Ze ba Buza Babali

Kana Luli Baana Ba Ba Butali Ba Balalu Ne Ba Potezi Jesu Ka Nako Ya Naa Sa Zo Pepwa?

Makande a Ngilisimusi a futuka mwa lifasi kaufela a bulela kuli malena ba balalu, kamba baana ba ba butali, ne ba tiselize Jesu limpo inzaa sa zo pepwa. Kana taba yeo ki ya niti? Kana ya lumelelana ni ze nee ezahalile luli? Ha lu boneñi.

Evangeli ya Mateu ni ya Luka i talusa ka za ku pepwa kwa Jesu. Makande ao a bonisa kuli nee li feela balisana ba babotana be ne ba liseza mwa masimu aa li bukaufi be ne ba potezi Jesu ha naa sa zo pepwa. Batu ba ba bulelwa kuli malena, kamba baana ba ba butali, nee li baana ba ba nuha ka linaleli, isiñi malena, mi Bibele ha i buleli palo ya bona. Banuhi bao ne ba si ka yo fumana Jesu mwa sicelo sa limunanu inzaa li mbututu, kono ne ba izo mu fumana inzaa hulile hanyinyani mi naa pila mwa ndu. Mane ku taha kwa bona ne ku batile ku kenya Jesu mwa kozi.

Ha mu nyakisise likande la yo muñwi wa bañoli ba Bibele, Luka, ili le li bulela ka za ku pepwa kwa Jesu. Mu ka fumana kuli li bulela cwana: “Balisana ne ba li teñi . . . [be ne] ba pila kwa milaka, ba tonela mitapi ya bona busihu. Mi lingeloi la Mulena la ba tahela, . . . la li ku bona: . . . Mu ka fumana mbututu a apesizwe masila, a lobalizwe mwa sicelo. . . . Ba akufela kwateñi, mi ba yoo fumana Maria ni Josefa, ni mbututu a lobalizwe mwa [sicelo].”—Luka 2:8-16.

Batu feela be ne ba inzi ni Jesu inge a li mbututu nee li Josefa, Maria, ni balisana. Ha ku na mutu u sili ya bulezwi mwa likande leo la Luka.

Cwale ha mu nyakisise likande le li kwa Mateu 2:1-11, le li li: “Jesu ha naa pepezwi mwa Betelehema wa mwa Judea, ku mulena Heroda, babutali ba ba kwa Upa kiha ba fita mwa Jerusalema . . . Ha ba kena mwa ndu, ba fumana mwana, ni Maria, mahe.”

Mu lemuhe kuli likande leo li bulela feela kuli “babutali,” isike kuli “babutali ba balalu,” mi li talusa kuli ne ba zwile kwa upa ni ku liba pili kwa Jerusalema, isiñi kwa Betelehema kwa naa pepezwi Jesu. Mi cwale ka nako ye ne ba yo esha mwa Betelehema, Jesu na saa hulile mi naa siyo mwa sicelo kono naa pila mwa ndu.

Hape, nihaike kuli Bibele ya Silozi i talusa bapoti bao kuli nee li “babutali,” Libibele ze ñwi li ba talusa kuli nee li “baana ba ba nuha ka linaleli.” Ka ku ya ka buka ya A Handbook on the Gospel of Matthew linzwi la “babutali” li tolokilwe ku zwa fa “linzwi la Sigerike le ne li talusa baprisita ba Maperesia be ne ba ziba hahulu ku nuha ka linaleli.” Mi buka ya The Expanded Vine’s Expository Dictionary of New Testament Words i bulela kuli linzwi leo li talusa “muloi, nakaloti, mutu wa mabibo.”

Nihaike kuli ba ba nuha ka linaleli ni baloi ki ba bañata kacenu, Bibele i lu lemusa kuli ha lu swaneli ku itusisa bona. (Isaya 47:13-15) Ba swalisana ni badimona mi ba eza lika za toile Jehova Mulimu. (Deuteronoma 18:10-12) Kona libaka ha ne ku si na lingeloi la Jehova le ne li bulelezi banuhi ka za ku pepwa kwa Jesu. Kono Mulimu naa ba lemusize mwa tolo kuli ba si ke ba kutela ku Mulena Heroda ya maswe, kakuli na bata ku bulaya Jesu. Kacwalo “ba kutela kwa naha ya habobona ka nzila i sili.”—Mateu 2:11-16.

Kana Bakreste ba niti ne ba ka tabela ku tumisa makande a buhata a kopamisa litaba za niti ka za ku pepwa kwa Jesu? Kaniti luli kalabo kikuli, ku tokwa.