Afwaya Ukuti Tuleba ne Nsansa
Palameni Kuli Lesa
Afwaya Ukuti Tuleba ne Nsansa
ABAFYASHI abasakamana abana babo balafwaya sana ukuti abana babo babe ne nsansa. Na Yehova, Shifwe wa ku muulu e fyo afwaya, afwaya abana bakwe aba pano isonde ukuba ne nsansa. Ukulangilila ukuti alatusakamana, alatweba ifya kucita pa kuti tube ne nsansa. Taleni tontonkanyeni pa mashiwi alandile kuli Yoshua, ayaba pali Yoshua 1:6-9.
Tontonkanyeni ifyo cali. Ilyo Mose afwile, Yoshua e watendeke ukutungulula abena Israele, apa ninshi nabafika na mu mamilioni. Abena Israele baleipekanya ukwingila mu calo ico Lesa alaile ifikolwe fyabo. Lesa alikwete ifyebo fya kufunda Yoshua. Ifi fyebo fyali no kwafwa Yoshua ukubomba bwino nga afikonka. Lelo te Yoshua fye wali no kunonkelamo muli uku kufunda. Na ifwe bene kuti twanonkelamo nga twakonka uku kufunda.—Abena Roma 15:4.
Yehova aebele Yoshua ukuba uwashipa kabili uwakosa, amwebele aya mashiwi imiku itatu, te muku fye umo iyo. (Ifikomo 6, 7, 9) Ca cine Yoshua alekabila ukukosa no kushipa pa kutungulula bwino abena Israele ukwingila mu Calo ca Bulayo. Nomba ali no kucita shani pa kuti abe uwakosa kabili uwashipa?
Ifyalembwa fya mushilo e fyali no kwafwa Yoshua ukushipa no kukosa. Yehova amwebele ati, “Upoose amano ku kulakonka amafunde yonse ayo Mose umubomfi wandi akwebele.” ((Icikomo 7) Pali iyi nshita, Yoshua afwile akwete fye amabuuku ayanono aya mu Baibolo ayalembelwe. * Nomba ukukwata fye Icebo ca kwa Lesa te kwali no kumulenga ukubomba bwino. Pa kuti Yoshua anonkelemo mu Cebo ca kwa Lesa, alekabila ukucita ifintu fibili.
Ica kubalilapo, alingile ukulabelenga icebo ca kwa Lesa lyonse. Yehova atile: “Ulebelenga ifyalembwa muli ili buuku no kwetetulapo akasuba no bushiku.” (Icikomo 8) Icitabo cimo cisosa ukuti: “Lesa ale-eba Yoshua ukulaibukisha amafunde Yakwe ukupitila mu ‘kutontonkanyapo’ nelyo ‘ukwetetulapo.’” Ukubelenga Icebo ca kwa Lesa cila bushiku no kwetetulapo kwali no kwafwa Yoshua ukucimfya amafya ayo ali no kukwata.
Ica bubili, Yoshua alingile ukulacita ifyo alebelenga mu Cebo ca kwa Lesa. Yehova amwebele ukuti: “Ubike amano ku kulakonka fyonse ifyalembwamo; pantu e lyo ukatunguluka.” (Icikomo 8) Pa kuti Yoshua atunguluke alekabila ukulacita ukufwaya kwa kwa Lesa. Nga talecita ifyo Lesa alefwaya tali na kutunguluka! Ukufwaya kwa kwa Lesa lyonse fye kulacitika.—Esaya 55:10, 11.
Yoshua alyumfwilile ukupanda mano kwa kwa Yehova. Ne cafuminemo ca kuti, apo ali ni kapepa wa cishinka uwa kwa Yehova, aali ne nsansa kabili alibombele bwino.—Yoshua 23:14; 24:15.
Bushe na imwe mulafwaya ukuba ne nsansa nga filya cali kuli Yoshua? Yehova afwaya ukuti muleba ne nsansa. Nomba ukukwata fye Icebo cakwe Baibolo te kwingamulenga ukuba ne nsansa. Umwina Kristu umo uwabombela Yehova pa myaka iingi atile: “Mwilasunga fye Baibolo lelo muleibelenga no kulaleka ifyo mulebelenga fileba mu mitima yenu.” Nga mulebelenga Icebo ca kwa Lesa lyonse no kulacita ifyo mulebelenga, ninshi na imwe mukaba ne nsansa nga filya fyali Yoshua.
[Futunoti]
^ para. 7 Pa fyalembwa fyafumine kuli Lesa ifyo Yoshua akwete pafwile pali na mabuuku 5 ayo Mose alembele (Ukutendeka, Ukufuma, Ubwina Lebi, Impendwa, na Amalango), e lyo ne buuku lya kwa Yobo ne buuku limo ilye lumbo nelyo yabili.