Messiah! Enye Emi Abasi Adade Anyan̄a Owo
Messiah! Enye Emi Abasi Adade Anyan̄a Owo
“Koro kpa nte otode ke Adam kpukpru owo ẹkpan̄a, kpasụk ntre ke Christ ẹyenam kpukpru owo ẹdu uwem.”—1 COR. 15:22.
1, 2. (a) Didie ke Andrew ye Philip ẹkenam n̄kpọ ke ini ẹkesobode ye Jesus? (b) Ntak emi idọhọde ke imakam inyene uyarade oro owụtde ke Jesus edi Messiah ikan akpa mbet esie?
“NNYỊN imokụt Messiah.” Andrew eketịn̄ ikọ emi ọnọ Peter eyeneka esie, ke enye ama ekedi edifiọk ke Jesus eyen Nazareth edi Enye Emi Abasi Eyetde Aran. Philip ama enịm n̄ko, ntre enye ama oyom Nathaniel ufan esie, onyụn̄ ọkọdọhọ enye ete: “Nnyịn imokụt enye emi Moses ye mme Prọfet ẹkewetde ẹban̄a ke Ibet, kpa Jesus, eyen Joseph, emi otode ke Nazareth.”—John 1:40, 41, 45.
2 Ndi emenen̄ede enịm ke Jesus edi Messiah oro ẹken̄wọn̄ọde, kpa ‘Akpan Isụn̄utom emi Jehovah adade anyan̄a owo’? (Heb. 2:10) Nnyịn imakam inyene ekese uyarade emi owụtde ke Jesus edi Messiah ikan se akpa mme anditiene enye ẹkenyenede. Se N̄wed Abasi etịn̄de aban̄a Jesus ọtọn̄ọde ke emana esie tutu esịm ini emi enye esetde ke n̄kpa enen̄ede owụt ke enye edi Christ. (Kot John 20:30, 31.) Bible owụt n̄ko nte ke Jesus ayaka iso osu ntịn̄nnịm ikọ oro aban̄ade Messiah ke heaven. (John 6:40; kot 1 Corinth 15:22.) Se ekpepde ke Bible ekeme ndinam fi etiene ọdọhọ ke ‘imokụt Messiah’ n̄ko. Edi yak ibem iso ineme se ikanamde akpa mbet Jesus ẹnịm ke imokụt Messiah.
Ẹyarade “Edisana Ndịben̄kpọ” Oro Aban̄ade Messiah Nsịtnsịt
3, 4. (a) Akpa mbet Jesus ẹkesan̄a didie ẹfiọk ke ‘imokụt Messiah’? (b) Ntak emi ọkpọdọhọde ke Jesus kpọt ekeme ndisu kpukpru ntịn̄nnịm ikọ oro ẹban̄ade Messiah?
3 Akpa mbet Jesus ẹkesan̄a didie ẹfiọk ke enye edi Messiah? Jehovah ama ada mme prọfet esie ayarade nsịtnsịt se ẹdidade ẹfiọk Messiah. Eyen ukpepn̄kpọ Bible kiet ọdọhọ ke emi onyụn̄ etie nte nditan̄ nsio nsio mbai mbiet ndian kiet nnam akabade akamba mbiet kiet. Yak idọhọ ke nsio nsio owo oro akanam mîkwe kiet eken m̀mê ndifiọk se enye eken anamde ẹmen mbai oro kiet kiet ẹdi ubet kiet. Edieke ẹtan̄de kpukpru mbai oro ẹdian kiet ndien ata ediye mbiet ọwọrọ ada, ndi ukponịmke ke anaedi odu owo emi ekewetde nte mbiet oro editiede onyụn̄ ọdọn̄ kpukpru owo oro ẹte ẹda mmọ ẹdi ebiet oro? Ntịn̄nnịm ikọ kiet kiet oro ẹban̄ade Messiah onyụn̄ etie nte mbai mbiet oro kiet kiet—ntịn̄nnịm ikọ kiet kiet enyene akpan n̄kpọ emi enye etịn̄de aban̄a Messiah.
4 Ndi kpukpru ntịn̄nnịm ikọ oro ẹban̄ade Messiah ẹkeme ndidue nsu owo ekededi ke idem? Anam-ndụn̄ọde kiet ọkọdọhọ ke utọ n̄kpọ oro ikemeke nditịbe tutu amama! Enye akada ikọ esie ekeberi ntem: “Jesus kpọt edi n̄kukụre owo ke mbụk oro ediwak ntịn̄nnịm ikọ Bible ẹsude enye ke idem.”
5, 6. (a) Ẹdisan̄a didie isobo Satan? (b) Didie ke Abasi akayarade ubon oro “mfri” oro editode nsịtnsịt?
5 Ntịn̄nnịm ikọ oro ẹban̄ade Messiah ẹdi “edisana ndịben̄kpọ” oro ẹnyenede nsio nsio ikpehe, emi onyụn̄ ebehede ofụri ekondo. (Col. 1:26, 27; Gen. 3:15) Ndịben̄kpọ emi esịne nsobo oro anade ebet Satan kpa Devil, “kpa akani urụkikọt” emi anamde ubonowo ẹnam idiọk ẹnyụn̄ ẹkpan̄a. (Edi. 12:9) Ẹdisan̄a didie isobo enye? Jehovah ama etịn̄ ete ke “n̄wan” ayaman eyen m̀mê “mfri” emi edinuakde Satan ibuot. Mfri emi ayanuak Satan ibuot, kpa enye emi akadade nsọn̄ibuot, udọn̄ọ, ye n̄kpa edi. Edi Abasi ayayak Satan ebem iso anuak “mfri” an̄wan emi nditịn̄-ikpat ke ndamban̄a usụn̄.
6 Jehovah ama aka iso ayarade enye emi edidide “mfri” oro nsịtnsịt. Abasi ọkọdọhọ Abraham ete: “Kpukpru mme idụt ke ererimbot ẹyenyụn̄ ẹkụt mfọn eke otode ke ubon fo.” (Gen. 22:18) Moses ọkọdọhọ ke Enye edinyụn̄ idi prọfet nte imọ, edi prọfet emi oyokpon akan Moses. (Deut. 18:18, 19) Abasi ama ọdọhọ David ke Messiah edidi eyen esie, ndien ke enye eyetie ke ebekpo esie ke nsinsi. Mme prọfet eken ẹma ẹnyụn̄ ẹsọn̄ọ emi.—2 Sam. 7:12, 16; Jer. 23:5, 6.
Se Iwụtde ke Jesus Edi Messiah
7. Didie ke Jesus okoto ndamban̄a an̄wan Abasi?
7 Abasi ama osio Akpan esie ke esop Esie ke heaven, emi etiede nte n̄wan esie, ọdọn̄ man edidi “mfri” un̄wọn̄ọ oro. Emi ọkọwọrọ ke ikpọn̄-ikpọn̄ edibon Eyen Abasi ekenyene ndisana idaha esie ke heaven nyak ndi ndimana nte mfọnmma owo ke isọn̄. (Phil. 2:5-7; John 1:14) Edisana spirit ndikodoro Mary ke idem okowụt ke enye ediman “edisana, Eyen Abasi.”—Luke 1:35.
8. Didie ke Jesus okosu ntịn̄nnịm ikọ Messiah ke ini enye ọkọdọhọde John enịm imọ baptism?
8 Mme ntịn̄nnịm ikọ oro ẹban̄ade Messiah ẹma ẹsiak ebiet ye ini emi Jesus edimanade. Jesus akamana ke Bethlehem nte ẹketịn̄de. (Mic. 5:2) Mme Jew oro ẹkedude ke n̄kpọ nte isua 2,000 emi ekebede ẹma ẹnen̄ede ẹdori enyịn ke ini oro ke Messiah edidi. Ntak edi oro ndusụk mmọ ẹkekerede “m̀mê [John Andinịm Owo Baptism] akpakam edi Christ.” Edi John ọkọdọhọ mmọ ete: “Owo emi enyenede odudu akan mi ke edi.” (Luke 3:15, 16) Ke isua 29 E.N., kpa isua emi Jesus ekedide n̄kpọ nte isua 30, enye ama adaha ebịne John ete enịm imọ baptism. Ini emi ke Jesus ekedi Messiah nte ẹma ẹketetịn̄ ke N̄wed Abasi. (Dan. 9:25) Ini emi n̄ko ke enye ọkọtọn̄ọ n̄wọrọnda utom ukwọrọikọ esie, onyụn̄ ọdọhọ mme owo ete: “Edimek ini emekem, obio ubọn̄ Abasi onyụn̄ asan̄a ekpere.”—Mark 1:14, 15.
9. Nso ke mbet Jesus ẹkenen̄ede ẹnịm kpa ye oro mmọ mîkenyeneke ọyọhọ ntọt iban̄a Jesus?
9 Edi akana mme owo ẹkpụhọde ekikere. Ẹkekot Jesus Edidem, ndien se enye onyụn̄ edide edi oro. Edi mbon eyo esie ikenen̄ekede ifiọk ke enye edidu ke heaven ikara isọn̄, ye nte ke emi edidi ke ini iso. (John 12:12-16; 16:12, 13; Utom 2:32-36) Ke ini Jesus okobụpde mbet esie ete, “Mbufo, ndien, ẹdọhọ ẹte ami ndi anie?” Peter ama ọsọsọp ọbọrọ ete: “Afo edi Christ, Eyen odu-uwem Abasi.” (Matt. 16:13-16) Peter ama afiak etịn̄ ukem ikọ emi ke ini ediwak mbet ẹketrede nditiene Jesus sia enyene ikọ esie oro mîkan̄wan̄ake mmọ.—Kot John 6:68, 69.
Kpan̄ Utọn̄ Nọ Messiah
10. Ntak emi Jehovah ọkọdọhọde ikpan̄ utọn̄ inọ Eyen imọ?
10 Ikpọn̄-ikpọn̄ edibon Eyen Abasi ekedi ata akwa owo ke heaven. Enye ‘akada ke ibuot Ete’ esie ke ini enye okodude ke isọn̄. (John 16:27, 28) Enye ọkọdọhọ ete: “Se ami n̄kpepde idịghe okịm, edi enyene enye emi ọkọdọn̄de mi.” (John 7:16) Ke ini ẹkekpụhọrede Jesus mbiet, Jehovah ama ọsọn̄ọ ke enye edi Messiah ke ndikọdọhọ mbet esie ete: “Ẹkpan̄ utọn̄ ẹnọ enye.” (Luke 9:35) Ih, Abasi ọdọhọ ikpan̄ utọn̄, m̀mê ikop uyo Owo Emi Imọ Imekde mi. Emi oyom inyene mbuọtidem inyụn̄ inam nti utom—n̄kpọ iba emi ẹnen̄ede ẹdi akpan n̄kpọ edieke iyomde ndinem Abasi esịt nnyụn̄ nnyene nsinsi uwem.—John 3:16, 35, 36.
11, 12. (a) Ntak emi mme Jew eyo Jesus mîkenịmke ke enye edi Messiah? (b) Mmanie ẹkebuọt idem ke Jesus?
11 Okposụkedi emi akpakịp uyarade ẹkewụtde ke Jesus ekedi Messiah, ata ekese mme Jew eyo esie ikenịmke ke enye edi Messiah. Ntak-a? Koro enyene utọ messiah oro mmọ ẹketiede ẹbet, enye emi edisiode mmọ ke ufụn mbon Rome. (Kot John 12:34.) Ntak edi oro mmọ ẹkesịnde Messiah oro okosude ntịn̄nnịm ikọ oro ọkọdọhọde ke ẹyesịn enye ke ndek, ẹsịn enye, ke enye oyokụt ukụt, emehe ye mfụhọ, ke ẹyenyụn̄ ẹwot enye. (Isa. 53:3, 5) Idem ndusụk mme anam-akpanikọ mbet esie ẹkekere ke enye ọmọn̄ osio mmimọ ke ufụn ukara Rome, edi kpa ye oro idotenyịn mmọ akakpade mfụhọ, mmọ ẹkesụk ẹsọsọn̄ọ ẹda ye enye. Ndien nte ini akakade, ẹma ẹdinam n̄kpọ enen̄ede an̄wan̄a mmọ.—Luke 24:21.
12 N̄kpọ en̄wen emi mîkayakke mme owo ẹnịm ke Jesus edi Messiah edi ukpepn̄kpọ esie, emi ediwak owo mîkenịmke ke akpanikọ. Enye ọkọdọhọ ke mbemiso owo odụkde Obio Ubọn̄ Abasi, ke ana enye “akan̄ idemesie,” ‘ata’ obụkidem imọ onyụn̄ ọn̄wọn̄ iyịp imọ, “ọtọn̄ọ ntak amana,” okûnyụn̄ edi “ubak ererimbot.” (Mark 8:34; John 3:3; 6:53; 17:14, 16) Mbon ntan̄idem, mme imọ owo, ye mbon mbubịk ẹkekere ke se Jesus eketịn̄de emi ọsọn̄ akaha. Edi mme Jew oro ẹkesụhọrede idem ẹma ẹnyịme ke Jesus ekedi Messiah, kpa nte ndusụk mbon Samaria emi ẹkedọhọde ẹte: “Ke akpanikọ . . . owo emi edi andinyan̄a ererimbot.”—John 4:25, 26, 41, 42; 7:31.
13. Didie ke ẹkenuak Jesus nditịn̄-ikpat?
13 Jesus ama etetịn̄ ke mbọn̄ oku ẹyebiom imọ ikpe n̄kpa, ẹnyụn̄ ẹyak mme Gentile ẹkọn̄ imọ ke eto ẹwot, edi ke iyeset ke ọyọhọ usen ita. (Matt. 20:17-19) Ke ini enye ekenyịmede ke iso esop Sanhedrin ete ke imọ idi “Christ Eyen Abasi,” esop ẹkedọhọ ke enye osụn̄i Abasi. (Matt. 26:63-66) Pilate ama okụt ke Jesus “inamke baba n̄kpọ kiet eke odotde n̄kpa,” edi sia mme Jew ẹkedọhọde n̄ko ke Jesus anam mbio obio ẹsọn̄ ibuot, Pilate ama “ayak Jesus ọnọ mmọ ete ẹnam ye enye nte uduak mmọ edide.” (Luke 23:13-15, 25) Mmọdo, mmọ ẹma ẹkan̄ ẹnyụn̄ ẹdụk odu ẹwot “Akpan Isụn̄utom uwem,” kpa ye akpakịp uyarade oro ẹkewụtde ke Abasi ọkọdọn̄ enye. (Utom 3:13-15) Ẹma ẹsịbe Messiah ẹfep nte ẹketịn̄de ẹnịm—ẹkọn̄ enye ke eto ke Usen Passover ke isua 33 E.N. (Dan. 9:26, 27; Utom 2:22, 23) Ibak ibak n̄kpa emi ekedi edinuak enye “nditịn̄-ikpat” oro ẹketịn̄de ke Genesis 3:15.
Ntak Emi Akanade Messiah Akpa
14, 15. (a) Tịn̄ ntak iba oro akanamde Jehovah ayak Jesus edikpa? (b) Nso ke Jesus akanam ke ama ekeset?
14 Enyene akpan ntak iba emi akanamde Jehovah ayak Jesus akpa. Akpa, Jesus ndikọsọn̄ọ nda tutu esịm n̄kpa ama ayarade ata akpan ikpehe “edisana ndịben̄kpọ.” Emi n̄ko ama owụt ke kpa ye ọkpọsọn̄ idomo Satan, ke mfọnmma owo ekeme ndika iso ‘nten̄e Abasi’ tutu esịm n̄kpa, onyụn̄ owụt ke Abasi enen ndikara. (1 Tim. 3:16) Jesus ke idemesie ama etịn̄ ọyọhọ ntak iba emi akanamde Ete imọ ayak imọ idikpa, ete ke ‘Eyen owo ekedi man ọnọ ukpọn̄ esie nte ufak ke ibuot ediwak owo.’ (Matt. 20:28) “N̄kemn̄kem ufak” emi ama osio isop idiọkn̄kpọ oro nditọ Adam ẹkedade ẹmana, onyụn̄ anam ẹkeme ndinọ kpukpru mbon oro ẹbuọtde idem ke Jesus nsinsi uwem.—1 Tim. 2:5, 6.
15 Christ ama eset ke ọyọhọ usen ita, onyụn̄ ada ofụri usen 40 owụt mbet esie ke imeset, onyụn̄ eteme mmọ se ẹkpenamde. (Utom 1:3-5) Ekem enye ama ọnyọn̄ heaven ọkọnọ Jehovah ọsọn̄urua ekọmurua uwa esie onyụn̄ etie ebet ini emi enye editọn̄ọde ndikara nte Messiah. Edi enye okosụk enyenyene ekese ndinam mbemiso ini emi edikem.
Ndikụre Utom Esie nte Messiah
16, 17. Tịn̄ se Jesus anamde nte Messiah tọn̄ọ enye ọkọnyọn̄ heaven.
16 Jesus ke esịn idem ese enyịn ke esop emi enye akarade tọn̄ọ enye ekeset ke n̄kpa. (Col. 1:13) Nte ini akade, enye ekenyene ndinam mme n̄kpọ en̄wen n̄ko nte Edidem Obio Ubọn̄ Abasi. Ntịn̄nnịm ikọ Bible ye se itịbede ke ererimbot ẹwụt ke Jesus ama odu ke ubọn̄ toto ke 1914, ye nte ke “utịt editịm n̄kpọ emi” ọkọtọn̄ọ ini oro. (Matt. 24:3; Edi. 11:15) Esisịt ini ke oro ebede, Jesus ye ndisana angel ẹma ẹsio Satan ye mme demon esie ke heaven ẹduọn̄ọ ke isọn̄.—Edi. 12:7-10.
17 Utom ukwọrọikọ ye unọ ukpep oro Jesus ọkọtọn̄ọde ke isua 29 E.N. ke asan̄a ekpere utịt. Ibịghike, Jesus ọmọn̄ ebiere ikpe ọnọ kpukpru mme odu-uwem. Do ke enye edidọhọ mbon mbieterọn̄ oro ẹnịmde ke imọ ke Jehovah ada ọnọ owo edinyan̄a ete: “Ẹda obio ubọn̄ emi ẹketịmde ẹnịm ẹnọ mbufo toto ke editọn̄ọ ererimbot ẹnyene.” (Matt. 25:31-34, 41) Ẹyesobo kpukpru mbon oro mîdaha Jesus nte Edidem ke ini enye edisan̄ade ye udịmekọn̄ heaven ẹdisobo idiọk ererimbot emi. Ke oro ebede, Jesus oyomụm Satan ye mme demon esie ọkọbi ke “editụn̄ọ ukpe.”—Edi. 19:11-14; 20:1-3.
18, 19. Nso ye nso ke Jesus edinam nte Messiah, ndien nso edidiọn̄ ke emi edida ọsọk mbon n̄kopitem?
18 Ke ini Jesus edikarade ke tọsịn isua, enye ayanam n̄kpọ ekekem ye kpukpru udorienyịn̄ esie, utọ nte, “Utịbe, Ọnọ-item, Ọkpọsọn̄ Abasi, Nsinsi Ete, Ọbọn̄ Emem.” (Isa. 9:6, 7) Ukara esie ayanam mme odu-uwem, ọkọrọ ye mbon oro ẹdinamde ẹset, ẹfọn ẹma. (John 5:26-29) Messiah ayada mbon n̄kopitem aka “obube mmọn̄ uwem,” onyụn̄ anam mmọ ẹdu ke emem ye Jehovah. (Kot Ediyarade 7:16, 17.) Ke ẹma ẹkedomo owo akpatre udomo, ẹyetop kpukpru mbon nsọn̄ibuot, ọkọrọ ye Satan ye mme demon esie, “ẹsịn ke n̄kpọdiọhọ ikan̄,” ntem ke ẹdinuak “urụkikọt” oro ibuot.—Edi. 20:10.
19 Nso utịbe utịbe usụn̄ ke Jesus edisu kpukpru ntịn̄nnịm ikọ Messiah ntem! Isọn̄ emi edidi Paradise, ndien mbon emi Abasi afakde ẹdidụn̄ ke Paradise emi ke nsinsi, ẹnen̄ede ẹkop nsọn̄idem ye inemesịt. Ẹyenam enyịn̄ Jehovah asana ọyọhọ ọyọhọ, ẹnyụn̄ ẹnen̄ede ẹwụt ke enye ikpọn̄-ikpọn̄ odot ndikara. Omokụt utọ utịbe utịbe edidiọn̄ oro anade ebet kpukpru mbon oro ẹkopde uyo Owo Emi Abasi Eyetde Aran!
Ndi Omokụt Messiah?
20, 21. Ntak emi akpanamde mme owo ẹfiọk Messiah?
20 Christ ọkọtọn̄ọ ndidu ke ebekpo ubọn̄ toto ke 1914. Ẹkot ini emi pa·rou·siʹa ke usem Greek. Kpa ye oro nnyịn mîkwe enye, mme ntịn̄nnịm ikọ oro ẹsude ẹwụt ke enye do ke ebekpo nte Edidem Obio Ubọn̄ Abasi. (Edi. 6:2-8) Edi kpa nte mme Jew eyo esie ẹkenamde, ata ediwak owo mfịn iyomke-yom ndifiọk ke Messiah do ke ubọn̄. Mmọ n̄ko ẹyom messiah oro edide akara ukara ererimbot emi. Edi afo ọmọfiọk ke Jesus ke akara idahaemi ke Obio Ubọn̄ Abasi. Eketie fi didie ke idem ke ini ọkọfiọkde emi? Anaedi ama onyụn̄ ọdọn̄ fi ndifiori nte akpa mbet Jesus ẹkefioride ẹte: “Nnyịn imokụt Messiah.”
21 Mfịn, ke ini ọkwọrọde ikọ, ndi emesinam mme owo ẹfiọk utom Jesus nte Messiah? Oro ayanam enen̄ede owụt esịtekọm ke se enye anamde ọnọ fi ye se enye edinamde ke ini iso. Anaedi emesinyene nneme ye iman ye mme ufan fo aban̄a Messiah nte Andrew ye Philip ẹkenamde. Edieke edide ntre, mbọk fiak bịne mmọ idahaemi nyụn̄ nen̄ede nam mmọ ẹfiọk ke Jesus Christ edi ata Messiah oro ẹken̄wọn̄ọde, kpa enye emi Abasi adade ọnọ ubonowo edinyan̄a.
Nte Afo Emekeme Ndinam An̄wan̄a?
• Akpa mbet Jesus ẹkesan̄a didie ẹfiọk ke imokụt Messiah?
• Tịn̄ akpan ntak iba oro akanamde Jehovah ayak Jesus edikpa.
• Tịn̄ ntịn̄nnịm ikọ oro aban̄ade Messiah emi Jesus edisude ke ini iso.
[Mme Mbụme Ukpepn̄kpọ]
[Mme ndise ke page 21]
Mbon eyo Jesus ẹkenam didie ẹfiọk ke enye ekedi Messiah oro ẹken̄wọn̄ọde?
[Ndise ke page 23]
Ke ini ọkwọrọde ikọ, ndi emesinam mme owo ẹfiọk utom Jesus nte Messiah?