E Mesias!​—E Medio Ku Dios Ta Usa pa Trese Salbashon

“Pasobra meskos ku den Adam tur ta muri, asina tambe tur lo wòrdu hasí bibu den Kristu.”​—1 KOR. 15:22.

1, 2. (a) Kon Andres i Felipe a reakshoná ora nan a topa Hesus? (b) Kompará ku Hesus su siguidónan di promé siglo, pakiko nos por bisa ku nos tin mas evidensia ku Hesus ta esun ku Dios a nombra komo Mesias?

“NOS a haña e Mesias.” Asina Andres, konvensí ku Hesus di Názarèt tabata e Ungí di Dios, a bisa su ruman Pedro. Felipe tambe tabata konvensí di esaki, i p’esei el a bai buska su amigu Natanael i a bis’é: “Nos a haña esun di kende Moisés a skirbi den e Lei i di kende e Profetanan tambe a skirbi—Hesus di Názarèt, yu di Hosé.”​—Juan 1:​40, 41, 45.

² Abo tambe ta plenamente konvensí ku Hesus ta e Mesias primintí, e medio prinsipal di Yehova pa ‘guia nos riba e kaminda di salbashon’? (Heb. 2:10, BPK) Awe, kompará ku Hesus su siguidónan di promé siglo, nos tin muchu mas evidensia ku Hesus ta esun ku Dios a nombra komo Mesias. For di Hesus su nasementu te na su resurekshon, e Palabra di Dios ta duna prueba irefutabel ku é tabata e Kristu. (Lesa Juan 20:30 i 31.) Tambe Beibel ta mustra ku Hesus lo a sigui kumpli for di shelu ku su papel komo Mesias. (Juan 6:40; lesa 1 Korintionan 15:22.) Den un sentido spiritual, bo tambe por bisa awe ku bo a “haña e Mesias.” Pero, pa kuminsá, laga nos mira kon bini e promé disipelnan por a konkluí korektamente ku nan a haña e Mesias.

E “Sekreto Sagrado” Tokante e Mesias A Keda Revelá Progresivamente

3, 4. (a) Kon e disipelnan di promé siglo por a “haña e Mesias”? (b) Pakiko abo lo bisa ku ta Hesus so por a kumpli ku tur e profesianan relashoná ku e Mesias?

³ Kiko a duna Hesus su siguidónan di promé siglo e siguransa ku é tabata e Mesias? Yehova a usa e profetanan pa revelá na un manera progresivo kiko ta e kosnan ku lo a identifiká e binidero Mesias. Un eksperto riba tereno di Beibel a kompará e proseso akí ku trahamentu di un estatua ku ta konsistí di pida-pida piedra di marmer. Imaginá bo ku hopi hende ku nunka no tabatin kontakto ku otro ta trese, kada ún, un pida piedra di marmer den un sala. Si e pidanan ei pas presis den otro i forma un estatua perfekto, ta lógiko pa konkluí ku mester tabatin un persona tras di kortina ku a diseñá e estatua i a manda e vários pida piedranan di marmer pa kada un di e hendenan ei. Meskos ku kada pida di e estatua, asina tur profesia relashoná ku e Mesias lo a duna un parti importante di informashon tokante dje.

⁴ Anto kon grandi e chèns ta ku tur e profesianan tokante e Mesias lo por a kumpli pa kasualidat den un solo persona? Un analista a bisa ku e chèns ku un persona por a kumpli pa kasualidat ku tur e profesianan relashoná ku e Mesias ta asina chikitu, ku esei ta kasi imposibel. “Ta Hesus—i Hesus so atraves di henter historia—a logra hasi esei.”

5, 6. (a) Kon e huisio kontra Satanas lo keda ehekutá? (b) Kon Dios a revelá na un manera progresivo e liña di desendensia ku a hiba na e “simia” primintí?

⁵ E profesianan relashoná ku e Mesias ta enfoká riba un “sekreto sagrado” ku hopi faseta di importansia universal. (Kol. 1:​26, 27, NW; Gén. 3:15) E sekreto ei a inkluí e huisio kontra Satanas e Diabel, “e kolebra di antigwedat,” ku a pone humanidat kai den piká i morto. (Rev. 12:9) Kon e huisio ei lo keda ehekutá? Yehova  a profetisá ku un “simia” ku ta bini for di un “muhé” lo heridá kabes di Satanas. E “simia” profetisá lo aplastá kabes di e kolebra, eliminando asina e kousa di rebelion, malesa i morto. Sinembargo, promé ku esei, Dios ta permití Satanas heridá e hilchi di e “simia” di e muhé simbólikamente.

⁶ Yehova a revelá na un manera progresivo ken e “simia” primintí lo tabata. Dios a hura Abraham: “Pa medio di bo simia tur nashon di tera sigur lo bendishoná nan mes.” (Gén. 22:18, NW) Moisés a profetisá ku esaki lo tabata “un profeta” mas grandi ku e mes. (Deu. 18:​18, 19) Dios a garantisá David—lokual algun profeta a konfirmá mas despues—ku e Mesias lo tabata un di su desendientenan i ku lo el a heredá e trono ku a pertenesé na David pa semper.​—2 Sam. 7:​12, 16; Jer. 23:​5, 6.

Prueba di Hesus Su Identidat Komo Mesias

7. Den ki sentido Hesus a bini for di e “muhé” semehante na un esposa di Dios?

⁷ Dios a manda su Yu—su promé kreashon—for di Su organisashon di kriaturanan spiritual den shelu, semehante na un esposa, pa e bira e “simia” primintí. Esaki a nifiká ku e Yu unigénito di Dios mester a ‘bandoná su gloria’ selestial i nase komo un ser humano perfekto. (Fil. 2:​5-7; Juan 1:14) E echo ku spiritu santu a ‘sombra’ Maria a garantisá ku esun ku mester a nase lo a “ser yamá santu, Yu di Dios.”​—Luk. 1:35, NW.

8. Kon Hesus a kumpli ku profesia relashoná ku e Mesias ora el a presentá su mes pa boutismo bou di awa?

⁸ E profesianan relashoná ku e Mesias a indiká na unda i na ki tempu Hesus lo a aparesé. Hesus a nase na Bètlehèm, manera a keda profetisá. (Mik. 5:2) E hudiunan den promé siglo tabata den gran ekspektativa. Antisipando e aparishon di e Mesias, algun a puntra tokante Juan Boutista: “E lo por ta e Kristu”? Pero Juan a kontestá: “Ta bini un ku ta mas poderoso ku mi.” (Luk. 3:​15, 16) Ora Hesus, na edat di 30 aña, a bai serka Juan pa Juan batis’é na kabamentu di aña 29 di nos era, el a presentá su mes nèt na e tempu indiká komo Mesias. (Dan. 9:25) Anto el a kuminsá su ministerio eksitante, bisando: “E tempu ta kumplí, i e reino di Dios ta serka.”​—Mar. 1:​14, 15.

9. Ounke e disipelnan di Hesus no tabatin tur detaye relashoná ku e Mesias, ki konvikshon firme nan tabatin?

⁹ Sinembargo, e hendenan a haña nan ta ahustá nan ekspektativanan. Ounke nan tabatin bon motibu pa aklamá Hesus komo Rei, e tempu ei nan no a komprondé kompletamente ku lo e tabatin ku kuminsá goberná den futuro i for di shelu. (Juan 12:​12-16; 16:​12, 13; Echo. 2:​32-36) Tòg, ora Hesus a puntra su disipelnan: “Ken boso ta bisa ku ami ta?” Pedro a kontestá sin pensa dos biaha: “Abo ta e Kristu, Yu di e Dios bibu.” (Mat. 16:​13-16) Ora un siñansa en partikular a pone hopi hende trompeká i bandoná Hesus, Pedro a bolbe kontestá algu similar.​—Lesa Juan 6:68 i 69.

 Tende di e Mesias

10. Pakiko Yehova a enfatisá ku hende mester tende di su Yu?

¹⁰ Den shelu, Hesus, e Yu unigénito di Dios, tabata un persona spiritual poderoso. Riba tera, e tabata “e representante di e Tata.” (Juan 16:​27, 28, NW) El a bisa: “Mi siñansa no ta di mi, ma di esun ku a manda mi.” (Juan 7:16) Durante su transfigurashon, Yehova a konfirmá ku Hesus ta e Mesias, ora el a duna e instrukshon: “Tende di dje.” (Luk. 9:35, BPK) Sí, obedesé òf tende di Esun skohí akí. Esei a rekerí dos kos ku ta sumamente importante pa agradá Dios i haña bida eterno: fe i bon obra.​—Juan 3:​16, 35, 36.

11, 12. (a) Pa ki motibunan e hudiunan di promé siglo a rechasá Hesus komo Mesias? (b) Ken sí a pone fe den Hesus?

¹¹ Ounke tabatin prueba irefutabel ku ta Hesus tabata e Mesias, e gran mayoria di hudiu di promé siglo no a asept’é komo tal. Dikon nò? Pasobra nan tabatin nan propio ideanan relashoná ku e tipo di personahe ku e Mesias lo mester tabata, inkluso e idea ku e mester a hunga un papel polítiko den libra nan for di opreshon romano. (Lesa Juan 12:34.) Por ehèmpel, nan no por a aseptá un Mesias ku, manera a ser profetisá, hende lo a despresiá i bandoná, i ku mester a sufri, konosé enfermedat i finalmente ser matá. (Isa. 53:​3, 5) Asta algun di Hesus su disipelnan leal a keda desapuntá pa e echo ku e no a libra Israel for di opreshon romano. Pero nan a keda leal na dje sí, i ku tempu, nan a bin haña un komprondementu eksakto di su papel komo Mesias.​—Luk. 24:21.

¹² Un otro motibu ku a pone hende rechasá Hesus komo e Mesias primintí tabata su siñansanan, ku pa hopi di nan tabata difísil pa aseptá. Nan no por a traga e idea ku pa un hende drenta e Reino e mester a “nenga su mes,” ‘kome Hesus su karni i bebe su sanger,’ “nase di nobo” i ‘no ser parti di mundu.’ (Mar. 8:34; Juan 3:3; 6:53; 17:​14, 16) Hende riku, esnan orguyoso i esnan hipókrita a haña e rekisitonan akí muchu difísil pa kumpli ku nan. Ma e hudiunan humilde sí a aseptá Hesus komo Mesias, meskos ku algun samaritano tambe ku a bisa: “Esun akí di bèrdat ta e salbadó di mundu.”​—Juan 4:​25, 26, 41, 42; 7:31.

13. Den ki manera Hesus a sufri e herida simbóliko na su hilchi?

¹³ Hesus a bisa adelantá ku e saserdotenan prinsipal lo a konden’é i ku e paganonan lo a klab’é na staka, pero ku riba e di tres dia lo el a lanta for di morto. (Mat. 20:​17-19) Nan a konsiderá e deklarashon ku el a hasi dilanti di e Sanedrin, esta, di ta ‘e Kristu, Yu di Dios,’ komo blasfemia. (Mat. 26:​63-66) Pilato no a haña “nada ku meresé morto” den dje, pero pa motibu ku e hudiunan a akus’é tambe di a instigá e pueblo pa lanta kontra outoridat, Pilato a “entregá Hesus na nan boluntat.” (Luk. 23:​13-15, 25) Asina nan a ‘nenga e Prens di Bida’ i a konspirá pa mat’é, apesar di e prueba konvinsente ku ta Dios a mand’é. (Echo. 3:​13-15) Manera Beibel a profetisá, e Mesias a ser “kòrtá tirá afó,” siendo klabá na un staka riba e dia di Pasku Hudiu di aña 33 di nos era. (Dan. 9:​26, 27; Echo. 2:​22, 23) Ku e morto kruel akí, el a sufri e herida na su “hilchi” ku Génesis 3:15 a profetisá.

Pakiko e Mesias Tabatin Ku Muri?

14, 15. (a) Pa ki dos motibu Yehova a permití Hesus muri? (b) Kiko Hesus a hasi despues ku el a resusitá?

¹⁴ Yehova a permití Hesus muri pa dos motibu sumamente importante. Na promé lugá, Hesus su fieldat te na morto a resolvé un aspekto importante di e “sekreto sagrado.” El a demostrá te na un grado ekstremo ku un hende perfekto por keda deboto na Dios i sostené Su soberania apesar di e pruebanan di mas severo ku Satanas ta pone hende pasa aden. Na di dos lugá, manera Hesus a bisa, e Yu di Hende a bini “pa duna su bida komo preis di reskate pa hopi.” (Mat. 20:28) E “preis di reskate” akí a paga e kastigu pa piká ku e yunan di Adam a heredá, i el a habri kaminda pa duna bida eterno na tur esnan ku aseptá Hesus  komo e medio ku Dios ta usa pa trese salbashon.​—1 Tim. 2:​5, 6.

¹⁵ Despues ku Kristu a pasa tres dia den graf, el a resusitá, i 40 dia largu el a aparesé na su disipelnan, demostrando asina ku e tabata na bida i pa duna nan mas instrukshon. (Echo. 1:​3-5) Despues el a subi na shelu pa presentá e balor di su sakrifisio presioso na Yehova i pa warda riba e tempu stipulá, ora ku su presensia komo Rei Mesiániko mester a kuminsá. Miéntras tantu, e tabatin hopi kos di hasi.

Kompletando Su Papel Komo Mesias

16, 17. Kon Hesus a kumpli ku e papel di Mesias despues ku el a subi na shelu?

¹⁶ Durante e siglonan ku a sigui despues ku Hesus a resusitá, el a supervisá fielmente e aktividatnan di e kongregashon kristian riba kua e tabata reina komo Rei. (Kol. 1:13) Na e tempu stipulá, lo e tabatin ku kuminsá ehersé su poder komo Rei di e Reino di Dios. Profesianan di Beibel i susesonan mundial ta konfirmá ku su presensia komo Rei a kuminsá na aña 1914, sí, e mesun aña ku e “konklushon di e sistema di kosnan” a kuminsá. (Mat. 24:3, NW; Rev. 11:15) Djis despues di esei, el a enkabesá e ehérsito di angel santu pa saka Satanas i su demoñonan for di shelu.​—Rev. 12:​7-10.

¹⁷ E obra di prediká i hasi disipel ku Hesus a kuminsá kuné na aña 29 ta yegando su gran kulminashon. Pronto lo e husga tur hende ku ta na bida. E ora ei lo e bisa esnan semehante na karné ku ta asept’é komo Yehova su medio di salbashon pa “heredá e reino ku ta prepará pa [nan] desde e fundashon di mundu.” (Mat. 25:​31-34, 41) Esnan ku ta rechasá Hesus komo Rei lo ser destruí ora e enkabesá e ehérsitonan selestial pa kaba ku tur maldat. E ora ei Hesus lo mara Satanas i tir’é huntu ku su demoñonan den “abismo.”​—Rev. 19:​11-14; 20:​1-3.

18, 19. Kiko Hesus ta logra segun ku e ta kumpli ku su papel komo Mesias, i kiko esei ta trese pa humanidat obediente?

¹⁸ Durante Hesus su Reinado di Mil Aña, lo e duna realse na tur su títulonan, manera “Konsehero Maravioso, Dios Poderoso, Tata Eterno, Prens di Pas.” (Isa. 9:​6, 7) Bou di e gobernashon di su Reino, hende—inkluso e mortonan resusitá—lo bira perfekto. (Juan 5:​26-29) E Mesias lo guia hende ku tin un bon disposishon na “fuentenan di e awa di bida,” lokual lo permití esnan obediente disfrutá di un relashon di pas ku Yehova. (Lesa Revelashon 7:16 i 17.) Despues di e prueba final, tur rebelde, inkluso Satanas i su demoñonan, lo ser “tirá den e lago di kandela.” Esei lo ta e gòlpi mortal na kabes di e “kolebra.”​—Rev. 20:10.

 ¹⁹ Hesus ta kumpli na un manera maravioso i a la perfekshon ku su papel komo Mesias. E tera transformá den un paradeis lo ta yen di hende librá di piká i morto ku lo biba pa semper den salú perfekto i felisidat. E nòmber sagrado di Yehova lo keda liber di tur reproche, i lo keda demostrá fuera di tur duda ku e ta esun ku tin derecho di goberná e universo. Ki un rekompensa magnífiko ta warda tur esnan ku ta obedesé e Ungí di Dios!

Abo A Haña e Mesias?

20, 21. Ki motibunan bo tin pa konta otro hende tokante e Mesias?

²⁰ Desde 1914 nos ta bibando den e tempu di e pa·rou·sí·a òf presensia di Kristu. Ounke su presensia komo Rei di e Reino di Dios ta invisibel, e profesianan di Beibel ku ta kumpliendo ta indiká esei bon kla. (Rev. 6:​2-8) Sinembargo, meskos ku e hudiunan di promé siglo, mayoria di hende awe ta ignorá e evidensia di e presensia di e Mesias. Nan tambe ta interesá den un mesias polítiko òf por lo ménos unu ku lo obra mediante gobernantenan polítiko humano. Ma abo sí a komprondé ku Hesus ta reina aktualmente komo Rei di e Reino di Dios. Bo no a keda emoshoná ora bo a haña sa esei? Meskos ku e disipelnan di promé siglo, bo a sinti bo impulsá pa proklamá: “Nos a haña e Mesias.”

²¹ Awe, ora bo ta papia tokante e bèrdat, bo ta resaltá Hesus su papel komo Mesias? Ora bo hasi esei, lo bo haña mas apresio pa loke el a hasi pa bo, loke e ta hasiendo awor i loke lo e hasi ainda den futuro. Meskos ku Andres i Felipe, bo tambe sin duda a papia ku bo famia- i amigunan tokante e Mesias. Pakiko bo no ta aserká nan yen di entusiasmo atrobe i mustra nan ku en bèrdat Hesukristu ta e Mesias primintí, sí, e medio ku Dios ta usa pa trese salbashon?

Bo Por Splika?

• Kon e disipelnan di promé siglo por a haña e Mesias?

• Pa ki dos motibu importante Hesus a muri?

• Kiko mas Hesus lo hasi den futuro pa kumpli ku su papel komo Mesias?

[Preguntanan di Estudio]

[Plachi na página 21]

Kon e hendenan di promé siglo por a sa ku Hesus tabata e Mesias primintí?

[Plachi na página 23]

Ora bo ta papia ku otro hende, bo ta resaltá Hesus su papel komo Mesias?