‘Lebaka le Beilwego’ le Kgaufsi

GO SWANA le moporofeta Habakuku, barutiwa ba Jesu ba be ba hlologetše go bona tlaišego e fela. Ge ba ithutile mabapi le seo Mmušo wa Modimo o tlago go se dira go lokiša dilo mo lefaseng, ba botšišitše Jesu gore: “Dilo tše di tla direga neng, le gona pontšho ya go ba gona ga gago [o le matleng a Mmušo] le ya bofelo bja tshepedišo ya dilo e tla ba eng?” (Mateo 24:3) Ge a araba, Jesu o ile a re ke Jehofa Modimo feela yoo a bego a tseba nako yeo ka yona Mmušo o bego o tla buša lefase ka mo go feletšego. (Mateo 24:36; Mareka 13:32) Lega go le bjalo, Jesu le ba bangwe ba ile ba bolela e sa le pele ka ditiragalo tšeo di bego di tla bontšha gore nako yeo e kgaufsi.—Bona  lepokisi le le lego ka go le letona.

Na ga o dumele gore dilo tše di tlwaelegile lehono? Le gona, Jesu o boletše e sa le pele gore modiro wa go ruta o be o tla dirwa lefaseng ka bophara. O itše: “Ditaba tše tše dibotse tša mmušo di tla bolelwa lefaseng ka moka le go agilwego go lona gore e be bohlatse go ditšhaba tšohle; ke moka bofelo bo tla tla.”—Mateo 24:14.

Seo se a direga lehono. Dihlatse tša Jehofa di phetha modiro woo. Dinageng tše ka bago tše 236, Dihlatse tše fetago dimilione tše šupago di botša batho ka seo Mmušo o tlago go se dira e bile di ba thuša go dira dilo ka go dumelelana le ditekanyetšo tše di lokilego tša Modimo, yoo thato ya gagwe e lego go fediša tlaišego le bohloko. Tšwela pele o ithuta ka Mmušo wa Modimo gomme o tla ba le tebelelo ya go phela lefaseng le se nago tlaišego—ka mo go sa felego.

[Lepokisi go letlakala 8]

 Mangwalo ao a Bolelago ka Mehla ya Bofelo

MATEO 24:6, 7; KUTOLLO 6:4

• Ntwa e sa kago ya bonwa

MATEO 24:7; MAREKA 13:8

• Ditšhišinyego tše dikgolo tša lefase

• Tlhaelelo ya dijo

LUKA 21:11; KUTOLLO 6:8

• Mauba a malwetši

MATEO 24:12

• Go ata ga go hloka molao

• Go fola ga lerato

KUTOLLO 11:18

• Go senywa ga lefase

2 TIMOTHEO 3:2

• Go rata tšhelete ka mo go feteletšego

• Go se kwe batswadi

• Boithati

2 TIMOTHEO 3:3

• Go se be le maikwelo a borutho a tlhago

• Batho ba sa ikemišetšago go amogela tumelelano

• Batho ba maemo ka moka ga ba na boitshwaro

• Go phatlalala ga go se rate go loka

2 TIMOTHEO 3:4

• Go rata maipshino go e na le go rata Modimo

2 TIMOTHEO 3:5

• Ba bantši bao ka boikaketši ba ipolelago gore ke Bakriste

MATEO 24:5, 11; MAREKA 13:6

• Go na le baporofeta ba bantši ba maaka

MATEO 24:9; LUKA 21:12

• Go tlaišwa ga Bakriste ba therešo

MATEO 24:39

• Batho ba sa elego hloko ditemošo tša Beibele

[Seswantšho go letlakala 8]

Lefaseng ka bophara, Dihlatse tša Jehofa di ruta batho ba bangwe ka Mmušo wa Modimo