“Shighe Na” La Zulum

KUHWA

“Shighe Na” La Zulum

YANGE sar mbahenen mba Yesu tsung u nengen a mkur u ican i yan vough er profeti Habaku nahan. Yange mba er ve kwagh u Tartor u Aôndo ua er sha u sôron akaa cii shin tar yô, ve pine ér: “Ka hanma shighe man akaa ne aa ere? Man ka nyi ia lu ikyav i sha mve Wou [mtem u una tema Tor sha Tartor] la man i mkurtara?” (Mateu 24:3) Yesu gema kaa ér ka Yehova Aôndo tseegh a fe shighe jighilii u Tartor la ua tema tor sha tar hoghom hoghom ye. (Mateu 24:36; Marku 13:32) Nahan kpa, Yesu man mbagenev kpaa tsenga pasen akaa a aa er sha tar, a tesen ér shighe la zulum yô.—Nenge ngeren u ken iyan la.

U nenge wer akaa ne dumbur nyian ga he? Yesu shi tsenga pasen ér a er tom u tesen ior sha tar jimin cii. A kaa ér: “Man Loho u Dedoo u tartor ne yô, á ôr u á tser tar, sha u u̱ lu mpase hen akuraior cii; ka zum la man mkur una kuma ye.”—Mateu 24:14.

Ka kwagh u a lu zan hemen nyian vough je ne. Mbashiada mba Yehova mba eren tom la. Mbashiada mba hemban iyengeior miliôn utaankaruhar nahan mba ôron mbagenev ken ityar i kuman er 236 nahan, kwagh u Tartor la ua er yô, shi mba wasen ve u dondon atindi a perapera a Aôndo, u a we ishima u been a ican i yan man mnyoon kpaa la. Za hemen u henen kwagh u Tartor u Aôndo, nahan u lu a ian i va lun uma gbem sha won, a ican i yan shio.

[Ngeren u kiriki u a lu sha peeji 8 la]

Avur a Bibilo a a Er Kwagh u Ayange a Masetyô yô

MATEU 24:6, 7; MPASE 6:4

• Ityav mbi cieryol mbia pev

MATEU 24:7; MARKU 13:8

• Ityartenger i vesen

• Ijen

LUKA 21:11; MPASE 6:8

• Ubombauangev

MATEU 24:12

• Mseer u mvende u vendan atindi

• Dooshima una ndôhôr