‘Tshikondo tshijadika’ tshikadi pabuipi

ANU bu muprofete Habakuka, bayidi ba Yezu bavua bajinga bikole bua makenga ajike. Pakamanyabu tshivua Bukalenge bua Nzambi ne bua kuenza bua kuakaja nsombelu pa buloba, bakebeja Yezu ne: ‘Utuambile dituku dialua malu aa; utuambile tshimanyinu tshia pawalua tshiakabidi [ne bukole bua Bukalenge]; ne tshia ku nshikidilu kua tshikondo etshi.’ (Matayo 24:3) Yezu wakabandamuna ne: anu Yehowa nkayende ke udi mumanye tshikondo tshijalame tshikala Bukalenge buende ne bua kutuadija kukokesha pa buloba. (Matayo 24:36; Mâko 13:32) Nansha nanku, Yezu ne bantu bakuabu bakadianjila kuleja malu avua ne bua kuenzeka pa buloba avua ne bua kuleja ne: tshikondo atshi tshikadi pabuipi.​—Bala malu adi mu  kazubu kadi ku dia balume.

Kuenaku umona ne: malu aa adi enzeka lelu anyi? Yezu wakamba kabidi ne: mudimu wa kulongesha bantu uvua ne bua kuenzeka pa buloba bujima. Wakamba ne: ‘Nebambile bantu bonso ba pa buloba lumu luimpe elu lua bukalenge buanyi, neluikale tshimanyishilu ku bisamba bionso; pashishe, nshikidilu nealue.’​—Matayo 24:14.

Ke tshidi tshienzeka lelu. Bantemu ba Yehowa badi benza mudimu eu. Bantemu bapite pa miliyo 7 badi bayisha mu matunga matue ku 236 bua kuambila bantu tshikala Bukalenge bua Nzambi ne bua kuenza, ne badi babambuluisha bua kutumikila mikenji ya Nzambi udi musue kujikija ntatu ne makenga. Wewe mutungunuke ne kulonga malu adi atangila Bukalenge bua Nzambi, neupete ditekemena dia kuikala ne muoyo wa kashidi pikala makenga kaatshiyiku kabidi.

[Kazubu mu dibeji 15]

 Mvese idi yakula bua matuku a ku nshikidilu

MATAYO 24:6, 7; BUAKABULUIBUA 6:4

• Mvita ya katshia ne katshia

MATAYO 24:7; MÂKO 13:8

• Dikanka dia buloba

• Biyole bia nzala

LUKA 21:11; BUAKABULUIBUA 6:8

• Bipupu bia masama

MATAYO 24:12

• Divulangana dia malu mabi

• Dikepa dia dinanga

BUAKABULUIBUA 11:18

• Dinyanga dia buloba

2 TIMOTE 3:2

• Dinanga biuma bikole

• Dibenga kutumikila baledi

• Dipite kudinanga

2 TIMOTE 3:3

• Bantu kabayi banange bana babu

• Bashipi ba bipungidi

• Dibenga kudikanda didi mu bantu ba milongo yonso

• Divulangana dia dibenga kunanga malu mimpe

2 TIMOTE 3:4

• Ditamba kunanga masanka kupita Nzambi

2 TIMOTE 3:5

• Bena lubombo ba bungi badi badiamba mudibu bena Kristo

MATAYO 24:5, 11; MÂKO 13:6

• Divulangana dia baprofete ba dishima

MATAYO 24:9; LUKA 21:12

• Dikengesha bena Kristo balelela

MATAYO 24:39

• Dibenga kuitaba malu adi Bible udimuija nawu bantu

[Tshimfuanyi mu dibeji 15]

Bantemu ba Yehowa badi balongesha malu a Bukalenge bua Nzambi pa buloba bujima