‘Ngiyal’ ni Kan Dubliy’ e Ke Chugur
‘Ngiyal’ ni Kan Dubliy’ e Ke Chugur
MUS ngak pi gachalpen Jesus ma ur athapeged e ngiyal’ nra chuw e gafgow ni bod Habakkuk. Nap’an ni kar nanged e n’en nra rin’ Gil’ilungun Got ni nge chuweg e gafgow u fayleng, mi yad fith Jesus ni lungurad: “Mang e pow ko ngiyal’ ni ga bay [ngiyal’ ni ke pilung u Gil’ilungun] nge ngiyal’ ni ke chugur nga tomuren e re m’ag ney?” (Matthew 24:3, NW) Me yog ngorad ni yigoo Jehovah Got e manang e ngiyal’ nra tabab Gil’ilungun ko gagiyeg u fayleng. (Matthew 24:36; Mark 13:32) Machane, i yiiynag Jesus nge boch e girdi’ e pi n’en nra buch u fayleng ni nge dag ni ke chugur e re ngiyal’ i n’em.—Mu guy e kahol u ba’ ni mat’aw.
Gathi aray e n’en ni be buch e ngiyal’ ney? Ki yiiynag Jesus murung’agen reb e maruwel ni yira tay u ga’ngin yang e fayleng. I gaar: “Re Thin rok Got ney Nib Fel’ ni murung’agen e gagiyeg rok Got e bay ni machibnag u gubin yang u fayleng ni nge urngin e girdi’ me nang, ma aram mfini taw nga tomren e fayleng.”—Matthew 24:14.
Aray e n’en ni be buch e ngiyal’ ney. Pi Mich Rok Jehovah e yad be rin’ e re maruwel ney. Sogonap’an medlip milyon e Pi Mich Rok Jehovah u 236 e nam e yad be machibnag ngak e girdi’ e n’en nra rin’ Gil’ilungun Got. Maku yad be ayuweg e girdi’ ni ngar folgad ko n’en nib m’agan’ Got ngay, ya ir e ra chuweg e gafgow ni be tay e girdi’. Ere, faan ga ra ulul i fil murung’agen Gil’ilungun Got, ma rayog ni ngam athapeg e par u lan e bin beech e fayleng ndariy e gafgow riy.
[Picture on page 8]
Thin nu Bible ni Be Weliy Rarogon e Tin Tomuren e Rran
MATTHEW 24:6, 7; REVELATION 6:4
• Mahl nib gel
• Durru’ nib gel
• Ra lich e ggan
• M’ar nib machreg ni ma af
• Yira togopuluw ko motochiyel
• Ra war e t’ufeg
• Yira kirebnag e fayleng
• Ra gel chogowen e salpiy
• Dab kun fol ko gallabthir
• Ra be’ ma yigoo ir e bay i lemnag ir
• Dab kun gol
• Bay un t’ar e thin nga daken e girdi’
• Dariy fan ban’en u wan’uy
• Yira dabuy e tin nib fel’
• Ra t’uf e fafel me tomur Got u wan’uy
• Boor e girdi’ e bay ur dake yad e Kristiano
• Ra yoor e profet ni googsur
• Bay un gafgownag e tin riyul’ e Kristiano
• Dabi tiyan’ e girdi’ ko ginang ni bay u Bible
[Picture on page 8]
Be machibnag e Pi Mich Rok Jehovah murung’agen Gil’ilungun Got u ga’ngin yang e fayleng