Yuvu Y’atangi Eto

Nga Akwa Ngangu Atatu Bakingula Kieleka o Nsedia Yesu?

Muna nsi za América do Sul, Europa Ocidental ye Ásia, vava bekembelanga nkinzi wa lumbu kia luwutuku lwa Yesu, besonganga wantu atatu bavwata nze atinu yovo akwa ngangu, benatanga lukau lwantalu kwa nsedia Yesu. Nga lusansu lwalu lwa ludi? Nga ngwizani luna ye ziku kina tuzeye? Yambula twazaya.

E Nsangu Zambote zasoneka Matai ye Luka, luwutuku lwa Yesu ziyikanga. Lusansu lwau lusonganga vo avungudi kaka bayenda kingula Yesu vava kawutuka. Wantu awaya beyikilwanga vo atinu yovo nganga, ke atinu ko kansi, afimpi a ntetembwa, lutangu lwau ka luzayakene ko. Afimpi a ntetembwa ke bayenda kingula Yesu mu dikilwa kia bulu ko, kansi bayenda kunkingula vava kakala se mwana muna nzo. Nkingul’au yasia nkutu moyo a Yesu mu vonza.

Toma fimpa muna Nkand’a Nzambi e lusansu lwa luwutuku lwa Yesu kasoneka Luka yo solola mvovo emi: “Mwakedi avungudi muna nzanza, beyingilang’ekambi diau o fuku. O mbasi a Yave wizidi telama vana bena, . . . ubavovese vo, . . . Numon’e kimwana-mwana kizingilu nlele, kilekeso muna dikilwa . . . Bezididi, basolwele Maria yo Yosefe, ye kimwana-mwana kilekeso muna dikilwa.”​—⁠Luka 2:​8-16.

Yosefe, Maria ye avungudi, kaka bakala ye Yesu wa nsedia. Ke vena muntu akaka ko oyikwanga muna lusansu lwa Luka.

Wau fimpa lusansu lwasonama muna Matai 2:​1-11 muna nsekola ya Nkand’a Nzambi: “O Yesu, vava kawutuka muna Beteleme a Yuda muna tandu kia Erodi wa ntinu, e nganga zatuka kuna este zizidi kuna Yerusaleme . . . Bezidi kuna nzo, bamwene e kingyanangyana yo Maria wa ngw’andi.”

Zaya dio vo lusansu lwalu “nganga” kaka luyikanga, ke “nganga zitatu” ko. Kuna este batuka yo kwenda kuna Yerusaleme, ke ku mbanza Beteleme ko kuna Yesu kawutukila. Vava balwaka kuna Beteleme, Yesu kakala diaka nsedia ko muna dikilwa kia bulu.

E nsekola ya Nkand’a Nzambi isadilanga e mvovo “nganga” mu yika awana bakingula Yesu. Nsekola zakaka zisadilanga mvovo “Akwa Mpandu” yovo “afimpi a ntetembwa.” Nkanda mosi uyikanga Nsangu Zambote kasoneka Matai uvovanga, e mvovo “Akwa ngangu” muna ndinga “Kingerekia nganga za Aparasi uyikanga ana bakunkuka muna mambu ma ntetembwa.” Muna Dicionário Expositivo de Palavras do Novo Testamento ya Vine disasilanga e mvovo nganga nze “nkwa mpandu, mvandi a nkisi, nkwa yimpa ye kindoki.”

Kana una vo afimpi a ntetembwa ye ndoki batomene zayakana o unu, Nkand’a Nzambi ukutulukisanga mu venga mavangu mau. (Yesaya 47:​13-​15) Mama mawonso i mavangu ma mpandu kemenganga o Yave wa Nzambi. (Nsiku 18:​10-​12) Ekiaki i kuma vo ke vena mbasi a Nzambi ko wasamuna luwutuku lwa Yesu kwa afimpi a ntetembwa. Kansi, muna ndozi, Nzambi wabalukisa balembi wo samuna kwa Erodi wa Ntinu ambi, kadi Yesu kavavanga vonda. Muna kuma kiaki, “bavutukìdi nzil’akaka kuna nsi au.”​—⁠Matai 2:​11-16.

Nga Akristu akieleka bafwete kembela lumbu kia Luwutuku eki kikululanga e ludi mu kuma kia luwutuku lwa Yesu? Ve kikilu.