Malapit na ang “Gintalana nga Tion”
Malapit Na ang “Gintalana nga Tion”
PAREHO ni manalagna Habacuc, gusto man sang mga disipulo ni Jesus nga madula na ang pag-antos. Sang natun-an nila kon ano ang himuon sang Ginharian sang Dios sa duta, ginpamangkot nila si Jesus: “San-o mahanabo ining mga butang, kag ano ang mangin tanda sang imo presensia kag sang katapusan sang sistema sang mga butang?” (Mateo 24:3) Nagsabat si Jesus nga si Jehova nga Dios lang ang nakahibalo kon san-o gid magagahom ang Ginharian sang Dios diri sa duta. (Mateo 24:36; Marcos 13:32) Pero, naghatag si Jesus kag ang iban nga manalagna sing mga palatandaan nga nagapakita nga ini nga tion malapit na.—Tan-awa ang kahon sa tuo.
Indi bala nga nagakatabo na ini subong? Nagtagna man si Jesus nga may pagpanudlo nga himuon sa bug-os nga kalibutan. Sia nagsiling: “Ining maayong balita sang ginharian ibantala sa bug-os napuy-an nga duta subong panaksi sa tanan nga pungsod; kag nian magaabot ang katapusan.”—Mateo 24:14.
Amo gid sini ang nagakatabo subong. Ginawali sang sobra sa pito ka milyon ka Saksi ni Jehova, sa mga 236 ka kadutaan, kon ano ang himuon sang Ginharian. Ginabuligan man nila ang mga tawo nga sundon ang matarong nga mga sugo sang Dios. Luyag gid sang Dios nga dulaon ang kasakit kag pag-antos. Kon padayon ka nga magtuon parte sa Ginharian sang Dios, may paglaum ka nga mabuhi sa kalibutan nga wala na gid sing pag-antos.
[Kahon sa pahina 8]
Mga Teksto nga Nagapamatuod nga Ari Na Kita sa Katapusan nga mga Adlaw
• Indi matupungan nga mga inaway
• Mabaskog nga mga linog
• Kakulang sa pagkaon
• Pagpamiste
• Pagdamo sang kalautan
• Pagkadula sang gugma
• Pagkaguba sang duta
• Sobra nga gugma sa kuarta
• Wala nagatuman sa mga ginikanan
• Sobra nga gugma sa kaugalingon
• Wala sing pasunaid sa isigkatawo
• Wala nagasugot sa bisan ano nga kasugtanan
• Wala sing pagpugong sa kaugalingon
• Wala sing gugma sa kon ano ang maayo
• Mahigugmaon sa kinasadya sa baylo nga sa Dios
• Nagapakitakita nga diosnon
• Pagdamo sang butig nga mga propeta
• Paghingabot sa matuod nga mga Cristiano
• Wala nagasapak sa mga paandam sang Biblia
[Retrato sa pahina 8]
Ginatudluan sang mga Saksi ni Jehova ang mga tawo sa bug-os nga kalibutan parte sa Ginharian sang Dios
