Mesaya Na! Ọnọ Ọghẹnẹ Ọ Rọ Wha Esiwo Ze
Mesaya Na! Ọnọ Ọghẹnẹ Ọ Rọ Wha Esiwo Ze
“Keme epanọ ahwo kpobi a whu fiki Adam na, ere a je ti ru ahwo kpobi wo uzuazọ fiki Kristi.”—1 KỌR. 15:22.
1, 2. (a) Eme Andru gbe Filip a ta kẹ amọfa nọ a ruẹ Jesu no? (b) Fikieme ma sae rọ ta nnọ ma wo imuẹro vi Ileleikristi ikpe-udhusoi ọsosuọ inọ Jesu họ Mesaya na?
U MU Andru ẹro inọ Jesu ohwo Nazarẹt na họ Ọnọ A Wholo na, fikiere ọ tẹ ta kẹ Pita oniọvo riẹ nọ: “Ma ruẹ Mesaya na.” Ẹme nana u mu Filip ẹro, ọ tẹ gwọlọ Nataniẹl ogbẹnyusu riẹ, ta kẹe nọ: “Ma ruẹ ọ nọ Mosis ọ jọ evaọ uzi gbe eruẹaro na kere nọ, Jesu e Nazarẹt, ọmọ Josẹf.”—Jọn 1:40, 41, 45.
2 Kọ u mu owhẹ ẹro ziezi inọ Jesu họ Mesaya nọ a ya eyaa riẹ na, ọnọ Jihova ọ rọ ẹkwoma riẹ wha “esiwo” ze? (Hib. 2:10) Nẹnẹ, ma wo imuẹro buobu vi Ileleikristi ikpe-udhusoi ọsosuọ inọ ọye họ Mesaya na. No eyẹ Jesu rite ẹkparomatha riẹ, Ikereakere na e kẹ imuẹro ivevẹ inọ ọye họ Kristi na. (Se Jọn 20:30, 31.) Ebaibol i te je dhesẹ inọ Jesu o ti gbe ru oware nọ a gwọlọ mi ei wọhọ Mesaya na no obọ odhiwu ze. (Jọn 6:40; se 1 Ahwo Kọrint 15:22.) Evaọ edhere abọ-ẹzi, whẹ omara whọ sae ta nnọ whọ “ruẹ Mesaya na” no nẹnẹ. Rekọ joma kake ta kpahe oware nọ u ro mu ilele riẹ jọ ẹro inọ a ruẹ Mesaya na no.
A Dhesẹ ‘Oware Udidi’ Kpahe Mesaya na Via Ẹmẹrera
3, 4. (a) Eme u ru rie lọhọ kẹ ilele ikpe-udhusoi ọsosuọ nọ a sai ro vuhu Mesaya na? (b) Ẹvẹ o sai ro mu owhẹ ẹro inọ ginọ Jesu họ Mesaya na?
3 Fikieme Ileleikristi ikpe-udhusoi ọsosuọ a sae rọ ta ududu inọ Jesu họ Mesaya na? Jihova ọ rọ ẹkwoma eruẹaro na dhesẹ via ẹmẹrera eware nọ a ti ro vuhu Mesaya nọ ọ be tha na. Owuhrẹ Ebaibol jọ ọ rehọ eware nọ a ti ro vuhu Mesaya na ro dhesẹ ẹwhẹhọ abọ sa-sa ọrọ ẹmema jọ. Dae rehọ iẹe inọ ezae buobu nọ a riẹ ohwohwo ho a rehọ abọ sa-sa ọrọ ẹmema na ruọ ubrukpẹ jọ. A tẹ sae whẹ ẹmema na họ gbagba, whọ rẹ sae ginẹ ta inọ ohwo jọ ọ jọ obemu dhesẹ oghẹrẹ nọ u fo nọ ẹmema na ọ rẹ jọ kẹ ae, o te vi abọ riẹ sa-sa se omomọvo. Wọhọ abọ sa-sa ọrọ ẹmema yena, eruẹaruẹ kpobi nọ a ruẹ kpahe Mesaya na o te kẹ obọdẹ ovuẹ kpahe Mesaya na.
4 Kọ o lọhọ re eruẹaruẹ nọ a ruẹ kpahe Mesaya na kpobi e jọ oma ohwo nọ ọ ginẹ rrọ Mesaya na ha rugba? Ọgba-eriariẹ jọ ọ ta inọ re eruẹaruẹ na kpobi e jọ oma ohwo jọ rugba yọ ọye họ Mesaya ha, yọ oware nọ o rẹ sae via vievie he. Ọzae na ọ ta nọ: “Oma Jesu ọvo eruẹaruẹ na kpobi i jo rugba.”
5, 6. (a) Ẹvẹ a ti ro kpe Setan? (b) Ẹvẹ Ọghẹnẹ ọ rọ rehọ ẹmẹrera dhesẹ uyẹ nọ ‘ubi’ nọ a ya eyaa riẹ na o ti no ze?
5 Eruẹaruẹ nọ a ruẹ kpahe Mesaya na e riobọhọ ‘oware udidi’ nọ u wuzou gaga. (Kọl. 1:26, 27; Emu. 3:15) Usu oware udidi yena họ oghẹrẹ nọ a ti ro kpe Setan Ẹdhọ na, “oriọvọ anwae na,” ọnọ ọ wha uzioraha gbe uwhu se ahwo-akpọ. (Evia. 12:9) Ẹvẹ a ti ro kpei? Jihova ọ ta inọ ‘ubi’ nọ “aye” jọ o ti yẹ ọ te nwa Setan uzou. ‘Ubi’ nọ a ya eyaa riẹ na o ti kpe Setan, ọ vẹ rọ ere si ọnọ ọ wha ọwọsuọ, ẹyao, gbe uwhu ze na no. Rekọ Ọghẹnẹ ọ te kake kẹ Setan uvẹ re ọ rowo ‘ubi’ aye na ithihrawọ.
6 Jihova ọ tẹ rọ ẹmẹrera dhesẹ ọnọ ‘ubi’ nọ a ya eyaa riẹ na ọ te jọ. Ọghẹnẹ ọ ya eyaa kẹ Abraham nọ: “Evaọ [ubi] ra erẹwho akpọ na kpobi i je wo oghale.” (Emu. 22:18) Mosis ọ ruẹaro inọ Ubi nana ọ te jọ “ọruẹaro” nọ ọ rro vi ọye omariẹ. (Izie. 18:18, 19) A ta kẹ Devidi inọ Mesaya na o ti no oma riẹ ze ọ vẹ jẹ rehọ agbara-uvie riẹ reuku bẹdẹ bẹdẹ, yọ eruẹaro jọ e ta ẹme ọvo na.—2 Sam. 7:12, 16; Jeri. 23:5, 6.
Eware nọ Ma rọ Riẹ nọ Jesu Họ Mesaya Na
7. Ẹvẹ Jesu o ro no ukoko obọ odhiwu ọrọ Ọghẹnẹ nọ o wọhọ “aye” kẹe na ziọ otọakpọ?
7 Ọghẹnẹ o vi Ọmọ riẹ ze, omama ọsosuọ riẹ, no ukoko Riẹ nọ o wọhọ aye kẹe evaọ obọ odhiwu, re ọ jọ ‘ubi’ nọ a ya eyaa riẹ na. Onana o gwọlọ nọ Ọmọ ọvo Ọghẹnẹ na ọ rẹ kpairoro vrẹ uzuazọ obọ odhiwu a ve yẹi wọhọ ohwo-akpọ ọgbagba. (Fil. 2:5-7; Jọn 1:14) Ẹzi Ẹri na o ti “ruru” Meri re a sai se ọmọ nọ o ti yẹ na “Ọrẹri, Ọmọ Ọghẹnẹ.”—Luk 1:35.
8. Ẹvẹ Jesu o ro ru eruẹaruẹ kpahe Mesaya na gba okenọ ọ nya bru Jọn kẹ ame-ọhọ?
8 Eruẹaruẹ kpahe Mesaya na i dhesẹ oria nọ a te jọ yẹ Jesu gbe okenọ a ti ro yẹe. A yẹ Jesu evaọ Bẹtlẹhẹm wọhọ epanọ a ruẹaro riẹ. Evaọ ikpe-udhusoi ọsosuọ, ahwo Ju a jẹ rọ ọwhọ hẹrẹ ẹtha riẹ. Fikinọ a je rẹro ẹtha Mesaya na, ahwo jọ a nọ kpahe Jọn Ọhọahwo-Ame na nọ: ‘Kọ o sae jọnọ ọye họ Kristi na?’ Rekọ Jọn ọ tẹ kuyo nọ: “Ọnọ ọ ga vi omẹ ọ be tha.” (Luk 3:15, 16) Jesu o bru Jọn ze evaọ ubrobọ ekuhọ ukpe 29 C.E. re ọ họ-ame nọ o te ikpe 30 no, uzedhe oke nọ a ruẹaro nọ Mesaya na ọ te rọ ze na. (Dan. 9:25) O te mu usiuwoma họ ẹta, inọ: “Oke u te [no], uvie Ọghẹnẹ o kẹle ino.”—Mak 1:14, 15.
9. Dede nọ ilele Jesu a wo otoriẹ eware kpobi kpahe iẹe he, didi imuẹro a wo?
9 Rekọ o gwọlọ inọ ahwo a re nwene eware jọ nọ a je rẹro rai kpahe Mesaya na. A dede Jesu rehọ wọhọ Ovie, rekọ a kake riẹ hẹ inọ esuo riẹ o te jọ obaro gbe nnọ odhiwu o ti su no ze. (Jọn 12:12-16; 16:12, 13; Iruẹru 2:32-36) Ghele na, okenọ Jesu ọ nọ inọ: “O no wha bi roro nọ mẹ [rọ]?” Pita ọ kuyo ababọ okioraha nọ: “Whẹ họ Kristi na, Ọmọ Ọghẹnẹ uzuazọ.” (Mat. 16:13-16) Oghẹrẹ uyo ọvo nana Pita ọ kẹ okenọ ahwo buobu a kiemuku Jesu fiki oware jọ nọ o wuhrẹ.—Se Jọn 6:68, 69.
Ẹmeoyo kẹ Mesaya Na
10. Fikieme Jihova o ro fi ẹgba họ nnọ u fo re ma yoẹme kẹ Ọmọ riẹ?
10 Ọmọ Ọghẹnẹ ọ jọ omama ẹzi nọ o wo ẹgba evaọ obọ odhiwu. Nọ Jesu ọ jọ otọakpọ, ọye ọ jọ ọnọ o no ‘obọ Ọsẹ na ze.’ (Jọn 16:27, 28) Ọ ta nọ: “Ewuhrẹ mẹ ọ rọ ọrobọ mẹ hẹ, rekọ ọrọ ọnọ o vi omẹ.” (Jọn 7:16) Okenọ Jesu ọ rẹriẹ, Jihova o dhesẹ inọ ọye họ Mesaya na nọ ọ ta nọ: “Wha yo ẹme riẹ!” (Luk 9:35) Ẹhẹ, ma re yoẹme kẹ Ọnọ Ọghẹnẹ ọ salọ na. Oyena o gwọlọ ẹrọwọ gbe iruo iwoma re ma sai ru eva were Ọghẹnẹ je wo uzuazọ ebẹdẹ bẹdẹ.—Jọn 3:16, 35, 36.
11, 12. (a) Eme o wha riẹ ze nọ ahwo Ju buobu a gbẹ rọ rọwo ho inọ Jesu họ Mesaya na? (b) Amono a fi ẹrọwọ họ Jesu?
11 Dede nọ eware buobu e riobọhọ Jesu inọ ọye họ Mesaya na, ahwo Ju buobu erọ ikpe-udhusoi ọsosuọ a se riẹ. Fikieme? Keme a wo eriwo ọthọthọ kpahe Mesaya na, ojọ rai họ a je roro inọ Mesaya na o ti siwi ai no okienyẹ ahwo Rom. (Se Jọn 12:34.) Fikiere, a tẹ siọ Mesaya nọ o ru eruẹaruẹ Aizaya gba na, inọ a ti rri rie vo, a te siẹe, ọ te vọ avọ edada, ukuhọ riẹ a ve ti kpei. (Aiz. 53:3, 5) O tubẹ kẹ ilele Jesu jọ uye inọ o siwi rai no obọ esuo ahwo Rom hu. Rekọ a talamu ei, uwhremu na a te wo otoriẹ eware na kpobi vevẹ.—Luk 24:21.
12 Oware ofa jọ nọ ahwo a rọ siọ Jesu wọhọ Mesaya nọ a ya eyaa riẹ na họ iwuhrẹ riẹ, enọ e were ibuobu rai hi. O wuhrẹ inọ re ohwo ọ sae ruọ Uvie na, ọ rẹ “vro oma riẹ,” ọ rẹ ‘re oma Jesu jẹ da azẹ riẹ,’ a rẹ ‘wariẹ ohwo na yẹ,’ yọ ọ rẹ jọ ọrọ “akpọ na ha.” (Mak 8:34; Jọn 3:3; 6:53; 17:14, 16) Otu omoya, edafe, gbe otu eviẹwẹ a rri izi nana inọ e ga hrọ. Rekọ otu omaurokpotọ a jẹ Jesu rehọ wọhọ Mesaya na, yọ ere otu ahwo Sameria jọ, enọ e ta nọ: “Ọnana họ Osiwi akpọ na.”—Jọn 4:25, 26, 41, 42; 7:31.
13. Ẹvẹ a rọ rowo Jesu ithihrawọ?
13 Jesu ọ ruẹaro inọ ilori izerẹ na a ti brukpe ei, ahwo erẹwho Egedhọ a ve ti kpei, ẹdẹ avọ esa ọ vẹ te kparoma ze. (Mat. 20:17-19) Fikinọ ọ jọ Sanhẹdrin na rọwo inọ ọye “họ Kristi, Ọmọ Ọghẹnẹ na,” a tẹ ta nnọ ọ ta ẹme aghọ. (Mat. 26:63-66) Pailet ọ jọ oma riẹ ruẹ “oware nọ u te uwhu hu,” rekọ fikinọ ahwo Ju a ta nnọ o bi wuhrẹ ahwo wọso esuo, Pailet “ọ tẹ rehọ Jesu kẹ ae re a ru ei epanọ a guọlọ.” (Luk 23:13-15, 25) Enẹ a rọ vro je si uwhu kpe “Ovie uzuazọ na,” dede nọ u ri vevẹ inọ Ọghẹnẹ o vi rie ze. (Iruẹru 3:13-15) Wọhọ epanọ a ruẹaro riẹ, a kpe Mesaya na nọ a kare iẹe fihọ ure-oja evaọ Ẹdẹ Ọnyavrẹ ọrọ 33 C.E. (Dan. 9:26, 27; Iruẹru 2:22, 23) Ẹkwoma uwhu oja nana a rọ rowo Jesu “ithihrawọ,” wọhọ epanọ a ruẹaro riẹ eva Emuhọ 3:15 na.
Oware nọ O rọ Gwọlọ nọ Mesaya na O re Whu
14, 15. (a) Ẹjiroro ivẹ vẹ Jihova ọ rọ kẹ Jesu uvẹ re o whu? (b) Eme Jesu o ru nọ ọ kparoma ze no?
14 Ugogo eware ivẹ e soriẹ ze nọ Jihova ọ rọ kuvẹ re Jesu o whu. Orọ ọsosuọ, ithihakọ Jesu rite uwhu u ku avro ologbo jọ họ ọrọ ‘oware udidi’ na. O dhesẹ vevẹ inọ ohwo ọgbagba ọ rẹ sae dadamu abọ esuo-okpehru Ọghẹnẹ ghelọ edawọ kpobi nọ Setan ọ wha sei. (1 Tim. 3:16) Orọ avivẹ, wọhọ epanọ Jesu ọ ta, “Ọmọ ohwo ọ . . . rọ uzuazọ riẹ ta ibuobu.” (Mat. 20:28) Ẹtanigbo nana u si omai no uzioraha nọ mai emọ Adamu ma reuku riẹ, u te je ru ei lọhọ re enọ e rọwo Jesu kpobi wọhọ ọnọ Ọghẹnẹ o vi ze ti siwi omai a sai wo uzuazọ ebẹdẹ bẹdẹ.—1 Tim. 2:5, 6.
15 Nọ ọ jọ uki te edẹ esa no, a tẹ kpare Kristi ze, yọ evaọ edẹ udhuvẹ ọ jẹ roma via kẹ ilele riẹ, bi dhesẹ inọ ọ kparoma ze no, ọ tẹ kẹ ai ithubro efa. (Iruẹru 1:3-5) Kẹsena o te muvrẹ kpobọ odhiwu, ọ tẹ rehọ aghare idheidhe riẹ bru Jihova be hẹrẹ okenọ o ti ro muhọ esu. Bọo oke yena, iruo e vọ riẹ abọ.
Erugba Ẹkẹ-Abọ Riẹ Wọhọ Mesaya Na
16, 17. Fodẹ eware nọ Jesu o bi ru anwẹnọ o ro tovrẹ kpohọ odhiwu no.
16 No anwọ oke ẹkparomatha riẹ rite inẹnẹ na, Jesu ọ be sẹro iruẹru ukoko Ileleikristi na, onọ o bi su wọhọ Ovie. (Kọl. 1:13) Nọ oke u te te, o ve dhesẹ ogaga riẹ wọhọ Ovie Uvie Ọghẹnẹ. Eruẹaruẹ Ebaibol gbe eware nọ e rrọ akpọ via i dhesẹ inọ o muhọ esu evaọ 1914, yọ ukpe yena “urere akpọ na” u ro muhọ. (Mat. 24:3; Evia. 11:15) Oke yena o nwane vrẹ no, tei te ikọ-odhiwu riẹ a te gele Setan avọ idhivẹri riẹ no odhiwu ze.—Evia. 12:7-10.
17 Iruo usiuwoma ota nọ Jesu o muhọ evaọ 29 C.E. na u bi te ekuhọ no. Kẹle na, ọ te rehọ enọ e rrọ uzuazọ kpobi guẹdhọ. Ọ vẹ te ta kẹ enọ e jẹ riẹ rehọ wọhọ ọnọ Jihova ọ be rọ wha esiwo ze inọ a “reuku uvie nọ a ruẹrẹ [kẹ ae] nọ emuhọ akpọ na ze.” (Mat. 25:31-34, 41) O ve ti kpe enọ e se inọ ọ rẹ jọ Ovie rai hi evaọ okenọ tei te egbaẹmo obọ odhiwu a ti si emuemu kpobi no. Jesu ọ vẹ te gba Setan, o ve gbolo ei avọ idhivẹri riẹ fihọ ‘ọgọdọ odidi na.’—Evia. 19:11-14; 20:1-3.
18, 19. Eme Jesu o ti ru wọhọ Mesaya na, kọ didi eghale i ti te ahwo-akpọ?
18 Evaọ etoke Esuo Odu Ikpe riẹ, Jesu o ti ru edẹ-ovao riẹ na kpobi gba, wọhọ “Ọkiroro Ogbunu, Ọghẹnẹ Ologbo, Ọsẹ Ebẹdẹ bẹdẹ, Ovie Udhedhẹ.” (Aiz. 9:6, 7) Esuo riẹ o ti fi obọ họ kẹ ahwo-akpọ te ẹgbagba, te enọ ọ te kpare ze. (Jọn 5:26-29) Mesaya na o ti su ahwo-akpọ evezi kpohọ “oria eyeri ame uzuazọ,” onọ u ti ru ei lọhọ re ahwo-akpọ nọ i re yoẹme a wo emamọ usu kugbe Jihova. (Se Eviavia 7:16, 17.) Nọ odawọ urere na o tẹ vrẹ no, a ve ti gbolo ahwo ọwọsuọ kpobi, te Setan avọ idhivẹri riẹ fihọ “ẹtẹre erae”; onana u dhesẹ uwhu “ukumuomu” na.—Evia. 20:10.
19 Jesu o ti gine ru oware nọ a gwọlọ mi ei gba vọvọ wọhọ Mesaya na. Ahwo-akpọ nọ a ta no igbo ze no, enọ e te rria bẹdẹ bẹdẹ avọ omakpokpọ gbe evawere, a te vọ otọakpọ aparadase. Oke yena yọ a si afuẹwẹ kpobi no odẹ Jihova no, yọ a dhesẹ no inọ ọye o gine te osu ehrugbakpọ. Eghale nọ e rrọ obaro kẹ enọ i yoẹme kẹ Ọnọ Ọghẹnẹ O Wholo na a rẹ ruẹ unu gbiku rai hi!
Kọ Whọ Ruẹ Mesaya na No?
20, 21. Eme o rẹ wọ owhẹ ta kẹ amọfa kpahe Mesaya na?
20 No anwọ 1914 ze ma be rọ rria etoke pa·rou·siʹa, hayo ọzino ọrọ Kristi. Dede nọ ma be rue riẹ hẹ wọhọ Ovie Uvie Ọghẹnẹ, eruẹaruẹ nọ i bi rugba i dhesẹ inọ o mu esuo riẹ họ no. (Evia. 6:2-8) Rekọ wọhọ ahwo Ju erọ ikpe-udhusoi ọsosuọ na, ahwo buobu nẹnẹ a rọwo ho inọ Mesaya na ọ ze no. Ahwo-akpọ inẹnẹ a gwọlọ mesaya nọ o re dhomahọ isuẹsu akpọ na, hayo ọnọ ọ rẹ kpọ isu ahwo-akpọ. Rekọ whọ riẹ no inọ Jesu o bi su enẹna wọhọ Ovie ọrọ Uvie Ọghẹnẹ. Kọ eva e were owhẹ nọ whọ rọ riẹ onana? Wọhọ ilele ikpe-udhusoi ọsosuọ na, oma o wọ owhẹ ta nọ: “Ma ruẹ Mesaya na” no.
21 Nẹnẹ, nọ whọ tẹ be ta usiuwoma, kọ whọ be hae fodẹ ọkwa Jesu wọhọ Mesaya na? Ere oruo o rẹ lẹliẹ owhẹ wo edẹro viere kẹ eware nọ o ru kẹ owhẹ no, eware nọ o bi ru enẹna, gbe enọ o bi ti gbe ru evaọ obaro. Wọhọ Andru avọ Filip, avro ọ riẹ hẹ inọ who gbiku Mesaya na no kẹ imoni gbe egbẹnyusu ra. Kọ whọ gbẹ wariẹ rọ ọwhọ nya bru rai re who dhesẹ kẹ ai inọ ginọ Jesu Kristi họ Mesaya nọ a ya eyaa riẹ na, ọnọ Ọghẹnẹ ọ rọ wha esiwo ze?
Kọ Whọ Sae k’Iyo Enọ Nana Vevẹ?
• Ẹvẹ ilele ikpe-udhusoi ọsosuọ na a rẹ sai ro vuhu Mesaya na?
• Fiki eware ivẹ vẹ Jesu o ro whu?
• Eware efa vẹ Jesu o ti gbe ru re o ru iruo riẹ gba wọhọ Mesaya na?
[Enọ Uwuhrẹ]
[Uwoho nọ o rrọ ẹwẹ-obe avọ 21]
Ẹvẹ ahwo ikpe-udhusoi ọsosuọ a rẹ rọ riẹ inọ Jesu họ Mesaya nọ a ya eyaa riẹ na?
[Uwoho nọ o rrọ ẹwẹ-obe avọ 23]
Who te bi wuhrẹ amọfa, kọ whọ be hae ta kpahe iruo nọ Jesu o bi ru wọhọ Mesaya na?