Mesia! Tsela ya Modimo ya go Phološa Batho
Mesia! Tsela ya Modimo ya go Phološa Batho
“Gobane go etša ge ka Adama bohle ba e-hwa, ka tsela e swanago, le ka Kriste bohle ba tla phedišwa.”—1 BAKOR. 15:22.
1, 2. (a) Andrea le Filipi ba ile ba arabela bjang ge ba be ba kopana le Jesu? (b) Ke ka baka la’ng re ka re re na le bohlatse bjo bontši bja gore Jesu ke Mesia go feta bja Bakriste ba lekgolong la pele la nywaga?
A KGODIŠEGILE gore Jesu wa Natsaretha ke Motlotšwa wa Modimo, Andrea o ile a botša mogolo’agwe gore: “Re hweditše Mesia.” Filipi o be a kgodišegile gomme o ile a nyaka mogwera wa gagwe Nathaniele, a mmotša gore: “Re hweditše yo Moše a ngwadilego ka yena Molaong, le Baporofeta ba ngwadilego ka yena, e lego Jesu morwa wa Josefa yo a tšwago Natsaretha.”—Joh. 1:40, 41, 45.
2 Na o kgodišegile e le ka kgonthe gore Jesu ke Mesia yo a holofeditšwego, “Moemedi yo Mogolo wa phološo”? (Baheb. 2:10) Lehono, re na le bohlatse bjo bontši bja gore Jesu ke Mesia go feta bjoo balatedi ba gagwe ba lekgolong la pele la nywaga ba bego ba e-na le bjona. Go tloga nakong ya go tswalwa ga Jesu go fihla nakong ya go tsošwa ga gagwe, Lentšu la Modimo le nea bohlatse bjo bo feletšego bja gore ke Kriste. (Bala Johane 20:30, 31.) Le gona, Beibele e bontšha gore Jesu o tla tšwela pele go phetha karolo ya gagwe e le Mesia a le legodimong. (Joh. 6:40; bala 1 Bakorinthe 15:22) Ka kgopolo ya moya, le wena lehono o ka bolela gore o “hweditše Mesia.” Eupša sa pele, ela hloko kamoo barutiwa bao ba pele ba ilego ba phetha ka mo go swanetšego gore ba hweditše Mesia.
“Sephiri se Sekgethwa” sa Mabapi le Mesia se Utollwa Ganyenyane-ganyenyane
3, 4. (a) Barutiwa ba lekgolong la pele la nywaga ba be ba ka ‘hwetša Mesia’ bjang? (b) Ke ka baka la’ng o ka re ke Jesu feela yo a bego a ka phethagatša diporofeto tšeo di bego di bolela ka Mesia?
3 Ke bjang balatedi ba Jesu ba lekgolong la pele la nywaga ba bego ba ka bolela ka kgodišego gore Jesu ke Mesia? Ka baporofeta, Jehofa o utollotše ganyenyane-ganyenyane dika tšeo di bego di tla hlaola Mesia yo a tlago. Seithuti se sengwe sa Beibele se swantšhitše tiragalo ye le go kopanywa ga sehlwa-seeme seo se dirilwego ka diripana tša mmabole. Akanya ka banna ba bantši bao ba sa tsebanego ba tliša diripana tša mmabole ka phapošing. Ge e ba diripana tšeo di ka kopana gomme tša bopa sehlwa-seeme se se feletšego, ka ntle le pelaelo o tla phetha ka gore go na le yo a ilego a bopa seswantšho seo gomme a romela monna yo mongwe le yo mongwe karolo ya gagwe. Go swana le seripana se sengwe le se sengwe sa sehlwa-seeme, boporofeta bjo bongwe le bjo bongwe bja mabapi le Mesia bo tšweletša tsebišo e bohlokwa ka Mesia.
4 Ka gona, go ka kgonega bjang gore boporofeta ka moka bjo bo boletšego ka Mesia bo phethagale ka mohlolo go motho o tee? Monyakišiši yo mongwe o boletše gore taba ya gore motho a ka phethagatša diporofeto ka moka tša mabapi le Mesia ka mohlolo “ke e thata kudu” moo e lego gore e swanetše go lebelelwa e le e sa kgonegego. “Jesu—le gona Jesu feela historing ka moka—ke yena a kgonnego go phethagatša boporofeta.”
5, 6. (a) Sathane o tla ahlolwa bjang? (b) Modimo o ile a utolla lešika la “peu” e holofeditšwego bjang ganyenyane-ganyenyane?
5 Kgwekgwe ya boporofeta bja Mesia ke “sephiri se sekgethwa” seo se nago le dikarolo tše dintši tše bohlokwa legohleng. (Bakol. 1:26, 27; Gen. 3:15) Sephiri seo se be se akaretša go ahlolwa ga Sathane Diabolo, “noga ya kgale” yeo e lahletšego batho sebeng le lehung. (Kut. 12:9) Kahlolo yeo e tla phethwa bjang? Jehofa o boletše e sa le pele gore “peu” yeo e bego e tla tšweletšwa ke “mosadi” e be e tla pšhatla hlogo ya Sathane. “Peu” yeo go boletšwego ka yona e sa le pele e be e tla pšhatla hlogo ya noga, ya fediša sebaki sa borabele, bolwetši le lehu. Lega go le bjalo, a dumeletšwe ke Modimo, Sathane ka tsela ya seswantšhetšo o tla loma “peu” ya mosadi serethe.
6 Jehofa ganyenyane-ganyenyane o ile a utolla yoo e bego e tla ba“peu” e holofeditšwego. Modimo o ile a enela Aborahama gore: “Xomme dithšaba ka moka tša lefase di tlo šexofala ka peu ya xaxo, ka ’baka la xobane O kwele lentšu la-ka.” (Gen. 22:18) Moše o ile a bolela gore Yoo e be e tla ba “Moporofeta” yo mogolo go mo feta. (Doit. 18:18, 19) Dafida o ile a kgodišega, gomme baporofeta ka morago ba ile ba hlatsela seo, gore Mesia e be e tla ba setlogolo sa gagwe le gore o be a tlo tšea bogoši bja Dafida e le bohwa ka mo go sa felego.—2 Sam. 7:12, 16; Jer. 23:5, 6.
Bohlatse bja Gore Jesu ke Mesia
7. Ke ka tsela efe Jesu a tšwilego go “mosadi” wa Modimo?
7 Modimo o ile a romela Morwa wa gagwe, tlholo ya gagwe ya pele, go tloga mokgatlong wa Gagwe o swanago le mosadi wa dibopiwa tša moya wa legodimong go tla go ba “peu” e holofeditšwego. Se se ile sa nyaka gore Morwa yo a tswetšego a nnoši wa Modimo a ‘itlhohlore’ bophelo bja legodimong gomme a tswalwe e le motho yo a phethagetšego wa nama. (Bafil. 2:5-7; Joh. 1:14) Go ‘aparetšwa’ ga Maria ke moya o mokgethwa go be go kgonthišetša gore yo a tlago go mmelega o “tla bitšwa yo mokgethwa, Morwa wa Modimo.”—Luka 1:35.
8. Jesu o phethagaditše boporofeta bja mabapi le Mesia bjang ge a be a itšweletša gore a kolobetšwe?
8 Diporofeto tša mabapi le Mesia di bontšhitše moo Mesia a bego a tla tšwelela gona le nako yeo a bego a tla tšwelela ka yona. Jesu o belegetšwe Betlelehema ka ge go boletšwe e sa le pele. (Mika 5:1) Lekgolong la pele la nywaga, Bajuda ba be ba letile ka tetelo-kgolo. Ka ge ba letetše go tšwelela ga Mesia, ba bangwe ba ile ba botšiša mabapi le Johane Mokolobetši gore: “Na mohlomongwe ke yena Kriste?” Eupša Johane o ile a araba ka gore: “Go tla yo a mphetago ka matla.” (Luka 3:15, 16) Ge Jesu a be a e-tla go Johane gore a mo kolobetše lehlabuleng la 29 C.E. a e-na le nywaga e 30, o ile a itšweletša ka nako e swanetšego e le Mesia. (Dan. 9:25) Ke moka o ile a thoma bodiredi bja gagwe bjo bogolo, a bolela gore: “Nako e beilwego e phethegile, gomme mmušo wa Modimo o batametše.”—Mar. 1:14, 15.
9. Le ge ba be ba sa tsebe ditaba ka botlalo, barutiwa ba Jesu ba be ba kgodišegile ka’ng?
9 Lega go le bjalo, seo batho ba bego ba se letetše ka Mesia se be se swanetše go fetošwa. Jesu o be a tumišwa ka mo go swanetšego gore ke Kgoši, eupša ka nako yeo batho ba be ba sa kwešiše gore o tla buša a le legodimong le gore o tla buša nakong e tlago. (Joh. 12:12-16; 16:12, 13; Dit. 2:32-36) Lega go le bjalo, ge Jesu a botšiša gore: “Lena le re ke nna mang?” Petro ka go se dika-dike o ile a araba ka gore: “Ke wena Kriste, Morwa wa Modimo yo a phelago.” (Mat. 16:13-16) Petro o ile a araba ka tsela e swanago ge ba bantši ba be ba furalela Jesu ka ge ba kgopišitšwe ke thuto ya gagwe.—Bala Johane 6:68, 69.
Go Theetša Mesia
10. Ke ka baka la’ng Jehofa a ile a gatelela bohlokwa bja go theetša Morwa wa gagwe?
10 Ge a be a le legodimong, Morwa yo a tswetšwego a nnoši wa Modimo e be e le sebopiwa se matla sa moya. Ge a be a le lefaseng, Jesu e be e le “moemedi wa Tate.” (Joh. 16:27, 28) O itše: “Seo ke se rutago ga se sa-ka, eupša ke sa yo a nthomilego.” (Joh. 7:16) Nakong ya ge Jesu a fetoga lebopo, Jehofa o ile a laela gore: “Le mo theetšeng,” e le ge a hlatsela gore Jesu ke Mesia. (Luka 9:35) Ee, theetša Mokgethwa yo goba o ikokobeletše Yena. Seo se nyaka tumelo le mediro e mebotse—tšeo di lego bohlokwa gore re kgahle Modimo le gore re hwetše bophelo bjo bo sa felego.—Joh. 3:16, 35, 36.
11, 12. (a) Ke ka baka la’ng go ka thwe Bajuda ba lekgolong la pele la nywaga ba ile ba gana gore Jesu ke Mesia? (b) Ke bomang bao ba ilego ba dumela go Jesu?
11 Le ge Jesu a be a e-na le dika tše dintši tšeo di bego di hlatsela gore ke Mesia, Bajuda ba bantši ba lekgolong la pele la nywaga ga se ba ka ba mo amogela. Ka baka la’ng? Ka gobane ba be ba šetše ba e-na le dilo tšeo ba bego ba di nagana ka Mesia yo a bego a tla ba lokolla kgatelelong ya Baroma. (Bala Johane 12:34.) Ka gona, ba ile ba se amogele Mesia yo a bego a phethagatša diporofeto tšeo di bego di bontšha gore o be a nyaditšwe, a lahlilwe ke batho, e le motho wa ditlhokofatšo, wa go tsebja ka mahloko gomme mafelelong a bolawa. (Jes. 53:3, 5) Gaešita le barutiwa ba bangwe ba Jesu ba botegago ba ile ba nyama ge a be a sa ba lokolle ka mmušo wa dipolitiki. Eupša ba ile ba dula ba botega gomme ka nako e swanetšego ba ile ba newa kwešišo e nepagetšego.—Luka 24:21.
12 Lebaka le lengwe leo le dirilego gore batho ba gane gore Jesu ke Mesia yo a holofeditšwego e be e le dithuto tša gagwe, tšeo ba bantši ba ilego ba hwetša go le thata go di amogela. Gore motho a tsene Mmušong, go be go tla nyakega gore “a itatole,” ‘a je’ nama ya Jesu le go nwa madi a gagwe, a “tswalwe gape” gomme a se be “karolo ya lefase.” (Mar. 8:34; Joh. 3:3; 6:53; 17:14, 16) Baikgogomoši, bahumi le baikaketši ba be ba bona go le thata go fihlelela dinyakwa tše. Lega go le bjalo, Bajuda ba ikokobeditšego ba amogetše Jesu e le Mesia, bjalo ka Basamaria bao ba ilego ba bolela gore: “Motho yo ka kgonthe ke mophološi wa lefase.”—Joh. 4:25, 26, 41, 42; 7:31.
13. Jesu o ile a longwa serethe bjang ka tsela ya seswantšhetšo?
13 Jesu o ile a bolela e sa le pele gore o tla ahlolwa ke baperisita ba phagamego gomme a fegwe koteng ke Bantle, eupša o tla tsošwa ka letšatši la boraro. (Mat. 20:17-19) Go dumela ga gagwe pele ga lekgotla la Sanhedrine gore ke “Kriste Morwa wa Modimo” go ile gwa dira gore le mo latofatše ka molato wa thogako. (Mat. 26:63-66) Pilato o ile a se hwetše “selo seo se swanelwago ke lehu” go yena, eupša ka gobane Bajuda ba be ba mo pharile ka molato wa go lwantšha mmušo, Pilato o ile “a ba gafela Jesu.” (Luka 23:13-15, 25) Mesia o ile a “tlošwa” bjalo ka ge go boletšwe e sa le pele, ka go kokotelwa koteng ya tlhokofatšo ka Letšatši la Paseka ka 33 C.E. (Dan. 9:26, 27; Dit. 2:22, 23) Ka go hwa lehu le sehlogo, o ile a longwa “serêthê” ka ge go boletšwe e sa le pele go Genesi 3:15.
Lebaka Leo ka Lona Mesia a Bego a Swanetše go hwa
14, 15. (a) Jehofa o dumeletše gore Jesu a hwe ka mabaka afe a mabedi? (b) Jesu o ile a dira’ng ka morago ga gore a tsošwe?
14 Go na le mabaka a mabedi ao a dirilego gore Jehofa a dumelele Jesu go hwa. La pele ke gore go botega ga Jesu go iša lehung go rarollotše karolo e bohlokwa ya “sephiri se sekgethwa.” O hlatsetše ka ntle le pelaelo gore motho yo a phethagetšego a ka dula a ‘ineetše go Modimo’ gomme a godiša bogoši bja Modimo go sa šetšwe go lekwa o šoro ke Sathane. (1 Tim. 3:16) La bobedi ke leo le boletšwego ke Jesu ge a re, ‘Morwa wa motho o tletše go direla le go nea moya wa gagwe gore e be topollo bakeng sa ba bantši.’ (Mat. 20:28) Sehlabelo se sa “topollo e lekanago” se lefeletše molato wa sebe seo bana ba Adama ba se abetšego, sa ba sa dira gore go kgonege gore bohle bao ba dumelago gore Jesu ke tsela ya Modimo ya go phološa batho ba hwetše bophelo bjo bo sa felego.—1 Tim. 2:5, 6.
15 Ka morago ga go fetša matšatši a mararo a le ka lebitleng, Kriste o ile a tsošwa gomme a bonagala go barutiwa ba gagwe ka matšatši a 40, a hlatsela gore o a phela le go ba nea ditaelo tše oketšegilego. (Dit. 1:3-5) Ke moka o ile a rotogela legodimong go neela mohola wa sehlabelo sa gagwe se bohlokwa go Jehofa le go letela nako e swanetšego ya go thoma go buša e le Kgoši ya Mesia. Ge a sa letile seo, go be go e na le dilo tše dintši tšeo a bego a di dira.
Go Phetha Karolo ya Gagwe e le Mesia
16, 17. Hlalosa karolo ya Jesu bjalo ka Mesia ka morago ga go rotogela ga gagwe legodimong.
16 Go theoša le nywaga-kgolo go tloga tsogong ya gagwe, Jesu ka potego o ile a okamela mediro ya phuthego ya Bokriste yeo a bego a dutše a e buša e le Kgoši. (Bakol. 1:13) Ka nako e swanetšego, o be a tla thoma go buša e le Kgoši ya Mmušo wa Modimo. Diporofeto tša Beibele le ditiragalo tša lefase di kgonthišetša gore go ba gona ga gagwe e le Kgoši go thomile ka 1914, bjalo ka ge “bofelo bja tshepedišo ya dilo” bo thomile ka yona nako yeo. (Mat. 24:3; Kut. 11:15) Nakwana ka morago, o ile a etelela barongwa ba bakgethwa pele go raka Sathane le batemona ba gagwe legodimong.—Kut. 12:7-10.
17 Modiro wa boboledi le wa go ruta woo Jesu a o thomilego ka 29 C.E. o kgaufsi le go fihla mafelelong. Kgaufsinyane o tla ahlola batho ka moka bao ba phelago. Ke moka o tla botša bao ba swanago le dinku e bile ba mo amogela e le tsela ya Jehofa ya go phološa batho gore ba ‘je bohwa bja mmušo wo ba o lokišeditšwego go tloga go theweng ga lefase.’ (Mat. 25:31-34, 41) Bao ba sa amogelego Jesu e le Kgoši ba tla fedišwa nakong ya ge a etelela pele madira a legodimo go fedišeng bobe ka moka. Ke moka, Jesu o tla tlema Sathane gotee le batemona ba gagwe gomme a ba lahlela ka ‘sekoting.’—Kut. 19:11-14; 20:1-3.
18, 19. Jesu o fihlelela’ng ge a phetha karolo ya gagwe e le Mesia, gona o tlišetša batho ba kwago ditšhegofatšo dife?
18 Nakong ya Pušo ya Nywaga e Sekete, Jesu o tla dira dilo ka go dumelelana le direto tša gagwe ka moka, tše bjalo ka “Moeletši, Modimo yo matla, Tatê wa xo sa felexo, Kxoši ya kaxišô.” (Jes. 9: 5, 6) Pušo ya Mmušo wa gagwe e tla bušetša batho phethegong, go akaretša le bao ba tsošitšwego bahung. (Joh. 5:26-29) Mesia o tla hlahla batho ba kwago go ya “methopong ya meetse a bophelo,” e le go ba thuša gore ba be le tswalano e botse le Jehofa. (Bala Kutullo 7:16, 17.) Ka morago ga teko ya mafelelo, marabele ka moka, go akaretša Sathane le batemona ba gagwe, a tla “lahlelwa letsheng la mollo,” e le go pšhatla hlogo ya “noga.”—Kut. 20:10.
19 Ruri Jesu o phetha karolo ya gagwe e le Mesia ka tsela e kgahlišago le e se nago bosodi! Lefase la paradeise le tla tlatšwa ka batho ba lopolotšwego, bao ba tlago go phela gabotse mmeleng le ka lethabo. Kgobošo ka moka e tla tlošwa leineng la Jehofa le lekgethwa, gomme tshwanelo ya gagwe ya go buša legohle e tla phagamišwa. A bohwa bjo bo kgahlišago gakaakang bjo bo letetšego bao ba kwago Mokgethwa wa Modimo!
Na o Hweditše Mesia?
20, 21. O na le mabaka afe a go botša ba bangwe ka Mesia?
20 Ga e sa le go tloga ka 1914, re be re dutše re phela nakong ya pa·rou·siʹa, goba go ba gona ga Kriste. Le ge e le gore go ba gona ga gagwe e le Kgoši ya Mmušo wa Modimo ga go bonagale, go bonagala gabotse ka go phethagala ga diporofeto. (Kut. 6:2-8) Go sa šetšwe seo, go swana le Bajuda ba lekgolong la pele la nywaga, batho ba bantši lehono ba hlokomologa bohlatse bja go ba gona ga Mesia. Le bona ba nyaka Mesia wa dipolitiki goba yo a tlago go diriša mebušo ya dipolitiki go ba buša. Lega go le bjalo, wena o a tseba gore Jesu ga bjale o buša e le Kgoši ya Mmušo wa Modimo. Na o ile wa thabišwa ke go kwa seo? Go swana le barutiwa ba lekgolong la pele la nywaga, o ile wa tutueletšega go bolela gore: “Re hweditše Mesia.”
21 Lehono, ge o bolela ka therešo, na o gatelela karolo ya Jesu e le Mesia? Go dira bjalo go tla oketša tebogo ya gago bakeng sa seo a go diretšego sona, seo a se dirago gona bjale le seo a tlago go se dira nakong e tlago. Go swana le Andrea le Filipi, ga go pelaelo gore o ile wa botša ba leloko le bagwera ka Mesia. Ke ka baka la’ng o sa bolele le bona gape ka phišego e tsošološitšwego gomme o ba bontšhe gore ruri Jesu Kriste ke Mesia yo a holofeditšwego, tsela ya Modimo ya go phološa batho?
Na o ka Hlalosa?
• Barutiwa ba lekgolong la pele la nywaga ba be ba ka hwetša bjang Mesia?
• Jesu o ile a hwa ka mabaka afe a mabedi a bohlokwa?
• Jesu o sa tlo dira’ng bakeng sa go phetha karolo ya gagwe e le Mesia?
[Dipotšišo tša Thuto]
[Diswantšho go letlakala 21]
Batho ba lekgolong la pele la nywaga ba be ba ka lemoga bjang gore Jesu ke Mesia yo a holofeditšwego?
[Diswantšho go letlakala 23]
Ge o bolela le ba bangwe, na o gatelela karolo ya Jesu e le Mesia?