មេស្ស៊ីជាមធ្យោបាយដែលព្រះសង្គ្រោះមនុស្ស!
មេស្ស៊ីជាមធ្យោបាយដែលព្រះសង្គ្រោះមនុស្ស!
«ព្រោះដូចទាំងអស់គ្នាកំពុងស្លាប់ក្នុងអាដាម នោះទាំងអស់គ្នានឹងត្រូវធ្វើឲ្យមានជីវិតឡើងវិញក្នុងគ្រិស្ត»។—១កូ. ១៥:២២
១, ២. (ក) តើអនទ្រេនិងភីលីពមានប្រតិកម្មយ៉ាងណា ពេលជួបលោកយេស៊ូ? (ខ) ហេតុអ្វីយើងអាចនិយាយថា យើងមានភ័ស្តុតាងច្រើនជាងគ្រិស្តសាសនិកនាសតវត្សរ៍ទី១ ដែលថាលោកយេស៊ូជាមេស្ស៊ី?
ដោយជឿជាក់ថាលោកយេស៊ូពីក្រុងណាសារ៉ែតគឺជាអ្នករើសតាំងរបស់ព្រះ អនទ្រេបានប្រាប់ពេត្រុសជាបងប្រុសគាត់ថា«យើងរកឃើញមេស្ស៊ីហើយ!»។ ភីលីពក៏បានជឿ ហើយទៅរកមិត្តរបស់គាត់ឈ្មោះណាថាណែល ដោយប្រាប់ថា៖ «យើងបានរកឃើញលោកដែលច្បាប់ម៉ូសេនិងសេចក្ដីបង្រៀនរបស់ពួកអ្នកប្រកាសទំនាយចែងអំពីលោក គឺលោកយេស៊ូ ជាកូនយ៉ូសែប ពីក្រុងណាសារ៉ែត»។—យ៉ូន. ១:៤០, ៤១, ៤៥
២ តើអ្នកជឿស៊ប់ថាលោកយេស៊ូជាមេស្ស៊ីដែលបានត្រូវសន្យា ជា‹មេដឹកនាំដែលព្រះយេហូវ៉ាប្រើដើម្បីផ្ដល់សេចក្ដីសង្គ្រោះ›ឬទេ? (ហេ. ២:១០) សព្វថ្ងៃ យើងមានភ័ស្តុតាងដែលថាលោកជាមេស្ស៊ី។ យើងមានភ័ស្តុតាងនេះច្រើនជាងអ្នកកាន់តាមលោកយេស៊ូនៅសតវត្សរ៍ទី១ទៅទៀត។ តាំងពីកំណើតរបស់លោកយេស៊ូរហូតដល់ការប្រោសឲ្យលោករស់ឡើងវិញ នោះបណ្ដាំរបស់ព្រះផ្ដល់ភ័ស្តុតាងយ៉ាងជាក់ច្បាស់ថាលោកជាគ្រិស្ត។ (សូមអាន យ៉ូហាន ២០:៣០, ៣១) គម្ពីរក៏បង្ហាញថាលោកយេស៊ូនឹងបន្តបំពេញតួនាទីរបស់លោកជាមេស្ស៊ីពីស្ថានសួគ៌។ (យ៉ូន. ៦:៤០; សូមអាន កូរិនថូសទី១ ១៥:២២) សព្វថ្ងៃ ដោយផ្អែកលើអ្វីដែលអ្នកបានរៀនក្នុងគម្ពីរ អ្នកក៏អាចនិយាយថាអ្នកបាន«រកឃើញមេស្ស៊ី»ដែរ។ ប៉ុន្តែ មុនដំបូង សូមពិចារណានូវរបៀបដែលអ្នកកាន់តាមលោកយេស៊ូនៅសម័យដើមបានសន្និដ្ឋានយ៉ាងត្រឹមត្រូវថា ពួកគាត់បានរកឃើញមេស្ស៊ី។
«អាថ៌កំបាំងដ៏ពិសិដ្ឋ» អំពីមេស្ស៊ីបានត្រូវបើកបង្ហាញបន្ដិចម្ដងៗ
៣, ៤. (ក) តើអ្នកកាន់តាមលោកយេស៊ូនៅសតវត្សរ៍ទី១អាច«រកឃើញមេស្ស៊ី»យ៉ាងណា? (ខ) ហេតុអ្វីអ្នកសន្និដ្ឋានថា មានតែលោកយេស៊ូម្នាក់ទេដែលអាចសម្រេចទំនាយទាំងអស់ស្តីអំពីមេស្ស៊ី?
៣ នៅសតវត្សរ៍ទី១ តើតាមរបៀបណាដែលអ្នកកាន់តាមលោកយេស៊ូអាចនិយាយយ៉ាងប្រាកដថាលោកជាមេស្ស៊ី? តាមរយៈពួកអ្នកប្រកាសទំនាយ ព្រះយេហូវ៉ាបានបើកបង្ហាញបន្ដិចម្ដងៗអំពីសញ្ញាសម្គាល់របស់មេស្ស៊ីដែលនឹងមក។ បណ្ឌិតគម្ពីរមួយរូបបានប្រដូចការបើកបង្ហាញនេះទៅនឹងការយកថ្មកែវមួយដុំៗមកផ្គុំជារូបចម្លាក់មួយ។ សូមនឹកក្នុងចិត្តថា បុរសមួយចំនួនដែលមិនធ្លាប់ប្រស្រ័យទាក់ទងគ្នាសោះ បានយកថ្មនោះមួយដុំម្នាក់មកក្នុងបន្ទប់មួយ។ បើគេផ្គុំថ្មនោះលេចចេញជារូបចម្លាក់ដ៏ល្អឥតខ្ចោះមួយ អ្នកអាចសន្និដ្ឋានថា មានបុគ្គលម្នាក់បានរៀបចំព័ត៌មានល្អិតល្អន់អំពីរូបចម្លាក់នោះ ហើយបញ្ជូនទៅបុរសម្នាក់ៗនូវព័ត៌មានសម្រាប់ខ្លួនគាត់។ ទំនាយនីមួយៗដែលទាក់ទងនឹងមេស្ស៊ី ផ្ដល់ព័ត៌មានសំខាន់ៗអំពីលោក ដូចថ្មមួយដុំៗនៃរូបចម្លាក់នោះ។
៤ បើដូច្នេះ តើបុរសតែម្នាក់មានលទ្ធភាពសម្រេចទំនាយទាំងអស់អំពីមេស្ស៊ីដោយចៃដន្យបានឬទេ? អ្នកស្រាវជ្រាវម្នាក់បានពោលថា លទ្ធភាពដែលមនុស្សម្នាក់អាចសម្រេចទំនាយទាំងអស់អំពីមេស្ស៊ីដោយចៃដន្យ «គឺស្តួចស្តើងណាស់!»។ ដូច្នេះ«ក្នុងប្រវត្ដិសាស្ត្រ មានតែលោកយេស៊ូម្នាក់ទេដែលអាចធ្វើយ៉ាងនេះបាន»។
៥, ៦. (ក) តើការវិនិច្ឆ័យទោសសាថាននឹងធ្វើឡើងតាមរបៀបណា? (ខ) តើព្រះបានបើកបង្ហាញបន្ដិចម្ដងៗយ៉ាងដូចម្ដេចអំពីវង្សត្រកូលនៃ«ពូជ»ដែលបានត្រូវសន្យា?
៥ ទំនាយស្តីអំពីមេស្ស៊ីជាប់ទាក់ទងនឹង«អាថ៌កំបាំងដ៏ពិសិដ្ឋ»ដែលមានលក្ខណៈសំខាន់ជាច្រើនសម្រាប់សកលលោកទាំងមូល។ (កូឡ. ១:២៦, ២៧; លោ. ៣:១៥) ក្នុងអាថ៌កំបាំងនោះ ក៏មានការវិនិច្ឆ័យទោសមេកំណាចសាថាន ជា«ពស់ដំបូងបង្អស់» ដែលនាំមនុស្សជាតិឲ្យទទួលភាពខុសឆ្គងនិងសេចក្ដីស្លាប់។ (បប. ១២:៩) តើការវិនិច្ឆ័យទោសនោះនឹងធ្វើឡើងតាមរបៀបណា? ព្រះយេហូវ៉ាបានទាយថា«ស្ត្រី»ម្នាក់នឹងបង្កើត«ពូជ»មួយដែលនឹងកិនក្បាលសាថាន។ «ពូជ»ដែលបានត្រូវទាយទុកនឹងកិនក្បាលពស់ ហើយនេះនឹងបំបាត់ចោលដើមហេតុនៃការបះបោរប្រឆាំង ជំងឺ និងសេចក្ដីស្លាប់។ ក៏ប៉ុន្តែ ដោយមានការអនុញ្ញាតពីព្រះ មុនដំបូង សាថាននឹងធ្វើឲ្យមានរបួសកែងជើងក្នុងន័យធៀបដល់«ពូជ»របស់ស្ត្រី។
៦ ព្រះយេហូវ៉ាបានបើកបង្ហាញបន្ដិចម្ដងៗថានរណាជា«ពូជ»ដែលបានត្រូវសន្យា។ ព្រះបានស្បថនឹងអាប្រាហាំថា៖ «គ្រប់ទាំងសាសន៍នៅផែនដីនឹងបានពរដោយសារពូជឯង»។ (លោ. ២២:១៨) ម៉ូសេបានទាយថាបុគ្គលនេះនឹងទៅជា«ហោរា»ឬអ្នកប្រកាសទំនាយដែលឧត្តមជាងម៉ូសេ។ (ចោ. ១៨:១៨, ១៩) ព្រះបានធានាដាវីឌថា មេស្ស៊ីនឹងទៅជាកូនចៅរបស់គាត់ ហើយនឹងទទួលបល្ល័ង្ករបស់គាត់ជាមត៌កជារៀងរហូត ក្រោយមកអ្នកប្រកាសទំនាយក៏បានបញ្ជាក់ដូចគ្នាដែរ។—២សាំ. ៧:១២, ១៦; យេ. ២៣:៥, ៦
ភ័ស្តុតាងដែលបញ្ជាក់ថាលោកយេស៊ូជាមេស្ស៊ី
៧. តើតាមរបៀបណាដែលលោកយេស៊ូបានកើតមកពី«ស្ត្រី»របស់ព្រះ?
៧ ព្រះបានចាត់បុត្ររបស់លោកដែលជាការបង្កើតមុនគេបង្អស់ ពីអង្គការនៃបុគ្គលវិញ្ញាណនៅស្ថានសួគ៌ដែលប្រៀបដូចជាភរិយារបស់លោក ឲ្យធ្វើជា«ពូជ»ដែលបានត្រូវសន្យា។ នេះតម្រូវឲ្យបុត្រតែមួយរបស់ព្រះ«លះបង់អ្វីៗទាំងអស់»នៅស្ថានសួគ៌ ហើយកើតជាមនុស្សល្អឥតខ្ចោះ។ (ភី. ២:៥-៧; យ៉ូន. ១:១៤) ដោយសារសកម្មពលបរិសុទ្ធរបស់ព្រះបាន«គ្របបាំង»នាងម៉ារៀ នោះធានាថាបុគ្គលដែលត្រូវកើតមកនឹង«ហៅថាជាបរិសុទ្ធ និងជាបុត្ររបស់ព្រះ»។—លូក. ១:៣៥
៨. ពេលលោកយេស៊ូបង្ហាញខ្លួនដើម្បីទទួលការជ្រមុជទឹក តើលោកកំពុងសម្រេចទំនាយអំពីមេស្ស៊ីយ៉ាងដូចម្ដេច?
៨ ទំនាយទាំងឡាយអំពីមេស្ស៊ីបញ្ជាក់ពីទីកន្លែងនិងពេលវេលាដែលលោកយេស៊ូនឹងលេចមក។ លោកយេស៊ូបានកើតនៅក្នុងក្រុងបេថ្លេហិមដូចបានទាយទុក។ (មីកា ៥:២) នៅសតវត្សរ៍ទី១ ជនជាតិយូដាសង្ឃឹមយ៉ាងខ្លាំងថានឹងឃើញមេស្ស៊ី។ មនុស្សខ្លះដែលបានរង់ចាំមើលមេស្ស៊ី បានសួរអំពីយ៉ូហានដែលជាអ្នកជ្រមុជទឹកថា៖ «ប្រហែលជាគាត់ជាគ្រិស្តទេដឹង?»។ ប៉ុន្តែយ៉ូហានតបឆ្លើយថា៖ «លោកដែលខ្លាំងជាងខ្ញុំកំពុងមក»។ (លូក. ៣:១៥, ១៦) នៅរដូវស្លឹកឈើជ្រុះនាឆ្នាំ២៩ គ.ស. ពេលលោកយេស៊ូមានអាយុ៣០ឆ្នាំ លោកទៅជួបយ៉ូហានដើម្បីឲ្យគាត់ជ្រមុជទឹកឲ្យលោក។ ដោយធ្វើដូច្នេះ លោកបង្ហាញខ្លួនលោកជាមេស្ស៊ីតាមពេលកំណត់។ (ដាន. ៩:២៥) ក្រោយមក លោកចាប់ផ្ដើមធ្វើកិច្ចបម្រើដ៏សំខាន់ ដោយមានប្រសាសន៍ថា៖ «គ្រាកំណត់បានមកដល់ហើយ រាជាណាចក្ររបស់ព្រះគឺជិតដល់ហើយ»។—ម៉ាក. ១:១៤, ១៥
៩. ថ្វីបើអ្នកកាន់តាមលោកយេស៊ូមិនយល់ច្បាស់ក៏ដោយ តើពួកគេជឿស៊ប់ទៅលើអ្វី?
៩ ប៉ុន្តែ សេចក្ដីសង្ឃឹមរបស់ជនជាតិយូដាចំពោះមេស្ស៊ីត្រូវការកែតម្រូវ។ លោកយេស៊ូបានត្រូវសរសើរយ៉ាងត្រឹមត្រូវជាស្តេច តែមនុស្សនៅសម័យនោះមិនយល់ច្បាស់ថា លោកនឹងគ្រប់គ្រងពីស្ថានសួគ៌នៅនាអនាគតទេ។ (យ៉ូន. ១២:១២-១៦; ១៦:១២, ១៣; សកម្ម. ២:៣២-៣៦) ទោះជាយ៉ាងណាក៏ដោយ ពេលលោកយេស៊ូសួរថា៖ «តើអ្នកថាខ្ញុំជាអ្នកណា?» នោះពេត្រុសឆ្លើយដោយឥតស្ទាក់ស្ទើរថា៖ «លោកជាគ្រិស្ត ជាបុត្ររបស់ព្រះដែលមានជីវិតរស់នៅ»។ (ម៉ាថ. ១៦:១៣-១៦) ពេត្រុសក៏បានឆ្លើយស្រដៀងគ្នានេះ ពេលមនុស្សជាច្រើនជំពប់ដួលដោយសារសេចក្ដីបង្រៀនមួយ ហើយលែងកាន់តាមលោកយេស៊ូទៀត។—សូមអាន យ៉ូហាន ៦:៦៨, ៦៩
ការស្ដាប់តាមមេស្ស៊ី
១០. ហេតុអ្វីបានជាព្រះយេហូវ៉ាដៅបញ្ជាក់ថាយើងត្រូវស្ដាប់តាមបុត្ររបស់លោក?
១០ នៅស្ថានសួគ៌ បុត្រតែមួយរបស់ព្រះជាបុគ្គលវិញ្ញាណដ៏ខ្លាំងក្លាមួយរូប។ នៅផែនដី លោកយេស៊ូជា«តំណាងរបស់បិតានៅស្ថានសួគ៌»។ (យ៉ូន. ១៦:២៧, ២៨) លោកមានប្រសាសន៍ថា៖ «អ្វីដែលខ្ញុំបង្រៀន មិនមែនជាសេចក្ដីបង្រៀនរបស់ខ្ញុំទេ តែជាសេចក្ដីបង្រៀនរបស់លោកដែលបានចាត់ខ្ញុំឲ្យមក»។ (យ៉ូន. ៧:១៦) ក្នុងអំឡុងការផ្លាស់ប្រែលក្ខណៈក្រៅរបស់លោកយេស៊ូ ព្រះយេហូវ៉ាបានបញ្ជាក់ថាលោកជាមេស្ស៊ី ហើយបានបង្គាប់ថា៖«ចូរស្ដាប់តាមលោក»។ (លូក. ៩:៣៥) ត្រូវហើយ យើងត្រូវស្ដាប់តាមឬធ្វើតាមអ្នករើសតាំងរបស់ព្រះ។ នេះតម្រូវឲ្យយើងមានជំនឿនិងការប្រព្រឹត្តល្អ ហើយលក្ខណៈទាំងពីរគឺសំខាន់ចាំបាច់ដើម្បីធ្វើឲ្យព្រះពេញចិត្ត និងដើម្បីទទួលជីវិតដែលគ្មានទីបញ្ចប់។—យ៉ូន. ៣:១៦, ៣៥, ៣៦
១១, ១២. (ក) តើជនជាតិយូដានៅសតវត្សរ៍ទី១មិនទទួលស្គាល់លោកយេស៊ូជាមេស្ស៊ីដោយមូលហេតុអ្វីខ្លះ? (ខ) តើនរណាមានជំនឿលើលោកយេស៊ូ?
១១ ទោះជាមានភ័ស្តុតាងជាច្រើនដែលបង្ហាញថាលោកយេស៊ូជាមេស្ស៊ីក៏ដោយ ក៏ជនជាតិយូដាភាគច្រើននៅសតវត្សរ៍ទី១នៅតែមិនទទួលស្គាល់លោកជាមេស្ស៊ីទេ។ ហេតុអ្វី? ពីព្រោះពួកគេប្រកាន់យកទស្សនៈដែលពួកគេធ្លាប់មានពីមុនស្តីអំពីមេស្ស៊ី ដូចជាគិតថាលោកនឹងទៅជាអ្នកដឹកនាំដែលនឹងរំដោះពួកគេពីការគាបសង្កត់របស់ពួករ៉ូម។ (សូមអាន យ៉ូហាន ១២:៣៤) យ៉ាងនេះ ពួកគេមិនអាចទទួលយកមេស្ស៊ីដែលសម្រេចទំនាយដែលថា គេនឹងមើលងាយលោក ត្រូវមនុស្សបោះបង់ចោល ជាមនុស្សទូទុក្ខ ក៏ធ្លាប់ស្គាល់សេចក្ដីឈឺចាប់ ហើយនៅទីបំផុតត្រូវគេសម្លាប់។ (អេ. ៥៣:៣, ៥) សូម្បីតែអ្នកកាន់តាមដ៏ស្មោះត្រង់របស់លោក ក៏ខកចិត្តដែរដោយសារលោកមិនរំដោះពួកគេពីការជិះជាន់របស់ពួករ៉ូម។ ប៉ុន្តែ ពួកគេនៅតែស្មោះត្រង់ចំពោះលោក ហើយក្រោយមកពួកគេទទួលបានការយល់ដឹងយ៉ាងត្រឹមត្រូវអំពីមេស្ស៊ីវិញ។—លូក. ២៤:២១
១២ មូលហេតុមួយទៀតដែលមនុស្សមិនទទួលស្គាល់លោកយេស៊ូជាមេស្ស៊ីដែលបានត្រូវសន្យា គឺដោយសារការបង្រៀនរបស់លោក ដែលពួកគេពិបាកទទួលយក។ ការចូលរាជាណាចក្ររបស់ព្រះនឹងតម្រូវឲ្យពួកគេ«ប្រគល់ខ្លួនឲ្យព្រះ» «បរិភោគ»សាច់និងផឹកឈាមរបស់លោកយេស៊ូ «កើតម្ដងទៀត» ហើយ«មិនរួមចំណែកក្នុងពិភពលោក»។ (ម៉ាក. ៨:៣៤; យ៉ូន. ៣:៣; ៦:៥៣; ១៧:១៤, ១៦) មនុស្សមានអំណួត មនុស្សមានពុតត្បុត និងអ្នកមានគិតថា តម្រូវការទាំងនេះពិបាកធ្វើតាមពេក។ ប៉ុន្តែ ជនជាតិយូដាដែលបន្ទាបខ្លួន ទទួលស្គាល់លោកយេស៊ូជាមេស្ស៊ី ដូចជនជាតិសាម៉ារីខ្លះដែលពោលថា៖ «បុរសនេះប្រាកដជាអ្នកសង្គ្រោះពិភពលោក»។—យ៉ូន. ៤:២៥, ២៦, ៤១, ៤២; ៧:៣១
១៣. ក្នុងន័យធៀប តើលោកយេស៊ូបានរងរបួសនៅកែងជើងយ៉ាងណា?
១៣ លោកយេស៊ូបានទាយថា ពួកសង្ឃនាយកនឹងកាត់ទោសលោក ហើយជនជាតិដទៃនឹងព្យួរលោកលើបង្គោល តែនៅថ្ងៃទី៣ លោកនឹងត្រូវប្រោសឲ្យរស់ឡើងវិញ។ (ម៉ាថ. ២០:១៧-១៩) ពេលលោកបញ្ជាក់នៅមុខក្រុមប្រឹក្សាជាន់ខ្ពស់ថា លោកជា«គ្រិស្ត ជាបុត្ររបស់ព្រះ» នោះពួកគេចាត់ទុកថាលោកប្រមាថព្រះ។ (ម៉ាថ. ២៦:៦៣-៦៦) ពីឡាតបានឃើញថាលោក«មិនបានធ្វើអ្វីដែលគួរនឹងប្រហារជីវិតសោះ» តែដោយព្រោះជនជាតិយូដាចោទប្រកាន់លោកពីបទបំបះបំបោរ នោះពីឡាតបាន«ប្រគល់លោកទៅឲ្យគេប្រហារជីវិត តាមសំណូមពររបស់បណ្ដាជន»។ (លូក. ២៣:១៣-១៥, ២៥) យ៉ាងនេះពួកគេបាន«បដិសេធមិនទទួលស្គាល់»ហើយរៀបផែនការសម្លាប់«មេដឹកនាំដែលផ្ដល់ជីវិត» ទោះជាមានភ័ស្តុតាងជាច្រើនដែលបង្ហាញថាលោកបានត្រូវព្រះចាត់ឲ្យមកក៏ដោយ។ (សកម្ម. ៣:១៣-១៥) ដូចបានទាយទុក មេស្ស៊ីបានត្រូវ«ផ្ដាច់ចេញ» ដោយបានត្រូវគេព្យួរលើបង្គោលនៅថ្ងៃបុណ្យរំលងនាឆ្នាំ៣៣គ.ស.។ (ដាន. ៩:២៦, ២៧; សកម្ម. ២:២២, ២៣) ដោយគេបានសម្លាប់លោកយ៉ាងឃោរឃៅ នោះលោកបានរងរបួសនៅ«កែងជើង» ដូចបានទាយទុកនៅលោកុប្បត្តិ ៣:១៥។
មូលហេតុដែលមេស្ស៊ីត្រូវទទួលមរណភាព
១៤, ១៥. (ក) តើព្រះយេហូវ៉ាអនុញ្ញាតឲ្យលោកយេស៊ូទទួលមរណភាពដោយផ្អែកលើមូលហេតុពីរណា? (ខ) ក្រោយលោកយេស៊ូបានត្រូវប្រោសឲ្យរស់ឡើងវិញ តើលោកបានធ្វើអ្វីខ្លះ?
១៤ ព្រះយេហូវ៉ាអនុញ្ញាតឲ្យលោកយេស៊ូទទួលមរណភាពដោយផ្អែកលើមូលហេតុសំខាន់ពីរ។ មុនដំបូង ភាពស្មោះត្រង់រហូតដល់ស្លាប់របស់លោកយេស៊ូ បានដោះស្រាយផ្នែកសំខាន់មួយនៃ«អាថ៌កំបាំងដ៏ពិសិដ្ឋ»។ ថ្វីបើសាថានបានល្បងលលោកយេស៊ូយ៉ាងខ្លាំងបំផុតក៏ដោយ លោកបានផ្ដល់ទីសំអាងរហូតដល់ស្លាប់ថា មនុស្សល្អឥតខ្ចោះអាចរក្សា«ភក្ដីភាពចំពោះព្រះ» ហើយគាំទ្រការគ្រប់គ្រងរបស់ព្រះ។ (១ធី. ៣:១៦) មូលហេតុទី២ គឺ«កូនមនុស្ស . . . បានមកដើម្បី . . . ឲ្យជីវិតខ្លួនជាថ្លៃលោះមនុស្សជាច្រើន» ដូចលោកយេស៊ូបានមានប្រសាសន៍។ (ម៉ាថ. ២០:២៨) ការ«ប្រគល់ខ្លួនជាថ្លៃលោះ»បានបង់ថ្លៃពិន័យសម្រាប់ភាពខុសឆ្គងដែលកូនចៅរបស់អាដាមបានទទួល ហើយធ្វើឲ្យអស់អ្នកដែលទទួលយកលោកយេស៊ូជាមធ្យោបាយដែលព្រះផ្ដល់សេចក្ដីសង្គ្រោះ មានលទ្ធភាពទទួលជីវិតដែលគ្មានទីបញ្ចប់។—១ធី. ២:៥, ៦
១៥ ក្រោយពីគ្រិស្តបាននៅក្នុងផ្នូរអស់បីថ្ងៃ លោកបានត្រូវប្រោសឲ្យរស់ឡើងវិញ ហើយអស់រយៈពេល៤០ថ្ងៃ លោកបានលេចមកឲ្យពួកអ្នកកាន់តាមឃើញដើម្បីបង្ហាញថា លោកពិតជាមានជីវិត និងដើម្បីផ្ដល់ការណែនាំថែមទៀតដល់ពួកគាត់។ (សកម្ម. ១:៣-៥) បន្ទាប់មក លោកបានឡើងទៅស្ថានសួគ៌ដើម្បីបង្ហាញព្រះយេហូវ៉ានូវតម្លៃនៃគ្រឿងបូជារបស់លោក ហើយរង់ចាំពេលកំណត់ដែលលោកនឹងចាប់ផ្ដើមមានវត្តមានជាស្តេចមេស្ស៊ី។ ទម្រាំដល់ពេលនោះ លោកមានកិច្ចការជាច្រើនដែលត្រូវបំពេញ។
ការបំពេញតួនាទីរបស់លោកជាមេស្ស៊ី
១៦, ១៧. សូមរៀបរាប់តួនាទីរបស់លោកយេស៊ូជាមេស្ស៊ីក្រោយលោកឡើងទៅស្ថានសួគ៌វិញ។
១៦ តាំងពីពេលលោកយេស៊ូបានត្រូវប្រោសឲ្យរស់ឡើងវិញ ហើយច្រើនសតវត្សរ៍ក្រោយមក លោកបានគ្រប់គ្រងជាស្តេចលើក្រុមជំនុំនៃគ្រិស្តសាសនិក ថែមទាំងត្រួតពិនិត្យលើសកម្មភាពរបស់ពួកគេផងដែរ។ (កូឡ. ១:១៣) នៅពេលកំណត់ លោកនឹងចាប់ផ្ដើមប្រើអំណាចរបស់លោកជាស្តេចនៃរាជាណាចក្ររបស់ព្រះ។ ទំនាយក្នុងគម្ពីរនិងព្រឹត្ដិការណ៍ដែលកើតឡើងក្នុងពិភពលោកសឲ្យឃើញថា លោកចាប់ផ្ដើមមានវត្តមានជាស្តេចនៅឆ្នាំ១៩១៤ ហើយនៅឆ្នាំនោះ«គ្រាចុងបញ្ចប់នៃរបៀបរបបពិភពលោក»ក៏ចាប់ផ្ដើមដែរ។ (ម៉ាថ. ២៤:៣; បប. ១១:១៥) មិនយូរក្រោយមក លោកបានដឹកនាំបណ្ដាទេវតាបរិសុទ្ធបោះទម្លាក់សាថាននិងពួកវិញ្ញាណកំណាចរបស់វាពីស្ថានសួគ៌។—បប. ១២:៧-១០
១៧ ការផ្សព្វផ្សាយនិងការបង្រៀនដែលលោកបានចាប់ផ្ដើមនៅឆ្នាំ២៩ គ.ស. គឺជិតដល់ទីបញ្ចប់ហើយ។ នៅពេលឆាប់ៗខាងមុខនេះ លោកនឹងវិនិច្ឆ័យមនុស្សទាំងអស់ដែលមានជីវិត។ បន្ទាប់មក លោកនឹងប្រាប់មនុស្សដែលមានលក្ខណៈដូចចៀម ដែលទទួលយកលោកជាមធ្យោបាយដែលព្រះផ្ដល់សេចក្ដីសង្គ្រោះ ឲ្យ«ទទួលរាជាណាចក្រដែលបានត្រូវរៀបចំឲ្យ[ពួកគេ]តាំងពីកំណើតពិភពលោកជាមត៌ក»។ (ម៉ាថ. ២៥:៣១-៣៤, ៤១) រីឯពួកអ្នកដែលបដិសេធលោកយេស៊ូជាស្តេចនឹងត្រូវបំផ្លាញចោល ពេលលោកដឹកនាំកងទ័ពនៅស្ថានសួគ៌ប្រឆាំងនឹងអំពើអាក្រក់ទាំងឡាយ។ ក្រោយមក លោកយេស៊ូនឹងចងសាថាន ហើយបោះវានិងវិញ្ញាណកំណាចរបស់វាទៅក្នុង«ទីជ្រៅបំផុត»។—បប. ១៩:១១-១៤; ២០:១-៣
១៨, ១៩. ពេលដែលលោកយេស៊ូបំពេញតួនាទីរបស់លោកជាមេស្ស៊ី តើលោកបានសម្រេចការអ្វីខ្លះ? ហើយតើនេះបាននាំឲ្យមនុស្សជាតិដែលចេះស្ដាប់បង្គាប់ទទួលលទ្ធផលអ្វីខ្លះ?
១៨ ក្នុងអំឡុងការសោយរាជ្យមួយពាន់ឆ្នាំរបស់លោកយេស៊ូ លោកនឹងបានបំពេញតួនាទីទាំងអស់ជា‹អ្នកជួយគំនិតយ៉ាងអស្ចារ្យ ព្រះដ៏មានចេស្ដា បិតាដ៏គង់នៅអស់កល្ប ម្ចាស់នៃមេត្រីភាព[ឬសន្ដិភាព]›។ (អេ. ៩:៦, ៧) ក្រោមការគ្រប់គ្រងនៃរាជាណាចក្ររបស់លោក មនុស្សនឹងទៅជាល្អឥតខ្ចោះរួមទាំងមនុស្សស្លាប់ដែលត្រូវប្រោសឲ្យរស់ឡើងវិញ។ (យ៉ូន. ៥:២៦-២៩) មេស្ស៊ីនឹងនាំមនុស្សដែលព្រមធ្វើតាមទៅឯ«រន្ធទឹកដែលផ្ដល់ជីវិត» ហើយនេះនឹងជួយពួកអ្នកដែលចេះស្ដាប់បង្គាប់ឲ្យមានចំណងមិត្តភាពដ៏ល្អជាមួយព្រះយេហូវ៉ា។ (សូមអាន ការបើកបង្ហាញ ៧:១៦, ១៧) បន្ទាប់ពីការសាកល្បងចុងក្រោយ ពួកអ្នកបះបោរប្រឆាំងទាំងអស់រួមបញ្ចូលសាថាននិងពួកវិញ្ញាណកំណាចនឹង«ត្រូវបោះទៅក្នុងបឹងដែលឆេះដោយភ្លើង»ដែលជាការកិនក្បាល«ពស់»ឲ្យស្លាប់តែម្ដង។—បប. ២០:១០
១៩ លោកយេស៊ូបំពេញតួនាទីរបស់លោកជាមេស្ស៊ីយ៉ាងល្អអស្ចារ្យនិងឥតខ្ចោះ! ផែនដីដែលក្លាយជាសួនឧទ្យាននឹងពោរពេញទៅដោយមនុស្សដែលបានត្រូវលោះ ហើយពួកគេនឹងរស់ជារៀងរហូតដោយមានសុខភាពល្អឥតខ្ចោះនិងសុភមង្គល។ ព្រះយេហូវ៉ានឹងជម្រះឲ្យអស់ការបង្ខូចឈ្មោះដ៏ពិសិដ្ឋរបស់លោក ហើយនឹងមានការបង្ហាញថាការគ្រប់គ្រងទូទាំងសកលលោករបស់លោកគឺត្រឹមត្រូវ។ បន្ដិចទៀត អស់អ្នកដែលស្ដាប់បង្គាប់អ្នករើសតាំងរបស់ព្រះ នឹងទទួលរង្វាន់ដ៏អស្ចារ្យ!
តើអ្នកបានរកឃើញមេស្ស៊ីឬទេ?
២០, ២១. ដើម្បីប្រាប់អ្នកឯទៀតអំពីមេស្ស៊ី តើអ្នកមានមូលហេតុណាខ្លះ?
២០ តាំងពីឆ្នាំ១៩១៤មក យើងបានរស់នៅក្នុងគ្រានៃវត្តមានរបស់គ្រិស្ត ឬផារូសៀ។ ទោះជាយើងមើលមិនឃើញវត្តមានរបស់លោកជាស្តេចនៃរាជាណាចក្ររបស់ព្រះក៏ដោយ តែតាមរយៈការសម្រេចទំនាយគម្ពីរ យើងដឹងច្បាស់ថាលោកមានវត្តមាន។ (បប. ៦:២-៨) ទោះជាយ៉ាងណាក៏ដោយ ដូចជនជាតិយូដានៅសតវត្សរ៍ទី១ មនុស្សភាគច្រើនមិនអើពើនឹងភ័ស្តុតាងដែលបញ្ជាក់ពីវត្តមានរបស់មេស្ស៊ីទេ។ ពួកគេក៏ចង់បានមេស្ស៊ីដែលជាអ្នកដឹកនាំម្នាក់ឬយ៉ាងហោចណាស់ចង់បានមេស្ស៊ីម្នាក់ដែលនឹងប្រើមនុស្សជាអ្នកគ្រប់គ្រង។ ប៉ុន្តែ រីឯអ្នកវិញ អ្នកបានរៀនដឹងថា លោកយេស៊ូកំពុងសោយរាជ្យជាស្តេចនៃរាជាណាចក្ររបស់ព្រះ។ ពេលអ្នកដឹងអំពីរឿងនេះ អ្នកពិតជារំភើបចិត្តណាស់ មែនទេ? ម្ល៉ោះហើយ នេះបានជំរុញទឹកចិត្តអ្នកឲ្យពោលដូចអ្នកកាន់តាមលោកយេស៊ូនៅសតវត្សរ៍ទី១ ដែលថា៖ «យើងរកឃើញមេស្ស៊ីហើយ!»។
២១ សព្វថ្ងៃ ពេលអ្នកប្រាប់អ្នកឯទៀតអំពីសេចក្ដីពិត តើអ្នកគូសបញ្ជាក់តួនាទីរបស់លោកយេស៊ូជាមេស្ស៊ីឬទេ? បើធ្វើដូច្នេះ នេះនឹងបង្កើនអំណរគុណរបស់អ្នកចំពោះអ្វីដែលលោកបានធ្វើសម្រាប់អ្នក អ្វីដែលលោកកំពុងធ្វើឥឡូវនេះ ហើយអ្វីដែលលោកនឹងធ្វើនៅអនាគត។ ដូចអនទ្រេនិងភីលីព អ្នកពិតជាបានប្រាប់ញាតិសន្ដាននិងមិត្តភក្ដិរបស់អ្នកអំពីមេស្ស៊ី។ យកល្អឲ្យអ្នកទៅជួបពួកគេដោយមានចិត្តខ្នះខ្នែងកាន់តែខ្លាំងឡើង ហើយបង្ហាញពួកគេថា លោកយេស៊ូគ្រិស្តពិតជាមេស្ស៊ីដែលបានត្រូវសន្យា ជាមធ្យោបាយដែលព្រះសង្គ្រោះមនុស្ស។
តើអ្នកអាចពន្យល់បានទេ?
• តើអ្នកកាន់តាមលោកយេស៊ូនៅសតវត្សរ៍ទី១អាចរកឃើញមេស្ស៊ីយ៉ាងណា?
• តើលោកយេស៊ូត្រូវទទួលមរណភាពដោយផ្អែកលើមូលហេតុពីរណា?
• តើលោកយេស៊ូនឹងធ្វើអ្វីនៅអនាគតក្នុងការបំពេញតួនាទីរបស់លោកជាមេស្ស៊ី?
[សំណួរសម្រាប់វគ្គនីមួយៗ]
[រូបភាពនៅទំព័រ២៤]
តើមនុស្សនៅសតវត្សរ៍ទី១អាចដឹងយ៉ាងដូចម្ដេចថា លោកយេស៊ូជាមេស្ស៊ីដែលបានត្រូវសន្យា?
[រូបភាពនៅទំព័រ២៦]
ពេលអ្នកផ្សព្វផ្សាយដល់អ្នកឯទៀត តើអ្នកគូសបញ្ជាក់តួនាទីរបស់លោកយេស៊ូជាមេស្ស៊ីឬទេ?