Mesia! Yor Nyasaye mar Kelo Warruok
Mesia! Yor Nyasaye mar Kelo Warruok
“Kaka ji duto tho e i Adam, kamano bende nomi ji duto doko mangima e i Kristo.”—1 KOR. 15:22.
1, 2. (a) Ere kaka Andrea gi Filipo notimo bang’ romo gi Yesu? (b) Ang’o momiyo wanyalo wacho ni wan gi gik mang’eny moloyo Jokristo motelo, makonyowa ng’eyo ni Yesu e Mesia?
“WASENWANG’O Mesia.” Mano e kaka Andrea nowachone Petro owadgi kane osefwenyo ni kuom adier Yesu Ja-Nazareth ema ne en Jal Mowal mar Nyasaye. Filipo bende nofwenyo kamano mi nomanyo Nathanael osiepne, mowachone kama: “Wasenwang’o jal ma ne Musa ondiko kuome e Chik, kendo ma Jonabi nondiko kuome; en Yesu ja Nazareth, wuod Josef.”—Joh. 1:40, 41, 45.
2 Be in gadier chuth ni Yesu e Mesia ma ne okor wachne, jal ma Jehova tiyogo kaka ‘Jatelo ma waro ji’? (Hib. 2:10) Mopogore gi jolupne motelo, ndalogi wan gi gik mang’eny makonyowa ng’eyo gadier ni Yesu e Mesia. A nyuolne nyaka chierne, Wach Nyasaye chiwo weche manyiso gadier ni Yesu ema ne en Kristo. (Som Johana 20:30, 31.) Muma bende nyiso ni Yesu ne dhi medo chopo migawone kaka Mesia ka en e polo. (Joh. 6:40; som 1 Jo Korintho 15:22.) Omiyo, kaluwore gi weche misepuonjori ei Muma, in bende ndalogi inyalo wacho ni, ‘isenwang’o Mesia.’ Kata kamano, we wanon ane mokwongo kaka jopuonjre motelo nofwenyo e yo makare ni ne gisenwang’o Mesia.
Elo Mosmos ‘Wach Mopandi’ e Wi Mesia
3, 4. (a) Ere kaka jopuonjre mokwongo ne nyalo ‘nwang’o Mesia’? (b) Ang’o momiyo inyalo wacho ni Yesu kende ema ne nyalo chopo weche duto ma ne okor e wi Mesia?
3 Ere kaka jolup Yesu motelo ne nyalo wacho gadier ni en ema ne en Mesia? Kokalo kuom jonabi, Jehova ne ose elo mosmos gigo ma ne idhi fwenygo Mesia. Jasomo moro ma nono Muma nowacho ni, elo wach Mesia chalo mana ka riwo kite mopogore opogore mopa e loso kit gimoro achiel. Par ane ni joma ng’eny mapok ne oromo a nyaka nene, ng’ato ka ng’ato kuomgi okelo kidi achiel mopa. Ka kitego duto oriw kanyachiel mi giloso gimoro achiel e yo malong’o chuth, onge kiawa ni ibiro ng’eyo ni nyaka bed ni ne nitie ng’at moro ma nopayo kitego kaka dwarore, mi oorogi ne ng’ato ka ng’ato kuom jogo. Mana kaka moro ka moro kuom kitego, e kaka moro ka moro kuom weche ma ne okor e wi Mesia ne dhi konyo ahinya e ng’eyo Mesia.
4 Kuom mano, ne en gima nyalre nade ni ng’at achiel ema ne dhi chopo weche duto ma ne okor e wi Mesia? Jatim nonro moro nowacho ni ok dibed ngang’ ni ng’ato ne nyalo chopo weche duto ma ne okor e wi Mesia ma onge chenro moro, en gima “ok dinyalre chuth,” omiyo chenro moro nyaka ne bedie. “Yesu—mana Yesu kende, nyaka a chakruok mar ngima dhano—ema osechopo weche ma ne okorgo.”
5, 6. (a) Ere kaka ne idhi ng’adne Satan bura? (b) Ere kaka Nyasaye noelo mosmos anyuola mar ‘kodhi’ ma ne okor wachne?
5 Weche ma ne okor e wi Mesia gin kaka ‘wach mopandi’ moting’o weche mang’eny mamulo ngima ji e piny koda e polo. (Kol. 1:26, 27; Chak. 3:15) Wach mopandino noting’o bende bura mibiro ng’ad ne Satan Jachien, ‘thuol machon,’ ma norwako dhano e richo koda tho. (Fwe. 12:9) Ere kaka ne idhi ng’ad burano? Jehova nokoro ni nitie ‘kodhi’ ma ne dhi wuok kuom “dhako” moro, kendo kodhino ne dhi ketho wi Satan. ‘Kodhi’ ma ne okor wachneno ne dhi ketho wi thuol, kotieko gima nokelo chakruok mar ng’anjo, tuoche, koda tho. Kata kamano, mokwongo, kokalo kuom thuolo ma Nyasaye ne dhi miye, Satan ne dhi ketho ofunj tiend ‘kodhi’ mar dhakono e yor ranyisi.
6 Jehova noelo mosmos wach jal ma ne dhi bedo ‘kodhi’ ma ne okorno. Nyasaye nosingore ne Ibrahim kama: “Kuom kothi dhoudi duto mag piny noyud hawi.” (Chak. 22:18) Musa nokoro ni Jalo ne dhi bedo “janabi” maduong’ moloyo Musa. (Rapar 18:18, 19) Ne osingi ne Daudi ni Mesia ne dhi wuok e anyuolane kendo ni ne odhi locho e kom-ruodh Daudi nyaka chieng’, ma en wach ma jonabi nowuoyoe bende bang’e.—2 Sam. 7:12, 16; Yer. 23:5, 6.
Gik Manyiso ni Yesu e Mesia
7. Yesu nowuok nade kuom “dhako” machalo kaka chi Nyasaye?
7 Nyasaye nooro Wuode, chwechne mokwongo, mondo obi obed ‘kodhi’ ma ne okor, kendo kodhino ne oa e riwruok mar oganda Nyasaye manie polo machalo kaka chiege. Mano ne dwaro ni Wuod Nyasaye ma miderma ‘otimre mobed ka nono’ kuom weyo ngimane mar polo mondo onyuole e piny kae kaka dhano ma onge richo. (Fili. 2:5-7; Joh. 1:14) Bedo ni roho maler ‘noumo’ Mariam ne dhi miyo nyathi ma ne idhi nyuolno oluong ni “maler, Wuod Nyasaye.”—Luka 1:35.
8. Ere kaka Yesu ne ochopo wach ma ne okor e wi Mesia sama ne ochiwore mondo obatise gi pi?
8 Weche ma ne okor e wi Mesia nonyiso kinde koda kama Yesu ne dhi fwenyoree. Ne onyuol Yesu e Bethlehem mana kaka ne okor. (Mika 5:2) Kane Mesia chiegni fwenyore, Jo-Yahudi ne kiyo ka girito ahinya biro mare. Nikech siso ma ne gin-go kuom biro mar Mesia, moko ne penjore e wi Johana Jabatiso kama: “Miti dobed Kristo?” Kata kamano, Johana nodwoko niya: “Ng’ato biro moloya gi teko.” (Luka 3:15, 16) Kane obiro ir Johana e higa 29 E Ndalowa mondo obatise ka ojahigini 30, Yesu ne ofwenyore owuon kaka Mesia e kinde mowinjore e wang’e. (Dan. 9:25) Bang’e ne ochako tije ne Nyasaye kowacho niya: “Ogik kare, kendo pinyruodh Nyasaye chiegni.”—Mari. 1:14, 15.
9. Kata obedo ni ne ok ging’eyo weche duto, jopuonjre Yesu ne nigi adier kuom wach mane?
9 Kata kamano, ne dwarore ni ji otim lokruok moko e pachgi e wi biro mare. Ne ji opako Yesu kare ni en Ruoth, kata kamano ne ok ging’eyo ni lochne ne en mar kinde mabiro ka en e polo. (Joh. 12:12-16; 16:12, 13; Tich 2:32-36) To kata kamano, kane Yesu openjo ni, “Un uwacho ni an e ng’a?” Petro nodwoko piyo ni: “In e Kristo, Wuod Nyasaye mangima.” (Math. 16:13-16) Petro nochiwo dwoko machalo gi mano e kinde moro ma thoth ji noweyo luwo Yesu nikech puonjne moro nochwanyogi.—Som Johana 6:68, 69.
Winjo Kendo Luwo Mesia
10. Ang’o momiyo Jehova nojiwo ahinya ni dwarore ni wawinj Wuode?
10 Kane en e polo, Wuod Nyasaye ma miderma ne en ng’at ma nigi teko ahinya. To e piny, Yesu ne en Jal ma ‘Wuoro nooro.’ (Joh. 16:27, 28) Nowacho kama: “Puonjna ok mara, to mar Jal ma noora.” (Joh. 7:16) Ka kit Yesu ne olokore, Jehova nonyiso ratiro ni Yesu e Mesia, kane ochiko kama: “Winjeuru.” (Luka 9:35) Ee, winj kendo iluw wach Jal Moyierni. Winjo Jalo ne dwaro ni ng’ato obed gi yie koda timbe mabeyo—ma duto gin gik madwarore mondo ng’ato omor Nyasaye kendo oyud ngima manyaka chieng’.—Joh. 3:16, 35, 36.
11, 12. (a) Jo-Yahudi ma nodak e kinde Yesu ne okwede kaka Mesia nikech ang’o? (b) Jomage ma noketo yie kuom Yesu?
11 Kata obedo ni ne nitie gik mang’eny manyiso ratiro ni Yesu e Mesia, thoth Jo-Yahudi ma ndalogo ne kwedo ni ok en. Nikech ang’o? Nikech ne gin gi paro moko ma maggi giwegi kuom Mesia ma ne girito, moriwo koda paro mar ni mesia ne dhi bedo jasiasa ma ne dhi gonyogi e bwo sand mar loch Rumi. (Som Johana 12:34.) Omiyo, ne ok giyie gi Mesia ma nochopo weche ma ne okor manyiso ni, ji ne dhi chaye, kwede, kendo nodhi neno chandruok koda masira, mi gikone ne idhi nege. (Isa. 53:3, 5) Kata mana moko kuom jopuonjre Yesu ma ne ochung’ motegno kode, ne ok mor gi wach mar ni ne ok ogonyogi e bwo sand mar joloch. Kata kamano, ne gisiko ka gimakore kode, kendo bang’ kinde, ne olernegi tiend gik moko e yo malong’o.—Luka 24:21.
12 Gimachielo ma nomiyo ji okwedo Yesu kaka Mesia ma ne okor wachne, ne gin puonjge ma thoth ji ne oyudo ka teknegi rwako. Donjo e Pinyruoth ne dhi dwaro ni ng’ato ‘okwerre owuon,’ ‘ocham’ ringre Yesu kod madho rembe, ‘onyuole manyien,’ kendo kik obed ‘mar piny.’ (Mari. 8:34; Joh. 3:3; 6:53; 17:14, 16) Jong’ayi, jomewo, koda jo wuondruok, ne oyudo ka chopo wechego ne teknegi ahinya. Kata kamano, Jo-Yahudi ma ne nigi chuny mobolore norwako Yesu kaka Mesia, mana kaka moko kuom Jo-Samaria ma nowacho kama: ‘Jali adier e jawar mar piny.’—Joh. 4:25, 26, 41, 42; 7:31.
13. Ere kaka ne oketh ofunj tiend Yesu e yor ranyisi?
13 Yesu nokoro ni, jodolo madongo ne dhi kwede, kendo jogo maok Jo-Yahudi ne dhi gure e yath, to e odiechieng’ mar adek ne odhi chier. (Math. 20:17-19) Wacho ayanga e nyim Sanhedrin ni en e “Kristo, Wuod Nyasaye” ne okaw kaka yanyo Nyasaye. (Math. 26:63-66) Pilato noyudo ni Yesu ne “ok osetimo gimoro mowinjore gi buch tho,” to kata kamano, nikech Jo-Yahudi nodonjone bende gi tim mar jiwo ji mondo ong’anj ne sirkal, Pilato “noketo Yesu e lwetgi mondo gitim kaka gidwaro.” (Luka 23:13-15, 25) Omiyo, ne ‘gikwedo’ kendo gango wach mondo gineg “Ruodh ngima,” kata obedo ni ne nitie gik mang’eny ma ne nyiso ratiro ni Nyasaye ema ne oore. (Tich 3:13-15) Mana kaka ne okor, Mesia ‘ne ogol oko’ kane ogure e yath e odiechieng’ Pasaka mar higa 33 E Ndalowa. (Dan. 9:26, 27; Tich 2:22, 23) Kokalo kuom tho malitno, ne oketh “ofunj tiende” mana kaka ne okor e Chakruok 3:15.
Gimomiyo Mesia Nyaka ne Tho
14, 15. (a) Jehova noweyo Yesu mondo otho nikech gik moko ariyo mage? (b) Yesu notimo ang’o bang’ kane osechiere?
14 Jehova noweyo Yesu mondo otho nikech gik moko ariyo madongo. Mokwongo, chung’ mar Yesu motegno nyaka e tho nochopo wach moro maduong’ motudore gi ‘wach ma ne opandino.’ Yesu nonyiso e okang’ mamalo chuth ni dhano ma onge richo nyalo rito ‘chwiruok mare ne Nyasaye,’ kendo riwo lwedo loch Nyasaye kata mana e bwo tembe mager mag Satan. (1 Tim. 3:16) Mar ariyo, mana kaka Yesu nowacho, ‘Wuod dhano ne obiro mondo ochiw ngimane odok rawar ne ji mang’eny.’ (Math. 20:28) ‘Rawarno,’ nochulo kar richo ma Adam noweyo ne kothe, kendo rawarno nochiwo thuolo mar yudo ngima mochwere ne jogo duto morwako Yesu kaka yor Nyasaye mar kelo warruok.—1 Tim. 2:5, 6.
15 Bang’ bet e liel kuom odiechienge adek, Nyasaye ne ochiero Kristo, kendo kuom odiechienge 40 ne ofwenyore ne jopuonjrene, konyisogi ni koro ne ongima, momiyogi weche momedore monego giluw. (Tich 1:3-5) Bang’e ne oidho malo e polo mondo ochiw ne Jehova misangone ma nengone tek, kendo orit kinde moketi ma bedoe mare kaka Mesia Ruoth ne dhi chakore. Ka podi orito kindeno, ne en gi migepe mang’eny.
Tieko Migawone Kaka Mesia
16, 17. Ler ane migawo Yesu kaka Mesia bang’ idho malo e polo.
16 Kuom higini duto bang’ chierne, Yesu osebedo ka tayo tij kanyakla mar Jokristo ma osebedo kolocho e wigi kaka Ruoth. (Kol. 1:13) Ka kinde moketi ochopo, ne odhi chako tiyo gi tekone kaka Ruoth mar Pinyruodh Nyasaye. Weche mokor ei Muma kaachiel gi gik matimore e piny nyiso gadier ni bedoe mar Kristo kaka Ruoth nochakore e higa 1914, mabende ne en chakruok mar “giko mar ndalo.” (Math. 24:3; Fwe. 11:15) Mapiyo bang’ mano, notayo malaike maler e wito Satan kod jochiendene oko mar polo.—Fwe. 12:7-10.
17 Tij lendo koda puonjo ma Yesu nochako e higa 29 E Ndalowa, koro ochomo e gikone. Kinde okayo ma Yesu biro ng’ado bura ne joma ngima duto. Bang’e nowach ne jogo ma nigi kido kaka mar rombe, ma rwake kaka jalo ma e yor Jehova mar kelo warruok ni, “chamuru gikeni mar pinyruodhno moiknu nyaka a chakruok piny.” (Math. 25:31-34, 41) Jogo makwedo Yesu kaka Ruoth noyud kethruok e kinde ma obiro telo ne ogend lweny me polo e tieko gik maricho duto. Bang’e Yesu biro tweyo Satan kendo wite kaachiel gi jochiendene e ‘bur matut.’—Fwe. 19:11-14; 20:1-3.
18, 19. Yesu chopo weche mage ka en e migawone kaka Mesia, kendo mano kelo ang’o ne dhano mawinjo chik?
18 E kinde Lochne mar Higini Gana Achiel, Yesu biro chopo chuth migepene ma dhi kanyachiel gi nyingene mag telo kaka, “Hono, Jabura, Nyasaye ma Jateko, Wuonwa Ma Nyaka Chieng’, Ruodh Kuwe.” (Isa. 9:6, 7) Loch mar Pinyruodhe nogol dhano e richo mi gibed makare chuth, kaachiel gi jomotho mibiro chier. (Joh. 5:26-29) Mesia biro tayo dhano ma chunygi oyie “e sokini mag pi ngima,” komiyo dhano mawinjo chik thuolo mar bedo gi winjruok majaber gi Jehova. (Som Fweny 7:16, 17.) Bang’ tem mogik, jong’anjo duto, moriwo koda Satan gi jochiendene, ibiro wit e “ataro mar ligek mach,” kendo mano noketh chuth wi “thuol.”—Fwe. 20:10.
19 Mano kaka Yesu chopo migawone kaka Mesia e yo miwuoro kendo makare chuth! Piny molos mobedo paradis nopong’ gi dhano mowar, mabiro dak nyaka chieng’ gi mor kendo e ngima ma onge tuoche. Weche maricho duto mosewach e wi nying’ maler mar Jehova ibiro tiek chuth, kendo ratiro ma Jehova nigodo mar bedo jaloch e wi gik moko duto e piny koda e polo biro nenore ayanga. Mano kaka pok maber okayo machiegni ne jogo duto mawinjo Jal Mowal mar Nyasaye!
Be Isenwang’o Mesia?
20, 21. Gin weche mage miseng’eyo momiyo onego iwuo gi jomoko e wi Mesia?
20 Chakre higa 1914, wasebedo ka wadak e ndalo miluongo ni pa·rou·siʹa mar Kristo, kata bedoe mare. Kata obedo ni bedoe mare e loch kaka Ruodh Pinyruodh Nyasaye ok nenre gi wang’, en gima nenore ayanga kaluwore gi kaka weche mokor chopo. (Fwe. 6:2-8) Kata kamano, mana kaka Jo-Yahudi ma nodak e kinde Yesu, thoth ji e ndalogi ok kaw gi pek gigo manyiso bedoe mar Mesia. Gin bende gidwaro mesia ma jasiasa, tiende ni mesia ma nobi kokalo kuom joloch mag siasa. Kata kamano, in to iseng’eyo ni Yesu sani locho kaka Ruodh Pinyruodh Nyasaye. Donge ng’eyo wachno ne omoro chunyi? Mana kaka jopuonjre ma ne otelonwa, ng’eyo wachno nomiyo iwacho ayanga kama: “Wasenwang’o Mesia.”
21 Kindegi, sama iwuoyo gi jomoko e wi adiera, be ijiwo migawo mar Yesu kaka Mesia? Timo kamano biro miyo imed hero gigo mosetimoni, motimoni sani, koda mago mapod obiro timoni. Mana kaka Andrea gi Filipo, onge kiawa ni isewuoyo gi wedeni koda osiepeni e wi Mesia. Donge inyalo wuoyo kodgi kendo gi ilo manyien, kinyisogi ni Yesu Kristo e Mesia manosingi, jal ma e yor Nyasaye mar kelo warruok?
Be Inyalo Lero?
• Ere kaka jopuonjre mokwongo ne nyalo nwang’o Mesia?
• Yesu ne otho nikech gik moko ariyo mage?
• Gin ang’o mapod Yesu biro timo ka en e migawone kaka Mesia?
[Penjo mag Puonjruok]