A Telutk el Taem a Kmedang
A Telutk el Taem a Kmedang
NGDI uai a profet el Habakuk, e a redisaiplo er a Jesus a oureng el mo mesa ulebengelel a ringel. Sera lesubii el kmo ngngerang ngmo meruul a Rengedel a Dios el mo mesmechokl a tekoi er tia el beluulechad, e te uleker er a Jesus el kmo: “Msbedemam el kmo, a ikal tekoi ngmorngii er choingerang, e ngeral olangch a morngii kau sel mei [el oba klisiich er a Renged], ma ullebongel ra taem ra belulechad?” (Matteus 24:3) Me a longer er tir, e a Jesus a dilu el kmo ngdi ta el Jehovah el Dios a medengelii sel ulterekokl el taem el ngii el Renged a mo oba cherrungel el dereder er a beluulechad. (Matteus 24:36; Markus 13:32) Engdi a Jesus me a rebebil a ulemlaoch a bebil er a tekoi el mo duubech el mo olecholt el kmo seikid el taem a kmedang.—Momes er a baks el ngar er a kadikm.
Kau ngdiak mkengei el kmo aika el tekoi a domes el kmal betekngang er a chelecha el sils? A Jesus a dirrek el uluuchais el kirel a ureor er a klou el osisechakl el mo meketmokl er a beluulechad el rokir. Ngdilu el kmo: “Me tial evangkelio ra rengedel a Dios a mo oberk ra belulechad el rokir, el kirel locholt el bedul a bek el renged; e sola e ngmochu ullebongel.”—Matteus 24:14.
Tia el tekoi a ngar er ngii er a chelecha el sils. A Resioning er a Jehovah a meruul er tia el ureor. Ngar er a bekord el 236 el beluu, e te betok er a 7 el miliol el Sioning a ouchais er a rechad aike el tekoi el bo loruul a Renged, e olengeseu er tir el mo kiei el oltirakl a melemalt el llechul a Dios, el ngii a soal el mo merrob a ringel me a chelebuul. Molemolem el mesuub el kirel a Rengedel a Dios me lebo er ngii a omeltkem el mo kiei er a beluulechad el diak a ringel er ngii el diak a ulebengelel.
[Baks el ngar er a 8 el llel]
Bades el Melutk er a Uriul el Sils
• Ngdiak a mekemad el uai ngii er a uchei
• Meklou el desiu
• Bosech
• Bekoiueiuul el rakt
• Delengerenger a mo obdois
• Ngmo mekelekolt a bltikerreng er a rechad
• Melemall er a beluulechad
• Ngibes er a udoud
• Diak lolengesenges er a redemerir me a rederrir
• Betik a rengrir er a di tir
• Diak lechubechub
• Melaes
• Diak ledelodau a bek el blekeradel er a chelsel a beluu
• Betok el chad a chetirir a ungil
• Betik a rengrir er a tameterreng el ngar er a uchei er a Dios
• Te betok a remengeblad el kmo te Kristiano
• Ngmo betok a remesisiich el klsuul el profet
• Odechelakl el mo er a remera el Kristiano
• A rechad a mo diak lomtab a omengelechel el ngar er a Biblia
[Siasing el ngar er a 8 el llel]
A Resioning er a Jehovah a olisechakl er a rebebil el kirel a Rengedel a Dios el meliuekl er a beluulechad el rokir