Diosqa salvamantsik Akrashqanwanmi
Diosqa salvamantsik Akrashqanwanmi
“Awiluntsic Adanpa jutsanrecur[mi] wanuntsic, y Teyta Jesucristurecurnam wiñepa cawanapaq cawarimushun.” (1 COR. 15:22.)
1, 2. a) ¿Ima niyarqantaq Andreswan Felipi Jesusta reqirirnin? b) ¿Imanirtaq nintsik, punta discïpulonkunapitapis más pruëbakunam kapamantsik Jesus Akrashqa kanqanta creinapaq?
ANDRESQA alleqmi musyarqan Nazaret markapita Jesus, Diospa Akrashqan kanqanta. Tsëmi wawqin Pëdruta nerqan: “¡Mesiastam noqacuna taricuyarqö!”. Tsënö kanqanta alleq creirmi, Felipe nishqan nunapis wawqin Natanaelta ashirir kënö nerqan: “Moises escribishqanchomi y Profetacuna escribiyashqanchomi willacun juc nuna shamunanpaq caqta. ¡Petam taricuyarqö! Mä, Nazaretcho täraq Josepa tsurin Jesusmi carqonaq” (Juan 1:40, 41, 45).
2 Y qamqa, ¿alleqku musyanki y creinki Jesus, Dios awnikonqan Mesias y “llapan criyicug wamrancunapa salvagnincuna” kanqanta? (Heb. 2:10, NTCN.) Diospa Akrashqan kanqanta musyanapaqqa, punta discïpulokunapitaqa más pruëbakunam kapamantsik, ¿imanir? Jesus yurinqampita hasta kawarimonqanyaq Bibliachö qellqarëkanqampitam ‘Diospa Acrashqan’ kanqanta musyantsik (lei Juan 20:30, 31). Hinamampis, Diospa Palabranqa rikätsikun Jesus ciëlochö këkarpis Diospa Akrashqan kanqantam (Juan 6:40; lei 1 Cor. 15:22). Tsëmi, Bibliapita alleq yachakushqa karnin noqantsikpis kënö nita puëdentsik: “¡Mesiastam noqacuna taricuyarqö!”. Këpita maslla yachakurinapaqqa, puntata rikärishun mä imanöpash Jesuspa punta qateqninkuna Mesïasta tariyanqanta alleq musyayänaq.
Ichikllapa ichikllapam “imayca pacaragnö caycag” Akrashqapaq musyakärin
3, 4. a) ¿Punta discïpulokuna Jesus Akrashqa kanqanta reqiyänampaq imataq yanaparqan? b) ¿Imanirtaq nishwan Akrashqapaq parlaq profecïakuna Jesusllachö cumplikanqanta?
3 ¿Imanöpataq punta discïpulokuna musyayarqan Jesus Akrashqa kanqanta? Puntapitana imanö kanantapis Jehová profëtankunawan ichikllapa ichikllapa musyatsikuptinmi. Këta maslla tanteanapaqmi Bibliapita alli musyaq nuna mármol rumipita estatuapaq parlan. Y imëpis mana rikänakushqa nunakuna estatuapa pedäzonkunata apakurkur huk sälaman gorikäyanqanta o ëllukäyanqanta. Y apayanqan pedäzokunata juntariyaptin huk estatuaman rurakärenqanta. ¿Imanöpataq tsë piëzakunata juntariyaptin huk estatuaman tikrarin? Pï karpis tsë piëzakunata imanö rurayänampaq willashqa kanqantam pensaratsimantsik. Tsë piëzakunanömi Akrashqapaq parlaq profecïakunapis: cada profecïam Akrashqa imanö kanqanta rikätsikun.
4 Huk nunapa kawëninchö, ¿kikillampitatsuraq llapan profecïakuna cumplikanman karqan? Huk yachaq nunam kënö nirqan: “Kë llapan profecïakunaqa manachi Jesuschö cumplikanmantsu karqan mana Akrashqa këkaptenqa”. Tsëpitanam nirqan: “Jesusllam llapan pasanqan tiempochö” Akrashqapaq parlaq profecïakunata cumplishqa.
5, 6. a) ¿Imanötaq Satanás castïgota chaskinan karqan? b) ¿Imanötaq Jehová ichikllapa ichikllapa musyatsikorqan warmipa ‘mirënin’ pï kanqantapis?
5 Akrashqapaq profecïakunaqa cumplin ‘imayca pacaragnö mana pï musyashgan’ profecïatam (Col. 1:26, 27, NTCN; Gén. 3:15). Kë “imayca pacaragnö” profecïaqa, Patsachö y ciëlochöpis cumplikïkanmi. Hukqam tsë ‘jatun dragonpa’ castïgon, tsëqa, llapan nunata hutsaman y wanïman ishkitseq Satanaspa castïgonmi (Apo. 12:9, QKW). ¿Imanöraq tsë castïgota chaskinan karqan? Jehovämi willakorqan, qeshyata y wanïta qallatsimoq “hatun Dragonta”, ‘warmipa’ mirënin peqanchö o umanchö ushakaqpaq halunanta. Pero tsë manaraq pasakuptinmi, Dios haqinan karqan Diabluraq warmipa mirëninta atakanchö kaninanta.
6 Warmipa ‘mirënin” pï kanqampis ichikllapa ichikllapam musyakar qallëkorqan. Puntataqa Abrahantam Jehová nerqan: “Mirënikiwanmi patsachö llapan nacionkuna bendecishqa kayanqa” (Gén. 22:18). Y tiempowannam Moises nirqan pëpita ‘más alli kaq’ profeta chämunanta (Deu. 18:18, 19). Davidtanam profëtankunawan Diosnintsik willatserqan Mesias kastampita yurinampaq kaqta, pëpa trönonta chaskinampaq kaqta y imëyaqpis gobernanampaq kaqta (2 Sam. 7:12, 16; Jer. 23:5, 6).
¿Imakunataq rikätsikun Jesus Diospa Akrashqan kanqanta?
7. ¿Mëpitataq Jesus shamurqan?
7 Huk ‘warmipitam’ tsë ‘mirëqa’ shamunan karqan, o ciëlochö Diosta llapan sirveqninkunapitam. Tsëmi Dios Yayapa hapallan Tsurinqa, ciëlochö “alabashga poderöso cayninta dëjasquir” kë Patsaman hutsannaq nunanö yurinampaq shamurqan (Fili. 2:5-7, NTCN; Juan 1:14). Jesusqa ‘Dios Yayapa Santo Tsurin’ karqan, Marïapa pachanchö hutsannaq winanampaq santo espíritu tsapanqampitam (Luc. 1:35, NTCN).
8. ¿Ima profecïakunatataq Jesus cumplerqan Juan kaqta bauticëkunampaq ëwarnin?
8 Qellqarëkaq profecïakunaqa willakorqan Belen markachö Diospa Akrashqan yurinantam, y tsë markachömi Jesus yurikorqan (Miq. 5:2). Hina willakorqanmi imë chämunantapis. Tsëmi, Diospa Akrashqan chämunampaq tiempona kanqanta musyarnin, judïokunaqa altantolla këkäyarqan. Tsëmi Bautizakoq Juanta rikärirnin niyarqan: “Shuyaconqantsic Dios Acrashqanchi pëqa” nishpa. Pero Juanqa kënömi contestarqan: “Jucmi shamun noqapita mas puedeq” nishpa (Luc. 3:15, 16). Y kima chunka watata cumplirirmi, Jesusqa Juan kaqta bauticëkunampaq ëwarqan. Ishkë chunka isqon (29) watapa ushanan killakunachömi, Akrashqa pï kanqampis musyakänan karqan (Dan. 9:25). Tsë höram Jesusqa qallëkorqan Diospita kënö yachatsikur: “Chämushganam Dios Yaya ningan tiempu gallananpag. Tsaynöllam chaycämunna Dios Yayapa mushogcag Mandacuy Reynon” (Mar. 1:14, 15, NTCN).
9. Akrashqa imanö kananta alli mana tanteëkarpis, ¿imapitataq seguro kayarqan Jesuspa punta qateqninkuna?
9 Pero manam nunakuna shuyaranqannötsu llapan cumplikarqan. Reyninkuna kananta munar nunakuna Jesusta alabayashqa kayaptimpis, tsëpitaran musyakärerqan ciëlopita shamoq tiempochö Gobernamunanta (Juan 12:12-16; 16:12, 13; Hech. 2:32-36). Qateqninkuna Tsënö kananta alleq mana musyëkarpis, “qamcunaqa, ¿imataq niyanqui? ¿Pitaq cä?” nishpa Jesus tapuriptin, kënömi Pedru contestarqan: “¡Qamqa Dios Acrashqanmi canqui, cawecaq Diospa tsurin!” (Mat. 16:13-16). Y tsënöllam Pedru nerqan Jesuspa yachatsikïninta mana gustar nunakuna piñar ëwakuyaptimpis (lei Juan 6:68, 69).
Akrashqatam wiyayänan karqan
10. ¿Imanirtaq Jehová wambranta wiyayänampaq mandakorqan?
10 Jesusqa ciëlochö poderoso këninta haqirirmi, kë Patsaman Teytampa rantin shamurqan (Juan 16:27, 28). Tsëmi nerqan: “Manam quiquï munanqäcunatatsu yachatsicü, sinoqa cachamaqnï parlashqancunatam” (Juan 7:16). Kikin Jehoväpis kima apostolkuna wiyëkäyaptinmi nerqan Jesuspaq: “Queqa noqa acrashqä cuyë tsurïmi. Peta cäsucuyë” (Luc. 9:35). Awmi, Jesuspa qateqninkunaqa nenqankunatam rurayänan karqan. Markäkuyänan o yärakuyänanmi karqan y allikunatam rurayänan karqan, tsëta rurarllam Diosta kushitsir mana wanushpa kawëtapis chaskiyanman karqan (Juan 3:16, 35, 36).
11, 12. a) ¿Imanirtaq atskaq judïokuna Jesus Mesias kanqanta creita munayarqantsu? b) ¿Pikunataq pëman markäkuyarqan o yärakuyarqan?
11 Jesus Diospa Akrashqan kanqan claro këkaptimpis, tsë witsan judïokunaqa manam llapantsu pëta chaskiyarqan. ¿Imanir? Munayanqannö mana kaptin. Pëkunaqa shuyaräyaq romänokunapa mandakïnimpita libranantam (lei Juan 12:34). Pero Bibliachöqa qellqarëkarqannam Diospa Akrashqanqa despreciashqa, mana chaskishqa, qeshyatapis nanëtapis reqeq y wanutsishqa kanantam. ¡Y tsënö nunataqa judïokuna manachi chaskiyanmantsu karqan! (Isa. 53:3, 5.) Hasta Jesuspa qateqninkunapis Israel nacionta romänokunapita mana libraptinmi llakikuyarqan. Tsënö karpis manam haqiyarqantsu, y tiempowanqa alleqmi musyariyarqan imanö kanantapis (Luc. 24:21).
12 Y wakinkunaqa Jesusta despreciayarqan yachatsikonqanta mana cumplïta munarmi. Pëqa yachatsikorqan, Diospa Gobiernonman yëkuyänampaq puntata ‘quiquincunapa munenintaraq’ haqiyänanta, ‘etsantaraq’ mikuyänanta, ‘yawarnintaraq’ upuyänanta, ‘yapëraq’ yuriyänanta y kë ‘patsachö nunacunano’ mana kayänantam (Mar. 8:34; Juan 3:3; 6:53; 17:14, 16). Rïcokunapaq, nunatukoqkunapaq y ardëlla imatapis allitukur ruraqkunapaqqa, alläpa mana cumplipaqnömi karqan kë yachatsikïkuna. Pero alli shonquyoq judïokunaqa rasllam reqiriyarqan pï Akrashqa kanqantapis. Y tsënöllam wakin samaritänokunapis ‘llapan nunacunapa salbadornin Dios Acrashqan canqanta’ creiyarqan (Juan 4:25, 26, 41, 42; 7:31).
13. ¿Imanötaq cumplikarqan atakanchömi kaninki nenqan profecía?
13 Bibliam willakun principal sacerdotekuna wanunampaq condenayänanta, mana judío kaq nunakuna qeruman clavayänanta y kima hunaqta kawarkamunanta (Hech. 5:30, 31). Sanedrín nishqan cortechö “Diospa Acrashqan” y “tsurin” kanqanta niriptinmi, Diostam penqakïman churan nir intuyarqan (Mat. 26:63-66). Y tsëpita Pilatu tapupärirnam cuentata qokurerqan wanutsiyänampaq ‘ni ima jutsan’ mana kanqanta, pero, autoridadkunapa contran churakäyänampaqmi nunakunata yachatsin nishpa judïokuna tumpayashqa kayaptinnam, pëkunata entreguëkorqan (Luc. 23:13-15, 25). Pëkunaqa despreciayarqan ‘wiñe cawatsicoq Jesustam’, y Dios Yaya kachamushqanta alleq musyëkarnimpis wanutsiyänampaqmi willanakuyarqan (Hech. 3:13-15). Qellqarëkaqchö willakonqannömi huk qeruchö ‘wanutsiyarqan’ 33 wata Pascua hunaqchö (Dan. 9:26, 27; Gal. 3:13). Génesis 3:15 textochö atakanchö kaninki nenqan profecïam wanutsiyanqanwan cumplikärerqan.
¿Imanirtaq wanunan karqan Diospa Akrashqan?
14, 15. a) ¿Ima ishkë precisaq rurëkunarëkurtaq Jesus wanunanta Jehová haqirirqan? b) ¿Imatataq Jesus rurarqan wanunqampita kawariramurnin?
14 Wambran wanunantaqa Jehová haqirerqan ishkë precisaq rurëkuna kaptinmi. Punta kaqqa, “imayca pacaragnö” precisaq kaq musyakänampaqmi. Perfecto nuna wanunqanyaq alli tsarakur Diosllapaq kanqanta rikätsikunampaq, y Satanás tukïta rurar hipëkätsiptimpis Diosnintsiklla alli gobernaq kanqanta rikätsikunampaqmi (1 Tim. 3:16). Y ishkë kaqtanam kikin Jesus willakorqan: “Diospita Shamushqa Nunapis que patsaman shamushqa [...] yawarninwan nunacunata rescatananpaqmi” (Mat. 20:28). Rikanqantsiknömi, Jesusqa “vïdanwan pägacurgan” hutsaman y wanïman Adan churamanqantsikpita salvamänapaq. Y Jesusta salvamänapaq Dios qomanqantsikman yärakur o markäkorqa, imëyaqpis kawakïtam chaskishun (1 Tim. 2:5, 6, NTCN).
15 Kawarimonqanta creiyänampaq y imata rurayänantapis maslla musyatsinampaqmi, kima hunaqta Cristu kawariramurnin chusku chunka hunaqpa qateqninkunata yuriporqan (Hech. 1:3-5). Tsëpitam ciëlota ëwakorqan wanunqampa valorninta Jehoväta qonampaq. Tsëchömi huk tiempo shuyararqan, Diospa Akrashqan Gobiernonnö gobernamunampaq. Tsë shuyaranqan tiempochöqa alläpa rurëyoqmi karqan.
Akrashqapa rurënin ushakärin
16, 17. ¿Ciëlota kutikonqampita patsë imakunatataq Diospa Akrashqan rurëkan?
16 Kawarimonqampita patsëmi Jesusqa dirigikan congregacionkunata, y llapan rurayanqantam rikëkämun (Col. 1:13). Y tsëpitam tiempo chärerqan Diospa Gobiernonchö Rey kanampaq. Biblia ninqan y kë mundochö llapan pasakonqankunam rikätsikun, 1914 watachö Diospa Akrashqan gobernar qallanqanta y kë mundo ushakänampaq ichikllana pishenqanta (Mat. 24:3; Apo. 11:15). Tsëpita ichikllatanam Jesus angelninkunawan kë Patsaman Satanasta y demonionkunata qarqarayämorqan (Apo. 12:7-10).
17 Diospita willakïta y yachatsikïta Jesus ishkë chunka isqon (29) watachö qallanqanqa ushëkannam. Ichikllanam pishin llapan nunakunata juzgar qallanampaq. Dios Akrashqanman markäkushqakunataqa kënömi nenqa: “Shayämi, Teytäpa benditunkuna, eredayey qamkunapaq alistashqa reynuta mundu qallananpita” (Mat. 25:31-34, 41, QKW). Pero Akrashqapa contran churakashqa kaqkunataqa angelninkunawanmi ushakäratsenqa. Tsënam Jesusqa Satanasta alli watarkur demonionkunatawan “wanwanyarëcaq” uchkuman weqaparkonqa (Apo. 19:11-14; 20:1-3).
18, 19. ¿Imataraq ruramonqa Diospa Akrashqan y imanöraq yanapanqa wiyakoqkunata?
18 Waranqa Wata gobernanqanchömi Jesus rikätsikonqa, “Shumaq Consejakoq, Puëdeq Dios, Imëyaqpis Kawatsikoq Teyta, Alli Pasakïcho Kawakïta Apamoq Príncipe” kanqanta (Isa. 9:6, 7). Pëpa gobiernonchömi llapan nunakuna y wanuyanqampita shärimoqkunapis hutsannaq këman chäyanqa (Juan 5:26-29). Diospa Akrashqanqa wiyakoq nunakunatam “cawatsicoq yacuman pushanqa”, tsënöpam nunakuna Dioswan alli pasakïcho kawakuyanqa (lei Apocalipsis 7:16, 17). Pero ushanan kaq pruëbakuna ushariptinmi, ‘asufriwan rupaquicaq qochaman’ hitashqa kayanqa manana wiyakoqkuna, Diablu y demoniokunapis. Tsënöpam, peqachö halushqa cuenta “jatun dragon” ushakärenqa (Apo. 20:10).
19 Awmi, Jesusqa cumplikanmi Teytan mandanqankunata. Tsëmi mushoq Patsa, salvakushqa nunakunapaq kanqa y tsëchömi mana qeshyashpa imëyaqpis kushishqa kawakuyanqa. Hinamampis Jehoväpa shutinmi tukï tumpayanqampita limpio quedarenqa y pëllam ciëlochö Patsachöpis yapë Gobernante tikrarenqa. ¡Imanö shumaq kawakïmi shuyaran Diospa Akrashqanta wiyakoqkunataqa!
¿Qamqa Diospa Akrashqanta tarirqunkiku?
20, 21. ¿Imanirtaq alläpa precisan Dios Akrashqampita nunakunata parlapänantsik?
20 1914 watapitanam parousía nishqan o noqantsikwan Jesus këkanqan witsanchö kawëkarqontsik. Gobernar qallanqampita noqantsikwan këkanqanta mana rikashqapis, qellqarëkaq profecïakuna cumplikanqanmi rikätsimantsik tsë witsanchöna kawëkanqantsikta (Apo. 6:2-8). Tsënö këkaptimpis wakin nunakunaqa manam creita munayantsu, Jesuspa tiemponchö judïokuna rurayanqannö. Y Diospa Akrashqan, kë Patsachö gobiernokunapita kanantam shuyaräyan. Pero noqantsikqa alleqmi musyantsik, Jesus cargonta chaskirir gobernëkämonqantana. ¿Imataq nirqantsik këta musyarirnin? Itsa Jesuspa punta qateqninkunanöpis sinchipa nirqantsik: “¡Mesiastam noqacuna taricuyarqö!”.
21 Tsëmi imëpitapis más kananqa willakushun Diospa Akrashqan Jesus imata rurëkanqantapis. ¿Qamqa willakïkankiku? Willakïkarqa, masmi qampaq llapan ruramonqanta y ruramunampaq kaqtapis kuyanki. Andresnö Felïpenöpis itsa reqinakushqëkikunata y kastëkikunata Cristupita parlaparqonkina. Nunakunata salvanampaq Dios akranqanqa Jesusmi, manam huktsu, tsëta yachatsikïta mana haqinëkipaq kë tema yanapëkushunëkitam munayä.
¿Yarpankiku?
• ¿Imanötaq punta discïpulokuna Diospa Akrashqanta tariyarqan?
• ¿Ima ishkë precisaq rurëkunataq karqan Jesus wanunampaq?
• ¿Imataraq ruramonqa Diospa Akrashqan shamoq tiempochö?
[Yachakunapaq kaqpa tapukïninkuna]
[19 kaq päginachö dibüjukuna]
¿Imanötaq judïokuna reqiyanman karqan Diospa Akrashqanta?
[22 kaq päginachö dibüju]
¿Nunakunawan parlarnin, Diospa Akrashqan rurëkanqanta yachatsikuntsikku?