Ang Mesiyas! Paagi sa Diyos sa Pagtaganag Kaluwasan
Ang Mesiyas! Paagi sa Diyos sa Pagtaganag Kaluwasan
“Kay ingon nga diha kang Adan ang tanan nangamatay, sa ingon usab diha kang Kristo ang tanan pagabuhion.”—1 COR. 15:22.
1, 2. (a) Unsay gibuhat ni Andres ug Felipe sa dihang ilang nahibalag si Jesus? (b) Nganong makaingon kita nga mas daghan kitag ebidensiya karon nga si Jesus mao ang Mesiyas?
“NAKAPLAGAN namo ang Mesiyas,” miingon si Andres ngadto sa iyang igsoon nga si Pedro. Siya kombinsido nga si Jesus nga taga-Nasaret mao ang Dinihogan sa Diyos. Nagtuo usab niana si Felipe busa iyang gipangita ang iyang higala nga si Natanael, ug giingnan siya: “Nakaplagan namo ang usa nga bahin kaniya si Moises, diha sa Balaod, ug ang mga Manalagna misulat, si Jesus, nga anak ni Jose, nga taga-Nasaret.”—Juan 1:40, 41, 45.
2 Kombinsido ka ba gayod nga si Jesus ang gisaad nga Mesiyas, ang ‘Pangulong Ahente [ni Jehova] sa kaluwasan’? (Heb. 2:10) Karong adlawa, mas daghan kitag ebidensiya nga siya ang Mesiyas. Sukad sa pagkatawo ni Jesus hangtod sa iyang pagkabanhaw, ang Pulong sa Diyos naghatag ug dili-malalis nga pamatuod nga siya ang Kristo. (Basaha ang Juan 20:30, 31.) Gipakita usab sa Bibliya nga si Jesus magpadayon sa pagtuman sa iyang papel ingong Mesiyas bisag tua na siya sa langit. (Juan 6:40; Basaha ang 1 Corinto 15:22.) Sa espirituwal nga diwa, ikaw usab makaingon nga imong ‘nakaplagan ang Mesiyas’ karon. Apan tagda usa kon sa unsang paagi natino sa unang mga tinun-an nga ilang nakaplagan ang Mesiyas.
Ang “Sagradong Tinago” Bahin sa Mesiyas Anam-anam nga Gipadayag
3, 4. (a) Sa unsang paagi ‘nakaplagan [sa unang-siglong mga tinun-an] ang Mesiyas’? (b) Nganong makaingon ka nga diha lamang kang Jesus natuman ang tanang tagna bahin sa Mesiyas?
3 Nganong nakaseguro ang unang-siglong mga sumusunod ni Jesus nga siya ang Mesiyas? Pinaagi sa mga manalagna, si Jehova anam-anam nga nagpadayag ug mga ilhanan bahin sa pag-abot sa Mesiyas. Ang usa ka eskolar sa Bibliya nagtandi niini sa pag-asembol sa usa ka marmol nga estatwa nga gilangkoban ug lainlaing parte. Handurawa nga ang mga tawo nga walay komunikasyon sa usag usa mag-abot sa usa ka lawak ug magdalag usa ka parte sa estatwa. Kon ilang maasembol ang estatwa, makaingon ka nga duna gyoy tawo nga naghimo sa matag parte ug nagpadala niana ngadto sa matag usa niadtong mga tawhana. Sama sa matag parte sa estatwa, ang matag tagna mahitungod sa Mesiyas magtaganag hinungdanong impormasyon bahin kaniya.
4 Posible kaha nga ang tanang tagna bahin sa Mesiyas sulagma lang nga matuman diha sa usa ka tawo? Usa ka tigdukiduki miingon nga imposible kaayo kana. Siya midugang: “Si Jesus—ug si Jesus lamang sa tibuok kasaysayan—ang nakahimo niana.”
5, 6. (a) Sa unsang paagi ipahamtang ang paghukom kang Satanas? (b) Sa unsang paagi anam-anam nga gipadayag sa Diyos kon kang kinsang banay maggikan ang gisaad nga “binhi”?
5 Ang mga tagna bahin sa Mesiyas nasentro diha sa usa ka “sagradong tinago” nga hinungdanon sa tibuok uniberso. (Col. 1:26, 27; Gen. 3:15) Lakip nianang maong tinago ang paghukom batok kang Satanas nga Yawa, “ang orihinal nga halas,” kinsa nagbanlod sa katawhan ngadto sa sala ug kamatayon. (Pin. 12:9) Sa unsang paagi ipahamtang ang maong paghukom? Si Jehova nagtagna nga ang “binhi” nga ipatungha sa “babaye” magasamad kang Satanas sa ulo. Ang gitagna nga “binhi” magadugmok sa ulo sa halas, nga magwagtang sa hinungdan sa rebelyon, sakit, ug kamatayon. Apan, sa pagtugot sa Diyos, ipahinabo una ni Satanas ang simbolikong samad sa tikod diha sa “binhi” sa babaye.
6 Anam-anam nga gipadayag ni Jehova kon kinsa ang gisaad nga “binhi.” Ang Diyos nagsaad kang Abraham: “Pinaagi sa imong binhi ang tanang nasod sa yuta tinong magapanalangin sa ilang kaugalingon.” (Gen. 22:18) Si Moises nagtagna nga kini Siya mahimong “manalagna” nga labaw pa kang Moises. (Deut. 18:18, 19) Gipasaligan si David, ug sa ulahi gisubli kini sa mga manalagna, nga ang Mesiyas magagikan sa iyang banay ug makapanunod sa trono ni David hangtod sa hangtod.—2 Sam. 7:12, 16; Jer. 23:5, 6.
Mga Pamatuod nga si Jesus ang Mesiyas
7. Sa unsang paagi si Jesus migula gikan sa simbolikong “babaye” sa Diyos?
7 Gipadala sa Diyos ang iyang Anak, ang iyang unang linalang, gikan sa Iyang samag-asawa nga organisasyon sa espiritung mga linalang sa langit, ingong gisaad nga “binhi.” Kini nagkinahanglan nga ‘haw-asan [sa bugtong Anak sa Diyos] ang iyang kaugalingon’ ug ihimugso ingong hingpit nga tawo. (Filip. 2:5-7; Juan 1:14) Ang pagkunsad sa balaang espiritu kang Maria naggarantiya nga ang iyang ipanganak “pagatawgong balaan, Anak sa Diyos.”—Luc. 1:35.
8. Sa unsang paagi gituman ni Jesus ang tagna bahin sa Mesiyas sa dihang iyang gipresentar ang iyang kaugalingon aron magpabawtismo?
8 Ang mga tagna bahin sa Mesiyas nagpaila kon asa ug kanus-a siya motungha. Si Jesus natawo sa Betlehem sumala sa gitagna. (Miq. 5:2) Sa unang siglo, mahinamong nagpaabot ang mga Hudiyo. Kay naghunahuna nga miabot na ang Mesiyas, dihay nangutana bahin kang Juan Bawtista: “Siya na ba kaha ang Kristo?” Apan si Juan mitubag: “Ang usa nga moanhi mas kusgan kay kanako.” (Luc. 3:15, 16) Sa pagduol ni Jesus kang Juan sa tinghunlak sa 29 K.P. aron bawtismohan sa edad nga 30 anyos, iyang gipresentar ang iyang kaugalingon ingong Mesiyas sa tukma nga panahon. (Dan. 9:25) Dayon iyang gisugdan ang iyang hinungdanon kaayong ministeryo, nga nag-ingon: “Ang tinudlong panahon natuman na, ug ang gingharian sa Diyos haduol na.”—Mar. 1:14, 15.
9. Bisag wala mahibalo sa tanang detalye, unsay hugot nga gituohan sa mga tinun-an ni Jesus?
9 Apan, kinahanglang ipasibo sa mga tawo ang ilang mga pagdahom. Husto nga ilang giila si Jesus ingong Hari, apan wala pa nila bug-os masabti nga ang iyang pagmando maoy sa umaabot pa ug maggikan sa langit. (Juan 12:12-16; 16:12, 13; Buh. 2:32-36) Bisan pa niana, sa dihang si Jesus nangutana, “Sumala ninyo kinsa ba ako?” Si Pedro wala magpanuko sa pagtubag: “Ikaw mao ang Kristo, ang Anak sa Diyos nga buhi.” (Mat. 16:13-16) Mao usab kanay gitubag ni Pedro sa dihang daghan ang mibiya kang Jesus kay napandol sa usa ka pagtulon-an.—Basaha ang Juan 6:68, 69.
Pagpatalinghog sa Mesiyas
10. Nganong gipasiugda ni Jehova ang panginahanglan nga magpatalinghog sa iyang Anak?
10 Sa langit, ang bugtong Anak sa Diyos maoy usa ka gamhanang espiritung persona. Sa yuta, si Jesus maoy “hawas sa Amahan.” (Juan 16:27, 28) Siya miingon: “Ang gitudlo ko dili akoa, kondili iya sa nagpadala kanako.” (Juan 7:16) Sa pagpamatuod nga si Jesus ang Mesiyas, panahon sa transpigurasyon si Jehova miingon: “Patalinghog kamo kaniya.” (Luc. 9:35) Oo, patalinghogi, o tumana, kining Pinili. Nagkinahanglan kanag pagtuo ug maayong mga buhat nga parehong hinungdanon sa pagpahimuot sa Diyos ug sa pagbatog kinabuhing walay kataposan.—Juan 3:16, 35, 36.
11, 12. (a) Nganong wala dawata sa unang-siglong mga Hudiyo si Jesus ingong Mesiyas? (b) Kinsay mituo kang Jesus?
11 Bisan tuod adunay daghang pamatuod nga si Jesus mao ang Mesiyas, kadaghanan sa unang-siglong mga Hudiyo wala modawat kaniya. Ngano? Tungod kay duna na silay kaugalingong ideya bahin sa Mesiyas, sama pananglitan, nga siya maoy usa ka politikal nga lider nga magpahigawas kanila gikan sa pagpanglupig sa Roma. (Basaha ang Juan 12:34.) Busa, dili nila madawat ang Mesiyas nga nagtuman sa mga tagna nga nag-ingon nga siya pagatamayon, likayan sa mga tawo, maoy alang sa mga kasakit ug sa pagsinatig sakit, ug sa ulahi pagapatyon. (Isa. 53:3, 5) Bisan ang pipila sa maunongong mga tinun-an ni Jesus nahigawad tungod kay wala siya magtaganag politikal nga kagawasan. Apan, sila nagpabiling maunongon, ug sa ngadtongadto, gihatag kanila ang tukmang pagsabot.—Luc. 24:21.
12 Ang laing rason kon nganong wala dawata sa mga tawo si Jesus ingong gisaad nga Mesiyas mao ang iyang mga pagtulon-an, nga lisod dawaton sa kadaghanan kanila. Aron makasulod sa Gingharian, ang usa kinahanglang ‘magdumili sa kaugalingon,’ ‘mokaon’ sa unod ug dugo ni Jesus, “ipanganak pag-usab,” ug “dili bahin sa kalibotan.” (Mar. 8:34; Juan 3:3; 6:53; 17:14, 16) Ang mga mapahitas-on, adunahan, ug ang mga salingkapaw naghunahuna nga lisod kaayong tumanon ang maong mga kinahanglanon. Apan, ang mapainubsanong mga Hudiyo midawat kang Jesus ingong Mesiyas, sama sa pipila ka Samarianhon kinsa miingon: “Kining tawhana mao gayod ang manluluwas sa kalibotan.”—Juan 4:25, 26, 41, 42; 7:31.
13. Sa unsang paagi si Jesus nakasinatig simbolikong samad sa tikod?
13 Si Jesus nagtagna nga siya pagahukman sa hataas nga mga saserdote ug ilansang sa mga Hentil, apan sa ikatulo ka adlaw, siya pagabanhawon. (Mat. 20:17-19) Ang iyang pag-angkon atubangan sa Sanhedrin nga siya mao ang “Kristo nga Anak sa Diyos” giisip nga usa ka pasipala. (Mat. 26:63-66) Si Pilato miingon nga si Jesus walay “nahimo nga bisan unsa nga takos sa kamatayon,” apan tungod kay si Jesus gipasakaan man usab ug sumbong sa mga Hudiyo nga siya mialsa kono sa pamunoan, si Pilato ‘nagtugyan kang Jesus sa ilang pagbuot.’ (Luc. 23:13-15, 25) Busa ilang “gidumilian” ug gisabotang patyon “ang Pangulong Ahente sa kinabuhi,” bisan pa sa daghan kaayong pamatuod nga siya gipadala sa Diyos. (Buh. 3:13-15) Ang Mesiyas ‘gipatay’ sumala sa tagna, nga gilansang sa estaka atol sa Adlaw sa Paskuwa sa 33 K.P. (Dan. 9:26, 27; Buh. 2:22, 23) Pinaagi sa iyang mapintas nga kamatayon, siya nasamdan sa “tikod” sumala sa gitagna sa Genesis 3:15.
Kon Nganong Kinahanglang Mamatay ang Mesiyas
14, 15. (a) Unsa ang duha ka rason kon nganong gitugotan ni Jehova si Jesus nga mamatay? (b) Unsay gibuhat ni Jesus human siya banhawa?
14 Gitugotan ni Jehova nga mamatay si Jesus tungod sa duha ka hinungdanong rason. Una, ang pagkamatinumanon ni Jesus hangtod sa kamatayon nagsulbad sa usa ka hinungdanong bahin sa “sagradong tinago.” Bug-os niyang gipamatud-an nga ang usa ka hingpit nga tawo makahupot ug “diyosnong pagkamahinalaron” ug magbayaw sa pagkasoberano sa Diyos bisan pa sa kinagrabehang mga pagsulay nga ipadangat ni Satanas. (1 Tim. 3:16) Ikaduha, sumala sa giingon ni Jesus ‘ang Anak sa tawo mianhi aron ihatag ang iyang kalag nga usa ka lukat baylo sa daghan.’ (Mat. 20:28) Kining “katugbang nga lukat” nagbayad sa silot nga sala nga napanunod sa mga anak ni Adan. Tungod usab niini mahatagag kinabuhing walay kataposan ang tanan nga modawat kang Jesus ingong paagi sa Diyos sa pagtaganag kaluwasan.—1 Tim. 2:5, 6.
15 Human sa tulo ka adlaw diha sa lubnganan, si Kristo gibanhaw, ug sulod sa 40 ka adlaw siya nagpakita sa iyang mga tinun-an aron sa pagpamatuod nga siya buhi ug sa paghatag kanilag dugang mga sugo. (Buh. 1:3-5) Dayon misaka siya sa langit aron ipresentar kang Jehova ang bili sa iyang halad ug nagpaabot sa tinudlong panahon sa dihang magsugod ang iyang presensiya ingong Mesiyanikong Hari. Sa kasamtangan, daghan siyag angayng buhaton.
Pagpalampos sa Iyang Papel Ingong Mesiyas
16, 17. Hubita ang papel ni Jesus ingong Mesiyas human sa iyang pagsaka sa langit.
16 Sulod sa daghang siglo sukad sa iyang pagkabanhaw, si Jesus matinumanong nagdumala sa mga kalihokan sa Kristohanong kongregasyon nga niana siya nagmando ingong Hari. (Col. 1:13) Sa gitakdang panahon, gamiton niya ang iyang gahom ingong Hari sa Gingharian sa Diyos. Ang mga tagna sa Bibliya ug ang mga panghitabo sa kalibotan nagpamatuod nga ang iyang presensiya ingong Hari nagsugod sa 1914, maingon man ang “kataposan sa sistema sa mga butang.” (Mat. 24:3; Pin. 11:15) Wala madugay human niana, siya nanguna sa balaang mga manulonda sa pagtambog kang Satanas ug sa iyang mga demonyo gikan sa langit.—Pin. 12:7-10.
17 Ang buluhatong pagsangyaw ug pagpanudlo nga gisugdan ni Jesus sa 29 K.P. hapit nang matapos. Sa dili madugay hukman na niya ang tanang buhi. Dayon moingon siya sa mga tawong karnerohon nga midawat kaniya ingong paagi ni Jehova sa pagtaganag kaluwasan: “Panunda ninyo ang gingharian nga giandam alang kaninyo sukad pa sa pagkatukod sa kalibotan.” (Mat. 25:31-34, 41) Kadtong wala modawat kang Jesus ingong Hari pagalaglagon sa dihang manguna siya sa langitnong kasundalohan sa pagtapos sa pagkadaotan. Dayon gaposon ni Jesus si Satanas ug itambog siya ug ang iyang mga demonyo ngadto sa “kahiladman.”—Pin. 19:11-14; 20:1-3.
18, 19. Unsay mapalampos ni Jesus sa pagtuman sa iyang papel ingong Mesiyas, ug unsay epekto niini ngadto sa masinugtanong katawhan?
18 Sulod sa iyang Usa ka Libo ka Tuig nga Pagmando, si Jesus bug-os nang molihok sumala sa tanan niyang mga titulo, sama sa “Kahibulongang Magtatambag, Diyos nga Gamhanan, Amahang Walay Kataposan, Prinsipe sa Pakigdait.” (Isa. 9:6, 7) Ang mga tawo mahimo nang hingpit ilalom sa pagmando sa iyang Gingharian, hasta kadtong pagabanhawon. (Juan 5:26-29) Ang Mesiyas magagiya sa masinugtanong katawhan ngadto sa “mga tuboran sa mga tubig sa kinabuhi,” ug sa ingon makatagamtam sila ug malinawong relasyon uban kang Jehova. (Basaha ang Pinadayag 7:16, 17.) Human sa kataposang pagsulay, ang tanang mirebelde, lakip na si Satanas ug ang iyang mga demonyo, ‘itambog ngadto sa linaw nga kalayo,’ ang pagdugmok sa ulo sa “halas.”—Pin. 20:10.
19 Hingpit gayod nga tumanon ni Jesus ang iyang papel ingong Mesiyas! Ang usa ka paraisong yuta mapuno sa natubos nga katawhan, kinsa mabuhi sa walay kataposan sa hingpit nga panglawas ug kalipay. Mawala na ang tanang pasipala sa sagradong ngalan ni Jehova, ug bug-os nga mabindikar ang iyang unibersohanong pagkasoberano. Pagkanindot nga panulondon ang nagpaabot sa tanan nga mosunod sa Dinihogan sa Diyos!
Nakaplagan na ba Nimo ang Mesiyas?
20, 21. Nganong angay nimong isulti sa uban ang bahin sa Mesiyas?
20 Sukad sa 1914 kita nagkinabuhi sa yugto sa pa·rou·siʹa, o presensiya ni Kristo. Bisan tuod dili makita ang iyang presensiya ingong Hari sa Gingharian sa Diyos, mahibaloan kana tungod sa pagkatuman sa mga tagna. (Pin. 6:2-8) Bisan pa niana, sama sa unang-siglong mga Hudiyo, kadaghanan sa katawhan karon wala magpakabana sa ebidensiya sa presensiya sa Mesiyas. Sila usab gusto ug usa ka politikal nga lider o usa nga mohawas sa politikal nga mga magmamando. Apan, ikaw nahibalo nga si Jesus nagmando na karon ingong Hari sa Gingharian sa Diyos. Dili ba nalipay ka sa pagkasayod niana? Sama sa unang-siglong mga tinun-an, ikaw natukmod sa pag-ingon: “Nakaplagan namo ang Mesiyas.”
21 Kon maghisgot ka karon bahin sa kamatuoran, imo bang gipasiugda ang papel ni Jesus ingong Mesiyas? Ang pagbuhat niana magpalalom sa imong apresasyon sa iyang nahimo alang kanimo, sa iyang ginabuhat karon, ug sa iya pang pagabuhaton sa umaabot. Sama kang Andres ug Felipe, walay duhaduha nga imo nang naestorya sa imong mga paryente ug mga higala ang mahitungod sa Mesiyas. Nganong dili nimo sila duolon uban ang bag-ong kasibot ug ipakita kanila nga si Jesu-Kristo mao gayod ang gisaad nga Mesiyas, ang paagi sa Diyos sa pagtaganag kaluwasan?
Makapatin-aw Ka Ba?
• Sa unsang paagi nakaplagan sa unang-siglong mga tinun-an ang Mesiyas?
• Unsa ang duha ka hinungdanong rason kon nganong namatay si Jesus?
• Unsa pay pagabuhaton ni Jesus sa pagtuman sa iyang papel ingong Mesiyas?
[Mga Pangutana sa Pagtuon]
[Mga hulagway sa panid 21]
Giunsa pagkahibalo sa mga tawo sa unang siglo nga si Jesus mao ang gisaad nga Mesiyas?
[Hulagway sa panid 23]
Sa dihang makigsulti sa uban, imo bang gipasiugda ang papel ni Jesus ingong Mesiyas?