‘Mwaka Wakutoñola Dehi’ Wudi Mukamwihi

KUFWANA kaprofwetu Habakuki, atumbanji twaYesu adiña nakutalila mpinji yakamana makabi. Chelukiluwu chuma chikakoña Wanta waNzambi hakuwahisha yuma yahamaseki, amwihwili Yesu nawu: “Tuleji hamba kela yumiyi, nichinjikijilu chakwiluka nachu hiwamba kenzeyi [muñovu yaWanta], nihamba kakuma nyaka yamakonu.” (Matewu 24:3) Yesu wayakwili nindi Yehova Nzambi hohu diweluka mpinji yikatachika kuyula Wanta hamaseki. (Matewu 24:36; Maku 13:32) Hela chochu, Yesu niantu amakwawu ashimwineñahu dehi yuma yikamwekana hamaseki yikamwekesha nawu kukuma kudi mukamwihi.— Talenu chikasha chidi kuchidiilu.

Komana himunateli kwiteja nenu iyi yuma yinakumwekana kumaluña ejima makonuku? Cheñi Yesu washimwineñahu dehi nindi kukekala mudimu wakutañisha mukaayi kejima. Wahosheli nindi: “Ninsañu iyi yawanta yayiwahi akayishimwañena mwahita matuña ejima mwashakamawu antu, kulonda yakayilili nyuza yejima wunsahu; henohu dihu hakenza kukumisha.”—Matewu 24:14.

Iwu dimudimu wunakuzatawu makonu. A Yinsahu jaYehova anakuzata iwu mudimu. Mumatuña akushika ku 236, aYinsahu akubadika ha 7,000,000 anakuleja antu yuma yakakoña Wanta, nawa anakuyikwasha kukakela kunshimbi jaNzambi jaloña, wafwilaña kumanisha makabi niyikatu. Twalekenuhu kudiza haWanta waNzambi, nawa mukwikala nakuchiñeja kwakushakama haya nyaka mwituña dakadi makabi.

[Chikasha chidi hefu 8]

 Nsona Jahoshaña haMafuku Akukuminina

MATEWU 24:6, 7; CHIMWEKESHU 6:4

• Kuswejelaku kwamajita

MATEWU 24:7; MAKU 13:8

• Nyitentanshi yamaneni

• Kukeha kwayakudya

LUKA 21:11; CHIMWEKESHU 6:8

• Yipupu

MATEWU 24:12

• Kuvulilaku kwakuluwalala

• Kukeña kunakukehelaku

CHIMWEKESHU 11:18

• Kukisañana iseki

2 TIMOTEWU 3:2

• Kusweja kufwila mali

• Kubula kwovwahila anvwali

• Kusweja kudikeña

2 TIMOTEWU 3:3

• Kubula kukeñañana

• Antu oma muchima

• Kuvulilaku kwakubula kudihemba munyunza yejima

• Kusweja kubula kukeña yayiwahi

2 TIMOTEWU 3:4

• Kusweja kukeña yakuditiyisha kuwaha kubadika kumukeña Nzambi

2 TIMOTEWU 3:5

• Anfwikiji amavulu anakuditena nawu hiyakwaKristu

MATEWU 24:5, 11; MAKU 13:6

• Kuvulilaku kwawatuprofwetu akutwamba

MATEWU 24:9; LUKA 21:12

• Kukabisha akwaKristu alala

MATEWU 24:39

• Antu hiyanakwiluka yinjikijilu yashimunawu muBayiboluku

[Mwevulu wudi hefu 8]

A Yinsahu jaYehova atañishaña haWanta waNzambi mukaayi kejima