An Mesiyas! An Gagamiton nin Dios sa Pagliligtas
An Mesiyas! An Gagamiton nin Dios sa Pagliligtas
“Huli ta kun paanong an gabos nagagadan ki Adan, siring man an gabos bubuhayon ki Cristo.”—1 COR. 15:22.
1, 2. (a) Ano an nagin reaksion ni Andres asin Felipe kan mamidbid ninda si Jesus? (b) Taano ta sinasabi niato na mas dakol kitang ebidensia dapit sa pagigin Mesiyas ni Jesus kisa kan sa mga Kristiano kan enot na siglo?
“NANOMPONGAN na niamo an Mesiyas,” an sabi ni Andres ki Pedro na tugang nia, na kombensido na si Jesus kan Nazaret an Linahidan nin Dios. Si Felipe nakombensir asin hinanap an saiyang katood na si Natanael, na nagsasabi sa saiya: “Nanompongan na niamo an saro na isinurat ni Moises, sa Ley, asin kan Mga Propeta, si Jesus, an aki ni Jose, na taga Nazaret.”—Juan 1:40, 41, 45.
2 Lubos daw kamong kombensido na si Jesus an ipinanugang Mesiyas, an gagamiton ni Jehova bilang ‘Pangenot na Ahente nin kaligtasan’? (Heb. 2:10) Ngonyan, mas dakol kitang ebidensia dapit sa saiyang pagigin Mesiyas kisa kan sa mga parasunod nia kan enot na siglo. An mga pangyayari poon sa pagkamundag ni Jesus sagkod sa saiyang pagkabuhay liwat, na yaon sa Tataramon nin Dios, nagtatao nin dai mapagdududahan na prueba na si Jesus an Cristo. (Basahon an Juan 20:30, 31.) Ipinapaheling man kan Biblia na padagos na ootobon ni Jesus sa langit an saiyang papel bilang Mesiyas. (Juan 6:40; basahon an 1 Corinto 15:22.) Sa espirituwal na paagi, makakapagsabi man kamo na ngonyan “nanompongan na [nindo] an Mesiyas.” Alagad isip-isipa nguna kun paano an enot na mga disipulong idto nakapagkongklusyon nin tama na nanompongan na ninda an Mesiyas.
Progresibong Ihinayag an “Sagradong Hilom” Dapit sa Mesiyas
3, 4. (a) Paano ‘an Mesiyas nanompongan’ kan mga disipulo kan enot na siglo? (b) Taano ta masasabi nindo na solamenteng si Jesus an makakaotob kan gabos na hula manongod sa Mesiyas?
3 Paano makakasegurado an mga parasunod ni Jesus kan enot na siglo na sia an Mesiyas? Paagi sa mga propeta, progresibong ihinayag ni Jehova an nagpapamidbid na mga tanda dapit sa madatong na Mesiyas. An sarong iskolar sa Biblia iinagid an prosesong ini sa pagbilog nin estatuwa na gibo sa mga pidaso nin marmol. Imahinara na dakol na lalaki, na dai pa noarin man nakikomunikar sa lambang saro, an nagdara sa sarong kuarto nin tigsararong pidaso nin marmol. Kun mabilog an estatuwa paagi sa pagsurugponsugpon kan mga pidasong iyan, kamo rasonable sanang makakakongklusyon na siertong may saro na responsable sa paggibo kan espesipikong mga instruksion kun paano bibilogon an estatuwa asin pagpadara sa lambang lalaki kan kanya-kanyang pidaso. Siring sa kada pidaso kan estatuwa, an kada hula manongod sa Mesiyas magtatao nin mahalagang marhay na impormasyon manongod sa Mesiyas.
4 Kun siring, may posibilidad daw na an gabos na hula manongod sa Mesiyas nagkanorongod sanang naotob sa sarong tawo? An sarong parasiyasat nagsabi na an posibilidad na an gabos na hula manongod sa Mesiyas nagkanorongod sanang naotob sa sarong tawo ‘imposible nanggad’ kaya dapat lingawan na sana iyan. “Si Jesus—asin solamenteng si Jesus sa bilog na kasaysayan—an nakaotob kaiyan.”
5, 6. (a) Paano gigibohon an paghokom ki Satanas? (b) Paano progresibong ihinayag nin Dios an dapit sa linahe kan ipinanugang “banhi”?
5 An sentro kan mga hula manongod sa Mesiyas sarong “sagradong hilom” na igwa nin dakol na aspekto na may unibersal na importansia. (Col. 1:26, 27; Gen. 3:15) Kaiba sa hilom na iyan an paghokom ki Satanas na Diablo, “an orihinal na halas,” na iyo an dahelan kun taano ta nagkakasala asin nagagadan an katawohan. (Kap. 12:9) Paano gigibohon an paghokom na iyan? Ihinula ni Jehova na sarong “banhi” na mamumundag sa “babae” an malugad sa payo ni Satanas. An maronot sa payo kan halas iyo an ihinulang “banhi,” na mapoho sa gikanan nin rebelyon, helang, asin kagadanan. Minsan siring, paagi sa pagtogot nin Dios, lulugadon nguna ni Satanas sa simbolikong paagi an bool kan “banhi” kan babae.
6 Progresibong ihinayag ni Jehova kun siisay an magigin ipinanugang “banhi.” An Dios nanumpa ki Abraham: “Paagi sa saimong banhi an gabos na nasyon sa daga magbebendisyon nanggad kan saindang sadiri.” (Gen. 22:18) Ihinula ni Moises na an Saro na ini magigin “sarong propeta” na orog kisa ki Moises. (Deut. 18:18, 19) Sinierto ki David, asin kan huri pinatunayan kan mga propeta, na an Mesiyas magikan sa saiya asin magmamana kan trono ni David sagkod lamang.—2 Sam. 7:12, 16; Jer. 23:5, 6.
Mga Kredensial ni Jesus Bilang an Mesiyas
7. Paanong si Jesus gikan sa simbolikong “babae” nin Dios?
7 Isinugo nin Dios an saiyang Aki, an enot na linalang nia, gikan sa Saiyang arog-agom na organisasyon nin espiritung mga linalang sa langit tanganing magin an ipinanugang “banhi.” Ini nagkaipo na an bugtong na Aki nin Dios ‘magpakadai sa sadiri’ paagi sa pagbaya sa langitnon na buhay asin mamundag bilang sangkap na tawo. (Fil. 2:5-7; Juan 1:14) An ‘paglindong’ ki Maria kan banal na espiritu naggarantiya na an mamumundag “aapodon na banal, Aki nin Dios.”—Luc. 1:35.
8. Paano inotob ni Jesus an hula manongod sa Mesiyas kan ipresentar nia an saiyang sadiri para sa bautismo sa tubig?
8 An mga hula manongod sa Mesiyas nagpaparisa kun saen asin kun noarin malataw si Jesus. Si Jesus namundag sa Betlehem arog kan ihinula. (Miq. 5:2) Kan enot na siglo, inaasahan nanggad iyan kan mga Judio. Huling inaantisipar an paglataw kan Mesiyas, an nagkapira naghapot manongod ki Juan na Bautisador: “Sia daw kaya an Cristo?” Alagad si Juan nagsimbag: “An saro na mas makosog kisa sa sako nagdadangadang.” (Luc. 3:15, 16) Paagi sa pagduman ni Jesus ki Juan kan tigrakdag nin 29 C.E. tanganing magpabautismo sa edad na 30 anyos, sa tamang panahon iprinesentar nia an saiyang sadiri bilang an Mesiyas. (Dan. 9:25) Dangan, pinonan nia an saiyang makasaysayan na ministeryo, na nagsasabi: “An itinalaan na panahon naotob na, asin an kahadean nin Dios harani na.”—Mar. 1:14, 15.
9. Minsan ngani mayo nin bilog na detalye, ano an nagin marigon na kombiksion kan mga disipulo ni Jesus?
9 Minsan siring, kaipuhan na itanos an inaasahan nin mga tawo kaidto. Si Jesus tama sanang irinukyaw bilang Hade, alagad sa huri sana ninda lubos na masasabotan na sia mamamahala gikan sa langit asin iyan sa ngapit pa. (Juan 12:12-16; 16:12, 13; Gibo 2:32-36) Minsan siring, kan si Jesus maghapot, “Para sa saindo siisay ako?” Si Pedro daing pag-alangan na nagsimbag: “Ika an Cristo, an Aki kan nabubuhay na Dios.” (Mat. 16:13-16) Siring man kaiyan an simbag ni Pedro kan an dakol maghale, huli ta sinda nasingkog sa sarong katokdoan.—Basahon an Juan 6:68, 69.
Paghinanyog sa Mesiyas
10. Taano ta idinoon ni Jehova an pangangaipo na maghinanyog sa saiyang Aki?
10 Sa langit, an bugtong na Aki nin Dios sarong makakamhan na espiritung persona. Digdi sa daga, si Jesus an “representante kan Ama.” (Juan 16:27, 28) Sia nagsabi: “An sakong itinotokdo bakong sa sako, kundi sa saiya na nagsugo sa sako.” (Juan 7:16) Bilang pagpatunay sa pagigin Mesiyas ni Jesus durante kan transpigurasyon, ipinagboot ni Jehova: “Maghinanyog kamo sa saiya.” (Luc. 9:35) Iyo, maghinanyog, o magkuyog, sa Pinili na ini. Iyan nagkakaipo nin pagtubod asin marahay na mga gibo—na parehong mahalagang marhay nanggad tanganing mapaogma an Dios asin magkamit nin buhay na daing katapusan.—Juan 3:16, 35, 36.
11, 12. (a) Sa anong mga dahelan na an mga Judio kan enot na siglo isinikwal si Jesus bilang an Mesiyas? (b) Sairisay an nagtubod ki Jesus?
11 Minsan ngani kadakol kan kredensial ni Jesus na nagpapatunay na sia an Mesiyas, dai sia minidbid kan dakulang mayoriya nin mga Judio kan enot na siglo. Taano? Huling sinda mismo igwa na nin dating mga ideya manongod sa Mesiyas, kaiba na an pagigin sarong mesiyas na politiko na mapatalingkas sa sainda sa pang-aapi kan Roma. (Basahon an Juan 12:34.) Sa siring, dai ninda maaako an Mesiyas na maotob kan mga hula na nagsasabing sia duduhagion, isisikwal nin mga tawo, itatalaga sa kakologan saka sa pakaaram dapit sa helang, asin sa katapustapusi gagadanon. (Isa. 53:3, 5) Dawa an nagkapira sa maimbod na mga disipulo ni Jesus nadesganar huli sa dai nia pagkalda sa Israel sa pang-aapi kan Roma. Alagad sinda nagdanay na maimbod, asin pag-abot nin panahon, itinao sa sainda an tamang pakasabot.—Luc. 24:21.
12 An saro pang dahelan sa pagsikwal nin mga tawo ki Jesus bilang an ipinanugang Mesiyas iyo an saiyang mga katokdoan, na dai maako nin dakol. An paglaog sa Kahadean nagkakaipo na an saro ‘paindahan an saiyang sadiri,’ ‘magkakan kan laman asin mag-inom kan dugo ni Jesus,’ ‘mamundag giraray,’ asin magin “bakong kabtang kan kinaban.” (Mar. 8:34; Juan 3:3; 6:53; 17:14, 16) Para sa mga orgolyoso, mayaman, asin mapagsaginsagin depisilon otobon an mga kahagadan na ini. Minsan siring, an mapakumbabang mga Judio inako si Jesus bilang an Mesiyas, siring kan nagkapirang Samaritano na nagsabi: “An tawong ini siertong an paraligtas kan kinaban.”—Juan 4:25, 26, 41, 42; 7:31.
13. Paano naeksperyensiahan ni Jesus an paglugad sa saiyang bool sa simbolikong paagi?
13 Ihinula ni Jesus na sia kokondenaron kan poon na mga saserdote asin ipapako kan mga Hentil sa harigi, alagad sa ikatolong aldaw, sia mabangon. (Mat. 20:17-19) An deklarasyon nia sa atubangan kan Sanhedrin na sia “an Cristo na Aki nin Dios” hinusgaran na paglanghad. (Mat. 26:63-66) Si Pilato ‘mayo nin ano man na nakua sa saiya na maninigo sa kagadanan,’ alagad huling sinahotan man sia nin sedisyon kan mga Judio, “itinao [ni Pilato] si Jesus sa kagustohan ninda.” (Luc. 23:13-15, 25) Sa siring, “pinaindahan” ninda asin nagkasarapakat sinda na gadanon “an Pangenot na Ahente nin buhay,” sa ibong kan kadakol na prueba na sia isinugo nin Dios. (Gibo 3:13-15) An Mesiyas ‘ginadan’ siring sa ihinula, na ipinako sa harigi kan Aldaw nin Paskua kan 33 C.E. (Dan. 9:26, 27; Gibo 2:22, 23) Paagi sa maringis na pagkagadan na ini, linugadan an saiyang “bool” na ihinula sa Genesis 3:15.
Kun Taano ta Kinaipuhan na Magadan an Mesiyas
14, 15. (a) Sa anong duwang dahelan itinogot ni Jehova na magadan si Jesus? (b) Ano an ginibo ni Jesus pagkabuhay liwat sa saiya?
14 Itinogot ni Jehova na magadan si Jesus huli sa duwang mahalagang marhay na dahelan. Enot, an kaimbodan ni Jesus sagkod sa kagadanan nakaresolber sa sarong importanteng aspekto kan “sagradong hilom.” Pinatunayan nia sagkod sa kagadanan na kaya nin sarong sangkap na tawo na papagdanayon an diosnon na debosyon asin suportaran an soberaniya nin Dios sa ibong kan pinakagrabeng mga pagbalo ni Satanas. (1 Tim. 3:16) Ikaduwa, arog kan sinabi ni Jesus, ‘an Aki nin tawo nagdigdi tanganing itao an saiyang kalag bilang pantubos na karibay nin dakol.’ (Mat. 20:28) An “katimbang na pantubos” na ini an nagin bayad sa penalidad na kasalan na minana kan mga aki ni Adan asin nagpagin posible na itao an buhay na daing katapusan sa gabos na inaako si Jesus bilang an gagamiton nin Dios sa pagliligtas.—1 Tim. 2:5, 6.
15 Pakalihis nin tolong aldaw sa lolobngan, si Cristo binuhay liwat, asin sa laog nin 40 aldaw sia nagpaheling sa saiyang mga disipulo, na nagpatunay na sia buhay asin nagtao sa sainda nin dugang pang mga instruksion. (Gibo 1:3-5) Dangan, suminakat sia sa langit tanganing ipresentar ki Jehova an halaga kan saiyang mahal na marhay na atang asin halaton an itinalaan na panahon kun noarin mapoon an saiyang presensia bilang Mesiyanikong Hade. Mientras tanto, dakolon pa siang dapat gibohon.
Pag-otob sa Saiyang Papel Bilang an Mesiyas
16, 17. Sabihon kun ano an mga kaiba sa papel ni Jesus bilang an Mesiyas pagkasakat nia sa langit.
16 Sa laog nin dakol na siglo poon kan si Jesus buhayon liwat, maimbod na dinidirehiran nia an mga aktibidad kan Kristianong kongregasyon na pinamamahalaan nia bilang Hade. (Col. 1:13) Sa itinalaan na panahon, poponan niang gamiton an saiyang kapangyarihan bilang Hade kan Kahadean nin Dios. An mga hula sa Biblia asin pangyayari sa kinaban nagpapatunay na an saiyang presensia bilang Hade nagpoon kan 1914, pati na an “pagtatapos kan sistema nin mga bagay.” (Mat. 24:3; Kap. 11:15) Dai nahaloy pagkatapos kaiyan, pinangenotan nia an banal na mga anghel sa pagpalayas sa langit ki Satanas asin sa saiyang mga demonyo.—Kap. 12:7-10.
17 An paghuhulit asin pagtotokdo na pinonan ni Jesus kan 29 C.E. nagrarani na sa dakulang kulminasyon kaiyan. Dai mahahaloy, hohokoman na nia an gabos na nabubuhay. Dangan sasabihon nia sa mga arog-karnero, na inaako sia bilang an gagamiton ni Jehova sa pagliligtas, na ‘manahon an kahadean na inandam para sa sainda poon pa kan pagkaestablisar kan kinaban.’ (Mat. 25:31-34, 41) Lalaglagon an mga nagsisikwal ki Jesus bilang Hade kun pangenotan na nia an langitnon na mga hukbo tumang sa gabos na karatan. Dangan gagaposon ni Jesus si Satanas asin iaapon sia sa “bûngaw” kaiba kan saiyang mga demonyo.—Kap. 19:11-14; 20:1-3.
18, 19. Ano an nahahaman ni Jesus sa pag-otob sa saiyang papel bilang an Mesiyas, na may anong mga resulta para sa makinuyog na katawohan?
18 Durante kan saiyang Sangribong Taon na Paghade, lubos na ootobon ni Jesus an gabos niang titulo, siring baga kan “Makangangalas na Parahatol, Makakamhan na Dios, Amang Daing Sagkod, Prinsipe nin Katoninongan.” (Isa. 9:6, 7) Paagi sa saiyang pamamahala sa Kahadean, magigin sangkap an mga tawo, kaiba na an mga gadan na binuhay liwat. (Juan 5:26-29) Gigiyahan kan Mesiyas an masinunod na mga tawo pasiring sa “mga burabod kan tubig nin buhay,” tanganing an makinuyog na katawohan magkamit nin matoninong na relasyon ki Jehova. (Basahon an Kapahayagan 7:16, 17.) Pagkatapos kan huring pagbalo, an gabos na rebelde, kaiba na si Satanas asin an saiyang mga demonyo, ‘iaapon sa danaw nin kalayo,’ an pagronot sa payo kan “halas.”—Kap. 20:10.
19 Makangangalas asin sangkap nanggad na inootob ni Jesus an saiyang papel bilang an Mesiyas! An paraisong daga mapapano nin nabalukat na mga tawo, na mabubuhay sagkod lamang na may sangkap na salud asin kaogmahan. Mawawara na an gabos na katuyawan sa sagradong ngaran ni Jehova, asin biyong mabibindikar an pagigin may deretso nia bilang soberano kan uniberso. Sarong dakulang mana nanggad an naghahalat sa gabos na nagkukuyog sa Linahidan nin Dios!
Nanompongan Na daw Nindo an Mesiyas?
20, 21. Ano an mga dahelan nindo sa pagsabi sa iba manongod sa Mesiyas?
20 Poon kan 1914, kita nabubuhay na sa panahon nin pa·rou·siʹa, o presensia, ni Cristo. Minsan ngani dai naheheling an saiyang presensia bilang Hade kan Kahadean nin Dios, iyan risang-risa sa kaotoban kan mga hula. (Kap. 6:2-8) Minsan siring, arog sa mga Judio kan enot na siglo, dai iniintindi nin kadaklan na tawo ngonyan an ebidensia kan presensia kan Mesiyas. Gusto man ninda nin mesiyas na politiko o kun dai man, saro na magamit nin mga namamahalang tawong politiko. Pero, naaraman nindo na si Jesus namamahala na ngonyan bilang Hade kan Kahadean nin Dios. Bako daw na naogma kamo kan maaraman nindo iyan? Siring sa mga disipulo kan enot na siglo, kamo napahirong magbalangibog: “Nanompongan na niamo an Mesiyas.”
21 Ngonyan, kun kamo nakikipag-olay manongod sa katotoohan, itinatampok daw nindo an papel ni Jesus bilang an Mesiyas? An paggibo kaiyan pakokosogon an saindong pagpahalaga sa kun ano na an mga ginibo nia para sa saindo, kun ano an mga ginigibo nia ngonyan, asin kun ano pa an mga gigibohon nia. Arog ki Andres asin Felipe, mayong duda na ipinakipag-olay na nindo sa saindong mga paryente asin katood an manongod sa Mesiyas. Taano ta dai sinda dolokon na may bagong kaigotan asin ipaheling sa sainda na si Jesu-Cristo nanggad an ipinanugang Mesiyas, an gagamiton nin Dios sa pagliligtas?
Ikakapaliwanag daw Nindo?
• Paano an Mesiyas nanompongan kan mga disipulo kan enot na siglo?
• Ano an duwang mahalagang dahelan kun taano ta nagadan si Jesus?
• Ano pa an gigibohon ni Jesus sa pag-otob sa saiyang papel bilang an Mesiyas?
[Mga Hapot Para sa Pag-adal]
[Mga Ritrato sa pahina 21]
Paano makakapagsabi an mga tawo kan enot na siglo na si Jesus an ipinanugang Mesiyas?
[Ritrato sa pahina 23]
Kun kamo nakikipag-olay sa iba, itinatampok daw nindo an papel ni Jesus bilang an Mesiyas?