Te Mesia! Ta te Atua Ravenga no te Ora
Te Mesia! Ta te Atua Ravenga no te Ora
“Mei te tangata i ope i te mate ia Adamu, e ope katoa i te akaoraia e te Mesia.”—1 KORI. 15:22.
1, 2. (a) Akapeea a Anederea raua ko Philipa i te ariu atu anga i to raua aravei anga ia Iesu? (e) Eaa tatou i karanga ai e maata atu ta tatou akapapu anga i ta te au Kerititiano o te anere mataiti mua i kite mai no runga i to Iesu taoonga ei Mesia?
“KUA kitea ia maua te Mesia,” i akakite ei a Anederea ki tona tuakana ko Petero, te irinaki tikai anga e ko Iesu o Nazareta Tei Akatainuia e te Atua. Kua akakeuia a Philipa e kua aere atu i te kimi i tona oa ko Natanaela, e kua akakite atu kiaia e: “Kua kitea e matou ta Mose i tata ki roto i te ture ra, e ta te au peroveta ra, ko Iesu i Nazareta, e tamaiti na Iosepha.”—Ioa. 1:40, 41, 45.
2 Papu ainei ia koe e ko Iesu te Mesia taputouia, te ‘Tumu Ora’ a Iehova? (Ebe. 2:10) I teia tuatau, maata atu ta tatou akapapu anga no runga i tona taoonga Mesia te kare i rauka ana i tana au pipi o te anere mataiti mua. Mei to Iesu anau anga ki tona akatuakaouanga, te oronga maira te Tuatua a te Atua i te akapapu anga openga e koia te Karaiti. (E tatau ia Ioane 20:30, 31.) Te akaari katoa maira te Pipiria e ka akatupu ua atu rai a Iesu i tana tuanga ei Mesia i runga i te rangi. (Ioa. 6:40; e tatau ia 1 Korinetia 15:22.) Ko taau i marama mai mei te Pipiria, ka tuatua katoa rai koe e ‘kua kiteaia e koe te Mesia’ i teia tuatau. Inara e akamanako ana na mua e akapeea taua au pipi mua ra i te manako papu anga e kua kitea e ratou te Mesia.
Akakite Marieia Mai te “Tuatua Ngaro” o te Mesia
3, 4. (a) Akapeea te au pipi o te anere mataiti mua ‘i kite ei i te Mesia’? (e) Eaa koe ka karanga ai e na Iesu anake ua i akatupu i te totou katoatoa o te Mesia?
3 Akapeea i papu ei i te au pipi a Iesu i te anere mataiti mua e koia te Mesia? Na roto i te au peroveta, kua akakite marie mai a Iehova i te au akairo te akataka maira i te aerenga mai o te Mesia. Kua akaaite tetai tangata kite Pipiria i teia mataara ki te akanoonoo anga i tetai tiki tei maaniia ki te au potopotonga toka kanapanapa. Akamanako ana i te au tangata kare i komunikeiti ana ki tetai e tetai e kua apai tataki tai mai i tetai potonga toka kanapanapa ki roto i tetai pia. Me kapitipitiia taua au potopotonga ra i te maani i tetai tiki tano meitaki, ka manako tau koe e e tangata tetai e akaaere ra i te reira, tei toro i te au parani taka meitaki e tei tuku atu ki te tangata tataki tai tana tuanga. Mei te au potopotonga tataki tai rai o te tiki, kua oronga mai te au totou ravarai o te Mesia i tetai akakiteanga puapinga no runga i te Mesia.
4 Eaa i reira i manakoia ai e e mea tupu ua mai te totou katoatoa no runga i te Mesia i roto i te tangata okotai? Kua karanga tetai tangata kimikimi e kare i papu tikai e ka rauka i tetai tangata i te akatupu i te au totou katoatoa o te Mesia ma te poitirere ua, ka riro ei mea “maata roa” no reira eiaa e akamanako atu i te reira. “Na Iesu—e na Iesu anake ua i roto i te tuatua enua katoa—i akatupu i te reira.”
5, 6. (a) Akapeea me akautungaia te akavaanga ki runga ia Satani? (e) Akapeea te Atua i te akaari marie mai anga i te papaanga no te “uanga” tei taputouia?
5 Te akakoroanga maata o te au totou o te Mesia, e “tuatua ngaro” te reira ma te au tuanga tukeke puapinga maata o te ao e pini ua ake. (Kolo. 1:26, 27; Gene. 3:15) Kapiti mai ki taua tuatua ngaro ra ko te akavaanga ia Satani te Tiaporo, “taua ovi taito ra,” tei tuku atu i te au tangata ravarai ki roto i te ara e te mate. (Apo. 12:9) Akapeea taua akavaanga ra i te akatupuia anga? Kua totou a Iehova e ko te “uanga” tei anauia mai e te “vaine” ka akaparuparu i te mimiti o Satani. Ko te “uanga” tei totouia mai ka akaparuparu i te mimiti o te ovi, ka takore atu i tei akatupu i te meameaau, te maki, e te mate. Inara, ma ta te Atua akatikaanga, ka akaparuparu a Satani na mua i te pooavae akatutu ua o te “uanga” a te vaine.
6 Kua akaari marie mai a Iehova e koai te “uanga” taputouia. Kua taputou te Atua kia Aberahama e: ‘Na roto i toou ra uanga e akameitaki ei te pa enua katoa o te enua nei ia ratou uaorai.’ (Gene. 22:18, NW) Kua totou a Mose e ka riro teia Uanga ko “tetai peroveta” tei maata atu ia Mose. (Deu. 18:18, 19) Kua akapapuia kia Davida, e ki te au peroveta i muri mai e ka na roto mai te Mesia i tona uanga e ka noo aia ki runga i te terono o Davida e tuatau ua atu.—2 Samu. 7:12, 16; Iere. 23:5, 6.
Au Akapapu Anga ko Iesu te Mesia
7. I teea tu i na roto mai ei a Iesu i te “vaine” a te Atua?
7 Kua tono mai te Atua i tana Tamaiti, tana i anga mua, mei roto mai i Tana akaaerenga akatutuia mei te vaine rai o te au mea ora pae vaerua i te rangi, kia riro e ko te “uanga” taputouia. Te anoanoia ra e kia ‘tuku ke atu te Tamaiti anau tai a te Atua i tona uaorai’ oraanga i runga i te rangi e kia anauia mai ei tangata apa kore. (Phili. 2:5-7; Ioa. 1:14) I to Maria ‘tamaruia anga’ e te vaerua tapu te akapapu maira e ko tei anauia mai ka ‘tuatuaia e tamaiti tapu, e Tamaiti na te Atua.’—Luka 1:35.
8. Akapeea a Iesu i te akatupu anga i te totouanga Mesia te oronga anga aia iaia uaorai kia papetitoia ki roto i te vai?
8 Te akakite maira te au totouanga Mesia e kiea e aea a Iesu e mama mai ei. Mei tei totouia kua anauia a Iesu i Betelehema. (Mika 5:2) I te anere mataiti mua, maata te tapapa anga a te ngati Iuda. Te tapapa anga no te mama mai anga o te Mesia, kua ui tetai pae kia Ioane Papetito e: “Ko te Mesia aina aia me kare aina?” Inara kua pau atu a Ioane e: “Te aere mai na ra tetai, e mana maata tona i toku.” (Luka 3:15, 16) Na te aere anga kia Ioane i te tuatau pururu anga rau i te mataiti 29 T.N., kia papetitoia i te 30 mataiti, kua oronga a Iesu iaia uaorai ei Mesia i te tuatau tau tikai. (Dani. 9:25) Kua akamata aia i tana angaanga orometua puapinga tikai, te tuatua anga e: “Kua akatupuia te tuatau i akatakaia, e kua vaitata mai te patireia o te Atua.”—Mare. 1:14, 15, NW.
9. Noatu kare ratou i marama tikai i te au apiianga, eaa te irinaki anga papu tei rauka i te au pipi a Iesu?
9 Inara, te anoanoia ra kia akatikatikaia te au tapapa anga a te au tangata. Kua akangateitei tauia a Iesu ei Ariki, inara kare te au tangata o te reira tuatau i marama tikai ana e ko tana tutaraanga, no te tuatau ki mua e tei runga i te rangi. (Ioa. 12:12-16; 16:12, 13; Anga. 2:32-36) Noatu ra, te ui anga a Iesu e, “Koai ra au nei i ta kotou na tuatua anga?” Kua pau rapurapu atu a Petero e: “Ko te Mesia koe, ko te Tamaiti a te Atua ora.” (Mata. 16:13-16) Ko tera rai ta Petero i pau te akaruke anga te manganui, no te akaturoriia anga e tetai apiianga.—E tatau ia Ioane 6:68, 69.
Akarongo Anga ki te Mesia
10. Eaa a Iehova i akakite mai ei e e akarongo ki tana Tamaiti?
10 E peretana vaerua ririnui te Tamaiti anau tai a te Atua i runga i te rangi. I te enua nei, e komono a Iesu no te Metua. (Ioa. 16:27, 28) Kua tuatua aia e: “Kare taku uaorai i taku e apii nei, nana ra, na tei tono mai iaku nei.” (Ioa. 7:16) Te akapapu anga i to Iesu taoonga Mesia i te tuatau akatuke anga, kua akaue a Iehova e: “Akarongo iaia.” (Luka 9:35) Ae, e akarongo ki teia tangata Tei Ikiia. Te anoanoia ra te akarongo e te au angaanga meitaki—puapinga tikai teia nga mea roa ai i te akamareka anga i te Atua e kia rauka mai te ora mutu kore.—Ioa. 3:16, 35, 36.
11, 12. (a) Eaa te tumu i kopae ei te au ngati Iuda o te anere mataiti mua ia Iesu ei Mesia? (e) Koai ma tei tuku i te akarongo ki roto ia Iesu?
11 Noatu e maata te akapapuanga te akakite maira e koia te Mesia, e maata te au ngati Iuda i te anere mataiti mua tei kopae iaia. No teaa ra? No te mea e manako ke to ratou no runga i te Mesia, kapiti mai e ka riro aia ei arataki te ka akarangatira ia ratou mei te takinokino anga a Roma. (E tatau ia Ioane 12:34.) No reira, kare ratou i ariki i te Mesia tei akatupu i te au totou te karanga ra e ka akavaavaaia aia, ka kopaeia e te tangata, e tangata aue, e ka matau oki i te tumatetenga, e i te openga iora ka tamateia. (Isa. 53:3, 5) Kua maromaroa katoa rai tetai au pipi tiratiratu a Iesu e kare aia i rave ana i tetai akaoraanga ei arataki. Inara kua vai tiratiratu ua ratou, e kare i roa ana, kua orongaia mai te marama tika tikai kia ratou.—Luka 24:21.
12 Tetai tumu i kopae ei te tangata ia Iesu e ko te Mesia tei taputouia, no tana au apiianga, tei ngata i te manganui i te ariki. Te tomo anga ki roto i te Patireia ka umuumuia kia ‘akaruke tetai iaia uaorai,’ ‘te kai anga’ i te kiko e te toto o Iesu, te ‘anau akaou anga,’ e ‘kare no teianei ao.’ (Mare. 8:34; Ioa. 3:3; 6:53; 17:14, 16) Kua manako te aronga akaparau, apinga nui e te pikikaa i teia au umuumuanga ei mea ngata tikai i te aru. Inara, kua ariki te au ngati Iuda akaaka ia Iesu ei Mesia, mei ta tetai au tangata Samaria i tuatua e: ‘Ko teia tangata te ora mou o te ao.’—Ioa. 4:25, 26, 41, 42; 7:31.
13. Akapeea a Iesu i te kite anga i te mamae pooavae akatutuia?
13 Kua totou a Iesu e ka akaapaia aia e te kau taunga maata e ka patitiia e te au Kenitara, inara te toru o te ra, ka tu akaou mai aia. (Mata. 20:17-19) No tana akapapu anga i mua i te Tuneteri e koia “te Mesia, te Tamaiti a te Atua” kua akaapaia aia no te akakino Atua. (Mata. 26:63-66) Kua kite mai a Pilato e ‘kare aia e tau kia mate,’ inara no te akaapa anga katoa a te ngati Iuda no tana kaitamaki, “kua tuku maira ra [a Pilato] ia Iesu i ta ratou i anoano ra.” (Luka 23:13-15, 25) No reira kua “akaruke” ratou e kua kimi i tetai ravenga i te tamate i “te Tumu o te ora,” noatu e maata te akapapu anga e na te Atua i tono mai iaia. (Anga. 3:13-15) Mei tei totouia mai kua ‘tipu keia’ te Mesia, e kua patitiia ki runga i te rakau i te Ra Pasa o te mataiti 33 T.N. (Dani. 9:26, 27; Anga. 2:22, 23) No teia mate kino tikai, kua tamamaeia tona “pooavae” mei tei totouia mai i roto ia Genese 3:15.
Te Tumu i Mate ei te Mesia
14, 15. (a) Eaa nga tumu i akatika ai a Iehova kia mate a Iesu? (e) Eaa ta Iesu i rave i muri ake i tona akatuakaouia mai anga?
14 E rua nga tumu puapinga i akatika ai a Iehova kia mate a Iesu. Te mea mua, kua akapapu mai te mate akarongo mou o Iesu i tetai tuanga puapinga no te “tuatua ngaro.” Kua akapapu tikai mai aia e ka rauka i tetai tangata apa kore i te akono tamou i te “akarongo” e te turu anga i te turanga ngateitei o te Atua noatu ta Satani au timataanga pakari. (1 Timo. 3:16) Te rua, mei ta Iesu i tuatua e, ‘kua aere mai te Tamaiti a te tangata i te oronga i tona ora ei oko no te tangata e manganui.’ (Mata. 20:28) Kua tutaki teia “oko arite” i te utunga o te ara tei akatuangaia mai ki ta Adamu uanga, e kua rauka i te oronga mai i te ora mutu kore ki te katoatoa tei ariki ia Iesu e ko te ravenga ia a te Atua no te ora.—1 Timo. 2:5, 6, NW.
15 E toru ra i muri ake i roto i te vaarua, kua akatuia mai te Karaiti, e e 40 ra kua mama mai aia ki mua i tana au pipi, te akapapu anga e kua ora aia e kua oronga atu i tetai au ikuikuanga kia ratou. (Anga. 1:3-5) E oti kua oki atu aia ki te rangi i te oronga anga kia Iehova i te puapinga o tona atinga e te tiaki anga i te tuatau i akatakaia me akamata mai tona parutia ei Ariki Mesia. I taua taime rai, maata atu tana ka rave.
Akaoti Anga i Tana Tuanga ei Mesia
16, 17. Akakite mai i ta Iesu tuanga ei Mesia i muri ake i tona oki atu anga ki runga i te rangi.
16 I te au anere mataiti mei tona akatuakaouia mai anga, te akaaere akarongo mou ra a Iesu i te au angaanga a te putuputuanga Kerititiano tana e akaaere ra ei Ariki. (Kolo. 1:13) Te tuatau i akatakaia, ka akamata aia i te taangaanga i tona mana ei Ariki no te Patireia o te Atua. Kua akapapu mai te au totou Pipiria e te au tupuanga o teianei ao e kua akamata aia i tona parutia ei Ariki i te mataiti 1914, mei “te akaopengaanga o te akatereanga o te au mea nei.” (Mata. 24:3, NW; Apo. 11:15) I muri poto ua ake i te reira, kua arataki aia i te au angera tapu i te uri mai ia Satani e tana au temoni mei runga mai i te rangi.—Apo. 12:7-10.
17 Te angaanga tutuanga e te apiianga ta Iesu i akamata i te mataiti 29 T.N., te vaitata atu nei ki te openga. Kare e roa atu ka akava aia i te aronga ravarai e ora nei. Ka akakite aia i reira ki te aronga mei te mamoe rai te tu tei ariki iaia ei ravenga na Iehova no te ora kia “noo ki te basileia i akonoia no [ratou] mei te maani anga mairai i te enua nei.” (Mata. 25:31-34, 41) Ka takoreia te aronga tei patoi ia Iesu ei Ariki, me arataki aia i te pupu vaeau i te rangi i te takore anga i te au kino ravarai. Ka tapeka i reira a Iesu ia Satani e ka uri atu iaia e tana au temoni ki roto i “te vaarua takere kore.”—Apo. 19:11-14; 20:1-3.
18, 19. Eaa ta Iesu i rave i te akatupu anga i tana tuanga ei Mesia, te oronga mai anga i teaa no te au tangata akarongo?
18 I te tuatau o tona Tutaraanga Tauatini Mataiti, ka akono pouroa a Iesu i tona taoonga katoatoa, mei te “Umere, Tumu korero, te Atua Mana, te Metua no te tuatau mutu kore, te Ariki no te au.” (Isa. 9:5, 6) Ka riro mai te au tangata ei au tangata apa kore no tana tutaraanga Patireia, kapiti mai te aronga ka akatuakaouia mai mei te mate. (Ioa. 5:26-29) Ka arataki te Mesia i te au tangata inangaro ua ki te “au pupui anga o te vai ora,” te tauturu anga i te au tangata akarongo kia rekareka i tetai pirianga au kia Iehova. (E tatau ia Apokalupo 7:16, 17.) I muri ake i te timataanga openga, pouroa te aronga meameaau, kapiti mai ia Satani e tana au temoni, ka ‘uriia ki roto i te roto ai,’ te akaparuparu anga i te mimiti o te “ovi” na te tamate takiriia anga.—Apo. 20:10.
19 E mea umere e e meitaki tikai te akatupu anga a Iesu i tana tuanga ei Mesia! Ka akakiia te enua parataito ki te au tangata akaoraia te ka noo e tuatau ua atu ki roto i te oraanga apa kore e te mataora. Ka akakore katoatoaia te akakino anga no runga i te ingoa tapu o Iehova, e ka akatika puia te tikaanga o tona turanga ngateitei i te ao e pini ua ake. E tuanga mekameka tikai te vai nei i mua i te katoatoa tei akarongo ki Tei Akatainuia e te Atua!
Kua Kitea Ainei e Koe te Mesia?
20, 21. Eaa te au tumu ka akakite ei koe ki tetai ke no runga i te Mesia?
20 Mei te mataiti 1914 mai te noo nei tatou i roto i tetai tuatau o to Karaiti pa·rou·siʹa. Noatu e kare e kiteaia tona parutia ei Ariki no te Patireia o te Atua, te kite papuia ra te reira i te akatupuia anga te au totou. (Apo. 6:2-8) Noatu ra, mei te au ngati Iuda o te anere mataiti mua, te kopae nei te maataanga o te tangata i teia tuatau i te akapapu anga no runga i te parutia o te Mesia. Te inangaro katoa ra ratou i tetai arataki me kore tetai tangata te ka rauka i te angaanga na roto i te au tangata tutara poritiki. Te kite nei ra koe e te tutara nei a Iesu ei Ariki no te Patireia o te Atua. Kare ainei koe i mataora ana i te kite i te reira? Mei te au pipi o te anere mataiti mua rai, kua akakeuia koe kia tuatua e: “Kua kitea ia maua te Mesia.”
21 I teia tuatau, me tuatua koe no runga i te tuatua mou, te akakite ra ainei koe i ta Iesu tuanga ei Mesia? Te rave anga i te reira te akamaata atura i toou ariki rekareka anga i tana i rave noou, tana e rave nei i teianei, e tana ka akatupu. Mei ia Anederea rai raua ko Philipa, kare ekoko e kua tuatua ana koe ki toou kopu tangata e te au oa no runga i te Mesia. Eaa ka kore ei e aravei maroiroi atu ia ratou e te akaari kia ratou e ko Iesu Karaiti tikai te Mesia tei taputouia mai, ta te Atua ravenga no te ora?
Ka Rauka Ainei ia Koe te Akataka?
• Akapeea te au pipi o te anere mataiti mua i te kite anga i te Mesia?
• Eaa nga tumu puapinga i mate ei a Iesu?
• Eaa ta Iesu ka rave i te akatupu anga i tana tuanga ei Mesia?
[Au Uianga Apii]
[Au Tutu i te kapi 21]
Akapeea te au tangata o te anere mataiti mua i kite ei e ko Iesu te Mesia taputouia?
[Tutu i te kapi 23]
Me tuatua koe ki tetai ke, te akakite ra ainei koe i ta Iesu tuanga ei Mesia?