Ewe Fansoun mi fil A Arapoto
Ewe Fansoun mi fil A Arapoto
NÖÜN Jises kewe chon käeö ra usun chök ewe soufos Apakuk le mochen küna sopwoloon riäfföü. Ra fen käeö pwe Mwuun Kot epwe förisefäli mettoch meinisin woon fönüfan, iwe, ra eisini Jises: “Inet epwe fis ekei mettoch meinisin? Kopwe pwäri ngenikem asisilen fansoun om wareto [fän nemenien Mwuun we] me ewe fansoun sopolan.” (Mattu 24:3) Jises a pölüweniir pwe Jiowa Kot chök a silei ineet ewe Mwu epwe unusen nemenalo fönüfan. (Mattu 24:36; Mark 13:32) Iwe nge, Jises me pwal ekkoch mwän ra oesini met epwe fis woon fönüfan pwe epwe affata arapotoon ewe sopwoloon.—Nengeni ewe pwor.
Esap pwe ekkeei mettoch ra chöüfetäl ikenäi? Jises a pwal oesini pwe eü angangen asukul epwe fis woon unusen fönüfan. A erä: “Ei kapas allim usun ewe mu epwe esineifeili won unusen fonufan, pwe epwe pwar ngeni einang meinisin. Iwe, a ina sopolon.”—Mattu 24:14, TF.
Ina met a fiffis ikenäi. Chon Pwäratä Jiowa ra föfföri ena angang. Lon 236 fönü, lap seni fisu million chon afalafal ra esilei ngeni aramas met ewe Mwu epwe föri, iwe, ra pwal älisiir le etipeeüfengeni manauer ngeni än Kot kewe allük. Letipen Kot pwe epwe asopwalo riäfföü me letipechou. Ika kopwe sopwelo le käkkäeö usun än Kot Mwu, kopwe äpilükülükün manau lon eü otot ikewe esap chüen wor riäfföü ie.
[Pwóór lón pekin taropwe 8]
Wokisin Mi Oesini Usun Ekkewe Rän Lesopwoloon
• Maun mi sokkolo watteen
• Watteen chechchechin fönü
• Nafangawen möngö
• Mälapalap
• Lapoloon atai allük
• Patapateloon tong
• Aingawaloon fönüfan
• A watte tongen moni
• Älleasolapa sam me in
• Tongei pwisin iir
• Nafangawen tong
• Rese mosonoson
• Sokkun aramas meinisin rese pwisin nemeni inisiir
• Ra oput minne a mürinnö
• Ra tongei pwapwaan fönüfan nge rese tongei Kot
• Chommong ra chök elingepin
• Chommong soufos chofona
• Eriäfföüün Chon Kraist mi enlet
• Aramas ra tunalo öüröür seni Paipel
[Sasing lon pekin taropwe 8]
Chon Pwäratä Jiowa woon unusen fönüfan ra asukula aramas usun Mwuun Kot