“L’heure ni so a leke awe” so aga nduru
“L’heure ni so a leke awe” so aga nduru
TONGANA prophète Habakuk, adisciple ti Jésus aku kungo ti bâ hunzingo ti apasi kue. Na mango tënë ti ye so fade Royaume ti Nzapa ayeke sara ti leke akpale kue na ndo ti sese, ala hunda Jésus: “Lawa si aye so ayeke si ande? Na fade fä ti ngoi so mo yeke si na mo yeke duti dä [tongana Gbia] nga ti ngoi so aye ti ngoi so ayeke gue ti hunzi ayeke nyen?” (Matthieu 24:3). Na yâ ti kiringo tënë ti lo, Jésus atene so gi Jéhovah Nzapa oko la ahinga mbilimbili ngoi so Royaume ni ayeke komande sese kue (Matthieu 24:36; Marc 13:32). Me, Jésus na ambeni zo nga afa kozoni awe aye so ayeke si ande na ndo ti sese, so fade afa so ngoi ni aga nduru awe.—Bâ encadré so ayeke na koti.
Mo yeda pëpe so aye so amû ndo kue laso? Jésus afa nga kozoni awe so fade mbeni kapa ti fango ye na azo ayeke duti na ndo ti sese kue. Lo tene: “A yeke fa ande nzoni tënë ti royaume so na ndo ti sese kue so azo ayeke dä tongana mbeni tënë ti témoin ndali ti amara kue. Na pekoni, nda ni ayeke ga.”—Matthieu 24:14.
A yeke tâ ye so ayeke tambela laso la. A-Témoin ti Jéhovah ayeke sara kusala so. Na yâ ti akodoro 236, aTémoin ti Jéhovah kutu mbasambala na ndo ni ayeke fa na azo ye so fade Royaume ni ayeke sara, na ala yeke mû maboko na ala ti sara ye alingbi na ndia ti Nzapa, Nzapa so aye ti zi pasi na songo tere kue. Ngbâ ti manda ye na ndo ti Royaume ti Nzapa na fade mo yeke wara beku ti duti na fini ti lakue lakue na yâ ti mbeni dunia so pasi ayeke dä pëpe.
[Encadré na lembeti 8]
Aversê so asara tënë ti alango ti nda ni
MATTHIEU 24:6, 7; APOCALYPSE 6:4
• Abira so ade asi lâ oko pëpe.
• Sese ayeke yengi ngangu.
• Akota nzara ayeke tï.
• Akobela so ayeke fâ gbâ ti azo.
• Kpengo ndia pëpe ayeke wu mingi.
• Ndoye ayeke dë.
• Bubango ti sese.
• Kota ndoye ti nginza.
• Kengo yanga ti ababâ na amama.
• Azo andoye gi tere ti ala wani.
• Azo aye amba ti ala azo pëpe.
• Azo aye oko pëpe ti mä tere na amba ti ala.
• Azo akanga nzara ti bê ti ala pëpe.
• Na ndo kue azo andoye nzoni ye pëpe.
• Azo andoye angia ahon ti ndoye Nzapa.
• Mingi ni ayeke handa lê atene ani yeke aChrétien.
• Aprophète ti wataka mingi ayeke londo.
• A yeke sara ngangu na atâ Chrétien.
• Azo ayeke bi bê ti ala pëpe na ndo ti agbotongo mê ti Bible.
[Foto na lembeti 8]
Na ndo ti sese kue, aTémoin ti Jéhovah afa na azo tënë ti Royaume ti Nzapa