Mesias mak ida neʼebé Maromak uza atu fó salvasaun
Mesias mak ida neʼebé Maromak uza atu fó salvasaun
“Nuʼudar iha Adão ema hotu mate, nuneʼe mós iha Kristu ema hotu sei hetan moris.”—1 KOR 15:22.
1, 2. (a) Saida mak André no Filipe sente kuandu sira hasoru Jesus? (b) Tanbasá mak ita bele fiar katak ita iha buat barak neʼebé hatudu katak Jesus mak Mesias duni?
TANBA André fiar duni katak Jesus husi Nazaré mak ida neʼebé Maromak kose mina atu sai Mesias, nia hatete ba nia maun Pedro: “Ami hetan ona Mesias!” Filipe mós fiar nuneʼe no nia bá fó-hatene nia belun Natanael: “Ami foin hetan ida neʼebé Moisés no profeta sira fó sai nanis, katak Jesus, José nia oan, husi Nazaré.”—Joao 1:40, 41, 45.
2 Ita rasik mós fiar duni katak Jesus mak Mesias neʼebé promete nanis ona, ida neʼebé Maromak Jeová uza nuʼudar “Ulun iha maksoin” ka lae? (Ebr 2:10) Ohin loron, liu fali tempu uluk, ita iha buat barak neʼebé hatudu katak Jesus mak Mesias duni. Maromak nia Liafuan konta buat barak kona-ba Jesus nia moris no inklui mós ninia moris-hiʼas, neʼebé hatudu katak nia mak Kristu duni. (Lee Joao 20:30, 31.) Bíblia mós hatudu katak iha lalehan Jesus sei kontinua atu halaʼo ninia serbisu nuʼudar Mesias. (Joao 6:40; lee 1 Korinto 15:22.) Husi buat neʼebé ita aprende iha Bíblia, ita mós bele dehan katak ita “hetan ona Mesias”. Maibé, ulukliu mai ita haree kona-ba saida mak halo dixípulu sira iha tempu uluk fiar katak sira hetan ona Mesias.
Maromak fó sai neineik-neineik Mesias mak sé
3, 4. (a) Oinsá mak dixípulu sira ‘hetan Mesias’? (b) Tanbasá mak ita fiar duni katak Jesus deʼit mak bele kumpre profesia hotu kona-ba Mesias?
3 Tanbasá mak Jesus nia dixípulu sira fiar katak nia mak Mesias duni? Maromak Jeová fó sai neineik-neineik liuhusi profeta sira kona-ba buat neʼebé sei hatudu sé mak Mesias. Matenek-naʼin ida kompara ida-neʼe hanesan ho monta estátua husi parte kiʼik balu. Hanoin toʼok katak ema barak neʼebé seidauk koñese malu, lori parte kiʼik sira husi estátua neʼe ba uma laran ida. Se parte sira-neʼe monta hamutuk, ida-neʼe sei sai estátua ida, neʼe halo ita hanoin katak tenke iha ema ruma mak halo planu no haruka parte kiʼik ida-idak ba ema sira-neʼe. Hanesan parte kiʼik ida-idak husi estátua neʼe, profesia ida-idak sei fó informasaun importante kona-ba Mesias.
4 Entaun, ema ida deʼit bele kumpre profesia ida-idak, ka liafuan ida-idak neʼebé fó-hatene nanis kona-ba Mesias, se Maromak la halo planu ka lae? Matenek-naʼin ida rekoñese katak profesia hotu la bele sai loos iha ema ida se la iha planu. No nia hatete: “Iha ema nia istória hatudu katak Jesus deʼit mak bele kumpre liafuan hotu neʼebé fó-hatene nanis kona-ba Mesias.”
5, 6. (a) Oinsá mak Maromak sei tesi lia ba Satanás? (b) Oinsá mak neineik-neineik Maromak fó sai kona-ba sé mak “bei-oan” neʼebé promete nanis?
5 Profesia sira kona-ba Mesias sai hanesan “planu neʼebé ema nia hanoin la bele toʼo [“segredu sagradu”, MF]”, no ida-neʼe envolve buat barak neʼebé importante tebes ba Maromak nia kriatura hotu. (Kol 1:26, 27; Gên 3:15) Planu ka segredu neʼe inklui Maromak nia tesi-lia ba Diabu Satanás, “samea uluk nian” neʼebé halo ema hotu hetan sala no mate. (Apok 12:9) Oinsá mak Maromak sei tesi lia? Maromak fó-hatene nanis katak “bei-oan” husi “feto” sei harahun Satanás nia ulun, neʼe katak “bei-oan” neʼe sei halakon ida neʼebé hamosu hahalok kontra Maromak, neʼebé mós hamosu moras no mate. Maibé, ulukliu Maromak husik Satanás atu hakanek ain-tuban husi feto nia “bei-oan”.
6 Neineik-neineik Maromak Jeová fó sai sé mak sei sai “bei-oan” neʼebé nia promete nanis. Maromak promete ba Abraão: “Liuhusi ó-nia bei-oan nasaun hotu iha rai sei hetan duni bensaun.” (Gên 22:18) Moisés mós fó-hatene nanis katak Ida neʼebé atu mai neʼe sei sai “profeta” neʼebé boot liu Moisés. (Deut 18:18, 19) Maromak mós fó-hatene ba David katak husi nia bei-oan mak Mesias sei mai no sei tuur iha David nia kadunan ba nafatin, no profeta sira mós fó sai kona-ba ida-neʼe.—2 Sam 7:12, 16; Jer 23:5, 6.
Saida mak hatudu katak Jesus mak Mesias
7. Iha dalan saida mak Jesus mai husi Maromak nia “feto” neʼebé hanesan nia feen?
7 Maromak haruka ninia Oan, ninia kriasaun primeiru, atu sai “bei-oan” neʼebé promete nanis, no neʼebé sei mai husi “feto” neʼebé hanesan Ninia feen, katak Ninia organizasaun iha lalehan neʼebé iha kriatura espíritu sira. Atubele halo ida-neʼe, Maromak nia Oan mesak tenke husik ninia moris iha lalehan atubele moris iha rai nuʼudar ema neʼebé perfeitu. (Flp 2:5-7; Joao 1:14) Espíritu santu “hamahan” Maria atu nuneʼe ida neʼebé sei moris sei bolu nuʼudar “santu” no “Maromak nia Oan”.—Lc 1:35.
8. Oinsá mak Jesus kumpre profesia kona-ba Mesias kuandu nia bá atu hetan batizmu?
8 Profesia balu kona-ba Mesias fó sai fatin no tempu neʼebé Jesus sei mosu. Jesus moris mai iha Belein hanesan fó-hatene nanis. (Miq 5:2) Foin antes Mesias mosu, ema judeu barak hein namanas Mesias atu mosu. Tan neʼe, ema balu ‘hanoin katak João Batista mak Mesias’, maibé João hatete: “Ida neʼebé makaʼas liu haʼu atu toʼo mai ona.” (Lc 3:15, 16) Jesus kumpre profesia kona-ba Mesias hodi mosu iha tempu loos, iha tinan 29. Iha tempu neʼe, Jesus tinan 30 ona, no nia bá hasoru João Batista atu hetan batizmu. (Dan 9:25) Depois neʼe, nia komesa ninia serbisu hodi dehan: “Tempu toʼo ona, Maromak nia reinu besik ona.”—Mc 1:14, 15.
9. Maski Jesus nia dixípulu sira la hatene buat hotu, sira nafatin fiar saida?
9 Maibé, ema presiza troka sira-nia hanoin kona-ba buat neʼebé Mesias sei halo. Maski ema barak hahiʼi Jesus nuʼudar liurai, maibé iha tempu neʼebá ema seidauk komprende katak ninia ukun sei iha futuru no husi lalehan. (Joao 12:12-16; 16:12, 13; Apos 2:32-36) Maski nuneʼe, kuandu Jesus husu ba ninia dixípulu sira: “Imi fali dehan haʼu sé?” Pedro hatán kedas: “Ita-Boot mak Kristu, Maromak moris nia Oan.” (Mt 16:13-16) Pedro mós hatán iha dalan neʼebé hanesan kuandu ema balu husik tiha Jesus tanba sira sidi ho hanorin ida neʼebé sira la simu.—Lee Joao 6:68, 69.
Rona ba Mesias
10. Tanbasá mak Maromak Jeová hatete katak ita tenke rona ba ninia Oan?
10 Iha lalehan, Maromak nia Oan mak kriatura espíritu ida neʼebé iha forsa boot. Iha rai, Jesus reprezenta nia Aman ‘neʼebé haruka nia mai’. (Joao 16:27, 28) Nia hatete: “Haʼu-nia doutrina laʼós haʼu-nian, maibé mai husi Ida neʼebé haruka haʼu mai.” (Joao 7:16) Kuandu Jesus nakfila an, Maromak Jeová hatudu katak Jesus mak Mesias hodi dehan: “Rona nia bá!” (Lc 9:35) Sin, ema tenke rona no halo tuir Ida neʼebé Maromak hili ona. Atu halo ida-neʼe ema presiza iha fiar no iha hahalok diʼak. Fiar no hahalok diʼak mós importante tebes atubele halo kontente Maromak no atu hetan moris rohan-laek.—Joao 3:16, 35, 36.
11, 12. (a) Tanbasá mak ema judeu iha Jesus nia tempu la simu nia nuʼudar Mesias? (b) Sé mak fiar Jesus nuʼudar Mesias?
11 Maski iha buat barak neʼebé hatudu katak Jesus mak Mesias, maibé iha tempu neʼebá, ema judeu barak liu la simu nia. Tanbasá? Tanba sira iha ideia oioin kona-ba Mesias, hanesan hanoin katak nia sei sai ukun-naʼin ida neʼebé sei halo sira livre husi Roma nia ukun neʼebé hanehan sira. (Lee Joao 12:34.) Tan neʼe, sira la simu Mesias neʼebé kumpre profesia neʼebé dehan katak ema sei hakribi nia, hadook an husi nia, katak nia sei hetan terus no hatene kona-ba moras, no ikusmai mate. (Isa 53:3, 5) Maski Jesus nia dixípulu sira balu mós sai laran-kanek tanba nia la halo sira sai livre husi Roma nia ukun, maibé sira nafatin laran-metin ba nia no neineik-neineik mak sira komprende diʼak liután.—Lc 24:21.
12 Ema la simu Jesus nuʼudar Mesias neʼebé promete nanis tanba razaun ida tan, neʼe mak ninia hanorin neʼebé susar ba sira atu simu. Jesus hanorin katak atu tama iha Maromak nia Reinu ema presiza “hakribi nia an rasik”, “han” Jesus nia isin no “hemu” nia raan, ‘moris foun’, no ‘la sai mundu neʼe nian’. (Mc 8:34; Joao 3:3; 6:53; 17:14, 16) Ema neʼebé foti-an, riku, no sira neʼebé laran-makerek hanoin katak buat sira-neʼe hotu mak susar liu atu halo tuir. Maski nuneʼe, ema judeu neʼebé haraik-an simu Jesus nuʼudar Mesias, nuneʼe mós ema samaritanu balu, neʼebé hatete: “Loos duni, nia mak mundu nia maksoin.”—Joao 4:25, 26, 41, 42; 7:31.
13. Oinsá mak Jesus hetan kanek iha ninia ain-tuban?
13 Jesus hatete nanis katak amlulik ulun sira sei duun nia no ema jentiu sei hedi nia iha ai-riin, maibé liu tiha loron tolu nia sei moris hiʼas fali. (Mt 20:17-19) Kuandu nia iha Sinédriu nia oin, nia la nega katak nia mak “Kristu, Maromak Oan”, no tan neʼe ema duun katak nia hatete aat Maromak. (Mt 26:63-66) Maski Pilatos hatete katak Jesus “la halo buat ida neʼebé soʼi mate”, maibé tanba ema judeu mós duun katak Jesus kontra Roma nia ukun, Pilatos “saran Jesus ba sira tuir sira-nia hakarak”. (Lc 23:13-15, 25) Maski iha buat barak neʼebé hatudu katak Maromak rasik mak haruka Jesus mai, maibé sira “hakribi” no buka atu oho Jesus, ida neʼebé “moris nia hun”. (Apos 3:13-15) Hanesan hatete nanis ona, Mesias “halakon” tiha, ida-neʼe akontese kuandu ema hedi nia iha ai-riin iha loron Páskua, iha tinan 33. (Dan 9:26, 27; Apos 2:22, 23) Gênesis 3:15 hatete nanis katak nia sei hetan kanek iha “ninia ain-tuban”, ida-neʼe akontese kuandu nia mate tanba ema prega nia iha ai-riin.
Tansá Mesias tenke mate?
14, 15. (a) Tanba razaun rua saida mak Maromak Jeová husik Jesus mate? (b) Saida mak Jesus halo depois nia moris hiʼas fali?
14 Maromak Jeová husik Jesus mate tanba razaun importante rua. Primeiru, hodi laran-metin toʼo mate, Jesus hatudu buat ida neʼebé importante kona-ba “mistériu [“segredu sagradu”, MF]”. Neʼe mak ema perfeitu ida bele nafatin laran-metin ba Maromak no bele apoia Maromak nia direitu atu ukun maski hetan terus makaʼas husi Satanás. (1 Tim 3:16) Segundu, hanesan Jesus hatete: “Oan-Mane mai . . . [atu] saran nia moris atu soi ema barak.” (Mt 20:28) Sakrifísiu neʼe mak selu atu halakon sala neʼebé Adão hadaʼet ba nia bei-oan sira, no ida-neʼe mós bele fó moris rohan-laek ba ema hotu neʼebé simu Jesus nuʼudar ida neʼebé Maromak uza atu fó salvasaun.—1 Tim 2:5, 6.
15 Liutiha loron tolu iha rate laran, Kristu moris hiʼas fali, no ba loron 40 nia mosu ba ninia dixípulu sira atu hatudu katak nia moris hiʼas ona no mós atu fó-hatene tan kona-ba saida mak sira presiza halo. (Apos 1:3-5) Depois neʼe, nia saʼe ba lalehan atu entrega folin husi ninia sakrifísiu ba Maromak Jeová no atu hein ba tempu neʼebé nia hahú nia ukun nuʼudar Liurai. Maibé antes tempu neʼe, nia sei iha buat barak atu halo.
Kumpre ninia serbisu nuʼudar Mesias
16, 17. Esplika toʼok Jesus nia serbisu neʼebé nia halo nuʼudar Mesias depois nia saʼe ba lalehan.
16 Husi tempu neʼebé Jesus moris hiʼas fali toʼo ohin loron, nia nafatin tau matan ba kongregasaun kristaun neʼebé nia mak ukun nuʼudar Liurai. (Kol 1:13) Maibé, iha tempu neʼebé loos nia sei hatudu nia kbiit nuʼudar Liurai ba Maromak nia Reinu. Bíblia nia profesia sira no buat neʼebé akontese iha mundu hatudu katak Jesus komesa ona ninia ukun nuʼudar Liurai iha tinan 1914, no hatudu mós katak “mundu neʼe atu hotu”. (Mt 24:3; Apok 11:15) Kuandu Jesus foin komesa nia ukun, nia hamutuk ho anju sira duni sai Satanás no ninia anju aat sira husi lalehan.—Apok 12:7-10.
17 Serbisu atu haklaken no hanorin neʼebé Jesus komesa iha tinan 29 besik ona atu ramata. Lakleur tan, nia sei tesi lia ba ema hotu neʼebé moris. Iha tempu neʼebá Jesus sei hatete ba sira neʼebé hanesan bibi-malae, no neʼebé simu nia nuʼudar ida neʼebé Maromak Jeová uza atu fó salvasaun, atu “simu nuʼudar liman-rohan reinu neʼebé hadiʼa hela ba [sira] hori mundu hahú”. (Mt 25:31-34, 41) Ema sira neʼebé la simu Jesus nuʼudar Liurai sei mate kuandu nia hamutuk ho nia anju sira sei halakon buat aat hotu. No depois neʼe, Jesus sei kesi Satanás no soe nia hamutuk ho ninia anju aat sira ba rai-kuak neʼebé kleʼan tebetebes.—Apok 19:11-14; 20:1-3.
18, 19. Buat diʼak saida deʼit mak Jesus sei halo bainhira nia kumpre ninia serbisu nuʼudar Mesias?
18 Durante Jesus nia ukun ba tinan rihun ida, nia sei moris tuir nia títulu sira hotu, hanesan “Ida neʼebé Fó Konsellu Diʼak, Maromak Kbiit Boot, Aman Rohan-Laek, Liurai-Oan Dame nian”. (Isa 9:6, 7) Iha ninia ukun nia okos ema hotu sei sai perfeitu fali, ida-neʼe inklui mós sira neʼebé sei moris hiʼas husi mate. (Joao 5:26-29) Mesias sei lori ema ba “bee-matan bee moris nian”, atu ema hotu neʼebé halo tuir bele haksolok tanba iha relasaun diʼak ho Maromak Jeová. (Lee Apokalipse 7:16, 17.) Kuandu tinan rihun ida liutiha, Maromak sei husik Satanás atu koko ema hotu ba dala ikus. Depois neʼe, sira hotu neʼebé kontra Maromak, inklui mós Satanás no nia anju aat sira, sei soe tiha “iha tasi ahi no enxofre nian”, neʼe mak atu harahun “samea” nia ulun hodi halo mate nia.—Apok 20:10.
19 Jesus kumpre duni ninia serbisu nuʼudar Mesias iha dalan neʼebé diʼak tebes! Mundu paraízu sei nakonu ho ema sira neʼebé Maromak perdua ona sira-nia sala, no sira sei moris ho haksolok no iha saúde diʼak ba nafatin. Iha tempu neʼebá, Maromak Jeová nia naran sei sai moos husi lia aat hotu hasoru nia, no sei la iha tan dúvida katak Maromak deʼit mak iha direitu atu ukun. Sin, lakleur tan ema hotu neʼebé halo tuir Maromak nia Oan sei hetan bensaun barak tebes!
Ita hetan ona Mesias?
20, 21. Saida mak book ita atu fó-hatene ema seluk kona-ba Mesias?
20 Komesa husi tinan 1914, ita moris iha tempu neʼebé Kristu ukun ona iha lalehan, ka parousia. Maski Jesus nia ukun iha Maromak nia Reinu ita la haree, maibé klaru katak liuhusi profesia sira neʼebé kumpre ona ita hatene katak Jesus ukun duni ona. (Apok 6:2-8) Maski nuneʼe, hanesan ema judeu sira iha tempu uluk, ema barak ohin loron mós lakohi rekoñese kona-ba buat barak neʼebé hatudu katak Mesias ukun ona. Sira mós hakarak ukun-naʼin ida neʼebé mai husi mundu neʼe nia polítiku-naʼin sira. Maibé, ita hatene ona katak Jesus ukun ona nuʼudar Liurai iha Maromak nia Reinu. Ita kontente tebes atu hatene kona-ba ida-neʼe, loos ka lae? Hanesan dixípulu sira iha tempu uluk, ita mós kontente atu fó sai katak: “Ami hetan ona Mesias.”
21 Ohin loron, kuandu ita fahe lia-loos ba ema seluk, ita mós koʼalia kona-ba Jesus nia serbisu nuʼudar Mesias ka lae? Halo ida-neʼe sei ajuda ita atu hafolin liután buat neʼebé nia halo ona ba ita, buat neʼebé nia halo daudauk, no buat neʼebé nia sei halo iha futuru. Hanesan André no Filipe, ita mós karik fó-hatene ona ba ita-nia família no kolega sira kona-ba Mesias. Entaun, diʼak atu koʼalia fali ho sira ho laran-manas hodi hatudu ba sira katak Jesus Kristu mak Mesias neʼebé promete nanis ona, ida neʼebé Maromak uza atu fó salvasaun.
Ita bele esplika?
• Oinsá mak dixípulu sira iha Jesus nia tempu hetan Mesias?
• Jesus mate tanba razaun importante rua saida?
• Saida tan mak Jesus sei halo atu kumpre ninia serbisu nuʼudar Mesias?
[Pergunta estudu nian]
[Dezeñu iha pájina 21]
Oinsá mak ema iha tempu uluk hatene katak Jesus mak Mesias neʼebé promete nanis ona?
[Dezeñu iha pájina 23]
Kuandu ita fahe lia-loos ba ema seluk, ita mós koʼalia kona-ba Jesus nia serbisu nuʼudar Mesias ka lae?