO 3:4

• Paghigugma sa kalipayan inay sa Diyos

2 TIMOTEO 3:5

• Daghan ang salingkapawng nangangkon nga sila Kristohanon

MATEO 24:5, 11; MARCOS 13:6

• Daghang mini nga mga propeta

MATEO 24:9; LUCAS 21:12

• Paglutos sa matuod nga mga Kristohanon

MATEO 24:39

• Ang mga tawo walay pagtagad sa mga pasidaan sa Bibliya

[Hulagway sa panid 8]

Sa tibuok yuta, ang mga Saksi ni Jehova nagtudlo sa uban bahin sa Gingharian sa Diyos