“Igihe vyashingiwe” kiri hafi
“Igihe vyashingiwe” kiri hafi
NKA kumwe kw’umuhanuzi Habakuki, abigishwa ba Yezu baripfuza cane kubona imibabaro irangiye. Kubera ko bari bazi ico Ubwami bw’Imana bwokoze kugira butorere umuti ingorane zo kw’isi, babajije Yezu bati: “Ivyo bintu bizoba ryari, kandi ni igiki kizoba ikimenyetso c’ukuhaba kwawe [mu bubasha bw’Ubwami] n’ic’insozero y’ivy’isi?” (Matayo 24:3) Mu kubishura, Yezu yavuze yuko Yehova Imana wenyene ari we yari azi igihe nyezina ubwo Bwami bwokwifatiye mu minwe isi. (Matayo 24:36; Mariko 13:32) Ariko rero, Yezu be n’abandi, bari baravuze imbere y’igihe ibintu vyobaye vyokwerekanye yuko ico gihe kiri hafi.—Raba uruzitiro ruri iburyo.
Ntiwemera none yuko ivyo bintu bisigaye birangwa hose muri iki gihe? Yezu kandi yaravuze imbere y’igihe yuko hari igikorwa co kwigisha coranguwe kw’isi yose. Yavuze ati: “Iyi nkuru nziza y’ubwami izokwamamazwa mw’isi yose ngo bibe intahe ku mahanga yose; maze umuhero uzoca uza.”—Matayo 24:14.
Ivyo ni vyo nyene biriko biraba muri iki gihe. Ivyabona vya Yehova bariko barakora ico gikorwa. Mu bihugu nka 236, Ivyabona barenga imiliyoni indwi bariko barabwira abantu ivyo Ubwami buzokora, kandi bariko barabafasha kubaho bisunga ibintu bigororotse Imana isaba, na yo ikaba igomba ko ugucumukura n’umubabaro bihera. Nubandanye kwiga ivyerekeye Ubwami bw’Imana maze uzogire icizigiro co kubaho ibihe bidahera mw’isi itagiramwo imibabaro.
[Uruzitiro ku rup. 8]
Ivyanditswe vyerekana ko turi mu misi ya nyuma
MATAYO 24:6, 7; IVYAHISHUWE 6:4
• Intambara zitari bwigere zibaho
• Vya nyamugigima bikomakomeye
• Amapfa
• Indwara z’ibiza
• Ukwongerekana kw’ubugarariji
• Ugukanya kw’urukundo
• Uguhonya isi.
• Ugukunda amahera birenze urugero
• Kutagamburukira abavyeyi
• Ukwikunda birenze
• Kutagira igishika c’abantu
• Abantu badashaka kwumvikana
• Abantu bo mu mice yose y’ikibano batagira ukwigumya
• Ukudakunda iciza bikwiragiye henshi
• Gukunda ibinezereza kuruta Imana
• Abiyorobetsi benshi bivugisha ko ari abakirisu
• Abahanuzi b’ikinyoma benshi bakorana umwete
• Uruhamo rugirirwa abakirisu b’ukuri
• Abantu batitaho imburi Bibiliya itanga
[Ifoto ku rup. 8]
Kw’isi yose, Ivyabona vya Yehova barigisha abandi ibijanye n’Ubwami bw’Imana