“Ini Emi Ẹnịmde” Ekpere
“Ini Emi Ẹnịmde” Ekpere
AMA enen̄ede ọdọn̄ mme mbet Jesus ndikụt nte ẹtrede ndutụhọ, ukem nte ọkọdọn̄de prọfet Habakkuk. Ke mmọ ẹma ẹkefiọk se Obio Ubọn̄ Abasi edinamde man enen̄ede mme n̄kpọ ke isọn̄, mmọ ẹma ẹbụp Jesus ẹte: “Ini ewe ke mme n̄kpọ emi ẹditịbe, nso idinyụn̄ idi idiọn̄ọ edidu fo [ke ukara Obio Ubọn̄] ye eke utịt editịm n̄kpọ emi?” (Matthew 24:3) Jesus ama ọbọrọ mmọ ke Jehovah Abasi kpọt ọfiọk nnennen ini emi Obio Ubọn̄ oro edikarade ofụri isọn̄. (Matthew 24:36; Mark 13:32) Edi Jesus ye mbon en̄wen ẹma ẹbem iso ẹtịn̄ ndusụk n̄kpọ oro ẹdiwụtde ke ini oro ekpere.—Se ekebe emi odude ke nnasia.
Ndi idịghe akpanikọ ke mme n̄kpọ emi ẹyọyọhọ mfịn? Jesus ama etịn̄ n̄ko ke ẹyenọ mme owo ukpep ke ofụri isọn̄. Enye ọkọdọhọ ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt eyedi.”—Matthew 24:14.
Se ẹnamde mfịn edi oro. Mme Ntiense Jehovah ke ẹnam utom emi. Se ibede Mme Ntiense Jehovah miliọn itiaba ke n̄kpọ nte idụt 236 ke ẹsian mme owo se Obio Ubọn̄ oro edinamde, ke ẹnyụn̄ ẹn̄wam mmọ ẹnam mme ndinen n̄kpọ oro Abasi emi aduakde nditre ndutụhọ ye ubiak oyomde mmọ ẹnam. Ka iso kpep n̄kpọ ban̄a Obio Ubọn̄ Abasi, ndien eyenyene idotenyịn ndidu uwem ke nsinsi ke ererimbot emi ndutụhọ mîdidụhe.
[Ekebe ke page 8]
Mme Itie N̄wed Abasi Emi Ẹban̄ade Mme Akpatre Usen
MATTHEW 24:6, 7; EDIYARADE 6:4
• Ekọn̄ oro mînyeneke mbiet
• Ikpọ unyekisọn̄
• Unana udia
• Ndiọi udọn̄ọ
• Ukwan̄ido nditọt
• Ima ndibịt
• Edisobo isọn̄
• Edima okụk mbe ubọk
• Edisọn̄ ibuot ye ete ye eka
• Edima idem mbe ubọk
• Ẹnana ndammana ima
• Mme owo imaha ndidụk ediomi ekededi
• Ẹnana mfara ke idem ke kpukpru se ẹnamde
• Ẹsua eti ido ke kpukpru ebiet
• Ẹma inemesịt ẹkan Abasi
• Ediwak owo ẹdi Christian inua inua
• Prọfet nsu ẹnen̄ede ẹwak
• Ẹkọbọ ata mme Christian
• Mme owo ẹfụmi ntọt Bible
[Ndise ke page 8]
Mme Ntiense Jehovah ke ẹkpep mme owo ẹban̄a Obio Ubọn̄ Abasi ke ofụri isọn̄