Pataluboon an Pagkamoot na Nungkang Nasusudya
Pataluboon an Pagkamoot na Nungkang Nasusudya
‘An pagkamoot nagtatagal kan gabos na bagay. An pagkamoot nungkang nasusudya.’—1 COR. 13:7, 8.
1. (a) Paano parateng ipinepresentar an pagkamoot? (b) Sa kiisay asin sa ano isinesentro nin dakol an saindang pagkamoot?
DAKOLON na nin ipinublikar manongod sa temang pagkamoot. An kualidad na ini haloy nang inoomaw asin ginigibong kaakit-akit paagi sa mga awit. An pagkamoot sarong pundamental na pangangaipo nin tawo. Alagad iyan parateng itinatampok sa mga libro asin pelikula paagi sa mga nobelang dapit sa pagkamoot, asin kadakol nin ipinapabakal na siring na materyales. Pero, mayo nanggad nin tunay na pagkamoot sa Dios asin sa kapwa. Naheheling niato na nangyayari na an ihinula kan Biblia manongod sa huring mga aldaw na ini. An mga tawo ‘mamomoton sa sainda man sana, mamomoton sa kuarta, mamomoton sa kasingawan imbes na mamomoton sa Dios.’—2 Tim. 3:1-5.
2. Anong patanid an itinatao kan Biblia manongod sa salang pagkamoot?
2 An mga tawo may kakayahan na magpaheling nin pagkamoot, pero an Tataramon nin Dios nagpapatanid sa sato manongod sa salang pagkamoot. Asin ilinaladawan kan Biblia an nangyayari kun an siring na pagkamoot nakakagamot sa puso nin saro. (1 Tim. 6:9, 10) Nagigirumdoman daw nindo an isinurat ni apostol Pablo manongod ki Demas? Minsan ngani sia nagin kaibaiba ni Pablo, namotan ni Demas an iinaalok kan kinaban. (2 Tim. 4:10) Pinatanidan ni apostol Juan an mga Kristiano manongod sa mismong peligrong ini. (Basahon an 1 Juan 2:15, 16.) An pagkamoot sa kinaban saka sa temporaryong mga bagay asin dalan kaiyan bakong kaoyon kan pagkamoot sa Dios asin kan mga minagikan sa saiya.
3. Anong kadepisilan an napapaatubang sa sato, na nagpapalataw nin anong mga hapot?
3 Kita bakong kabtang kan kinaban na ini, minsan ngani kita nabubuhay pa digdi. Huli kaini, depisil para sa sato na likayan an biribid na pagmansay kan kinaban dapit sa pagkamoot. Mahalagang marhay na dai niato pagtogotan an satong sadiri na mabiktima nin salang pagkamoot o biribid na pagmansay dian. Kun siring, para kiisay kita maninigong magpatalubo asin magpaheling nin may prinsipyong pakamoot? Anong mga probisyon an nakakatabang sa sato na pataluboon an pagkamoot na nagtatagal kan gabos na bagay asin nungkang nasusudya? Paano ini nagtataong pakinabang sa sato ngonyan asin nakakaapektar sa satong ngapit? Kaipuhan niato nin mga simbag basado sa punto de vista nin Dios tanganing magiyahan kita oyon dian.
Pagpatalubo nin Pagkamoot ki Jehova
4. Paano nagtatalubo an pagkamoot sa Dios?
4 An pagpatalubo puedeng mangahulogan na andamon asin tabangan an sarong bagay tanganing umoswag. Isip-isipa an sarong paraoma na nagmamaigot na andamon an daga asin itanom an banhi. Inaasahan nia na matubo an banhi. (Heb. 6:7) Kaagid kaiyan, an satong pagkamoot sa Dios maninigong tumalubo. Ano an kaipuhan tanganing mangyari ini? Dapat niatong kultibaron an marahay na daga kan satong puso, na dian itinanom an banhi nin katotoohan kan Kahadean. Magigibo niato ini paagi sa mahigos na pag-adal kan Tataramon nin Dios tanganing umoswag an satong kaaraman dapit sa saiya. (Col. 1:10) Matatabangan man kita na umoswag sa kaaraman paagi sa regular na pag-atender asin pakikikabtang sa mga pagtiripon kan kongregasyon. Bilang indibiduwal, padagos daw kitang naghihingoang marhay na magkaigwa nin mas hararom na kaaraman?—Tal. 2:1-7.
5. (a) Paano kita makakanood manongod sa pangenot na mga kualidad ni Jehova? (b) Ano an masasabi nindo manongod sa hustisya, kadonongan, asin kapangyarihan nin Dios?
5 Paagi sa saiyang Tataramon, ihinahayag ni Jehova an personalidad nia. Paagi sa pag-adal sa Kasuratan asin progresibong pagkua nin kaaraman dapit ki Jehova, mapapatalubo niato an pagpahalaga sa saiyang mga kualidad—an saiyang hustisya, kapangyarihan, kadonongan asin, orog sa gabos, an pinakanangongorog na pagkamoot. Ipinapaheling ni Jehova an hustisya sa gabos niang ginigibo asin sa saiyang sangkap na ley. (Deut. 32:4; Sal. 19:7) Puede kitang maghorophorop dapit sa gabos na linalang ni Jehova asin magkaigwa nin may pagkangirhat na paggalang sa saiyang nakakalabing kadonongan. (Sal. 104:24) An uniberso nagtatao man nin prueba na si Jehova an Burabod nin dinamikong enerhiya asin dai nauubos na kapangyarihan.—Isa. 40:26.
6. Paano ipinahayag sa sato an pagkamoot nin Dios, asin paano iyan nagkakaigwa nin epekto sa saindo?
6 Ano an masasabi manongod sa nangingibabaw na kualidad nin Dios, an saiyang pagkamoot? Iyan mahiwas an sakop asin may epekto sa sato gabos. Ipinahayag nia an pagkamoot na iyan paagi sa pagtao kan pantubos tanganing balukaton an katawohan. (Basahon an Roma 5:8.) An bilog na kinaban nin katawohan puedeng makinabang sa probisyon na ini, alagad solamenteng an mga minahiro oyon sa pagkamoot nin Dios asin nagtutubod sa saiyang Aki an makikinabang dian. (Juan 3:16, 36) An pagtao nin Dios ki Jesus bilang pampagian nin boot na atang para sa satong mga kasalan dapat na magpahiro sa sato na kamotan man an Dios.
7, 8. (a) Ano an kahagadan tanganing ikapaheling niato an pagkamoot sa Dios? (b) Sa ibong nin anong mga kamugtakan kinukuyog kan mga lingkod nin Dios an saiyang mga togon?
7 Paano niato ikakapaheling an pagkamoot sa Dios huli sa gabos na ginigibo nia para sa sato? Mahalaga an ipinasabong na simbag na: “Ini iyo an boot sabihon kan pagkamoot sa Dios, na kuyogon niato an saiyang mga togon; alagad ta an saiyang mga togon bakong nakakapagabat.” (1 Juan 5:3) Iyo, an pagkamoot ki Jehova Dios nagmomotibar sa sato na kuyogon an saiyang mga togon. Iyan an sarong dahelan kaya nagpapatotoo kita manongod sa saiyang ngaran asin Kahadean, na nagtatao nin pakinabang sa iba. An paggibo kaiyan gikan sa kapanoan kan puso sarong ebidensia na kinukuyog niato na may dalisay na motibo an mga togon nin Dios.—Mat. 12:34.
8 An satong mga tugang sa bilog na kinaban nagmamaigot na kuyogon an mga togon nin Dios sa ibong nin pagkadaing interes asin direktang pagsayuma sa mensahe kan Kahadean. Dai sinda nagpopondo sa saindang paghihingoa na lubos na otobon an saindang ministeryo. (2 Tim. 4:5) Siring man, napapahiro kita na sabihon sa iba an kaaraman dapit sa Dios saka kuyogon an gabos na iba pang pagboot nia.
Kun Taano ta Namomotan Niato an Satong Kagurangnan na Jesu-Cristo
9. Ano an tinagalan ni Cristo, asin ano an nakamotibar sa saiya?
9 Apuera sa pagkamoot sa Dios, dakol nin dahelan kun taano ta pinapatalubo niato an pagkamoot sa saiyang Aki. Minsan ngani dai niato noarin man naheling si Jesus, nag-oorog an satong pagkamoot sa saiya mantang mas dakol kitang nanonodan manongod sa saiya. (1 Ped. 1:8) Ano an nagkapira sa mga bagay na tinagalan ni Jesus? Mantang ginigibo an kabotan kan saiyang Ama, si Jesus ikinaongis na mayo nin dahelan, pinersegir, putik na inakusaran, asin tinaraman nin maraot. Sia nagtios man nin iba pang pang-iinsulto. (Basahon an Juan 15:25.) An pagkamoot ni Jesus sa saiyang langitnon na Ama nagmotibar sa saiya na tagalan an mga pagbalong iyan. Asin huling namotibar nin pagkamoot, an saiyang kagadanan bilang atang nagtao nin pantubos sa dakol.—Mat. 20:28.
10, 11. Huli sa ginibo ni Cristo para sa sato, ano an pasohan niato?
10 An ginibo ni Jesus nakakapukaw man sa sato. Mantang iniisip-isip niato an ginibo ni Cristo para sa sato, nag-oorog an satong pagkamoot sa saiya. Bilang mga parasunod nia, an maninigong magin pasohan niato iyo na pataluboon asin danay na ipaheling an arog-Cristong pagkamoot tanganing makapagpadagos kita sa pagkuyog sa saiyang togon na magpatotoo manongod sa Kahadean asin gumibo nin mga disipulo.—Mat. 28:19, 20.
11 Huli sa pagkamoot ni Cristo sa bilog na katawohan, namomotibar kitang taposon an asignasyon sa sato bago umabot an katapusan. (Basahon an 2 Corinto 5:14, 15.) An pagkamoot na ipinaheling ni Cristo mahalagang marhay sa pag-otob nia sa katuyohan nin Dios para sa katawohan. Asin an modelo na iwinalat ni Cristo tanganing sunodon niato nin estrikto nakakatabang sa lambang saro sa sato na magin kabtang kan katuyohan na iyan nin Dios. Ini nagkakaipo na mapangganang pataluboon niato an pagkamoot sa Dios sa pinakaposibleng paagi. (Mat. 22:37) Paagi sa pagkuyog sa itinokdo ni Jesus asin pag-otob sa mga togon nia, ipinapaheling niato na sia namomotan niato asin determinado kitang suportaran an soberaniya nin Dios ano man an mangyari, arog ni Jesus.—Juan 14:23, 24; 15:10.
Pagsunod sa Nakakalabing Marhay na Dalan nin Pagkamoot
12. Ano an boot sabihon ni Pablo kan pananaram na “nakakalabing marhay na dalan”?
12 Si apostol Pablo paraarog ki Cristo. Huli sa pagsunod nin estrikto sa mga lakad ni Cristo, may katalingkasan sa pagtaram na sinadol ni Pablo an saiyang mga tugang na magin paraarog sa saiya. (1 Cor. 11:1) Minsan ngani sinadol nia an mga Kristiano sa Corinto na padagos na maigot na hanapon an nagkapirang balaog kan espiritu na naheling kan enot na siglo, siring baga nin pagpaomay asin pagtaram nin laen-laen na lenguahe, ipinaheling ni Pablo na may mas marahay na bagay na dapat sunodon. Sa 1 Corinto 12:31, ipinaliwanag nia: “Alagad ta ipinaheheling ko sa saindo an nakakalabing marhay na dalan.” An konteksto sa nagsurunod na bersikulo nagpapaheling na ini an nakakalabing marhay na dalan nin pagkamoot. Sa anong paagi na iyan nakakalabing marhay? Iinilustrar ni Pablo an boot niang sabihon. (Basahon an 1 Corinto 13:1-3.) Kun sia nagkaigwa nin nagkapirang pambihirang kakayahan asin nakagibo nin darakulang bagay alagad mayo nin pagkamoot, ano an halaga nia? Mayo! Huling napahiro kan espiritu nin Dios, ikinadoon nia an importanteng puntong ini. Ini saro nanggad na mapuersang punto na ipinasabot nia sa sato!
13. (a) Ano an teksto kan taon para sa 2010? (b) Sa anong paagi an pagkamoot nungkang nasusudya?
13 Sunod, ipinaliwanag sa sato ni Pablo kun ano an pagkamoot asin kun ano an bakong kahulogan kaiyan. (Basahon an 1 Corinto 13:4-8.) Ngonyan, magtao nin panahon na siyasaton kun naootob nindo an kahagadan nin pagkamoot. Sa pangenot, magkonsentrar sa huring mga tataramon kan bersikulo 7 asin sa enot na sentence kan bersikulo 8: ‘An pagkamoot nagtatagal kan gabos na bagay. An pagkamoot nungkang nasusudya,’ na magigin satong teksto kan taon para sa 2010. Mangnohon na sa bersikulo 8, sinabi ni Pablo na hahaleon an mga balaog kan espiritu, kaiba na an paghula asin pagtaram nin laen-laen na lenguahe, na ginamit kan bago pa sana an Kristianong kongregasyon. Matatapos iyan. Alagad an pagkamoot pirmeng magdadanay. Si Jehova an pinakarepresentasyon nin pagkamoot, asin sia daing sagkod. Kaya, an pagkamoot nungkang masusudya, o matatapos. Iyan magpapadagos sagkod lamang bilang sarong kualidad kan satong daing sagkod na Dios.—1 Juan 4:8.
An Pagkamoot Nagtatagal kan Gabos na Bagay
14, 15. (a) Paano an pagkamoot makakatabang sa sato na tagalan an mga pagbalo? (b) Taano ta nagsayumang magkompromiso an sarong hoben na tugang na lalaki?
14 Ano an nakakatabang sa mga Kristiano na magtagal ano man an napapaatubang sa sainda na mga pagbalo, masakit na mga situwasyon, asin mga problema? Sa pundamental, an pagkamoot na basado sa prinsipyo. An siring na pagkamoot labi pa sa pagsakripisyo sana nin materyal na bagay. Iyan sagkod pa sa pagigin andam na papagdanayon an satong integridad asin sa pagkawara pa ngani kan satong buhay para ki Cristo. (Luc. 9:24, 25) Horophoropon an kaimbodan nin mga Saksi na nagtagal sa mga kampo de konsentrasyon, kampo nin puersahan na pagtrabaho, asin presohan durante saka pagkatapos kan Guerra Mundial II.
15 Ini malinaw na marhay na ipinaheling nin Aleman na Saksi na si Wilhelm. Imbes na magkompromiso, sia nagdanay na maimbod kan mapaatubang sa kagadanan paagi sa iskuad na parabadil nin Nazi. Sa saiyang surat nin pamamaaram sa pamilya nia, sia nagsabi: “Orog sa gabos dapat na mamotan niato an Dios, arog kan ipinagboot kan satong Poon na Jesu-Cristo. Kun kita maninindogan sa kampi nia, kita tatawan nia nin balos.” Kan huri, sa sarong artikulo sa Torrengbantayan, sarong kapamilya nia an nagsurat: “Sa panahon nin grabeng kariribokan, sinesegurado mi bilang pamilya na pirmeng enot an samong pagkamoot sa Dios.” Siring man kaiyan an saboot nin dakol na tugang na nakabilanggo ngonyan sa Armenia, Eritrea, Korea del Sur, asin iba pang nasyon. An mga tugang na ini nagdadanay na marigon sa saindang pagkamoot ki Jehova.
16. Ano an tinagalan kan mga tugang niato sa Malawi?
16 Sa dakol na lugar, nababalo sa laen-laen man na paagi an pagtubod asin pakatagal kan satong mga tugang. Sa laog nin 26 na taon, an mga Saksi ni Jehova sa Malawi nagtagal nin mga pagprohibir nin gobyerno, grabeng pagtumang, asin dakol na karatan. Tinawan sinda nin balos huli sa saindang pakatagal. Kan biglang mangyari an persekusyon, mga 18,000 an Saksi sa nasyon na iyan. Pakalihis nin 30 taon, duminakol iyan nin labing doble na nagin 38,393. Arog man kaiyan an naeeksperyensiahan sa ibang nasyon.
17. Sa ano napapaatubang an nagkapira na nasa pamilyang bakong gabos Saksi, asin taano ta nakakaya nindang tagalan an pagmaltrato?
17 An direktang pagtumang sa banwaan nin Dios sa pangkagabsan puedeng magin masakit. Mas masakit pa ngani kun naeeksperyensiahan nin indibiduwal na mga Kristiano an pagtumang kan saindang mga kapamilya. Puedeng an dahelan nin tension iyo an mga kapamilya o haraning mga paryente. Bako daw ihinula ni Jesus na mangyayari ini? Iyo, asin naeksperyensiahan nin dakol an pagigin totoo kan saiyang mga tataramon. (Mat. 10:35, 36) An mga tinedyer nagtatagal nin pagtumang kan daing pagtubod na mga magurang. An nagkapira pinalayas pa ngani sa saindang harong, alagad pinadagos sinda nin maboot na mga Saksi sa saindang harong. An iba isinikwal. Ano an nakatabang sa siring na mga tugang na tagalan an pagmaltrato? Bako sanang an pagkamoot ninda sa kasararoan nin magturugang kundi, orog sa gabos, an saindang tunay na pagkamoot ki Jehova asin sa saiyang Aki.—1 Ped. 1:22; 1 Juan 4:21.
18. Paanong an pagkamoot na nagtatagal kan gabos na bagay sarong tabang sa mga mag-agom na Kristiano?
18 Dakol pang situwasyon sa buhay an nangangaipo kan pagkamoot na nagtatagal kan gabos na bagay. Sa pag-ibanan nin mag-agom, an pagkamoot nakakatabang sa sainda na igalang an mga tataramon ni Jesus: “An pinagsaro nin Dios dai pagsuwayon nin siisay man.” (Mat. 19:6) Kun nakakaeksperyensia nin “kahorasaan sa saindang laman,” maninigong girumdomon nin mga mag-agom na Kristiano na si Jehova an pangenot na kabtang sa saindang pagigin mag-agom. (1 Cor. 7:28) An saiyang Tataramon nagsasabi na ‘an pagkamoot nagtatagal kan gabos na bagay,’ asin an mag-agom na nagpapaheling kan kualidad na ini napaparigon na mag-ibanan asin magdanay bilang mag-agom.—Col. 3:14.
19. Ano an ginibo kan mga lingkod nin Dios pagkatapos nin natural na mga kalamidad?
19 An pagkamoot nakakatabang sa sato na tagalan an gabos na bagay kun may natural na mga kalamidad. Ini an nangyari kan maglinog sa timog kan Peru asin kan raoton kan Bagyong Katrina an mga lugar kan Golpo sa timog-sirangan na Estados Unidos. Dakol sa mga tugang niato an nawaran nin harong o materyal na mga rogaring huli sa mga kalamidad na iyan. An pagkamoot nagpahiro sa pambilog na kinaban na kongregasyon na magtao nin mga ayuda, asin an mga boluntaryo nagtabang na itogdok giraray an mga harong asin hirahayon an mga Kingdom Hall. An siring na mga gibo nagpapatunay na an satong mga tugang namomoot asin nagmamakolog sa lambang saro sa gabos na panahon saka sa ano man na mga kamugtakan.—Juan 13:34, 35; 1 Ped. 2:17.
An Pagkamoot Nungkang Nasusudya
20, 21. (a) Taano ta an pagkamoot may nakakalabing halaga? (b) Taano ta determinado kamong sunodon an dalan nin pagkamoot?
20 Sa mga lingkod ni Jehova ngonyan, naheheling niato an kadonongan sa pagsunod sa nakakalabing marhay na dalan nin pagkamoot. Tunay nanggad, nakakalabi iyan sa gabos na situwasyon. Mangnohon kun paano idinoon ni apostol Pablo an katotoohan na iyan. Enot, idinoon nia na an mga balaog kan espiritu hahaleon asin na an Kristianong kongregasyon matalubo hale sa pagkaomboy kaiyan asin makakaabot sa pagkamaygurang. Dangan, sia nagkongklusyon: “Ngonyan, minsan siring, nagdadanay an pagtubod, paglaom, pagkamoot, an tolong ini; alagad an nakakalabi sa mga ini iyo an pagkamoot.”—1 Cor. 13:13.
21 Pag-abot nin panahon, magigin totoo an mga tinutubod niato, asin kun siring matatapos na an pangangaipo na magtubod dian. An paglaom sa mga panugang hinahalat niato na maotob dai na iisipon kun an gabos na bagay bago na. Alagad kumusta man an pagkamoot? Iyan nungkang masusudya, o matatapos. Iyan magdadanay. Mantang kita naghahalat sa buhay na daing katapusan, siertong maheheling asin masasabotan pa niato nin orog an mga aspekto kan pagkamoot nin Dios. Paagi sa paggibo kan kabotan nin Dios sa pagsunod sa nakakalabing marhay na dalan nin pagkamoot na nungkang nasusudya, puede kamong magdanay sagkod lamang.—1 Juan 2:17.
Ano an Isisimbag Nindo?
• Taano ta dapat kitang mag-ingat manongod sa salang pagkamoot?
• An pagkamoot nakakatabang sa sato na tagalan an ano?
• Sa anong paagi nungkang nasusudya an pagkamoot?
[Mga Hapot Para sa Pag-adal]
[Blurb sa pahina 27]
An teksto kan taon para sa 2010 iyo an: ‘An pagkamoot nagtatagal kan gabos na bagay. An pagkamoot nungkang nasusudya.’—1 Cor. 13:7, 8.
[Ritrato sa pahina 25]
An pagkamoot sa Dios nagmomotibar sa sato na magpatotoo
[Ritrato sa pahina 26]
An dai nasusudyang pagkamoot nakatabang sa satong mga tugang sa Malawi na tagalan an mga pagbalo