Lengwalo le le Tšwago United States

Leeto la go ya Nakong e Fetilego

AKANYA kamoo e ka bago mo go kgahlišago ka gona go tšea leeto la go yo bona tsela yeo bagologolo ba gago ba bego ba phela ka yona. Ka tsela e itšego, re ile ra tšea leeto le bjalo. Re tlogile Switzerland ra ya United States of America. Ba bantši ba nagana ka United States e le yeo e tletšego sebjale-bjale, eupša leeto la rena le re išitše nywageng e makgolo a mabedi e fetilego. E re re go botše ka lona.

Ka ge re bolela mmolelo wa Sejeremane sa Switzerland, re ile ra laletšwa gore re yo fetša dikgwedi tše tharo nageng ya Indiana. Pakane ya rena e be e le go bolela ditaba tše dibotse tša Mmušo wa Modimo le malapa a ma-Aman ao a bego a sa bolela mmolelo wa bagologolo ba bona. Malapa a makgolo a batho ba a dula Indiana.

Ma-Aman ke ditlogolo tša sehlopha sa lekgolong la bo-17 la nywaga sa ma-Anabaptist. Leina la bona le tšwa leineng la moetapele wa bona e lego Jacob Amman, yoo a bego a dula Switzerland. Ge ba be ba ithuta Beibele mehleng yeo, batho ba bao ba boifago Modimo ba ile ba lemoga gore kolobetšo ya masea le tirelo ya tša bohlabani di be di fošagetše. Mmušo o ile wa ba tlaiša ka baka la tumelo ya bona. Ba mmalwa ba ile ba ba ba bolawa ka baka la ditumelo tša bona tša bodumedi. Tlaišo e ile ya tšwela pele e gola gomme ba bantši ba bona ba ile ba swanelwa ke go tšhabela dikarolong tše dingwe tša Switzerland le Fora. Magareng a lekgolo la bo-19 la nywaga, ba dikete ba ile ba tšhabela United States. Ga se ba ka ba lahla setšo sa bona le mmolelo wa bona wa Sejeremane sa Switzerland.

Ge re be re etela batho ba ba bonolo, ba ile ba makatšwa ke ge ba re hwetša mejakong ya bona re bolela mmolelo wa bona! Bona tiragalo ye ka leihlo la kgopolo.

Ba botšiša ka Sejeremane sa Switzerland gore: “Go tla bjang gore le bolele go swana le rena?”

Re araba ka gore, “Ke ka gobane re e-tšwa Switzerland.”

Ka go makala ba ile ba re, “Eupša ga le ma-Aman!”

Batho ba bantši ba a re amogela gomme re bona tsela ya bophelo yeo go bonagalago e le ya kgale-kgale. Go e na le go diriša mabone a mohlagase, ba diriša mabone a parafene; go e na le go diriša dikoloi, ba diriša dipere le dikarikana; go e na le go ga meetse dipomping, ba ga meetse didibeng le diphaphapheng; go e na le go letša diradio, ba a opela.

Seo se re kgahlago kudu ke boikokobetšo le boipoetšo bja bao re ba etelago. Ba bantši ba ma-Aman ba bala Beibele letšatši le letšatši e bile ba tšeela godimo dipoledišano tša Beibele. Se se re nea sebaka sa go ba le dipoledišano tša mabapi le morero wa Modimo ka batho le lefase.

Kapejana, batho ba bantši ba tseba gore go na le baeng ba tšwago Switzerland lefelong leo. Ba bantši ba kgopela gore re etele ba leloko la bona, e lego seo re se dirago ka lethabo. Seo se ilego sa dira  gore re thabe kudu ke ge re be re laletšwa gore re etele sekolo sa ma-Aman. Ke’ng seo re tlago go se bona?

Re kokota mojakong wa sekolo. Morutiši o a re bulela gomme kapejana o re re tsene ka klaseng, moo mahlo a batho ba 38 bao ba nyakago go tseba a bego a lebeletše batho ba bane ba šele. Diklase tše 8 di be di bokantšwe ka klaseng e tee gomme barutwana ba e-na le nywaga e 7 go ya go e 15. Banenyana ba apere yunifomo e talalerata ka dikepisi tše tšhweu; bašemanyana ba apere marokgo a maso le digempe tše talalerata. Siling ya phapoši yeo e be e le godimo kudu. Maboto a mararo a pentilwe ka pente e talalerata gomme leboto la ka pele le na le letlapa la go ngwalela. Kgaufsi le lona go na le mmapa wa nkgokolo le mebapa e mengwe ya lefase yeo e phuthilwego. Sekhutlong go na le setofo se segolo sa tšhipi.

Ge re dula fase pele ga klase, bana ba re lebeletše ka go nyaka go tseba mo gogolo. Klase e nngwe le e nngwe e biletšwa tesekeng ya morutiši gomme e botšišwa mabapi le mošomo wa gae wa maabane. Re ile ra tlabja ke ge morutiši a be a botšiša bana ka thuto ya mabapi le Dithaba tša Switzerland. Dipuku tša bona tša sekolo ke tša kgale gomme morutiši o re botšiša ge e ba Switzerland e sa le ka mokgwa woo dipuku tša bona di e hlalosago. Na dikgomo di sa ya mafulong a dithabeng nakong ya selemo, goba na dithaba di sa na le lehlwa? Ge re mmontšha diswantšho tša mebala e feletšego tša dithaba tše nago le lehlwa e le gore a bone gabotse seo se bontšhwago ke diswantšho tša mmala o mošweu le o moso tšeo di lego ka pukung ya sekolo, o ile a myemyela a thabile.

Mosadi wa morutiši yoo, yo e lego modirišani wa gagwe, o botšiša gantši gore, “Na le kgona go hlaba mokgolokwane?” Ga re kgone. Lega go le bjalo, ka ge re tseba gore ma-Aman a kgona go opela le go hlaba mokgolokwane gabotse, re ba kgopela gore ba re opelele koša. Ke moka ba a re opelela gomme ra theetša sehlopha se sa baopedi ba 40 ka lethabo. Se se latelago, morutiši o re barutwana ba tšwele ka ntle bakeng go tšea nakwana ba bapala.

Mosadi wa morutiši yoo o kgopela gore le rena re ba opelele. Ka ge re tseba dikoša tše mmalwa tša Majeremane a Switzerland, re thoma go opela. Bana ba ile ba kwa gore re a opela gomme ba boa ka klaseng. Ge re eme pele ga klase, re ba opelela gabotse kamoo re ka kgonago ka gona.

Ka morago, re laletšwa go yo ja dijo tša matena le lapa le lengwe la ma-Aman la ditho tše 12. Tafola e telele e dirilwego ka kota e tletše ka dijo tše bose—ditapola tše ritilwego, nama ya serope sa kolobe, mafela, senkgwa, tšhese, merogo, dikuku le dihlatswa-pelo tše dingwe. Pele re e-ja, yo mongwe le yo mongwe o ithapelela ka pelong. Ge re dutše re sola dijo, re bolela ka Switzerland, naga ya bagologolo ba bona gomme ba re anegela ka bophelo bja bona bja polaseng. Bana ba feditše nako ya dijo ka moka ba seba-seba e bile ba sega. Ge yo mongwe le yo mongwe a feditše go ja, go rapelwa la bobedi gomme se ke pontšho ya gore bana ba dumeletšwe go tloga tafoleng—eupša e sego bakeng sa go yo bapala. Yo mongwe le yo mongwe o abetšwe gore a dire se itšego ge dibjana di tšewa tafoleng le ge di hlatswiwa, e lego seo se rago gore ba thome ka go ga meetse le go a ruthetša.

Ge bana ba dutše ba hlatswa dibjana, batswadi ba re laletša gore re dule le bona ka phapošing ya go dulela. Ga go na sofa, eupša re dula godimo ga ditulo tša go teka-teka tšeo di dirilwego ka kota. Ba ntšha Beibele ya kgale ya Sejeremane ka rakeng gomme bjalo ka ge go tlwaetšwe ka malapeng a ma-Aman, kapejana re boledišana ka dilo tša moya. Morero wa Jehofa Modimo ka lefase le batho ke ofe? Jesu o be a e-ra gore’ng ge a be a re ba boleta ba tla ja bohwa bja lefase? Na ruri Modimo o ikemišeditše go tlaiša batho ba kgopo mollong wa dihele ka mo go sa felego? Ke bomang bao ba phethago taelo ya Jesu ya gore ditaba tše dibotse di bolelwe lefaseng ka moka leo go agilwego go lona? Go ahla-ahla dipotšišo tše ka moka—le tše dingwe tše dintši—le batho ba sekametšego dilong tša moya bao ba nago le Beibele ya bona go thabiša dipelo tša rena.

Gona bjale re gopola leeto la rena la go ya nakong e fetilego ka lethabo, e lego leeto leo le bego le tletše ka diphihlelo tše di kgahlišago. Re holofela le go rapela gore maeto a le dipoledišano tše tša Sejeremane sa Switzerland ga se a bula mejako e mentši feela eupša a butše le dipelo tše dintši e le gore di ka amogela therešo yeo e hwetšwago ka Lentšung la Modimo, e lego Beibele.