Dirava Kahirakahira Oi Lao

Ia Ura Do Ita Kwalimu

Iosua 1:6-9

LALOKAU tama sina idia ura edia natudia be do idia kwalimu bona edia mauri do idia moalelaia. Unai hegeregerena, iseda guba Tamana, Iehova, danu ia ura iseda mauri lalonai do ita moale. Iehova be ita ia laloa dainai, moale do ita davaria dalana be ita ia hadibaia. Hegeregere, Iosua 1:6-9 ai Iosua dekenai ia gwauraia herevadia mani ita laloa.

Idiba kahanai ia noho laulau mani oi laloa. Mose ia mase murinai Iosua be Israela taudia milioni momo edia gunalaia tauna ai ia lao. Israela taudia be idia hegaegae Dirava ese edia tubudia dekenai ia gwauhamatalaia tanona ai do idia vareai totona. Dirava be Iosua dekenai heduru hereva haida ia henia. Bema Iosua be unai hereva ia badinaia, ia kwalimu diba. Dirava ese unai heduru herevadia ia gwauraia be Iosua ena namo totona. Bema ita ese unai hereva ita badinaia, ita danu be do ita kwalimu.​—Roma 15:4.

Iehova be nega toi Iosua ia hamaoroa do ia boga auka bona goada totona. (Siri 6, 7, 9) Oibe, Iosua ese Israela taudia be Gwauhamata Tanona ai ia hakaua vareai totona, ia boga auka bona goada be namo. To, edena dala ai Iosua be unai kara do ia hahedinaraia?

Revareva helagadia ese Iosua do idia durua ia boga auka bona goada totona. Iehova ese ia hamaoroa: “Lauegu hesiai tauna Mose umui dekenai ia henia taravatu ibounai do oi badinaia, bona ena kara do oi karaia.” (Siri 7) Unai neganai, Iosua dekenai be reana Baibel bukadia haida sibona idia noho. * Ena be Iosua dekenai Dirava ena Hereva ia noho, to unai ese ia hahedinaraia lasi Iosua be do ia kwalimu. Ia be Dirava ena Hereva amo namo ia abia totona, gau rua ia karaia be namo.

Gau ginigunana be inai: Namona be Iosua ese Dirava ena hereva ia duahia hanaihanai bona iena kudouna ai ia atoa. Iehova ia gwau: “Taravatu Buka be nega ibounai [emu] guriguri heboudia lalonai do [oi] duahia. Dina bona hanuaboi do oi tahua.” (Siri 8) Tahua gaukara ta amo idia davaria gauna be inai: “Dirava ese Iosua ia hagania Iena Taravatu do ia laloatao totona, anina be ‘ia laloa dobu’ o ‘lalohadailaia’ be namo.” Dina ta ta ai Dirava ena Hereva ia duahia bona laloa dobu karana ese Iosua do ia durua ia davaria hahetoho ia hanaia totona.

Gau iharuana be inai: Iosua ese Dirava ena Hereva amo ia dibaia gaudia ia badinaia be namo. Iehova be Iosua dekenai ia gwau: “Iena torea herevadia ibounai do oi kamonai henia. Unai neganai oiemu raka do ia namo.” (Siri 8) Iosua ia kwalimu totona, Iehova ena ura ia karaia be gau badana. Iosua ese unai bamona ia karaia be mai anina bada, ani? Dirava ena ura be nega ibounai ia kwalimu.​—Isaia 55:10, 11.

Iosua be Iehova ena sisiba ia badinaia. Unai dainai ena mauri ibounai Iehova ia tomadiho henia bona ia moale.​—Iosua 23:14; 24:15.

Oi ura oi danu be Iosua bamona emu mauri oi moalelaia, a? Iehova ia ura do oi kwalimu. To Iena Hereva, Baibel, oi duahia sibona be hegeregere lasi. Nega daudau orea lalonai ia noho Keristani tadikaka ta ia gwau: “Baibel oi duahia sibona lasi, to oi duahia gaudia oi badinaia be gau badana.” Bema emu mauri lalonai hanaihanai Baibel oi duahia bona oi dibaia gaudia oi badinaia, Iosua bamona “oiemu raka do ia namo.”

[Futnout]